-----ّّّّتجمع المراجعات عن الدكتورة الفاضله ناهده العليّّّّّ------

[عيون^^زوجها]

حبيبتي miss-uk
انا عندي موعد يوم الثلاثا اذا تبين احطلج موعد نا حاضره

 

[ام يارا]

الله يسامحهاا هذا اللي اقوله

بصراحه تجربتي معاها جدا جدا فاشله اللهم بس الخياط اللي روعه


طول ما انا حامل تقولي ماعليه يا بنتي سهالات و كلش ما قالت لي اني بولد قيصريه ولا يابت طاريهاا


وقالت لي بالمراجعه قبل الاخيره ان البيبي محشور بالحوض

ولمن رحت اخر مراجعه قالت لي لا انتي دخوول الحين للمستشفى نولدج لانج متأخره والياهل مونازل بالحوض ؟؟ّ!!

و لمن دشيت المستشفى عطوني طلق صناعي

12 ساعه وانا على الطلق الصناعي و التخطيط

اخرتها يتني جان تقولي مومفتوحه الا نص سانتي و الياهل مستحيل ينزل بالحوض

لان حوضج ضيق ؟؟؟


عفيه هذا كلام ليش ما قلتي من اول عشان اعرف مو لمن صارلي 10 اشهر حاامل


والحين لازم نولدج قيصريه لان الياهل تعب من الطلق الصناعي


لاتقولون هذا االلي كتبه ربي لج ونعم بالله ادري

بس كانت تقدر تكتشف ان حوضي ضيج من اول شي مو حزتهاا

يا انها موفاهمه او متعمده اني اولد قيصريه او قالت بجرب وشطارتي

بس حسبي الله و نعم الوكيل اذا كانت متعمده و الله يسامحها اذا ما كانت قاصده


ومستحيييييييييييييييييييييييييييييييييييييييييييييل اخوذ تجربه يديده معاها بالمستقبل


اساسا العياده مالتها مومهيئه بالمره شلووون جذي ما اشوف عندها الا سونار واحد بس

وسسترتين اهم يسون كل شي حتى التنظيف عليهم امبييه لااا

 

[لازوردي]

حبيبتي حمد الله على سلامتج بس ترا بالعكس شغلها تمام مافيه شي و ترا وايد ناس حزة الولادة رحمهم مايفتح مع انه يكون ماعطينهم طلق صناعي علشان يساعد الرحم و يخليه يفتح و بعدين بالنهايه مايفتح و اتكون الولادة قيصريه و هم ترا في ناس يكون حوضهم صغير و مع الولادة سبحان الله يفتح و في ناس لا مايفتح اهي شغلها معاج زين ما استعيلت عليج بالولادة اصبرت عليج علشان تولدين طبيعي و يوم شافت انه خلاص الحوض ماراح يفتح صارت ولادتج قيصريه ... و الياهل عادي تلقينه حزت الولادة يتغير وضعه عاااادي مثال حماتي من الشهر السابع و البيبي كان بالحوض و حتى كان معاها نزيف شوي و بداية طلق قالوا لها لا اتحركين وايد و حزت الولادة الياهل ارتفع سبحان الله و يوم ادخلت المستشفى علشان تولد الطلق كان حامي بس الرحم مافتح و اصبروا عليها يوم و نص يوم فتح الرحم الياهل ارتفع و على طول حلوها العمليات و ولدوها ولاده قيصريه و كانت دكتورتها نجمه اللي بالسلام ... لا اتحطين في بالج هالأشياء ترا وقت الولاده اتصير اشياء مو متوقعه بس المهم يكون تصرف الدكتوره صح و انا اشوف تصرفها معاج صح و ترا اهي ادرس بالجامعه و اهي استشاريه و فاهمه شغلها عدل ماشالله بس هم اهي انسانه مو معصومه من الخطاء ياما دكاتره شطار و اسمهم يلمع صارت معاهم اخطاء طبيه بس اهم شي انه هالأخطاء ما اتكرر وايد و انا ما اقول انه الدكتوره ماعندها اخطاء لا عندها اخطاءها بس مو كثر الدكاتره اللي اخطاء وايد وايد و مستمرين فيها ..... و انا اشوف شغلها معاج زين الحمد الله ....


و كلامج عن العياده اهم شي انها نظيفه و اتأدي الغرض ...

انا قبل لا اروح عندها كنت اروح عند دكتوره كبيره و معروفه و شاطره و العياده حلوه و كشخه و هم الدكتوره لها اخطائها بس تشخيصها لي غلط و المصيبه انه تشخيصها لي على اساس التحاليل و يوم خذيت التحاليل و رحت عند دكاتره اثنين غيرها كلهم قالوا لي التشخيص غلط و اتفقوا على تشخيص واحد و فوق هذا مرات كانت تفحصني و مرات اتخلي السستر تفحص !!! و اذا بسألها ماتعطي مجال مستعيله الصراحه اتضيق الخلق على الأقل ناهده تعطي من وقتها حقنا تسمعنا اترد علينا رد كافي و وافي ماتخليني اطلع الا وانا مو مخليه سؤال مو سألتها عنه و اترد بكل رحابة صدر و الحاله ماتهدها على السستر ماتخلي السستر اتسوي السونار ....​

 

[Souly]

انا اراجع عند دكتوره ناهده وايد مدحوها لي وتعاملها وايد راقي

 

[الاسطورة]

امووووووووووووووووووووووووت فيها والله
توها مولدتني
ماشالله عليها لا اله الا الله
حزت الولاده ما تهد الاذكار
والسانها مايسكت من كثر قرايتها للقران

وهم ما تتاخر عليج حزت الولاده يعني مفتوحه 5 سانتي تلقينها موجوده
والله والله والله


وحدهمن رفيجاتي تحلف تقول
وحده من هالدكتورات الي اسمها يرن رن
تقول مفتوحه 8 ساني ولا شفت ويهه الدكتوره
الا حزت طلعت الراس



اما ناهدهاسمالله عليها
معاج من اول الولاده لما تخلصين

وخياطها عجيب
ونظيف يعني انا الحين لي شهرين والده
وماكو اثر حق مكان الخياط




الله يحميها انشالله
والله يرزقها اكثر واكثر


وعلى فكره الدكتوره الوحيد
الي قلبها من على الفلوس
وكلش كلش مو ماديه

 

[انوار الكندري]

خواتي بغيت اسألكم اذا مسوين عندها سونار رباعي والا لأ؟

 

[الحلوه الأموره]

السلام عليكم ،،

بنات انا مفكرة اروح اراجع عندها ... بس حابه اعرف جم اسعارها

يعني المراجعات ... والسونار ... والولادة

وهل تسوي سونار كل مراجعه؟

 

[ام زين العابدين]

حبيبتي فتح املف 15 والسونار 15 وطبعا كل مراجعه اتسوي سونار لانه اساسا اول الاشهر لي السابع تقريبا موعدج كل شهر عندها يعني كل شهر اتسوي سونار والصراحه سونارها يهبل

 

[love love]

انا جربتها ببجري وحمدالله وايد زينه

وهالحمال متردده يا عندها او عند ليلى اثنيييناتهم يهبلوووووووووووب

 

[love love]

حبيبتي miss-uk
انا عندي موعد يوم الثلاثا اذا تبين احطلج موعد نا حاضره

والله انا ابي موعد عندها ممكن تحطين لي؟؟

 

[ام زين العابدين]

الولاده ما عندي فكره جم

 

[ummallok]

بنات تكفى ممكن رقم عيادة الدكتورة

واسعارها بالضبط؟

يعني الدكتورة الي كنت اراجع عندها بحملي الي قبل 20 سونار و 12 استشارة يعني كل زيارة ب32 دينار واذا زادتهم تحليل بول وانتوا

بكرامة 3 دنانير المجموع 35 دينار.

وجم ولادتها ؟ والخياط بعد بجم؟

على فكرة انا كنت اراجع عندها بحملي الاول يعني من زمان والي خلاني اغيرها مواعيدها بصراحة كله متاخرة وعيادتها كله زحمة

تنطرين بالساعات آخر شي تطلع عندها ولادة؟؟؟؟!!!!

 

[ام زين العابدين]

حبيبتي رقمها 25656886 وسالي الي تبينه للسكرتيره

 

[لازوردي]

انوار الكندري

خواتي بغيت اسألكم اذا مسوين عندها سونار رباعي والا لأ؟

حبيبتي اهي ماعندها سونار رباعي سونارها العادي بس وااااضح ماشالله الرباعي اتحصلينه بالهادي و بأغلب المستشفيات و يمكن يعد اتحصلين عند بعض العيادات ...​

الحلوه الأموره

السلام عليكم ،،
بنات انا مفكرة اروح اراجع عندها ... بس حابه اعرف جم اسعارها
يعني المراجعات ... والسونار ... والولادة
وهل تسوي سونار كل مراجعه؟

حبيبتي مثل ماقالتلج الأخت ام زين العابدين فتح ملف 15 و استشاره مع سونار 15 و عب كل شهر لما اتراجعين بس تدفعين 15 اهي للاستشاره و السونار وماتدفعين اكثر ... و اذا راجعتي بنفس مرتين هم يقل السعر و على مااعتقد اتصير المراجعه و السونار 12 ....و الولاده ما اذكر بالضبط بس انا ولدتني الدكتوره بالشفا و كان سعرها نفس سعر الدكاتره اللي عندهم يعني مثلا اذا المستشفى حاط سعر معين يشمل الولاده و الغرفه و مع تكلفة الدكتور اللي عندهم مثلا انقول 600 و اذا دكتور من بره يختلف السعر يعني يزيد بس مع ناهده احسبولي السعر نفس سعر الدكاتره اللي عندهم ... ​

ummallok​

حبيبتي احسن لج اذا يتي اتحطين موعد حطي موعد مبجر يعني لا يتعدي الساعه 7 احسن لج انا دايما مواعيدي معاها مبجر ... و اهي صح عيادتها غالبا اتكون زحمه و هم مواعيدها بعديه و خصوصا التليفون دايما مشغول انا مسبب لي ازمه و ساعات اضطر اني اروح لهم اذا ماردوا علي ... و اسعار الولاده و الخياط ما اذكر بس احسن لج دقي عليهم و تأكدي ...​

 

[عيون^^زوجها]

والله انا ابي موعد عندها ممكن تحطين لي؟؟

اي حبويه اكيد انا انشاله باجرموعدي عطيني بيناتج عالخاص ومتى تبين الموعد وما يصير الاالخير

 

[*peace*]

بنات دكتورة ناهده اهيا اللي تسوي خصم لرويال حياة ولافوزيه القطان ضيعت ؟!!

 

[عيون^^زوجها]

والله ما دري ما عندي فكره اللي عندها فكرة ممكن تفيدنا

 

[غروب]

أنا توني والده عندها صارلي أسبوع،،

والله هالدكتورة وايد حبيتها، إنسانه طيبة وراقية بالتعامل وحنونه، حتى لما تتكلم وتسولف معاج جنها تعرفج من زمان مو نوعها اللي رسمية وشغل وبس، تسأل عنج وعن نفسيتج وشفيج ومافيج، ومتفهمه جداً.

بحملي الأول والثاني راجعت وولدت عندها، وبالمرتين كانت قيصرية للأسف بس ماعتقد إن اهيا السبب، بعد شي مكتوب والحمدلله رب العالمين، وبالنسبة لخياطها نظيف وايد، حتى أعرف وحده ولدت عندها قيصرية أول مره وثاني مره قيصرية عند دكتورة ثانيه، قالت لي إن المرة الأولى عند ناهده واااايد أحسن من المرة الثانية يعني حست بفرق.

لو بحمل مرة ثانية ماظن إني بغير دكتورة ناهده، وايد قالولي أغيرها عشان سالفة القيصرية، بس نفسياً مرتاحتلها ومابي غيرها، وصج حزة الولادة بالمرتين لقيتها عندي بسرعة وما تأخرت علي وكانت تهديني وعلى طول تدعي وتذكر الله وتقرا آيات تطمنج، الله يوفقها دنيا وآخرة.

 

[انوار الكندري]

مايردوووووووووون صارلي جم يوم ادق ومحد يرد

 

[نونا**]

بنات انا بالشهر ال8 تهقون تستقبلني ناهده لو اييها