بنقل ولدى اولى ابتدائى من صفه....

[hadeel111]

السلام عيكم

ودى انقل ولدى صف ثانى بنفس المدرسه هروبا من بعض المدرسات( المتوحشات )

قولولى وين اروح الاخصائيه او الاداره , وشنو اعطيهم السبب ؟ لانهم اشوفهم ما يتعاونون معاى لانى اشتكيت عليهم على سالفه الطق
http://q8yat.net/showthread.php?t=350530

فيدونى ولدى عور قلبى كل يوم يشتكى اليوم الابله ظاقته طراااااق وامس ممجعه شعره مالة العربى وهى اول سنه تدريس ومعطيته جيد مع انه يقرا كل الدروس صمممم,,غير الابلات الثانيات كل وحده عصاتها معاها ويطقون يوميا كل مكان

مااقول الا حسبنا الله ونعم الوكيل


فيدونى شلون انقله بدون ما يعاندونى الاداره انا والله عندى ظروف والمسئول استذان يحسبه بالدقيقه غير مسئولياتى الثانيه وعيالى الثانين

انا ودى انقله بالذات من ابلة العربى حيل حاطه عليه غير التدقر ...وفيه صبيان ماتجى صوبهم

:0bee2e8d89:

 

[بنت العرب]

كلمي المديرة أول والنقل عند السكرتاريه بس حنا اللحين آخر السنه خلاص ما بقى شئ

 

[أسرار الطبيعة]

لومكانك ، لو مكانك
أروح للأبله اللي مدت ايدها على ولدي
واكوفنها ، وأهزأها وأخليه عبره لمن يعتبر
شنو هالمسخره ، يعل أيدها والله الكسر
حسبي الله عليكم تكرهون العيال في الدراسه وتهزون شخصيتهم
طيري بولدك السنه القادمه للخاص ، التعليم عندنا بالانحدار
وأقل شي تسوينه تدخليهم خاص على الأقل يهتمون فيهم عاطفيا .

 

[الحراير]

حرام عليهم وروحي لمدرسته وكلميها واللحين ماينفع تنقلينه لانه مابقي شي ويعطلون

 

[+بسبوسة+]

واي..
والله جان ذابحتها وحاطه صورها بالجرايد..

مهما كان الولد ماترفع ايدها...

انصحج نقليه..من المدرسة كلها
اذا كنتي مشتكية وللحين هالوضع يعني مافي امل..
والادارة راضيه..
اما اذا الادارة ماتدري..روحي شرشحيهم
ودقي على المنطقة التعليمية..
عندنا مدرسة قالت لبنت اوششششششششششششششش
من باجر المنطقة داقين على الناظرة يستفسرون والبنت تفشلت وكرهت الدراسة!!!!

لا تسكتين..
موعشان ولدج عشان باجي اليهال والله حرام لان في يهال مايقولون لامهم ان الابله طقتني..



الله ياخذ حقه منهم

 

[hadeel111]

مشكورين حبايبى الله لايحرمنا من التواصل والتواصى بالخير ويمكن اغيبه لانه مايستفيد كثر مايتضرر وباجر

بقعد اعالج نفسيته

ولو غيبته الحين نهاية السنه والحين هو اولى فما راح يسقط...

 

[أسرار الطبيعة]

هديل حبيبتي تبينا نروح عنك للمدرسه يعني ؟!
روحي قابليها واطلبيها وواجهيها شفيك ولدك يهون عليك ؟!
الغياب اكثر من اسبوعين فصل ، وهم تقريبا ما بقى عليهم غير 3 اسابيع
لكن بقولك شي : لو ما انتصرتي لولدك بتظين طول عمرك ماكول حقك
تشجعي ووقفيها على الأقل خليها تحس أنه وراه أهل !

 

[hadeel111]

هديل حبيبتي تبينا نروح عنك للمدرسه يعني ؟!
روحي قابليها واطلبيها وواجهيها شفيك ولدك يهون عليك ؟!
الغياب اكثر من اسبوعين فصل ، وهم تقريبا ما بقى عليهم غير 3 اسابيع
لكن بقولك شي : لو ما انتصرتي لولدك بتظين طول عمرك ماكول حقك
تشجعي ووقفيها على الأقل خليها تحس أنه وراه أهل !

مشكوره للنصيحه بس انا رحت لهم وواجههتهم كلهم الاخصائيه الابلات نفسهم الوكيلات

الناظره...بعد شبقى !

واليوم تونى جايه بعد من الناظره والله هاده شغلى ومجابلتهم ...تدرين الناظره شتقولى اليوم..

تقول انا اليوم طاقه صبى ..شياطين!

بعد شتقولين...ياليت تقرين الرابط اول الموضوع عشان تعرفين الحوسه اللى انا فيها ..

ولدى هذى ثانى مدرسه له كنت مسجلته باجيال الباكستانيه ..بس عقب ماشفتهم بعيونى شلون يطقون الطلبه بالطابور جدام المدير الباكستانى طلعته.. مع انه منهجهم ممتاز


صدقينى الظاهر السالفه هذى بالجهرا عااادى ...

والله المستعان

 

[hadeel111]

والحين قاعده اكتب شكوى رسميه باوديها للمنطقه التعليميه..بذكر فيها كل التفاصيل

مشكورين حبايبى ماقصرتوا..

 

[رفرف]

اي حبيبتي كتبي شكوى رسمية ..

لا تضيعين حق ولدج

 

[حلم الطفولة]

والحين قاعده اكتب شكوى رسميه باوديها للمنطقه التعليميه..بذكر فيها كل التفاصيل

مشكورين حبايبى ماقصرتوا..

:ggdw: :ggdw: :ggdw: :ggdw: :ggdw: :ggdw:
هذا اللي كان لازم يصير من زمان ..
خواتي ,, والنعم بالأبلات والمدرسات , ولهم احترامهم أكيد , بس إذا صدر من وحده تصرف شخصي سيء أو أمور غير تربويه وتكررت فلا مجال للسكووت أبدا .. ,, كتبي التفاصيل بكل حذافيرها والله يكون بعونك.

 

[أسرار الطبيعة]

هدبل حبيبتي
نصيحتي لك شكوتك ليس للمنطقه ( الله والمنطقه )
شكوتك للوكيل المساعد لقطاع التعليم العام
ليس من حق المعلمه أن تمد أصبعها على قميص طالب أو يتعرض للسخريه فما بالك بالضرب

والله يعينكم فعلا بمدارس الحكومه ، طبعا قال شمفرعنك يا فرعون ، قال ما لقيت اللي يصدني

على أنهم صبيان عصاتهم بيدهم ، شنو قطيع غنم هم !

بس انت مبين عليك مو راعية لسان ، حاولي توصلين لموجهة اللغة العربية اللي تشرف على مدرستهم وكلميها شخصيا بالموضوع .

 

[+بسبوسة+]

بشرينا اشصار على ولدج؟؟؟

الله يعينج

 

[hadeel111]

اليوم رحت المدرسه...طبعا اول مادشيت كالعاده الابلات كل وحده عصا وتخرع بهالاطفال ..والالفاظ كل الحيوانات شغاله..المهم كلمت الاخصائيه قلت لها ابى رئيسات الاقسام

ماابى المدرسات ..استدعتهم وقلت لهم كل التفاصيل ووريتهم كتابى اللى بوديه للمنطقه ..وطلبت فيه تحويلهم للتحقيق

قلت انتو المدرسات المسئولات مباشره عنهم وحبيت يكون عندكم علم وابى تعاقبونهم اداريا وتذكرون تصرفاتهم بتقاريركم عنهم للوزاره ومسئولينهم الاعلى

وجابوا المدرسات اللى حطوا كل البلاوى فى ولدى

اهو قائد التمرد !!ومايسمع الكلام !وماطقوه بهالصوره يجذب ..

وانا عارفه ولدى !قلت لهم عندكم عصا قالوا اى بس للتخرع! ..قلت لهم ممنوع!

قلت يلا ولدى فيه كل العبر ..هم قطيتوها براسه ..وحاطينه جيد مع انه حافظ كل الكتاب العربى يقرا من اول درس لآخروه كل الكتاب وحاطينه جيد ..

مالها حق تمسك عصا وانا رايحه رايحه للوزاره لازم يتعاقبون ..قالوا خلاص راح نعامل ولدج معامله خاصه ونتطمن عليه بنفسنا كل يوم !

يعنى قاموا يهدونى يقنعونى مااروح

وانا طلبت معاقبة المدرسات وهم ابى اكمل مشوار الوزاره

بس والله يابنات كثر مااسولف عن الوضع المزرى لهالمدرسه مااوفيها حقها

قعدت ساعه انطر مع بعض الامهات عيالهم فى اولى عيالهم اشكال والوان اصابات !

غير الالفاظ ..غير الصبيان يطقون بعض ..وكل شوى داشين طالعين ووقت حصص مو فرصه

وحرام كل شوى جاينى واحد ابله ..بدق تلفون احنا طول اليوم ماعندنا ابله وماندرس ابروح البيت..بتصل على اهلى وطليت غرفة الناظره!هى وكل الاداره ريوق وشاى وقهاوى!
والله ماراح اقدر اوصف الوضع


ولدى انشاالله ادبر له مدرسه ثانيه السنه الجايه

اقول من قلبى لاحول ولا قوة الابالله ...


مشكورين خواتى على اهتمامكم وردودكم اللى فادتنى كثير وجزاكم على رب العالمين ..

:klhfl:

 

[أسرار الطبيعة]

الأم مدرسة إذا أعددتها أعددت شعباً طيب الأعراق
العشم فيكم أنتوا الأمهات وألا ربي يخلف على مدارس الحكومه
التعليم والتربية والتوجيهات والسلوك كله من البيت ، والمدرسة تخرب وتدمر
حسبنا الله ونعم الوكيل في كل مديرة مدرسة لا تقوم سلوك معلماتها ، وتلهى بالنشاطات التافهه
ولا تلقي بالاً للتعليم والتربية
حسبنا الله في كل معلمة تشوف الخطأ وتسكت عنه ، ترفع يديها عن كل شي
كلكم مسؤل وكلكم مسؤل عن رعيته
انقلي ولدك على نهايه السنه قبل لا يعطل كادر السكرتاريه ، عسى ربي يخلف عليك بمدرسة أفضل من مربيات الشحوم !

 

[بمبة المفترسة]

روحي المنطقة التعليمية ولا اشتكي بالمخفر عليهم اذا مانفع لاتسكتين عشان يتأدبون