روايه جميله .... غصة قلبي .... مكتمله ...

[LOOLY]

غصة قلبي

كنت انطر دوري في البنك كان عندي معامله انتظر رقمي يوصل وكان رقمي 26 وانا اتأمل في الرايح والراد طاحت عيني على شاب حليوه توه طالع من مكتب مدير الفرع عيني يت في عينه وصديت ولا حطيت في بالي شي يوم يي دوري قمت وقعدت يم المكتب عند الموظفه اللي بتسوي معاملتي – ماحسيت الا في الشاب الحليوه ايي ويكلمها شوي شوي واهي تهز راسها انها اتأيده .
بدت تستفسر عن معاملتي وعقب ما قلت لها شنو أبي قالت ان المعامله تاخذ وقت وخلتني أوقع على اوراق وخذت رقم مو بايلي .
المهم اني طلعت من البنك قلت ارجع البيت لان الدنيا حر وقلت مو مال اني اطلع الحين اروح اقعد في البراد احسن لي .

على فكره انا ما عرفتكم على نفسي انا اسمي فجر عمري 20 وفي آخر سنه لي في كلية العلوم الاداريه جسمي حلو و طولي حلو بعد بشرتي حنطاويه عيوني عسلي شعري كستنائي ناعم طوله لي نص ظهري . اسرتي تتكون من أمي أم جاسم الله يخليها لنا كانت تشتغل مدرسه وتقاعدت وقاعده في البيت لان البيت والعيال من اساسيات حياتها مثل ما هي تقول , و ابوي عسى الله يطول لنا بعمره يشتغل في مكان مرموق وحساس في الديره عاد اللي يشوف ابوي ما يقدر يقاوم سحره .
ينا الحين حق اخواني و اختي الوحيده عندي جاسم عمره 27 وهو صحفي مشهور ومتزوج وعنده بنت عمرها سنه واسمها روان وزوجته اسمها عاليه ربة بيت ماحب اخوي يخليها تشتغل من بعد روان.
وبعدين عندي اختي نور عمرها 25 سنة متزوجة من دبلوماسي من 6 شهور وعايشه معاه في البحرين واسم زوجها سامي .
وعندي بعدين اخوي النزغه جمال عمره 22 وخريج حديث من اكادمية سعد العبدالله يعني ضابط يديد .
وآخر العنقود انا جوري مثل ما ينادوني أهلي .

دخلت البيت الا اميمتي الغاليه قاعده بريحاتها ويمها صينية الشاي والقروضات ( المكسرات )
ام جاسم : هلا حبيبتي جوري يتي __ عسى خلصتي شغلج .
فجر : لا يمه تقولي الموظفه ان الشغله تطول شوي .
ام جاسم : على خير حبيبتي كل شي ياخذ وقته الايام هذي.
فجر : الله المستعان .. اقول يمه خالتي ام فواز شلونها ان شاء الله صارت أحسن .
ام جاسم : ان شاء الله تقول ان الضغط استقر ويمكن بيرخصونها باجر .
فجر : الله يشافيها يارب اليوم العصر بمرها ان شاء الله.
ام جاسم : حبيبتي انتي دايما صاحبة واجب .
بعد ما شربت شاي مع الوالده وسولفنا شوي أذن الظهر ، صعدت غرفتي وخذيت لي شور على السريع وصليت الظهر ونزلت أساعد أمي في المطبخ .
على السفرة متواجدين كل من أم جاسم و ابو جاسم وجمال وفجر
ابو جاسم : تسلم ايدج يا ام جاسم على الغدا العجيب
أم جاسم : عليك بالعافيه يالغالي
جمال : احم احم نحن هنا
أم جاسم : يعني شنو و أنا عند ربي صاجه اهو غالي
جمال : وانا
أبو جاسم غشيان من الضحك عليهم
أم جاسم ترد على جمال : كل من له غلاته العيال لهم غلاتهم والابو له غلاته
فجر : يا عيني على الغزل الصريح
ام جاسم : كليتوني بهدومي والغالي بس يطالعنا ويضحك .
ابو جاسم : ما عاش من يضحك عليج يالغاليه ، يالله جوري حبيبتي جهزي لنا الشاي خلينا نروح نرتاح شوي .
فجر : من عيوني يالغالي . واهي تطالع امها وتضحك
كان تحضير الشاي من اختصاصي انا دايما بعد الغدا اسوي الشاي ونقعد عند التلفزيون ونشرب الشاي ونسولف ومن عقب كل من يروح في حال سبيله . أنا استأذنت من ابوي اني بزور خالتي في المستشفى العصر طبعا اهو ما مانع لا ابوي يحب صلة الرحم وطبعا جمال لما سمع قال انه بيوديني حقها لانه بعد اهو بيزورها واتفقنا ان انا اصحيه من النوم الساعه 5 العصر .
في هالفترة خلوني أعرفكم على افراد عايلتي من بعد ما تعرفتوا على أفراد اسرتي .
راح ابتدي مع أهل أمي :
يدي عيسى وينادونه بوراشد ارمل توفت يدتي نوره قبل أربع سنوات وساكنه معاه في البيت خالتي هيا اللي اهي ام فواز ما عندها الا فواز عمره 25 سنه مهندس بترول يشتغل في شركة البترول وحيدها لان توفى زوجها واهي حامل في فواز بحادث سياره بس خالتي صج تعبت بتربية فواز وأمانتاً فواز كل من يتمناه من أخلاقه العالية ومافي فرض ما يطوفه بالمسجد .
خالي راشد أهو الكبير زوجته خاتي وفاء الكل يحبها في العايله عندهم عيسى 33 متزوج من غالية 27أخت عالية زوجة اخوي جاسم وعبدالله 29 رافض فكرة الزواج ( لين يلقى اللي تملي عينه وقلبه ) وعمر 25 انسان اكثر من روعه بعد اهو ظابط وبالأخير آخر العنقود نوره 20 سنه ومعاي بنفس الكليه __ على فكره انا ونوره صديقات قراب من بعض واكثر من الخوات . وجمال اخوي مع فواز مع عمر معروف انهم ما يفترقون عن بعض .
نكمل مع الآهل .
خالي علي ترتيبه الأخير متزوج من ميساء وعندهم عماد 22 يدرس في أمريكا طب أسنان وعبير 20 لحقت اخوها تدرس تسويق .

أهل أبوي :
عمي ناصر( الكبير) وزوجته خالتي سهام ( بحرينيه ) وعندهم بدر 38 متزوج أميره تصير بنت خاله و عندهم ناصر ومريم وعذبه وبنت عمي بدور متزوجه ولد خالتها سعود وعايشه في البحرين والله لي الحين ما رزقهم الذريه .
عمتي شيخه أم يوسف منفصله عن زوجها وعايشه في بيتها مع عيالها يوسف 33 سنه مهنس طيران و بنتها ياسمين 30 سنه دكتورة اطفال .
نبدي بأحداث قصتنا ...

الساعه 5 العصر .
تجهزت ولبست تنوره بيضه فيها قصات لي الركبه ومعاها تونز وردي فاتح عليه ورود جهة الكتف من ورا وصندل ابيض فلات وحددت عيوني بكحل اسود وحطيت كلوز وردي فاتح ورحت عند غرفة جمال .
فجر واهي تطق الباب على جمال : جمال يالله الساعه صارت 5
جمال : اوكي انا جاهز ثواني وانزل .
نزل جمال وكان لابس جينز غامج وقميص ابيض وحزام بني غامج ( على فكرة جمال وانا ما نتشابه اهو ماخذ شبه أبوي وانا نسخة امي .)
ركبنا سيارة جمال الرينج وحركنا بطريجنا حق المستشفى الأميري
وكان جمال طول الطريج يسولف لي عن المواقف اللي كانت تصير في الكليه وانا غشيانه من الضحك لأني اعرف جمال ودقاته واعرف خفة دمه .
وصلنا المستشفى ووقفنا في المواقف واتجهنا حق المدخل ووصلنا لي المصاعد وعلى حظنا تو واصل المصعد ومافي غيرنا ينطر ركبنا تو الباب يتصكر الا احد يفتح الباب ويدش وتيي عيني بعينه تتوقعون منووووو ؟!

في انتظار تعليقاتكم .... علشان اكملها _03ba:
​

 

[رفيف الورد]

الشاب اللي كان طالع من مكتب المدير اللي بالبنك

 

[LOOLY]

الشاب اللي كان طالع من مكتب المدير اللي بالبنك

يسلموو يالغاليه ....

 

[LOOLY]

الجزء الثاني

يدش علينا الشاب الحليوه اللي شفته في البنك شاف جمال سلموا على بعض وعقب عطاني نظرة ونزل عيونه اللي عرفته من كلامه مع جمال ان امه في المستشفى ياي يزورها وعرفت ان اسمه فيصل .
وصادف ان امه يم غرفة خالتي بالمستشفى . وطول ما انا امشي في الممر أحس ان في نظرة تحرق ظهري .
دخلنا غرفة خالتي وكان موجود عندها اخوي الكبير جاسم وزوجته عاليه وفواز ولد خالتي وخالي راشد وولده عيسى وغاليه سلمت عليهم وطبعا خالي حضني حيل وقام يدغدغني بلحيته مثل ما كان يسوي فيني من يوم كنت صغيره . ورحت صوب خالتي أم فواز وسلمت عليها .
فجر : ما تشوفين شر خالتي لا باس طور ان شاء الله .
خالتي أم فواز : الشر ما ييج حبيبتي.
فجر : عساج مرتاحه الحين خالتي وان شاء الله بيرخصونج باجر .
خالتي أم فواز : ان شاء الله هذا اللي قاله الدكتور ان ضغطي نزل وان شاء الله باجر الظهر ارجع بيتي .
جمال : محد رقع ضغطج خالتي إلا مجابل فواز . ويضحك .
فواز يخزه والتعب مبين بعيونه .
جمال : فواز شفيك يالغالي فيك شي .
فواز : لا يالحبيب ما فيني شي بس كنت احاتي الوالده.
فجر : فواز ليش ماتروح ترتاح وانا اقعد عند خالتي .
فواز : لا ما يحتاج فجر انا مافيني شي .
جاسم : فواز كلام جوري مضبوط تقعد مع خالتي وانت ريح شوي .
أيد الموجودين كلام جاسم وراح فواز مع جمال بعد ما ترك جمال سيارته عندي واهو يوصيني على سيارته .
قعدت يم خالتي بع ما الكل مشى وقمت أمسح على راسها واقرأ عليها قرآن وابوسها لاني احبها وايد .
أذن المغرب أستأذنتها اني بروح الاستراحة علشان اصلي وانا طالعه من عندها إلآ فيصل ( بعد ما راح اقول لكم الشاب الحليوه بعد ماعرفت اسمه ) طالع من عند امه الظاهر بيروح يصلي بعد .
فيصل : السلام عليكم بشري شلون صحة مريضتكم ؟
قمت اطالعه وانا مستغربه ورديت عليه : ان شاء الله احسن وبيرخصونها باجر . عن اذنك .
لفيت عنه ورحت الاستراحه وانا افكر في جرأته . بعد ما صليت رديت عند خالتي . بس ما صادفت احد .
لقيت عند خالتي جاراتها . قمت في واجبات الضيافه من شاي وحلويات وقهوة .
انتهت الزياره ورحت البيت . لقيت امي في البيت تنتظرني ، الا اهي محتاسه تقول لي ان ابوي بيوله ضيوف
طيران على غرفتي غيرت ملابسي وصليت العشا ورجعت حق امي قمت اجهز االعشا معاها سويت انا السلطات والحلو وطلبنا معجنات من برا وسويت سندويشات صغيره منوعه وامي سوت شوربة الدجاج بالذرة ومعكرونه وصينية بطاط بالكريمه والجبن .( على فكرة انا احب ادخل المطبخ واطقطق لي واطلع لي طبخه مني وإلا مني )
جهزنا السفرة انا وامي ، لما وصل ابوي وضيوفه جهزنا العشا على الطاوله بعد ما تعشوا اصر ابوي عليهم انهم يظلون عندنا في البيت طول فترة اقامتهم في الكويت بس مارضوا وقالواان عندهم معارف في الكويت وايد وراح يزعلون لان كل من لزم عليهم يسكنون عندهم .
بعد ما رتبت الأغراض مع امي ( امي طبعها ما تحب تترك كل شي على الخدام تحب كل شي تحت ايدها وتحب اني اصير مثلها – دايما تقول لي ان الواحده منا لزم ما تتكل اتكال كامل على الخدم لانهم مو دايمين لنا ) .
صعدت لغرفتي وخذيت شور ولبست بجامتي وشيكت على ايميلاتي في اللاب توب وأخيرا اندسيت بفراشي
فتحت عيوني الا اهي الساعه 4 قمت صليت الفجر ورجعت انام .
اليوم الخميس _ كل خميس تكون يمعة الأهل عند بيت عمتي من بعد صلاة العشا ودايما أروح قبل المغرب اصلي المغرب عندها علشان اساعدها انا مع بنتها ياسمين اذا ما كان عندها دوام .
صحيت من النوم الساعه 9 قمت غسلت ويهي واسناني وتوضيت ، قعدت في داري وقريت ما تيسر من تلاوتي اليوميه من المصحف الشريف ، بعدها نزلت الصاله ما لقيت امي سألت سيتي شغالتنا عن الوالده قالت ان امي راحت حق خالتي ام فواز .
اتصلت على موبايل امي .
ام جاسم : الوووو
فجر : السلام عليكم هلا يمه صبحج الله بالخير .
ام جاسم : هلا حبيبتي جوري عليكم السلام والرحمه الله يصبحج بالنور حبيبتي .
فجر : هلا يالغاليه ما شفتج قلت اصبح عليج واتبارك بها الصوت .
ام جاسم : ____
فجر : بشري يمه شلون خالتي ام فواز . ان شاء الله بيرخصونها .
ام جاسم : انشاء الله ييه الدكتور وطمنا عليها وكاني الم اغراضها معاها .
فجر : خلاص يما انا كاني يايتكم اساعدكم واوصلها البيت .
ام جاسم : مشكوره حبيبتي لا تعبيت نفسج فواز معانا واهو بيوصلني عقب ما نوصل خالتج البيت واتطمن عليها .فجر : على راحتج يالغاليه ، بس انا بنطرج في بيت يدي علشان استقبل خالتي .
ام جاسم : على خير جوري .
فجر : على خير يالغاليه انا استأذن ، مع السلامه .
ام جاسم : مع السلامه ، الله يعفظج يا بنيتي .
تجهزت على السريع ورحت حق بيت يدي عيسى .
وانا عند الباب انتظر الشغاله تفتح الباب .
شفت سياره تركن عند بيت يدي ، يا ترى منو كان داخل السياره ؟؟!!!!

 

[kawaka]

كمليييها حلوة

 

[LOOLY]

كمليييها حلوة

الحلوة عيونج :aha:

 

[LOOLY]

الجزء 3

كانت نوره بنت خالي بعد ما نزلت من السياره بسرعه رحت اسلم عليها وضمينا بعض حيل لاني من زمان ما شفتها كانت مسافره وامس وصلت .كانت يايه تسلم على يدي ، وما تدري باللي صار بخالتي ام فواز .
داخل بيت يدي في الصاله .

اتجهنا حق الصاله اليي كان يدي يحب يقعد فيها ( كان ديكورها كل شي قديم وقعده ارضيه وبرمه وبشتخته كل شي يذكرنا بأول )

سلمنا على يدي وبسنا راسه وايده وقعدنا يمه نسولف .
نوره : انا بروح اسلم على عمتي أم فواز .
الجد عيسى : ليش يا سمية الغاليه ( كان دايما يدي يناديها شذي علشان على اسم اليده ) ما دريتي ان خالتج بالمستشفى .
نوره : المستشفى !؟! أي مستشفى ! وشفيها ؟
ناظرني يدي كأنه يقولي كملي عني انا ما احب السيره هذي .
فجر : المسكينه ارتفع ضغطها واسدحوها بالطريج الحين يايين .
نوره : ماتشوف شر عمتي والله ما تستاهل .
اليد عيسى : الشر ما ييج ان يومين بالمستشفى بس علشان يضبطون الضغط وان شاء الله اهم شاء الله .
شوي إلا صوت عند الباب إلا خالتي وأمي وفواز وصلوا .
بعد ما استقبلنا خالتي ورتبنا اغراضها وخليناها ترتاح استأذنا انا وامي ورجعنا البيت إلا الساعه كانت وحده الظهر .
صعدت غرفتي صليت الظهر وغيرت ملابسي ونزلت اشوف امي اذا محتاجه مساعده .
تشكرت مني امي وقالت ان كل شي جاهز .
ام جاسم : كل شي جاهز يا جوري انتي ارتاحي لان اليوم خميس وانتي بتروحين حق عمتج قبل المغرب .
فجر : انا مرتبه كل شي ،، يمه .
ام جاسم : هلا حبيبتي .
فجر : شفتي فواز وايد تعبان وشكله ما كان مرتاح
ام جاسم : أي انا حسيت فيه وسألته قال انه كان يحاتي امه وايد . بعد تعرفين ماله بالدنيا احد من بعدها .
فجر : الله يعينه .
ام جاسم : انتي تعرفين ابوه الله يرحمه كان وحيد اهله وماعنده من بعد الله ثم امه إلا يده وزوجة يده .
فجر : ادري يالغاليه عسى الله يطمنه على اميمته ولا يحرمه منها .
ام جاسم : آميييييييييييين .
دخلت المطبخ وسويت كيكه اسفنجيه عاديه والعصر زينتها بالكريمع وحطيت عليها حبات فراوله فرش بحرف f على كبر الكيكه .
قريب المغرب أستأذنت من امي وخذيت الكيكه اللي سويتها ورحت حق بيت عمتي .
بيت عمتي متكون من دور واحد بس مقسوم نصين نص للصالات والنص الثاني اجنحة النوم وكل جناح متكون من غرفتين مع ماستر . ومطبخ تحضيري صغير . وصاله صغيره .وبره على امتداد البيت حديقه كبيره وشرحه معتنين فيها عدل .
عمتي صممت البيت بالطريقه هذي تقول ما ابي أحد من عيالي يطلع من عندي اذا تزوج .
دخلت بيت عمتي إلا الصاله فاضيه ( بتقولون ادخل بدون لا استأذن ) كلهم متعودين ان هذا وقت فجر وإذا تأخرت شويه أشتغلت التلفونات يتفقدوني .
رحت المطبخ وحطيت الكيكه في الثلاجه بس ما لقيت احد غير ميري شغالة عمتي سألتها عن عمتي .
فجر : ميري شلونج انتي زينه .
ميري : أي فجر انا وايد زين انتي شلونج اليوم انتي وايد حلوه .
فجر واهي تضحك : انا زينه تمام ميري وين ماما شيخه ؟
ميري : موجود داخل دار ما اهوه .
فجر : مشكوره ميري .
ميري : فجر ، اننت ليش ما يسوي زواج حق بابا يوسف .
فجر واهي مبحلقه عيونها في ويه ميري : شطاري عليج ميري .. انا مثل اخت مال يوسف ما يصير .
ميري : والله حرام انتي وايد زين و بابا يوسف بعد وايد زين .
فجر : الله يعينا ميري بتشتغل خطابه .
طلعت من المطبخ وانا اضحك على سوالف ميري الخطابه .
طلعت من المطبخ إلآ يوسف بويهي وشافني وانا أضحك واتحلطم على ميري .
يوسف : هلا فجر السلام عليكم .
فجر : هلا وعليكم السلام يوسف شلونك عساك بخير .
يوسف تمام انتي شلونج خالي بو جاسم وخالتي ام جاسم شلونهم .
فجر : تمام الحمدلله انت شلونك بش مهندس ان شاء الله كل شي تمام .
يوسف : نحمد الله على كل حال شفيج مع ميري طالعه تضحكين من عندها .
فحر وهي قامته ضحكتها : بعد ما تعرف سوالف ميري .
إلا بأذان المغرب .
تهربت من يوسف .
فجر : يوسف انا لي الخين ما شفت عمتي استأذن من رخصتك .
يوسف : اذنج معاج وانا بروح المسجد . مع السلامه .
بعد ما صليت المغرب في غرفة ياسمين ، طلعت ادور عمتي .
لقيتها تتكلم في التلفون في الصاله ويمها يوسف اللي يطالعني واهو يضحك .
قلت في قلبي اكيد ميريوووو قايله حقه شي .
يوسف : شنو هالشي الحلو شنو هالزين .
اشوفه واكلم نفسي " شنو عنده يوسف اليوم مو عادته ينغزني شذي .
عقب نا دتني عمتي وعطتني صندوق كبير مغطى من صناديق ايكيا لونه احمر وقالت لي خليه في الصاله .
ابتدو الأهل ايون .
وقمنا في واجب الضيافه قدمنا العصير ومن بعد قعدنا نشوف صورنا واحنا صغار وصور ابوي وعمي وعمتي كانت عمتي مجمعتهم في الكرتون الاحمر.
وكلنا نضحك على صورنا في صوره كان ماسكها يوسف وقعد يضحك عليها وغشيان من الضحك . عقب قام يشوفني ويضحك وعيونه تدمع من كثر ما ضحك على الصوره .
يوسف وهو يضحك : ههههههه فجر هههههه شوفي .
فجر وهي تشوف الصورة : امبي شنو هالصورة من يومك وانت مجرم .
يوسف : هههههههههههههاااااااااااي
فجر : عمتي لا تخلين يوسف يشوف الصور .
يوسف : ههههه لا انا شايفهم بس هذي تنطبق هههههه على كلام ميري ههههههه.
الصوره كانت لي وانا صغيره قاعده على الارض كان عمري 3 سنوات تقريبا ويوسف شادني من شعري وانا فاتحه حلجي حيل الظاهر كنت اصرخ .
يوسف : لا لا هذي الصوره فيها غريم حقي .
ابو جاسم : أشوف وانا خالك .
ابوي قام يضحك و يقول الظاهر عمتج قاصدتج بالصور .
عمتي : افا بو جاسم عاد ما هقيتك شذي تتبلى علي .يايلك الدور وبنضحك عليك .
كانت الصوره لي وانا بلبس المدرسه مع بدر ولد عمي وهو يبوسني . ( مو يروح بالكم بعيد كنت بلبس الروضه )
وما بين ضحكنا وسوالفنا وتعاليقنا على الصور دش علينا عمي بو بدر . قمنا كلنا نسلم عليه ونتحمد له بالسلامه لانه اليوم واصل من السفر .
بعد العطله قربت تنتهي والطيور المهاجرة بدت تعود لاوطانها .
تركنا الصور انتبهنا على عمي يسولف لنا عن رحلته وعن الاماكن اللي زارها ونعلق على الاماكن .
وصلت بالاخيرزوجة عمي أم بدر . وسلمنا عليها وقمت ومع ياسمين نتأكد ان كل شي جاهز حق العشا ( عمتي كانت عكس امي ما تقدر تستغنى عن الشغالات ) بعد ما انتهينا من العشا بدينا بالحلو والشاي والقهوه طبعا كل من علق على الكيكه وشنو هذا فجر تسلم ايدج .
يوسف : انتي وايد زين فجر . يقلد ميري .
فجر : مشكور بابا يوسف .
يغمزلي واهو يضحك . ردينا نشوف الصور ونعلق ونضحك . رن تلفوني إلا نوره المتصله فيني وكانت الساعه 11 بالليل .
فجر : الووو ( باستغراب )
نوره : السلام عليكم هلا جوري شلونج يالغاليه ؟.
فجر : عليكم السلام هلا فيج .
نوره : اقدر اكلمج بس بروحج .
فجر : اكيد – وهي تطلع من الصاله بتروح الحوش .
نوره : عندي لج خبر فرش طازه .

فجر : ____
خليكم مع البارت الياي ..

 

[LOOLY]

نوره : اليوم دقت على امي صديقتها تخطبني حق ولد اخوها .
فجر : واااااااااااااااو شنو الاخبار الحلوه صج خبر فرش .
نوره : اعطيج التفاصيل .
فجر : لا م الحين يبيلج وقت وتفرغ . ارجع البيت واكلمج وابي أعرف الموضوع من الألف الى الياء .

بعد مكالمتي مع نوره قعدت مع البقية أكمل الصور وردينا نضحك .
الحين دور يوسف اتشمت عليه .
فجر : هههههههههههههههههاي شوفتوا الاجرام
عمتي : استري على ما وجهتي يابنيتي .
فجر : الحين استر على ما واجهت ومن شوي تضحكون علي .
الصوره كانت يوسف حاطنا كلنا ويطقنا بالعصاة .
يوسف قرب مني بيشوف الصوره وانا اركض وهو يركض وراي الا بيعرف شنو الصوره وليش اضحك .
وانا احلف اقول والله ما اخليك تشوفها الا يشوفونها قبلك .
الكل قام يضحك وكل من قام يطلع فضايح يوسف وهو صغير كان وايد عدواني وكل حاط حيله باليهال .
اخر شي تعبت وعطيت الصوره حق جمال وقلت له يتصرف انا ما فيني حيل .
عاد جمال ما يقصر بهالسوالف وقعد مسك يوسف طنازه . بس بالاخير ما قدرنا نتكلم من الضحك .
تـأخرنا بالقعده عند عمتي وما طلعنا من عندها الا الساعه 2 بالليل .
في طريجنا حق البيت انا وجمال .
جمال : تدرين من شنو خالتي ام فواز كانت تعبانه ؟
فجر : لا ما ادري .
جمال : شفتي يوم قلت حقها ان مجابل فواز يرفع الضغط .
فجر : أي كنت تتغشمر .
جمال : كان بداية الموضوع غشمره . بس بعد ما طلعت معاه ضغطت عليه لان كان باين عليه ان فيه شي مضايجه .
فجر : أي .
جمال : وده يكمل دراسته .
فجر : ________
جمال : وصار نقاش حامي بينهم على الاساس ان خالتي ما تبيه يسافر ويخليها.
فجر : ليش توقف بطريجه . هذا مستقبله.
جمال : لا . تقول اخاف يصير فيني شي وانت بعيد عني . ما تحمل فراقك .
فجر : مسكينه . وحيدها وغالي عليها .الله يلوم اللي لومها .
جمال : وهذا اللي حاولت اوصله حق فواز.
فجر : قرار صعب بس الله يعينهم اثنينهم . .
وصلنا البيت . ورحت تحممت ولبست بجامتي ودزيت مسج حق نوره إذا كانت قاعدة تكلمني . بس ماردت
يعني نايمه .
شفت الساعه الا اهي قريب 3 ما يسوى انام قلت انطر صلاة الفجر بعدين انام .
شبكت وقمت اقرا قصه في المنتدى , اذن الفجر صليت وقريت سورة الكهف بعدها دخلت في سبات عميق ( علي بالعافيه ) .
عادتأً يوم الجمعه يوم يوم كسل وخمول حتى فترة اذان الظهر . وبعدها نتجهز ونزور بيت يدي عيسى .
في بيت يدي عيسى الغدا لازم الساعه 1 الظهر على السفره ، تشوفونا ندخل مع بعض تقريبا في بيت يدي .
الريايل يقعدون في صالة يدي المفضله والحريم في الصاله الثانية .
باشرنا الغدا انا وخالتي وامي ونوره . وجهزنا الغدا في الصالتين بعد ما خلصنا الغدا يدي استأذن ودخل غرفته للقيلوله وتجمعنا البقيه في الغرفه الزجاجيه في الحوش علشان نشرب الشاي .
قعدت انا ونورة على جنب نتكلم في موضوعها .
فجر : هاتي ما عندك يا نوره :
تضحك نوره : شوفي يا محفوظة السلامه في سفرتنا كانت معانا صديقة امي واخوها ومرته وعيالها وكان معاهم ولدهم الكبير خالد اللي اهو الخطيب المرتقب .
فجر : اوكي .
نوره : طول فترة السفره واحنا مع بعض في كل شي .مشاويرنا . رحلاتنا . تسوقنا . كل مع بعض بما ان احنا مسافرين مع بعض .
فجر : ___
نوره : بعد ما وصلنا بيومين اتصلت عمته تقول ان خالد له خاطر في بنتكم نوره .
فجر : وبعدين :
نوره : ابد هذا اللي صار .
فجر : يعني مافي شي مني وإلا مني .
نوره : يعني من ناحيتي .
فجر : أي .
نوره : امانتاً وبيني وبينج انا كنت معجبه فيه .
فجر : أي بدا يطلع المستخبي .
نوره : بس ما بينتله اني مهتمه علشانه واذا حسيت انه يتعمد ان ينفرد معاي اطنش وامشي مع أي احد .
فجر : يعني ما عطيتيه مجال .
نوره : اعجبج انا . ما خليته ولا سمحت له .
فجر : خوش حجي علشان لا يقول ماصدقت . وإلا قاله عمرها قل .
نوره : ابد انا ثقيله واعجبج .
فجر : يا ثقيل انت .
نوره : احم احم .
فجر : اوكي وافينا في باقي المعلومات وهي اسمه ، سنه ، وظيفته ، ؟
نوره : اسمه خالد عمره 28 مدرس بدنيه ومدرب سباحه العصر . حالتهم ميسوره عنده اخوان 2 و3 بنات اهو الوسطي بينهم بس اصغر الاولاد اخوانه متزوجين وخواته لا بعد شنو تبين ؟
فجر : لا هيك بيكفي .
نوره : الحمدلله حضرة المحقق ( وهي تضحك )
فجر : متى بيونكم .
نوره : بما ان احنا نعرفهم وشايفينهم اهلي بيسألون عنه وبعدين بتصير خطبة الرياييل رسمي .
فجر : خوش شغل يعني بيصير عندنا عرس عن قريب .
نوره نزلت راسها يعني مستحيه .
متعودين يوم الجمعه المغرب نطلع احنا الشباب مع بعض يعني انا وجمال وجاسم ومرته عاليه ويا راشد وزوجته غاليه مع عبدالله وعمر وطبعا فواز بس نوره اعتذرت تقول ان اهي مرتبطه اليوم .نروح سينما واذا مافي فيلم يعجبنا بالجدول يصير عشا .
اليوم رحنا السينما وبعد ما طلعنا من السنما قعدنا بكافيه ونسولف عن الفيلم بس طبعا الشباب يضحكون علينا علشان الفيلم كان رومانسي واحنى دموعنا ما تقصر .
رجعنا البيت ورحت انا غرفتي بعد ما خذيت لي شور وصليت العشا شيكت على ايميلاتي ونمت .
يوم السبت .نطلع مع ابوي لي الظهر او نتريق في البيت ونطلع نتغدى بره . عقب نرجع البيت وبس نباشر امورنا في البيت .
الأحد الصبح وصلني اتصال من البنك ويطلبون حضوري في اوراق محتاجه توقيعي .
رحت البنك وكلمت موظفة الاستقبال وضحت لها الموضوع قالت لي ان موضوعي حاليا عند مدير الفرع والمدير في انتظارج .
اكلم نفسي وانا رايحه المكتب اقول عشتو يا جوري طلعتي وايد مهمه .
دخلت المكتب الا فيصل موجود داخل .
فجر : السلام عليكم .
فيصل : هلا وعليكم السلام .
فجر : عفوا بغيت المدير .
فيصل : حياج تفضلي معاج مدير الفرع .
قمت ابولع بريجي طلع مدير الفرع وانا حسبالي موظف عادي .
فجر : عفوا اتصلتوا علي وقلتوا لي ان في اوراق محتاجه توقيع .
فيصل : أي نعم . بس لازم نضيفج شاي وإلا قهوة ؟
فجر : لا شكرا .
فيصل : لا ابد لازم تشربين شي .
فجر : لا شكرا ما ابي اشرب شي .
فيصل : يعني بتزعلينا .
فجر وهي تطالعه مستغربه : لا ما يحتاج زعل بس مو مشتهيه شكرا ابي اخلص شغلي وامشي .
فيصل : بشرينا عن خالتج ان شاء الله بخير .
فجر : الحمدلله ( من الذوق اني اسأل عن امه بس ما حبيت اني اطول في الموضوع لاني ما كنت مرتاحه )
فيصل : الحمدلله .
يمكن حس فيني فيصل اني مو متواصله معاه .رفع السماعه وكلم موظفه انها تييب الاوراق .
بعد ما خلصت توقيع الأوراق قال لي فيصل ان معاملتي خالصة .
تشكرت منه وطلعت وانا افكر شنو سالفته .

بعد 3 اسابع

بدينا دراسه في الجامعه ولهيت مع السحب والاضافه . وكلها اسبوع ويدش رمضان علينا في الفتره هذي اعلنوا خطبة نوره وقرروا بعد رمضان الملجه والعرس .
آخر اسبوع في رمضان يت اختي نور من البحرين قالت انها بتعيد معانا شنو كنت مشتاقه لها صار لي تقريبا 7 شهور موشايفتها وهذي اول مره تمر الفتره هذي كلها ما اشوفها ولما درت نور عن نوره قالت انها بتقعد لي بعد عرس نوره .
اليوم اول ايام العيد نتجمع في الغدا عند بيت يدي والعشا في بيت عمتي وبعدها ثاني وثالث العيد نزور الاصدقاء وباقي المعارف .
وانا اتجهز علشان اروح بيت يدي سمعت رنة المسج في تلفوني . كان مسج من رقم غريب .
" العيد عليج سعيد ومبارك عسى ايامج كلها اعياد "
استغربت المسج قلت عادي اكيد احد غلطان في الرقم .
لبست فستان اسود عليه تطريز بالفضي المطفي في الذيل والكموم صاير ضيج الى الخصر بعدين كلوش لي الركبه ولبست جوتي عزكم الله صندل فضي كعب عالي حطيت مكياج خفيف ورحت بيت يدي مع امي وابوي
جمال راح بعد صلاة العيد وقعد عندهم والتقينا كلنا في بيت يدي وتبادلنا التهاني .
ما في احداث غير السوالف عن نوره والعريس المرتقب والشباب ما قصروا يطفرونها واهي شوي بتبجي من كثر ما هي مرتبكه لان الموعد قرب باقي اسبوع وعرسها يتم .
انتهينا من بيت يدي رحت البيت تحممت ورديت تكشخت ورحت بيت عمتي على ما انتهى اليوم الا بطاريتي خنست و احتاج شحن مو اقل من 10 ساعات .
اليوم عرس نوره وبما اني اقرب وحده لها طبعا من الظهر وانا معاها في الفندق علشان تتجهز العروس خلصت العروس لبست فستانها اللي كان بلون الاوف وايت صاير ديكوتيل مخصر لي الخصر بعدين ينتفش على الخفيف مع شك خفيخ منثور وكانت رافعه شعرها بطريقه تكون في خصل مو مرتبه نازله ولابسه طرحه طويله اطرافها مشكوكه مث الفستان وكان مكياجها بسيط وراقي .
اما انا لبست فستان باذنجاني طويل مخصر على الجسم وكان الظهر عريان .
انتهينا من العرس عقب الربشه اللي كنا فيها ورجعت البيت مهدود حيلي حطيت راسي ونمت و ما حسيت بشيا من حوالي .
ورجعت للجامعه وامتحاناتي وطبعاً صرت اشوف نوره في الجامعه وطبعا الا خت في وادي ثاني كونهاعروس .
اليوم اخر امتحان لي في الكورس الاول وبعدها تبدي عطلة الربيع عندي .
المغرب يانا اتصال غير مجرى حياتي .
المتصل كانت ام فيصل .
اتصلت تخطبني انا فجر حق ولدها فيصل .( على فكره من اول يوم العيد وانا على طول توصل لي مسجات من نفس الرقم الغريب )
طبعا انا استغربت الوضع خاصه ان فيصل اكبر مني ب 14 سنه يعني عمره 34 سنه
اللي عرفته ان فيصل وحيد امه وابوه من الاولاد وعنده 5 خوات وفيصل الولد الوسطي .
بعد ما ابوي واخواني اسألوا عنه طلع الولد خوش ولد ولا غبار عليه بعد تفكير طويل وافقت .
تلفوني يرن وكان المتصل فواز .
فجر : الوو نعم
فواز : السلام عليكم شلونج فجر .
فجر : بخير الحمدلله .
فواز بتردد : فجججرر .
فجر : هلا فواز فيه شي ..................
فواز : ............
فجر : فواز ............ فيكم شي خالتي فيها شي .
فواز : لا فجر سلامتج ما فينا الا العافيه بس ..
فجر : ...........
فواز : فجر يسألج انتي فكرتي زين قبل لا توافقين على الخطبه .
فجر : أي فواز ليش انت سامع شي او تعرف شي عن المعرس .
فواز : لا ما اعرف شي عنه بس حبيت ابارك لج عسى الله يوفقج .
فجر : الله يبارك فيك اشكرك على اتصالك .
فواز : العفو .. مع السلامه .
فجر : مع السلامه .
بعد ما انتهيت من مكالمتي مع فواز استغربت اتصاله وقمت اتساأل اشفيه عقبها قلت يمكن حب يبارك بس .

 

[miss 3yara]

لايوقف لايوقف

 

[]دنيا الوله]

تكفين لاطولين علينا كملي

 

[LOOLY]

لايوقف لايوقف

ما راح نوقف ...


يسلمووو يالغاليه :klhfl:

 

[LOOLY]

تكفين لاطولين علينا كملي

يسلمووو على المرور :klhfl:

 

[LOOLY]

تم الاتفاق ان تكون الملجه خلال عطلة الربيع وبالتحديد بعد اسبوعين والعرس بعد ما انتهي من الكورس الأخير لي بالجامعه .
بالزور وافق فيصل .

ابتدينا التجهيزات حق الملجه .
ونوره فرحانه تقول انه ريلها خفيفه واسحبتني وراها .
اليوم الملجه :
لبست فستان ديكوتيل كريمي شيفون قصير لي الركبه وقصته كلوش من الصدر والظهر فيه ورده على شكل فيونكه .وتاركه شعري على طبيعته نازل على ظهري وبف خفيف من جدام وكنت ماسكه ورده وحده توليب مربوطف في شيفون نفس لون فستاني .
نزلت على زفة راشد الماجد الشيخة وانا مرتبكه ومتوتره المعازيم كانو بس اهلي واهل فيصل لان حق العرس بعزم الجميع .
بعد ما قعدت في الكوشه بساعه تقريبا وصل فيصل دخل مع ابوي وجاسم وجمال اخواني . دخل على اغنية يامعيريس بصوت القصار .
باسني على راسي وقعد يمي وانا منزله راسي مستحيه عقب بدا يقولي ما بغيتي تلينين راسج اللي خلاني ارفع له راسي
عقب ما لبسني الشبكه نزلنا حق العشا عق طلعت انا وياه .

فيصل : مبروك حبيبتي عسى الله يتمم علينا بخير .
فجر : الله يبارك فيك .
فيصل وهو يمسك ايدي ويبوسها : ما بغيتي ترضين عني ز
فجر : ليش شنو صار مني .
فيصل : لوعتيني من اول يوم شفتج فيه .
فجر تنزل راسها وهي تبتسم .
فيصل : تتبسمين الحين . طاحت ايدي وانا ادز لج مسجات .
فجر باستغراب : مسجات .
فيصل : أي من اول يوم العيد وانا ادز لج مسجات ولا في البال .
فجر : انا ما ارد عتلى الأرقام الغريبه .
فيصل خوش الحين رقمي مو غريب . شنو بتسيفينه .
فجر وهي منحرجه : فيصل
قيصل : بس
فجر : حبيبي
فيصل : اويييييييييييه جني ما سمعت عيديها .
فجر انحرجت : استحي
فيصل : افا اقولج ما سمعت .
شفت الساعه الا صارت 1
فجر : فيصل .
فيصل : لبيه يا روح فيصل.
فجر : الوقت تأخر .
فيصل : تو الناس ما شبعت منج .
فجر وهي تضحك : ليش ناوي تشبع مني .
فيصل : انتي ما ينشبع منج .
فجر : عيل الايام يايه بس انا تعبت .
فيصل : خلاص حبيبتي انا ما ابي الا راحتج .
بعد ما وصلني فيصل البيت قبل ما انزل من السياره اتفقنا انه يتصل فيني الظهر ونشوف شلون نرتب حق الليل .
لما دخلت البيت لقيته ظلمه وكانت اول مره ادش البيت بروحي وفي الوقت هذا رحت غرفتي ومسحت مكياجي وغيرت ملابسي وقعدت افكر باللي صار وبكلام فيصل شوي إلا تلفوني يرن .
فجر : الووو
فيصل : اشتقت لج .
فجر : شدعوه .
فيصل : وايد .
فجر : وينك الحين .
فيصل : عند باب بيتكم .
فجر : من صجك ما مشيت .
فيصل : لا انا انتظر نظرة من عيونج سحرتيني حبي .
فجر : فيصل .
فيصل : يا روح فيصل .
فجر : انا مومتعوده على حجي مثل هذا شوي شوي علي .
فيصل : لو تدرين بغلاتج يا حياتي .
فجر : ____
فيصل : فجوره حبيبتي شفيج ساكته .
فجر : ما فيني شي افكر في كلامك .
فيصل: وشفيه كلامي
فجر : ما فيه شي بس كل شي يديد علي .
فيصل : احبج فجوره .
فجر : __________
فيصل : فجر
فجر : نعم
فيصل : انا ضايقتج بشي .
فجر : لا ابد ليش تقول شذي .
فيصل : ساكته وما تردين علي .
فجر : شنو تبيني اقولك .
فيصل : قولي انج تحبيني وتبيني مثل ما انا ابيج .
فجر : ____
فيصل : انتي زعلانه مني
فجر : لا والله ماني زعلانه
فيصل : قولي انج تحبيني
فجر : فيصل
فيصل : ياروح فيصل .
فجر : استحي .
فيصل : انا الظاهر ثقلت عليج .
فجر : فييصل ( بدلع )
فيصل : نعم
فجر : زعلت .
فيصل : أي
فجر : لا تزعل علشاني .
فيصل : ما تراضيني إلا كلمه .
فجر : فيصل
فيصل : نعم
فجر : احبك
فيصل : ما سمعت شنو قلتي .
فجر : اذا وصلت البيت كلمني
فيصل و اهو يضحك : تواعديني تقولينها لي مره ثاني .
فجر : انت طماع .
فيصل : انا طماع بحبج .
فجر : اوعدك .
فيصل : طيران للبيت .
فجر : لا الله يعافيك شوي شوي لا تسرع انا انتظرك .
فيصل : اوكي حبي مع السلامه .
بعد ما وصل فيصل البيت كلمني وعقبها كل واحد عاش باحلامه
وكل يوم يعدي اتعلق في فيصل اكثر واحبه كان انسان رومانسي وحساس وايد كان يخاف علي من النسمه الطايره . ما في يوم يمر الا يايب لي هديه والا ورده كان دايما يقول لي خلي السواق يوديج الكليه وانا امر اخذج كان يحبني حيل ويدلعني وايد .بس كان في مشكله تواجهني وما كنت قادره اواجهه فيها ما احس اني ارتاح لما اكون في بيتهم احس ان امه ما تحبني .
كانت دايما تطالعني بنظرات غريبه ودايما كانت تتفحصني اذا رحت عندهم .وكانت شرطها ان سكنا معاهم في البيت .
بس لما اشوف فيصل شلون محتويني بحبه وحنانه مخاوفي كلها تروح .
صار ما يقعد الصبح الا على صوتي وما ينام الا على صوتي صرنا حق بعض مثل الماي والهوا
فجر : فيصل حبيبي قوم الساعه 7 تـأخرت .
فيصل : ما ابي ما شبعت من صوتج .
فجر : فيصل
فيصل : يا روح فيصل .
فجر : حبيبي تتأخر بعدين .
فيصل : يعني ما تبيني اكلمج .
فجر : خلاص وانت رايح البنك كلمني .
فيصل : وعد مو تردين تنامين .
فجر .: وعد حبي .
فيصل بطريجه حق البنك يتصل على فجر .
فجر وهي تسوي نفسها نايمه: الووو
فيصل : ننمتي ؟
فجر تضحك : وانا اقدر انام وانا ما شبعت منك .
فيصل : احبج .
فجر وانا بعد .
فيصل : شنو
فجر : بقوم اروح الجامعه .
فيصل : اها عبالي شي ثاني .
فجر : يعني شنو .
فيصل : يعني كلمتين تنشطني من الصبح .
فجر : يعني مثل كلمة أحبك يا روحي
فيصل : يا روحي شذي الواحد خذاله جرعه منشطة من الصبح .
فجر : اوكي حبي انا بروح اتجهز للجامعه وبعد المحاضره بمر على خالتي ام فواز.
فيصل : اوكي حبي.

 

[LOOLY]

بعد ما انتهبت من الجامعه وصلني السواق حق بيت خالتي ام فواز لانها كانت تعبانه ورحت اتطمن عليها .
وصلت بيت خالتي وشفت فواز عند الباب سلمت عليه رد علي بس مو بطريقته المعتاده .
قعدت عندها وطول الفتره فواز قاعد ولا يتكلم عقب سمعنا صوت يدي رحنا كلنا قعدنا عنده في مجلسه المفضل .
يدي عيسى : هلا فجر شلونج يبه .
فجر : بخير عساك بخير يدي .
يدي عيسى : إلا وينج من زمان ما شفناج مو من عادتج إلا المعرس خذاج منّا .
فجر وهي مستحيه ولا كانت منتبهه حق البركان اللي مجابلها : لا يدي ما في احد يا خذني منكم بس تعرف الدراسه و التجهيزات ما باقي شي على العرس .
يدي عيسى : وإلا ريلج شنو اسمه نسيت والله وانا ابوج قمت اغلط بينه وبين ريل نوره .
فجر : فيصل يدي .
يدي عيسى : شلونه عساه زين ومريحج .
فجر : الحمدلله يدي مرتاحه معاه .
رن تلفوني وكان فيصل المتصل وكنت حاطه الرنه اغنية بشار الشطي ( يا حبيب الدنا يا عمري يادنيا الحب ياحب الكون )
فجر : الووو
فيصل : هلا حبي اقدر ادش حق يدي .
فجر : حياك حبيبي .
ما حسيت إلا فواز يهب من جدامي واقف بيطلع لما سمع الرنه بس من سمعني اقول حق فيصل حياك حبيبي تجمد في مكانه.
دخل فيصل عند يدي عيسى وسلم عليه وسلم على فواز اللي ما كان بطبيعته كنه انسان ثاني غير فواز اللي نعرفه .
فيصل وهو يبوس يدي على راسه : هلا والله يدي شلونك بشر عنك .
يدي عيسى : هلا فيك والله يال نسيب . وين ما شفناك من زمان .
فيصل : والله لهتنا الدنيا يدي . بس ما يصير خاطرك إلا طيب الجمعه ان شاء الله غدانا عندكم .
يدي عيسى : حياك الله يبه البيت بيتك انت عزيز وغالي .
فيصل : الله يعز شانك . فواز شلونك وشلون الشغل معاك .
فواز : بخير عن اذنكم .
يدي عيسى : وين يالغالي .
فواز : مشغول شوي مع السلامه .
الجميع : مع السلامه .
وتمينا مع يدي شوي نسولف وفيصل مستانس على سوالفه .
لزمم علينا يدي نقعد علشان نتغدى بس فيصل تعذر منه وقال ان اليوم مرتبطين واكد له ان الجمعه غدانا عند بيت يدي .
طلعنا وفي طريجنا حق المطعم .
فيصل : حبيبتي يدي القعده معاه ما تنمل شرايج نخلي اليوم الجمعه الغدا في بيت يدج على طول .
فجر : اللي يريحك انا ما عندي مانع .
فيصل : بسألج إلا فواز شفيه ؟ انطوائي بطبعه .؟
فجر : لا حرام فواز حبيب وعشري بس اكيد في شي مضايجه وشاغل تفكيره لان مو هذي طبيعته .
فيصل : اها إلا اهو حبيب ( وهو يطالعني بنص عين )
فجر : بدينا نغار :
فيصل : اغار من الهوا اللي تتنفسينه .
فجر : يعني تبيني تموت . واوي نفسي زعلانه .
فيصل : اسم الله عليج ان شاء الله يومي قبل يومج .
فجر : اسم الله عليك لا تقول شذي . وحبيت اغير الموضوع . أي فواز حبيب وانا اضحك .
فيصل : انا بكنسل الغدا وبروح البيت وانتي خلي فواز ينفعج .
فجر : وتهون عليك فجوره حبيبتك تظل يوعانه لي الحين .
فيصل : لا والله ما يهون علي اقطع من لحمي واغديج .
فجر : تسلم لي يا حبيبي وامسك ايده وابوسها .
فيصل : لا فواز ولا اهل فواز بيغيروني عليج يالغاليه .
وصلنا ودخلنا المطعم .
اليوم آخر يوم بامتحاناتي وبعدها اتخرج و بعد يومين عرسي .
اتفقنا نقضي شهر العسل بايطاليا وعقبها بنطلع كروز في اوربا .
انا وفيصل كنا نخطط نقضي شهر عسل رومانسي .
وكانوا اصدقاء فيصل مسوين له حفلة وداع للعزوبيه قبل العرس بيوم ومسوينها في مزرعة في كبد بس قبل لا يروح حق الحفله مرني البيت وقعدت معاه في في الصاله كنت مسويه له عصير وانتظره يمرني .
كان يسولف معاي واهو يضحك وفرحان ان اخيرا ما بقى وقت واصير عنده في بيته .
فيصل : حبي احس ان قلبي بيوقف من الوناسه .
فجر : اسم الله عليك .
فيصل : احس اني مالك الدنيا وانتي معاي .
فجر : الدنيا بكبرها .
فيصل : انا فرحان لان خلاص كلها اليوم وبس راح تكونين عندي اصحى وانام وانتي بقربي انام على انفاسج واصحى على انفاسج .
فجر : من قدي انا بالكلام الحلو هذا .
فيصل : بقلبي لج اكثر من الكلام .
فجر . _____
فيصل : انا بمشي الحين حبيبتي تآمريني على شي يالغاليه .
فجر : ما يآمر عليك عدو ولا ظالم حبيبي .
فيصل : ما ودي امشي .
فجر : ولا انا .
فيصل : اوكي حبي بس ابي شي منج يصبرني لي باجر .
فجر : آمرني حبيبي .
فيصل واهو يأشر لي على خده .
فجر : فيصل .
فيصل : تبيني اطلع وان زعلان .
فجر : لأ
فيصل : اوكي يالله عطيني شي يصبرني .
فجر وهي تبوس فيصل على خده بسرعه .: خلصنا ؟
فيصل : لا ما خلصنا .
فجر : فيصل الله يخليك لا تحرجني .
فيصل : بخليج براحتج بس باجر ما راح تقولين لي لأ .
فجر تنزل راسها مستحيه .
فيصل : اوكي حبي انا ماشي تآمريني على شي .
فجر : سلامتك حبيبي بس اول ما توصل طمني عليك حتى لو بمسج .
فيصل : اوكي حبيبتي انتي تآمرين أمر .
فجر : فيصل . التفت علي ركضت عنده وحضنته بقوة . استغرب فيصل تصرفي وانا بعد استغربت تصرفي بس ياني احساس اني اسوي شذي وقلت له احبك حيل .
فيصل : وانا بعد اموت فيج . وحضني وباسني على راسي حيل .
بس حسيته شلع نفسه مني غصب وقال لي اننا لازم امشي الحين .
فجر : الله معاك ودير بالك في الدرب .
فيصل : مع السلامه حبي .
فجر بصوت واطي مع السلامه حبيبي الله يحفظك .
بعد ما طلع فيصل حاولت اني اشغل نفسي .
جهزت اغراضي اللي بآخذهم للفندق واغراضي اللي حق السفر كانت طيارتنا بنفس الليله الفجر .
بعد ما وصل فيصل المزرعه كلمني وطمني عليه وطلبت منه انه بالليل يطمني اذا وصل البيت في مسج لأنه قالي يمكن يتأخر في المزرعه .
صارت الساعه 12 وفيصل بعده في المزرعه انا رحت سريري بنام .
قمت الساعه 4 اصلي الفجر بس شفت لتلفون ما لقيت مسج من فيصل قلت يمكن تعبان نام وما دز مسج الصبح اكلمه اذا قعدت من النوم .
الصبح قعدت الساعه 10 وكان موعدي في الفندق الساعه 4 .
على ما قعدت وانا اتجهز ياني ابوي غرفتي وكان ويهه مهموم ومتكدر .
وقال لي : فجر حبيبتي صبري نفسج .
فجر : شفيك يبا عسى ما شر .
ابو جاسم : فجر فيصل صار له حادث .......................

 

[LOOLY]

ما قدرت اسمع شي عقب احس الدنيا لفت فيني وبس ......
ما وعيت إلا انا في سريري وامي تبجي يم راسي .
فجر : يما شنو صار .
ام جاسم : ______
فجر : يمه فيصل شفيه .
قامت امي من يمي وياني ابوي مع جاسم وجمال .
وكان الواضح انهم يبجووووووووووون .
فجر : فيصل فيه شي صار له شي تكلموااا ليش محد يرد علي .
قعد يمي جمال وطلع ابوي من الغرفه وجاسم قعد يم ريلي .
جمال : البقى براسج حبيبتي .
فجر : انت شنو قاعد تقول .؟؟؟؟؟؟؟!!!
جمال : فيصل صار له حادث وتوفى .
فجر : لألألألأ انت تضحك معاي لالالالالا لاتقول جذي
جمال : صبري نفسج انتي مؤمنه بالله .
فجر : لا ما اقدر اصدق اليوم عرسنا لألألألأ
قمت ابجي بشكل هستيري وجمال ضامني على صدره ويبجي معاي محد قدر يتحمل جاسم طلع وامي وابوي بس ظليت انا وجمال وابجي على صدره .
ياريتني ما خليتك تروح ياريتني منعتك يار يتني ويا ريتني .
يا بلي جمال ماي بارد وقال لي شربي حبيبتي .
حسيت اني ما قمت اشوف شي من البجي .
هديت شوي .
قال لي جمال : تقدرين تتجهزين حق العزا لان بيكون هني دامج دشيتي شهور العده .
قمت ابجي على حضي بدل لا ادش عش الزوجيه دشيت اشهر العده
قعدت ادعي ربي يصبرني على ما ابتلاني فيه .
تجهزت للعزا ونزلت العصر لانهم بيدفنون حبي بعد صلاة العصر .
كل اهلي يو عندي بيقعدون ويت نور اختي من البحرين . وخالتي ام فيصل وخواته قعدوا للعزا في بيتنه بس طول ما كانت قاعده كانت تخزني بنظرات ماني عارفه معناها
كنت اذا بنام باللي احس ان قلبي يتقطع وانا حاطه راسي على المخده وانا كاتمه صوتي وبس دموعي تنزل
امي من اول يوم شالت كل اغراض العرس من غرفتي .
نور اختي كانت تنام عندي في غرفتي .
آخر يوم من العزا قبل لا تطلع خالتي ام فيصل من البيت قالت لي كلمه نهت فيها كل شي يمكن يكون حلو في حياتي .
قالت لي ارتحتي يا وجه النحس يا البومه ليته ما شافج ولا تولع فيج وطلعت وخلتني انزف من الجرح اللي سببته لي .
قضيت اشهر العده في بيت اهلي وطبعا خالتي ام فيصل وخواته خبري فيهم من ايام العزا ولا مروا علي كانهم بيقطعون أي صله لي معاهم .
اهلي خلوا كل اربعا درس ديني في البيت عندنا وبعدها العشا اللي يحب ايي علشان يملون علي البيت .

 

[LOOLY]

الجزء الاخير


كان في قرار اتخذته انا اني اذا طلعت من العده بروح العمره وبتحجب .
انتهت ايام العده وخذاني جمال مع امي حق العمرة وعقبها رديت وتحجبت
حاولت ارجع حق حياتي اللي قبل بس ما قدرت .
صرت انسانه انطوائيه وما احب اطلع ابد واغلب الاوقات اقعد بداري .
كانت تقول لي امي دايم طلعي من غرفتج قعدي معانا . مري على يدج دايم يسأل عنج .
ان شاء الله . يصير خير طبعا ولا اتخرك من مكاني.
اليوم يدي ياي يزورني وخالتي وفواز يو معاه .
قعدت معاهم بس ماني معاهم .
فواز : الحمدلله على سلامتج وتقبل الله منا ومنج
فجر : منا ومنك صالح الأعمال .
فواز : مبروك الحجاب وايد حلو عليج احلى قرار اتخذتيه .
نزلت راسي وابتدت الدموع تنزل من عيوني غصب علي .
فواز ويدي : هدي بالله لا تسوين بنفسج شذي .
قعد يمي فواز وقام يكلمني بصوت هادي وبنبره حنونه : تحمدي الله على كل شي . فكري انه لو نجا بالحادث وظل مشلول او تشوه او بغيبوبه راح يتعذب اكثر صدقيني الشي هذا اريح حقه .
زادت دموعي بس ظليت ساكته واسمع كلام فواز .
فواز : تعوذي من ابليس فجر انتي بهالطريقه تأذينه اكثر لا تعذبينه ادعي الله يغفر له وحاولي تردين حق فجر القديمه .
رفعت راسي واشوفه ورديت عليه : ما اقدر .
فواز : لأ تقدرين إذا ضغطتي على نفسج .قدمي اوراقج حق ديوان الخدمه . انا ما اقولج روحي تمشي في المولات وإلا روحي سينمات و مطاعم . انا اقولج لا تقطعين صلة الرحم . الناس هذي اهلج لا تقاطعينهم .
فجر : احاول .
فواز : انا ابي وعد منج ان اليوم الجمعه نشوفج في البيت عندنا ولا ونبي كيكه من ايدج . وقام يتبسم .
فجر : ان شاء الله .
فواز : وعد الحر دين .
فجر : يعني تربطني بالوعد .
فواز : أي .
فجر : اوعدك .
يوم طلع يدي وفواز من عندنا صعدت غرفتي قمت افكر في كلام فواز وكان مر على وفاة فيصل 8 شهور واليوم اول مره اشوف فواز من قبل وفاة فيصل .
حسيت ان كلامه صح . انا لازم اطلع من قوقعتي شوي .
خذي تلفوني ودزيت مسج حق فواز " اشكرك على وقفتك العزيزه "
رد علي بمسج " ما سوينا شي هذا واجبنا "
يوم الخميس حاولت اني اروح بيت عمتي مثل كل مره قبل المغرب بس من دخلت بيت عمتي اخنقتني العبره واول ما شفت ياسمين احضنتني وقمت ابجي بحضنها يت عمتي ويوسف على صوتنا لان ياسمين شاركتني طبعا بالبكي .
عمتي قامت تهديني من جهه ويوسف من جهه . المهم هديت شوي . سلمت عليهم وقعدت احس ان مالي نفس اسوي شي .
قعدت ياسمين معاي وقامت تطلب مني اني اساعدها في تغيير ديكور الصاله انا ادري تبي تطلعني من المود اللي انا فيه .
غيرنا الديكور عقب قالت لي اني اجهز الشاي والقهوه معاها جهزنا كل شي وقعدنا .
يانا يوسف وقام يتكلم مع ياسمين بصوت واطي عقب ييه يكلمني ويبارك لي على الحجاب ويمدح فيه مع اني اعرف يوسف ما يحب الحجاب بس يخلق جو للكلام . بعد ما وصل البقيه وقمنا في واجب الضيافه وطاح العشا .
حسيت نوعا ما ان نفسيتي تغيرت شوي .
رجعت البيت الساعه 11 ادري ما تأخرت لأني من بعد وفاة فيصل قمت احب اني اقرأ قرآن في الليل واصلي قيام ليل وبعد ما اصلي الفجر انام .
بعد ما رجعت البيت دزيت مسج حق فواز " شكرا للمره الثانيه " رد علي " العفو ما سوينا شي "
قعدت من النوم الساعه 11 الظهر قريت الكهف وعقب صليت الظهر وتجهزت حق زوارة بيت يدي .
ونفس اللي حصل في بيت عمتي حصل لي في بيت يدي بس كان فواز لي بالمرصاد .
بعد ما مر سنتين على وفاة فيصل .
اشتغلت انا في شركه استثماريه اسلاميه ونوعا ما شوي رديت حق فجر القديمه .
خالتي ام فواز تعبت مره ثانيه بس المره هذي كانت حالتها شوي اخطر .
طلبت من امي اني اقعد عند خالتي الى انها تتعافى صحتها .
قعدت في بيت يدي معززة مكرمه و جهزوا لي غرفه يم خالتي .
فواز كان له جناح مستقل وانا جذي اخذ راحتي اكثر .
نقلت اغراضي في بيت خالتي وانا ادخل البيت إلا فواز اللي نازل .
فواز : هلا والله فجر تو ما نور البيت .
فجر : منور بأهله .
فواز : جزاج الله كل خير على وقفتج معاي .
فجر : وياك انا ما سويت شي هذي خالتي بعد .
فواز : أنا استأذن اخذي راحتج انا طالع مع جمال ما راح ارجع إلا بالليل .
رتبت اغراضي وقعدت مع خالتي اللي الدنيا ما كانت سايعتها من الفرح .
خالتي ام فواز : تو ما نور البيت .الحين احس ان عندي احد في البيت اقعد واسولف معاه .
فجر : ضحكت وقلت حق خالتي تجابلوا الأرامل . وسكت كانت اول مره انطق الكلمه هذي بدون لا ابجي .
خالتي قامت تخزني وظلت ساكته من ردة فعلي عقب قمنا نضحك احنا الأثنين .
وقمنا نسولف في كل شي لما صارت الساعه 10 اتصل فواز على البيت وانا رديت لان التلفون بعيد عن خالتي .
فواز : هلا فجر شلوننج .
فجر : بخير الحمدلله .
فواز : فجر انا بيي بعد نص ساعد ومعاي جمال ممكن .......... وسكت .
فجر : فواز شفيك في شي .
فواز : لا بس خلاص .
فجر : تبي نجهز العشا .
فواز وهو منحرج : ممكن .
فجر : اكيد ممكن .
انا حسيت ان فواز اتصل بس علشان ينبهني انه بيرجع علشان البس حجابي .
جهزت العشا بنفسي صار لي فتره ما دشيت المطبخ .
وصلوا فواز مع جمال وقعدت معاهم على العشا .
جمال استانس وايد :
جمال : الله يا اطباق اختي الغاليه والله ولهانين عليها .
فواز : تسلم ايدج فجر بس والله مستحي منج اول يوم لج في ضيافتنا وتسوين العشا .
فجر : فواز شذي بزعل يعني انا مو في بيتي .
فواز : سحبت كلامي وكل اليوم العشا عليج ، تمام .
فجر : تمام .
خلصنا العشا وجهزت الشاي لهم ورحت غرفتي
بعد ما صليت نمت بسرعه .
قعدت الصبح تجهزت حق الدوام . ورحت الا يدي وفواز قاعدين يتريقون سألت عن خالتي قالوا لي انها بعدها نايمه . طليت عليها قبل لا امشي حق دوامي .
قعدت في بيت خالتي 3 اسابيع صار فيها تطورات وايد في شخصيتي .
بدت فجر ترجع لطبيعتها .
في آخر يومين لي في بيت يدي قعدت الصبح إلا سيارتي تايرها فاش .
فواز وصلني حق دوامي وقال لي انه بيمر ياخذني .
اخر يوم لي بعد ما تحسنت صحة خالتي قررت اني ارجع بيتنا من باجر.
كلهم تعلقو في وجودي
يدي ضاق خلقه .
يدي عيسى : والله البيت بيفضى بدونج يا فجر .
فجر : افا يدي . انا ما راح اقطعكم انا بعد تعودت عليكم .
خالتي : والله كنتي مونستني في البيت .
فجر : خلاص وعد بين فتره والثانيه بيي اقعد عندكم يومين .
خالتي : الله كريم انا بدخل داري ارتاح شوي .
قعدت بالصاله بروحي اشوف التلفزيون ويمي مطارة الشاي .
دخل فواز اللي علاقتي وايد تغيرت معاه صار بالنسبه لي شي ثاني ويمكن هذا اللي خلاني اعزم ارجع بيتنا .
فواز : اوه فجر قاعده بروحها .
فجر : أي خالتي ويدي دخلوا يريجون وانا قاعده اتابع المسلسل .
فواز : ممكن شاي .
فجر : ممكنين يالله تدلع اليوم باجر ما في من يدلعك .
فواز : ليش ؟؟؟
فجر : اليوم برجع بيتنا .
فواز وهو مصدوم : اليوم تروحين ؟؟؟
فجر : أي ؟.
فواز : ضيقتي خلقي تعودنا عليج بينا .
فجر : وانا بعد تعودت عليكم .
المغرب عقب ما سلمت على يدي وخالتي رجعت بيتنا . فواز ما كان موجود .
بعد اسبوع رحت بيت يدي المغرب . لقيت خالتي رايحه استقبال حق جارتهم بنتها والده . ويدي قاعد في مجلسه قعدت معاه وقمنا نسولف ونضحك يدي كان دايم يحب يسولف عن ايام زمان وكان يضحكني على سوالف امي واهي صغيره . دش علينا فواز وحسيت عيونه طايره من الفرح .
سلم وقعد معانا .
سولفنا وايد عقب استأذن من عندنا قال ان بيروح يتمشى بالحوش شوي مشينا انا وفواز معاه وقلنا للخدامه تطلع الشاي في الغرفه الزجاجيه .
قعد فواز معاي بعد ما شغل النافوره .
فواز : ها شرايج بالقعده .
فجر : عجيبه
فواز وهو يقرب يقعد قريب : يعني ينفع للموضوع اللي بكلمج فيه ؟
فجر : أي موضوع ؟
فواز بتردد : فجر ترضين تتزوجيني ؟
فجر : _____________
تفاجأت وايد وخفت .
فواز : انا ما ابي ردج الحين ؟ انا ابيج تفكرين عدل !
فجر : ___________
فواز : ابيج تسمعين كلامي للأخير .
فواز : انا كنت معجب فيج من زمان بس صرتي مو من نصيبي والحين عقب ما قعدتي معانا الأيام اللي طافوا تعلقت فيج أكثر وشفت امي شلون كانت مستانسه .
فجر انا اعرف انج انتي سر سعادتنا في هذا البيت وما راح القى احن من قلبج على امي ويدي .
فجر : انت فاجأتني وايد .
فواز : فجر لا تتسرعين واخذي وقتج بالتفكير . انا ما حبيت افاتح امي بالموضوع ولا جمال علشان ما احرجج حبيت يكون بينا علشان لو رفضتي محد يدري إلا انا وانتي .
فجر : اشكرك على مراعاة مشاعري بس !!!
فواز : انا ما ابي اسمع شي الحين اخذي وقتج .
فجر : ان شاء الله .
مر اسبوع على موضوعي مع فواز . يوم الزواره ما رحت حبيت اني اخذ وقتي من غير لا اشوف فواز .
انا بعد حسيت ان فواز يعني لي شي ثاني وفكرت في كلامه من باب العقل قبل العاطفه حسيت ان كلامه صح مافي احن من قلبي على خالتي ويدي ومافي احن من قلب فواز علي .
قمت دزيت له مسج اهداء اغاني من اغنية خالد عبدالرحمن ( خذني بقايا جروح ارجوك داويني لا تروح الروح )
بعدها بالضبط ب 10 دقايق رن تلفوني اهداء اغنيه وكانت راشد الماجد ( طاير من الفرحه طاير وقلبي على نار ناطر )
ضحكت من قلبي
اتصل علي فواز : ومن غير لا يسلم يعني ابشر امي .
فجر وهي تضحك : بشرها .
ما صار العشا إلا خالتي يايه عندنا تخطبني رسمي وامي تيبب من الوناسه حتى ما خذوا رايي تقول امي سيماهم في وجوهههم تقول ما تلاحظين نفسج لما فواز يكون موجود شلون عيونج عليه وإذا كان موموجود عيونج تدوره المهم اتفقوا على كل شي وتم كل شي على خير ولله الحمد وعشنا في سبات وخلفنا صبيان وبنات وتوته توته خلصت الحتوته .

 

[]دنيا الوله]

يعطيج العافيه على هالقصة وااايدحلوه وأثرت فيني يوم توفا فيصل :eh_s(11):

 

[خيال الطفولة]

يعطيك العافية القصة مرة حلوة ومحزنة بوفاة فيصل:eh_s(16):

 

[نهج العيون]

بصراحة احلى قصة واروع قصة والأحلى انها مش طويلة وقعدي نطري مثل باقي القصص ليما يتكرمون علينا بتكملتها وقبل لا روحنا تطلع

ما يكملونها

تسلمين يا قلبي ع القصة الجميلة ويعطيج العاااااافية ان شاء الله

 

[كويتية وكلها جاذبية]

روعه القصه صج حلوه وروووووووووووووووووووووعه وتعطي امل بالحياة
مشاء الله علييييج والشخصيه وايييد طبيعيه وتنحب
وتعرف الله وذكرج للقرأن وصلة الرحم شي وايييد حلووو الله يجلعه في ميزان اعمالج يا قلبي