حملة قراءة سورة البقره كل يوم

[[ . . Jee Jee . . ]]

شلونج جيجي

انتي مو تقرين البقرة كل يوم روحي الجمعية واشتري جلن وترسيه ماي واقري البقرة ونفثي بالماي
واستحمي بجزا منه والباقي زيديه ماي عادي على فكرة ترا ثلاث اكواب من الماي المقري عليه زيديه ماي عادي يكفيج للاغتسال --- كل الي تقولين عنه يروح وقلبج ينشرح روحي استحمي اذا قارية رسالتي الحين وتقدرين سويها قبل لا تسمعين الرقية بدون ما تستحمين او تغتسلين بالماي المقري عليه

في كل موقف يمر علي ان الله مع الصابرين .

حبيبتي انتي كلش ولا جيجي الغاليه

ام منصور انا اليوم اغتسلت من الزفته استغفر الله وكالعادة برد اغتسل الحين لاني شاكة بشي..
حطيت مشاركة في مكان وقالي الراقي انه ابيج تقرين الايات كذا وكذا وتدعين جذي وتصلين ركعتين وتقوليلي شيصير معاج.. والله ماحلف جذب اني خايفة اسوي مثل ماقال
قلت بنطر الصبح وصار الصبح وليلحين قاعده..
تصدقين ام منصور نمت 6 وشوي وقمت 9 الا !!

بس صار شي حلو قبل لا انام قولي شنو :ggdw:
انا كنت منسدحه فيني النوم تعبااانة وحاطه على السعودية عقب الصلاة يحطون اذكار الصباح وادعيه حلوة
بعدين يحطون سورة من القرآن.. يوم بدت الفقرة مالت القرآن كنت اقول ماني قاريه البقرة اليوم باجر اعوض
.. جان يحطون الفاتحه.. جان اسوي جذي @@
جان تكمل البقرة وانا @@
جان اقعد اقرا من التلفزيون .. :ggdw:

احب الله يحبني ياااربي الله يحبني صج مو صدفه << هالجمله من تأثير قله النوم

بسوي اللي قلتي عنه بعد ماسوي اللي قالي الراقي.. بس اليوم لما اقراها ان شاءالله راح اقرا على ماي زمزم واشرب منه " ذكرتيني جزاج الله الف خير "

وعن الرقيه ماني سامعتها قبل لا اصلي الركعتين .. استغفر الله تخرع انا بيني وبين نفسي اقول ليتني ماسمعتها واكتفيت بالبقرة عالاقل ماحسيت بولا شي وانا اقراها

بعد عمري انتي الله يجازيج الجنة.. ويجازيج خير عن كل كلمة تكتبينها لي.. اختي حبيبتي يام منصور انتي

جيجي حبيبتي أنا لما كنت أسمع الرقيه ادوخ وأتنرفز والله ذاك اليوم مشغلة الرقيه وخواتي يمي يسمعون معاي والله اللي كلنا دخنا واختي تنرفزت تقولي صكيها خلاص مو قادرة حسيت فينا شي والله
بس استعيني بالله وكوني على ثقة (أن الله سيبطله ) بايد الله سبحانه وهاذي رحمة من الله أنج تكونين واعيه للي يصير فيج عشان تجتهدين بالدعاء وايد وربي يرفع عنج البلاء يارب وشدي حيلج وياج أحنا حبيبتي

انا فكرت اشغلها وخواتي حوالي والله.. والرقيه تخرررع يا اميرة رعب مستبد والله العظيم
يقول اقسم عليك يا ساكن هذا الجسد من مارد او عاشق وووو
بسسسم الله عليييييييي والله لما اسمع هالجمله اقول انا مافيني شي وبنفس الوقت هدوء غريب
وسرحااان وتنهد ورعشه خفيفه برجلي بس احس انه هذا طبيعي الرعشة.. يمكن تصير باوقات ثانيه ومالاحظها..
عورت قلبي اختج والله احسبهم مثل خواتي اللي قلبي معورني عليهم
وخاطري يسوون كل شي اسويه حتى لو مافي شي بتطمن..

الله لا يحرمني منج انتي بعد يا اميرة .. وانا معاج بعد مثل مانتي معاي وابيج تطمنيني عنج..



بروح اغتسل وانشف شعري واصلي ركعتين الراقي اللي قال عنهم واقرا ادعيته والايات
واردلكم.. اهو قال لو ماصار شي احمدي الله وادعي للناس المرضى وحصني نفسج
ولو صار شي قوليلي ...

ادعو مايصير شي.. ورادتلكم ...

 

[مستقبلي احلى]

الفا انا قريت عن عرض الحرارة في البطن.. مع عارض التنميل

ومشكورة لانج متابعه وانا ان شاءالله بكمل بس ناطرة الدنيا تنور لانه محد قاعد غيري الحين...
الله يجزيج خير.. ويشفيج من كل شي فيج ويريح بالج .. اتمنى من كل قلبي انه كل شي تشتكين منه يزول مع الوقت.. والله يصفي نيتنا ويتقبل منا يارب

اختي جيجي ولا عليج امر شنو يعني الحرارة في البطن والتنميل يعني عين

انا تصير معاي وايد

 

[أميرة الورد]

حبيبتي جيجي الله يهون عليج يارب بس انوي وانتي تقرين البقرة أنه اللي يفيج يطلع كله وترتاحين انويها من قلب

والله يسهل يارب

 

[أم منصور]

برد عليج وراي شغل

زين سويتي ابدي شوي شوي القراءة والاغتسال بالماء المقري عليه واذا تقدرين تجيبين 7 ورقات سدر هذي حق تنمل الجسم تنفع وحطي ال7 ورقات سدر مع ماي عادي بالخلاط واذا خلص حطيه على الماي الي بتغتسلين منه الماء المقري عليه واغتسلي وتشهدي وقولي الفاتحه وانتهي تغتسلين

والله يشفيج

وعيشي حياتج عادي لا تحكرين نفسج بالبيت خصوصا اذا حاسة بشي لا تقعدين بالبيت طلعي واختلطي بالناس نصيحة

لان قعده البيت في مثل حالتج تجيب الوسواس وتتعبين من التفكير في هذا الموضوع

وسلامتج حبيبتي انتي ياعمري اسعي وتركي الباقي على الله فوق يصونج ويرعاج

 

[[ . . Jee Jee . . ]]

اختي جيجي ولا عليج امر شنو يعني الحرارة في البطن والتنميل يعني عين
انا تصير معاي وايد

التنميل اثناء الرقيه له معنى وانا حسيت فيه .. الحرارة في البطن تحس فيها اختنا الفا
الله يشافينا كلنا اجمعين لو كان لهذا سبب له علاقه باللي نفكر فيه ..
اعوذ بالله مثل لما يكون احد شارب او ماكل سحر لما يقرا الرقيه يعورة بطنه او يستفرغ او ينتفخ بطنه له علاقه بالبطن ..
انتي ترين معانا مستقبلي؟ سامحيني لو مو منتبه عالنك وانتي معانا.. واذا مو معانا بلشي ..
والله حرام العمر يروح بكدر وضيقه وبدون ذكر ولا شي والله اني كاسرة خاطر نفسي ويني من سنه ويني من سنتين وليش من زمان ساكته عن نفسي.. سبحان الله اللي دشيت الموضوع وسبحان الله اللي الله حببني اني ابدي معه البنات.. يااامالج يا تشيري من الخير "الله يتقبل يارب"

تشيري والله فقدناج كلنا.. بحيل الله ماتكونين الا بخير وتسوين عدل ومستمرة على البقرة حتى وانتي بعيدة..

مستقبلي حلفتج بالله تبدين معانا لو مابديتي ..

حبيبتي جيجي الله يهون عليج يارب بس انوي وانتي تقرين البقرة أنه اللي يفيج يطلع كله وترتاحين انويها من قلب
والله يسهل يارب

أميرة .. توني سويت اللي كتبته بآخر كومنت وحسيت بضيقه وتنميل بجتفي من ورا.. والضيقه ببلعومي مو طبيعيه.. ووخز مثل الابر وراح.. وبقت الضيقه والتنميل..
اليوم ان شاءالله بقرايتي البقرة بإذن الله بنوي وبدعي بعدها وانا مادعي عادة نيتي من اول مابديت بس ببلش ادعي خلاص..

برد عليج وراي شغل
زين سويتي ابدي شوي شوي القراءة والاغتسال بالماء المقري عليه واذا تقدرين تجيبين 7 ورقات سدر هذي حق تنمل الجسم تنفع وحطي ال7 ورقات سدر مع ماي عادي بالخلاط واذا خلص حطيه على الماي الي بتغتسلين منه الماء المقري عليه واغتسلي وتشهدي وقولي الفاتحه وانتهي تغتسلين

والله يشفيج

وعيشي حياتج عادي لا تحكرين نفسج بالبيت خصوصا اذا حاسة بشي لا تقعدين بالبيت طلعي واختلطي بالناس نصيحة
لان قعده البيت في مثل حالتج تجيب الوسواس وتتعبين من التفكير في هذا الموضوع
وسلامتج حبيبتي انتي ياعمري اسعي وتركي الباقي على الله فوق يصونج ويرعاج

ام منصور انا مستحيل اطلع.. والله اني مرات البس واركب السيارة وارد البيت اقط عباتي
ولي غصبت روحي رديت باجية.. وامسك بجيتي بالسيارة عن اللي معاي وارد داري اقط ملابسي واطلع ببجامه وعيون حمر .. دوامي اللي يبي يبلش مابي اروح والله ماكله هم هالروحة كارهتها كلها
واختي حبيبتي تترجاني امشي نطلع واحكرها معاي ولي زعلت علي بجيت لاني زعلتها وبدون شي انا اصلا امشي وابجي ..


بس انا ماشيه معاكم وعلى نفس الكلام بكمل بإذن الله وبقرا على الماي اللي جدامي الحين وماشرب الا منه .. وناطره الراقي شيقولي ...



بنات مو جني صرت انانيه وخذيت اهتمام زايد ولا سألت عنكم؟ حلفتكم بالله انتوا مرتاحين؟ لا تجاملون على انفسكم جعموني انا اختكم في الله والله مازعل بس قولولي عنكم

 

[حـــــلا]

بارك الله فيكم

 

[alfa2002]

الفا انا قريت عن عرض الحرارة في البطن.. مع عارض التنميل

ومشكورة لانج متابعه وانا ان شاءالله بكمل بس ناطرة الدنيا تنور لانه محد قاعد غيري الحين...
الله يجزيج خير.. ويشفيج من كل شي فيج ويريح بالج .. اتمنى من كل قلبي انه كل شي تشتكين منه يزول مع الوقت.. والله يصفي نيتنا ويتقبل منا يارب

الله يقبل منك
بس نفسي اعرف وش قريتي عن حرارة البطن والتنميل
والل ان محتارة في حالي

 

[kuwaitya_zoGaa]

ماتشوفين شر جيجيى
بس حبيبتى انتى اى وحده اللى سمعتيها ؟؟

 

[أم منصور]

بالعكس جيجي انا وياج واي شي تين حاضر والطلعة من البيت ضرورية

حاولي ما تقعدين في اللبيت وايد زوري خواتج عند امج سويلج برنامج لا تخلين اليام تضيع وانتي بكدر

عالجي نفسج وعيشي حياتج بس مو زين تراقبين نفسج شنو صار ببطنج تنميل اخذي كل هالأمور عاديه انا مجربه وهذا كله من الشيطان وربي يشفيج قولي الي بقلبج عادي احنا نعين ونعاون وبالعكس شنو فايدة الاخوة في الاسلام اذا ما نوقف مع بعض الله يسامحك لا تقولين عن نفسج انانيه

وانا بع\د ابيكم تدعون لاختي وصديقتي بالتوفيق من قلبكم بنات محتاجين الدعوة حبايبي انتو

 

[استغفرك يارب]

ماتشوفين شر جيجيى
بس نصيحة لك ولغيرك لا تحطين في بالك التنميل والحبسة بالبيت توكلي على الله ودحري الشيطان
سوي اللي عليك وتركي الباجي علي ربنا
وادعي لنفسك بالشفاء في كل وقت وحين وياريت تقرين سورة الفاتحة علي مفسك باعداد كبيرة بنية الشفاء
طبعا مو بس قراية لا انتبهي لكلام ربنا عدل لا تسرحين
اتمني لك ولكل البنات الخير وربنا يحقق كل امانيكم
يا بنات لا تقنطوا من رحمة الله
اللهم اجعلنا من الذين يستجاب دعاؤهم يا رب
اللهم بلغني و وبنات منتدي كويتيات وكل بنات وابناء المسلمين
أسمى مراتب الدنيا و أعلى منازل الجنة
اللهم امين

 

[[ . . Jee Jee . . ]]

الله يقبل منك
بس نفسي اعرف وش قريتي عن حرارة البطن والتنميل
والل ان محتارة في حالي

آمين ومنج يارب.. حبيبتي انا حسيت بالتنميل بس.. حرارة البطن قريتها مع الاعراض
هم طريقتهم تكتبين الاعراض بعد ماتسمعين الرقيه وتقوليلهم حسيت بكذا وكذا

ماتشوفين شر جيجيى
بس حبيبتى انتى اى وحده اللى سمعتيها ؟؟

هلا الغالية, شلونج زوغه؟
انا سمعت هذي اول شي
http://www.youtube.com/watch?v=87igR3QFKDE
في جزء قبل هذا اوكي.. هذا جزء 2
تلقين الاول على اليمين و هو بدى فيني التنميل من هالجزء
بعدين سمعت الشامله والعامة

بالعكس جيجي انا وياج واي شي تين حاضر والطلعة من البيت ضرورية
حاولي ما تقعدين في اللبيت وايد زوري خواتج عند امج سويلج برنامج لا تخلين اليام تضيع وانتي بكدر ,قولي الي بقلبج عادي احنا نعين ونعاون وبالعكس شنو فايدة الاخوة في الاسلام اذا ما نوقف مع بعض الله يسامحك لا تقولين عن نفسج انانيه
وانا بع\د ابيكم تدعون لاختي وصديقتي بالتوفيق من قلبكم بنات محتاجين الدعوة حبايبي انتو

الله يجمعني فيج على محبة خالصة في الله وان لم نجتمع في الدنيا يجمعنا في الآخرة في الفردوس قولي آمين.. ابيج تطمنيني عليج بس والله وادري انكم خواتي وماتقصرون الله لا يحرمني منكم

الله يوفق اختج ورفيجتج ويرزقهم رزقا طيبا ويزيدهم من خيره ويتقبل منهم اعمالهم الصالحة ويضاعف لهم اجروها يارب.. وطمنيني عليهم.. شنو مشكلة اختج الغاليه؟ الله يرزقها ورفيجتج باللي تبيه يارب

وعن الطلعة صدقيني مو بيدي احس مالي خلق كلش اطلع.. نهائيا مو مشتاقه لأي شي برا ولو اتم حياتي كلها بالبيت عادي.. وصدقيني مو هذا اللي مضايقني.

"طمنيني عليج"

ماتشوفين شر جيجيى
بس نصيحة لك ولغيرك لا تحطين في بالك التنميل والحبسة بالبيت توكلي على الله ودحري الشيطان
سوي اللي عليك وتركي الباجي علي ربنا
وادعي لنفسك بالشفاء في كل وقت وحين وياريت تقرين سورة الفاتحة علي مفسك باعداد كبيرة بنية الشفاء
طبعا مو بس قراية لا انتبهي لكلام ربنا عدل لا تسرحين
اتمني لك ولكل البنات الخير وربنا يحقق كل امانيكم

آمين يارب جزاج الله خير وان شاءالله باخذ باللي قلتيه.. مشكورة لانج ذكرتيني اركز بالقرايه لانه صج انا لاحظت اني اشرد ومرات اقرا بدون لا افهم استغفر الله..
ومرات اقرا بدون لا اراعي اشكال التلاوة.. وقبل كنت اقرا بسرعه استغفر الله وهذا غلط
مشكورة حبيبتي
وجزاج الله الف خير .. والله يستجيب منج يارب

 

[kuwaitya_zoGaa]

مشكوره جيجي وماتشوفين شر ياعمرى
وراح ادعى لج انه الله يفرج همج ويشفيج

 

[أم منصور]

بنات الي مشاركين بقراءة سورة البقرة ياريت تقرونها بنيه للشيخ سعد ربي يتقبلها منكم اجمعين
لاتنسون الشيخ سعد الي فنى عمره في خدمة الكويت وعاش سنين طوال يعاني المرض

ادعوله بالمغفرة والحنه يارب اجعل مثواه جنات الفردوس مع النبيين والصديقين والشهداء واغسله بالماء والثلج والبرد ونقه من الخطايا والذنوب كما ينقى الثوب الأبيض من الدنس يارب

الله اغفر له يارب واجعل حسابه يسيرا عند الملكين ونجه يارب من عذاب القبر

 

[kuwaitya_zoGaa]

بنات عندى سؤال ؟؟
انا قاعده اقرا سورة البقرة من دون وضوء وقاعده اقراها من الاجزاء يعنى مو من المصحف
يصير والا لا ؟؟؟
لانه سمعت يقولون لى اذا قريتى بالاجزاء مو ضرورى الوضوء ؟؟؟

 

[flowers_q8]

الحمد لله قريتها امس وكملت 30 يوم

 

[[ . . Jee Jee . . ]]

العفو حبيبتي ..
زوغه احس تتوضين احسن .. لانه قرآن مو تفسير

بس دوري بقوقل لو مضطرة تقرين من اجزاء..


فلورز ماشاءالله ..
انا كملت 40 بدون 4 ايام 3 منهم ماقريت وواحد عن الظن
استغفر الله مرات اقرا واحس روحي ماقريت وياحلاة الاحساس لما اقراها كامله بتركيز وبتلاوة صح..


بنات هذي ايات الشفاء .. صلو ركعتين وقعدو بمصلاكم اقروا المعوذات والكرسي وهالايات
آيات الشفاء في الكتاب الكريم ستة كما يلي :
1 : قوله تعالى : ( قاتلوهم يعذبهم الله بأيديكم ويخزهم وينصركم عليهم ويشف صدور قوم مؤمنين ) . [التوبة : 14] .
2 : قوله تعالى : ( يا آيها الناس قد جاءتكم موعظة من ربكم وشفاءٌ لما في الصدور وهدًى ورحمة للمؤمنين ). [يونس : 57]
. 3 : قوله تعالى : ( ثم كلي من كل الثمرات فاسلكي سبل ربك ذُللا يخرج من بطونها شرابٌ مختلفٌ ألوانه فيه شفاءٌ للناس إن في ذلك لآية لقوم يتفكرون ). [النحل : 69]
. 4 : قوله تعالى: ( وننزل من القرآن ما هو شفاءٌ ورحمة للمؤمنين ولا يزيد الظالمين إلاّ خساراً ) . [الإسراء : 82].
5 : قوله تعالى : ( والذي هو يطعمني ويسقين ، وإذا مرضت فهو يشفين ) . [الشعراء : 80]
. 6 : قوله تعالى : ( ولو جعلناه قرآناً أعجمياً لقالوا لولا فصلت آياته أأعجميٌ وعربي ، قل هو للذين آمنوا هُدى وشفاء ، والذين لا يؤمنون في آذانهم وقرٌ وهو عليهم عمىٌ ، أولئك ينادون من مكان بعيد ). [فصلت : 44].

وادعولي الله يقوي قلبي اليوم ماقريتها ليلحين .. وبديت احس بتعب وتكاسل .. استغفر الله ياربي

 

[flowers_q8]

جي جي حبيبتي تشجعي وكملي لا تتكاسلين واستمري وكلنا معاج مع بعض نشجع بعض والله امس بالليل قريتها وعيوني تصك بنام بس دحرت الشيطان وكملت وهذا كله بفضل الله وتشجيعكم
جي جي حبيبتي لازمي الاستغفار
وانا ودي تعيشين سنج وتطلعين وتروحين ماودي كله قاعده في البيت ترى هذا يؤثر في ضيقة الخلق
يمكن اذا اشتغلتي يتغير شوي وضعج
جي جي املي وقت فراغج
والله اني احبج في الله وودي اشوفج باحسن حال بالاضافه الى العلاج بالقرآن والدعاء انتي بعد غيري اسلوب حياتج وخلج كله متفائلة ومستبشرة خير الرسول صلى الله عليه وسلم قال تفاءلو خير تجدوه
يعني انتي متفائله بيصير لج كل شي حلو اما اذا تشاءمتي بتلاقين اشياء مو حلوة
يارب اسمع عنج كل اخبار طيبه ربي يغير حالج الى احسن الاحوال بحوله وقوته
شوفي دامج تدعين ربج وانتي موقنه بالاجابه ربي بيعطيج كل ماتتمنين
دايما بعد صلاة الفجر ادعي الفتاح يفتح لج كل باب ويفتح لج ابواب رحمته الله يوفقج ويسعدج حبيبتي

 

[أميرة الورد]

الحمدلله قريتها بس بنات تعبانة كله اعصاب وببجي وأحس مثل غبظ أعوذ بالله من كل شي مادري شفيني والله تعبت

 

[alfa2002]

أميرة الورد الله يشفيك واستمري بالقراية وان شاء الله مايخيب الله عبد لجأ الية

 

[flowers_q8]

الحمد لله قريتها توني وكملت 31 يوم

اميرة الورد حبيبتي اشفيج عسى ماشر؟
قولي لا اله الا انت سبحانك اني كنت من الظالمين بدون عدد قوليها وايد راح ترتاحين ولزمي الاستغفار
حبيبتي تفاءلي ياقلبي تفاءلو بالخير تجدوه