"آمبي شفتهآ بآلآفنيوز بدون مكيآج ولآبسه آي شي".. شسآلفه؟؟

[{ شيوخهـ ~]

[

مسآء آلورد.. :eh_s(7):

هآلموضوع من زمآآآن ودي آحطه ومسبب لي آزمه ومكرهني بآلطلعه.. :eh_s(4):

آلنآس ليش صآرت تكشخ حق كل شي؟ وآي شي؟ وآي مكآن؟

كشخوآ مآقلنآ شي عليكم بستين آلف عآفيه لكن..

عشآن آوضح آكثر..

آلمعروف آن آلكشخه آلزآيده بمكآن مو منآسب تعتبر هلآقه..

مثلآ رآيحه آلآفنيوز تتسوق ولآبسه كعب شطوله تلقينهآ بآلغصب تمشي وتقآيس ونفنوف قصير وضيج وآلمكيآج ترس آلويه وتلتفت على وحده لآبسه عزكم آلله جوتي ريآضه وتعطيهآ نظره من فوق لي تحت جنهآ بآيقه حلآل آبوهآ.. :rgewrg:

يعني آنتي رآيحه تتسوقين مو رآيحه تلفتين آنظآر آلنآس وآلشبآب عليج!!!

آنزين آكيد بتقولون حريه شخصيه وآنآ مع هآلشي ومن حق آلبنت تكشخ متى و وين مآتبي وآنآ آللي كتبته مجرد وجهه نظر ومو آنآ آللي آحكم على آلشخص من شكله.. يمكن وحده بتتلآقه مع صديقآتهآ آو آهلهآ بمجمع ولآ شي وولآزم تكشخ؟ ملبووووس آلعآفيه عليهآ مآقلنآ آي شششي..

لكن ليش آلنظرآت وآلتعليقآت آللي مآلهآ دآعي؟؟

صآر آللي مآيكشخ حق آلآفنيوز ولآ 360 ولآ آلبدع ولآ هآلسوآلف يعتبر هيلقي وآي شي.. :rgewrg:

آنزين آنآ ليش بكشخ آذآ آنآ رآيحه آتسوق؟ ولآ عندي شغله مثلآ؟ ولآ بتغدى؟ ولآ سينمآ؟ منو بيشوفني؟ يمكن تصآدفين نآس آوكي آنآ مآرآح آطلع ببجآمتي آكيد!!! صآرت آلكشخه غصب وبآلآكرآه عشآن آلوآحد مآ يسمع حجي يسم بدنه ولآ تعليقآت ونظرآت مآلهآ دآعي؟ صآر آلوآحد مآله خلق يطلع وآلسبه هآلشي!

آوكي آكشخ حق طلعه مع رفيجآتي ولآ آهلي وآليمعآت وغيره وغيره لكن وآلله آنآ مو مجبوره آكشخ وآنآ رآيحه بقضي شغلي بس لآني خآيفه آصآدف آحد ويوصلني حجي منه آو تعليقآت آو نظرآت..

مثآل: آنآ كنت رآيحه 360 ولآبسه بلوزه وبنطرون ومكيآج وآكسسوآرآت خفيفه وشفت وحده آعرفهآ و وصلني حجي من هآلبنت ثآني يوم آنهآ قآيله: "تصدقون مآتعرف تكشخ وآلمجمع حزتهآ كآن زحمه وكله شبآب وآهيآ ومو حآطه مكيآج ولآبسه جوتي ريآضه بعد.."

آنزين آنتي شعليج مني؟ ترآ آلكشخه آلزآيده حق آللهم كللل شي وربي مصآخه!!! وبعدين آنآ كنت قآعده آتسوق وعندي جم شغله بقضيهآ يعني مو يآيه آلآقي رفيجآتي ولآ آتغدى مع آهلي عشآن وآلله آكشخ.. حق منو بكشخ؟؟ آذآ آنتي هآمج تلفتين آنتبآه آلشبآب آنآ مآيهمني ولآ فآضيه حق هآلسوآلف..

ومره بنت خآلتي مرت صوب بنآت يخزونهآ وسمعتهم يقولون "جيكي شلآبسه!!" ويضحكون عليهآ وآهيآ لآبسه تي شيرت وبنطرون.. :rgewrg:

ليش؟ طآلعه بلبس آرآجوز؟ ولآ يآيه من آلمريخ يعني؟ :eh_s(14):

آرد وآقول مره ثآنيه هذي وجهه نظري وكل شخص حر بنفسه وبلبسه لكن ليييش تحرون غيركم بنظرآتكم وتعليقآتكم؟ ترآ آلنآس مو على كيفكم!! :eh_s(4):

آنآ مآكتبت آلموضوع عشآن آشكي آلحآل..

كتبته عشآن آسمع رآيكم بآلموضوع..

وبتنوروني بمروركم..

]

 

[manoooram]

حبيبتي الغاليه
ما عليج من أحد لبسي اللي يريحج دام انه محتشم وما يجرح الذوق العام ومرتب ونظيف
ومثل ما قلت مسبقا بأحد مواضيع الخوات ان كل مكان له لبسه اللي يوافقه
ودام انج بسوق أكيد بيكون لبسج مريح

 

[فاقده حنان ابوه]

صح كلامج امبيه البنات صارو هولات ويبالغون بلبس والميك اب
شدعوه عليها جنها رايحه استقبال مو مجمع

اوك كلنا نكشخ ونسوي شعرنا واكسسوارات ناعمه
بس امبيه مو ويفي وتارسه الشعر سبريه ولا لابسه نفنوف سهره وربي فوقه توينز و جي جي نعم يعني كاشخه وربي هلاقه
تحسين يبون يلفتون النظر
الله يهديهم
لبسي الي يريحج مالج شغل باحد انشالله مو رايحه شوبينغ اكشخ واخب عمري

 

[فوفو22]

اخذيها قاعده

الواثق من نفسه ما يهتم بكلام خلق الله

واكتشفت مثلا انا للسوق البس لبس عملي

واذا متواعده مع الصديقات على عشا وبنفس السوق

يكون لبسي اكشخ شوي

ولكن اشوف بناتي يكشون وايد لنفس السوق

فايقنت ان لكل عمر احساس غير باللبس

هم بال 20 وهالسن البنت تحب تكون في كل مكان باخر اناقه

بعمر ال 30 تكون اعقل وتركد

ولكن بعمر ال 40 تكون ناضجه وتعرف ان لكل مكان لبسه الخاااص

فعشان جذي اشوف الوضع طبيعي بالاسواق تكون الاناقه

اوفر للبعض

وبسيط للبعض

ومعتدل للبعض

فوفو

 

[PuPa^^SWeeT]

للاسف انهم خلوو البنات اللي لابسين سوالف ماتنلبس اصلن


و يوو يعلقون على اللي ماسكة دينها و احتشامها


الدنيا مقلوبة ياقلبي



و مثل ما قالت فوفو

تحت 25 اتكونين للحين باوج اناقتج و تبين اتكونين كشخة بكل مكان


بس شوي اتعدين هالعمر بشوي تبدين تهديين و اتفكرين الاناقة باحتشام


انا احب ما افرط بالكشخة بالسوق ولا بالدوام


لانه هذي اماكن اتكونين فيها مشغولة البال و اليد



بس لو معزومة مثل ما تفضلتي على غدا ولا سينما


نكشخ و همن نحترم السوق اللي احنا فيه

 

[Ghreba eb derty]

والله انا لي الحين ما كملت 20 ولبسي من ابسط ما يكون عادي عندي اروح افنيوز ببنطرون وتيشيرت بس اهم شي يكووووون مررررررررتب وناعم اكره شي اوفر
الله والافنيوز عاد

يعني حتى بالعروس واستقبالات وهالسوالف ماااااااااحب شي اوفر حلاته شي ناعم ويبرز الجمال

والميكب مسكرا وحمره بدون فونديشن ولا مونديشن

قبل هبيت بلاشر وايلاينر وشدو بس بصراااحه موووو حلو علي وتركتهم :eh_s(22):

وطبعا اكسسوارات تراجي وسوار وخواتم اموووووت عليهم وصبغ اظاااافر احبه وساعات لي طق بمزاجي البس عدسات

وشعري اخليه على جنب او المه بماشات

ههههههههه واللي تبي تعيب علي خلتعيب مني لي يطيح لسانها اهم شي راحتي

وبث

 

[Combat]

اوله ميك اب واكسسوار عملي؟!!انا عندي هذا اوفر ..
شفتي شلون الناس تختلف مقاييسها
بس لاتقولين الي يكشخون انهم يكشخون للشباب لاتحطين بذمتج
وبالنسابه للي يتحجون عن فلانه ويخزخزون بالناس هذيلا عطيهم طاف هذيلا بالقاع مايجدموون ولا ياخرون
يقولج المثل عيوبي لا اراها وعيوب الناس اجري وراها

 

[رتبه دبلوماسيه]

وايد اصادف عالاشكال خصوصا ثري سكستي والافنيوو
تقولين رايحه عرس مو مجمع ..
أوكي احنا ماقلنا شي لبسي كشخي حريتج بس مو أووفر والناس والشباب كلها تطالع فيج
لكل مكان له لبسه اللي يوافقه


يعطيج العافيه


​

 

[PuPa^^SWeeT]

^^^^^


ايي والله


كشخي و كيفج بس لاتعيبين على البنات البسيطات

 

[عضوا]

[


آنزين آنتي شعليج مني؟ ترآ آلكشخه آلزآيده حق آللهم كللل شي وربي مصآخه!!! وبعدين آنآ كنت قآعده آتسوق وعندي جم شغله بقضيهآ يعني مو يآيه آلآقي رفيجآتي ولآ آتغدى مع آهلي عشآن وآلله آكشخ.. حق منو بكشخ؟؟ آذآ آنتي هآمج تلفتين آنتبآه آلشبآب آنآ مآيهمني ولآ فآضيه حق هآلسوآلف..


[/SIZE]
]

هذي نقطتي . . . اذا بقضي اغراضي لازم اكشخ على سنقه عشرة !!!
و المصيبه حتى بالسفر
انا اللحين بالمطار و بسافر لأمريكا لازم اطب بمطار لندن عشان ترانزيت
و تشوفين هذول البنات من الكويت طايحين تخزز فينا و "امبيييييه فشلتنااااا اكووا وحدة تييي جذي"
و عندي طيارة ثانيه
يعني عندي سفر 19 ساعه
اي مكياج اي كعب ابطيخ اللي بالبسه
و غلى فكرة كنت لابسه بلوزة و بنطلون عادي و فلات عشان التفتيش ما ياذوني

سالفه ثانيه

كنت راجعه من امريكا لي مطار لندن هذي 11 ساعه تقريبا
و تعبااانه من السفر
و هذول البنات اللي كاشخيين على سنقه عشرة
عشان المطاار
و لا لازم يخزوون و يعطون التعليقات اللي تهبل
من ضمنهم
"حسافه عليها كويتيه "
" امبييه ليش جي مهلقه و وويها املط ماكو حتر كحله"

ارد و اكرر انا كنت لابسه شيرت و بنطلون المريح
لا نهلق و لا يهم يحزنون

11 ساعه طيارة 7 ساعات نطرة
و توكم تييون و تتطنزون

عااد ما سكتت جليله الحياا
و يت تبي تسلم عبالها ما سمعتها و تبي تسوي نفسها اهي اللي فاهمه و احنا الاغبيا

سلام
و عليكم السلام

الاخت من الكويت
اي من الكويت

بتردين الكويت معانا بالطيارة الفلانبه

اي

شي جمييل و ابتسامه

جان تبدي و تقول عااد انا كله مطيحه بلندن و كل شي شغي من اهني . . . شكلج اول مرة تطبينها صح ؟

لاا هذي 10 مرة

جان يصير ويها حذي :eh_s(12):

اهاااا عااد رحت هالاماكن . . . . و قامت تسرد لي وين راحت و تسالني اذا اعرفهم
و كان جوابي اي على كل مكان
حسيتها انغثت :rgewrg:

جان اسألها عن اماكن سياحيه عاديه بلندن و قلت لها رحتي هالمكان جان تقول لأ
رحتي هالمكان
جان تقول لأ
يعني معظم الاسأله كان جوابها لأ

جان تقول يعني ممكن اكون صريحه معاج

قلت قولي مو قبل شوي كنتي شاقتني حش فيني
انصدمت البنت
جان تقول لا مو قصدي
هي هي هي
بس بسألج دامج تسافرين و تعرفين و هذا ممكن أعرف ليش هاللبس؟:eh_s(10):

قلت لها لأني كانت ياياه من سفرة 11 ساعه و صار لي اللحين 7 ساعات بالمطار
شوري علي
البس كعب و احط فل ميك اب حني رايحه عرس و لا لبس اللي يريحني و يلوق و فلات و يهي مملوط ماكو ميك اب !!! شراايج!!

جان تقوول هااا لا هي هي
وي امي تناديني

سلام

سلام و مشكورة على الحسنات


مشكوورة على الموضوع و شوي نسيت عمري و فضفضت عن تخلف بعض البنات


ســـــــــــــــــــــــــــــلام

 

[Vivaldi]

عزيزاتي هنالك مثل صيني يقول

العقول الصغيرة تناقش الاشخاص،
والعقول المتوسطة تناقش الاشياء،
والعقول الكبيرة تناقش المبادئ.


البنات اللي بالمجمعات طايحين تخزز وحش بغيرهم وتعليقات مالها داعي

هم اشخاص ذوي عقول صغيرة.. حبيبتي شيوخة اذا بتسمعين البنات وكلامهم

كل ما طلعتي ماراح تخلصين نصيحة عيشي حياتج لبسي اللي تبينه بس طبعا

اللي فيه مراعاة للذوق العام لان صدقيني مثل هالبنات فارغين والبنت نفسها مو

مرتاحة مع نفسها لانها تجامل الناس وتجامل نفسها باسم الموضة.. *

 

[happy&single]

" اكل على ما تشتهي والبس على ما يعجب الناس "
هذا يعتبر أكثر من مثل هذا عرف بمجتمعاتنا

وعموما المجمعات صارت صالونات تجمع الناس والأهل والصديقات والاصدقاء اكثر من انها أماكن تسوق
أنا اعرف عوايل زوارتها بالمول !؟ استنكرت بالبداية لكن هذا شي موجود

فلابد نشوف ناس كاشخة اوووفر وناس عادية .. اشتري راحتج و طنشي
كلام الناس ما يخلص

تحياتي ،،​

 

[Japanese]

جنج تدرين كنت ابي اكتب موضوع عن هالسالفه من كم يوم :/ تعبت ومليت ولاعت جبدي من كثر التعليقات

مع الآخت فوفو صراحه ،، احس لكل عمر تفكير مختلف بس اكيد يعني في ناس يطلعون من القاعده لووول

مثلي انا والبنت اللي فوق ،، انا ماوصلت ال ٢٥ ولبسي من ابسط مايكون ولا احب اتمكيج كلش ولا احب الكعوب

ولا الاكسسوارات الاوفر!!! آحس انه فيها خداع لنفسي لآن هذا طبعي احب اكون عمليه بلبسي ومرتاحه خصوصا ف السوق

الجامعه النادي وغيره

تستفزني نظرات الناس اللي جي وتفكيرهم السططححييي

هالآشيا لها اماكنها ،،، حتى لو اتواعد مع حد ف مول ماحب ابالغ اول شي استحي ثاني شي استحرم هالسالفه

خصوصا انه الصبيان هني عينهم وايد طويله ،،

لما اجوف بنات من طبقات راقيه برا الخليج ماجوفهم يسوون جذي ،، اللبس الاوفر والميك آب والاشيا اللي تقرقش والكعوب

هاي كلها لها اماكنها واذا مانلبست ف المكان المناسب مع احترامي بس البنت تبين وايد cheap

self absorbent and a girl that wanna make an impression!​

 

[أبلة فاتن]

بنات امس كنت احاتي لبسي مو حلو كان ههههههههه بس شسوي بسرعه قمت متاخر يوعانه ما تفطرت هههه رحت مجمع ماني ذاكره اسمه المهم لمن دشيت ولا يخزوني شلة بنات كويتيات امبيه جني بايقه حلال ابوهم ايهيء ايهيء اختي تقولي شعليج فيهم انتي كله شاكه بنفسج قتلها طالعي نظراتهم انا نوعي ارد ههههههههههههههه بويهم قلت وع شتبون هههههههه جان يشيلون قشهم ويذلفون هههه احسن الحمدالله كافي جمال ويهي ههههههه موصاحيه ههه المشكله اللي يعيبون ولا يكشخون ويهووهم يالله لك الحمد ربي اشكرك خلقتني باحسن تقويم ههههههههه ومشكورة ياليت عقول بنات تكبر الجامعة حق اكشخ السوق حق اكشخ ويبون تنمية بالديرة ههههه جامعات لبنان تلبس الجينز والبودي وتعالي شوفيها لي صارت فنانه تخلي نص بنات الخليج يقلدونها بس بالاماكن اللي ما تسوى مثل سوق وجامعه هالاماكن ايييييييييييي شييييييييييييييي بس اهني لان ماكو سياحه وكل شي عليه قيود ف تلقين هذي طلعتها وكشختها وبالبيت جدام زوجها ما تكشخ طبعا كلامي وردي موجه بشكل عام وخاص بفئة معينه يعني لا تنط لي وحده تقتبس ردي عبالها اني معممه على كل البنات


طيب السؤال بنات ليش الاجنبيات ما يسوون جذي ؟؟؟ يعني لكل مقام مقال ؟؟؟

بس هالسوالف ما تلقينها الا بالمجتمعات المغلقة مع الاسف الاجانب بناتهم غير محجبات يقدرون يلبسون اي شي يبونه ليل نهار بس شوفيهم بالانستغرام عاديات ومع ذلك حلوات

 

[فديتني ،،!!]

مساكين حسبالهم بالكشخة ة و البهرجة الزايدة بيكونون شي ��و بعدين في فرق بين المظهر و العقل يعني طالعة بهالمظهر و عقلج فارغ مساكين اشفق ع هالاشكال مرضى

 

[أبلة فاتن]

بنات دشو الانستغرام شوفو بنات التجار ماشاءالله قمة بالتواضع والبساطة ولا انصدمت من وحده تقول عن شغله من ملابسها
من سنتر بوينت ولا مادري من وين ب 5 دنانير لا ويردون عليها يقولون من وين اي سنتر بوينت هههههههههههه ناس حشريين
طالعي تفكيرهم وتفكيرها مع ان تاجره بس ما تفرق معاهم شيء غالي ولا رخيص المهم انه حلو البنات اللي عاديات
لازم تجنن اهلها وتكلف عليهم فوق امكاناتهم بس علشان تكشخ حق ناس مادرو عنها ارضاء الناس غاية لاتدرك

 

[Japanese]

ابله فاتن صااججججهههه ،، ارقى مكان رحتله واللي فيه صج صج صج صج ناس اغنيا وفلوسهم تخرع في بيفرلي هيلز بكاليفورنيا

البنات هناك حتى بكافيهات ويا ربعهم مايسوون اللي يسوونه البنات هني لمن يروحون مجمعات وسوق @@ ولا حتى نادي

ايه نااااديييي رياضي!!! الله يستر ع اللي معانا فالنادي بس صراحه ودي ايودهم وحده وحده

الفل ميك آب بالنادي ليششششش؟؟ اخوي ذاك اليوم ياي النادي وحده انصدم مسكين :! قالي انتي من صجج تدشين هالنادي

مع ذولي والشعر الويفي واللي مادري شعلته انا استحي اطالعهم لآن ياو ف نادي من يسوي جذي

شي يفشللللل!!!​

 

[بنت خيطان]

والله العظيم اكثر الى اشوفهم مو كويتيات ؟

مالة داعى اقول منو ؟ هذول من الخليج وبس

محكورة فى ديرتهم وطلع حرتها عندنا

والكل حسبالهم كويتية ؟

الكويتية الاصيلة ما تسوى جذى وتستحى على نفسها

 

[blue ocean]

انا امس في 360 ولابسه جوتي رياضه وشكلي مرتب

سوالف البنات وحركاهم الأوفر ما ابلعها بالمره .. شوفوا حول العالم بتشوفون ناس وايد مرتبه وشكلها

حلو مو شرط خبه ولويه وفل ميكب ..

في شي اسمه ترتيب وذرابه هذي المعادله ماتحتاجلها خبه وممكن الوحده يطلع شكلها حلو وايد ومرتب


الزبده الذراااابه شغله مو الكل يعرفلها

قواج الله عالطرح خيتي​

 

[أبلة فاتن]

بنات تتوقعون السبب ان محد ملقيهم وجه مثلا ؟؟؟

البحث عن العريس ولا حبيب لقطه ؟؟

ههههههههههههههههه قمنا نشك صراحه لان شيء ملفت مافي بنت تحب تلفت

الانتباه بالمظهر بهالشكل الصارخ الا تعاني من نقص او تبي شيء في بعضهم

اذا طالعتيها تخزج جنها ودج تموتين يماااي انحشششششششششش