السلام عليكم ورحمة الله وبركاته
(الحمدلله الذي اطعمني هذا الطعام من غير حول مني ولا قوة )
ياهلااا بخواتي الغاليات
حمستنا اليوم..لذيذه وسهله..ومقاديرها بسيطه
وهالحمسه حلوة مع الخبز..واحلى مع عيش مشخول..وانتي وذوقج ورغبتج
نبتدي بسم الله الرحمن الرحيم
اول شي ..تنظفين الدجاجه وتغسلينها..وتنثرين عليها شوية طحين وعصير ليمون يسحبون اي زفره فيها..نخليها بالليمون والطحين حوالي ربع ساعه وعقب نغسلها..ونقطعها لثمان قطع مع الجلد..هو الي يعطي الدجاج النكهة للصلصه .
بمقلاة ..ويفضل مقلاة تيفال تحطين زيت وتشوحين الدجاجه على الصوبين..نبيها تكتسب اللون الذهبي الجذااب.
نخليها حوالي عشر دقايق واحنا نقلبها ليما تكتسب اللون المطلوب وتطرى..
وتالي نشيلها على جنب.
بنفس المقلاة نزيد شوية زيت ونحمس ثلاث بصلات مفرومين ناعم حيل..ليما يكتسبون اللون الاشقر..نضيف حوالي 3 او 4 فصوص ثوم مدقوقين ناعم ..مع شوية زنجبيل مفروم
ونحرك ..
ونضيف حوالي 3 طماطات مقصصينهم ناعم حيل ونحرك..ونحاول نهرس الطماط واحنا نحمس..
وطبعا كل شغلنا على نار متوسطه.
ولا شفنا الطماط تمازج مع البصل والثوم ..نضيف نص ملعقة اكل كزبره مطحونه..ونص ملعقة اكل بهارات مشكله (استخدم بهارات القوطي الاخضر الي عليه صورة سفينه ) ونص ملعقة اكل فلفل اسود ورشة كمون مطحون وربع ملعقة كركم وملح والكميه حسب الرغبه والذوق...
نحرك الحمسه مع البهارات..ونضيف قطع الدجاج الي شوحناهم بالزيت على الحمسه
ونضيف ملعقتين اكل معجون طماط وملعقتين اكل دبس الرمان ونص ملعقة شكر ( سكر ).
نحرك الحمسه.. علشان نخلي المكونات تمتزج مع بعض عدل...
ونخليها على نار متوسطه حوالي خمس دقايق وعقب نضيف حوالي قلاصين ماي ..ونخليها تتسبك على نار هاديه لمدة 40 دقيقه، والي تبي الصوص ثقيل تكتفي بالقلاصين..والي تبي الصوص خفيف تزيد نص قلاص بعد..آنا حطيت قلاصين ماي ( قلاص الجبن الكبار).
وضروري تغطين وتغمتين المقلاة بأي غطا..علشان تضبط معاج هالحمسه اللذيذه.
ونقلي بشوية زيت شرايح من الفليفله البارده للزينه..وتعطي طعم مميز لهالطبق.
اهني جهزت الحمسه..ياحلات الريحه...:rerrerek:
ونجبتها..عوافي على قلب الي اكلوها..وعوافي على قلب الي يبون يسونها وياكلونها..
احلى كويتيات..
احلى كويتيات..
تفضلوا..
واقبلوا تحياتي
بنتكم
حلوة ومملوحة الكويت
بنتكم
حلوة ومملوحة الكويت
التعديل الأخير:
