تجمع العرايس الي تأخر حملهم

[boliana_q8]

ها بنات بشروو

مافي حد حمل

ان شاءالله كلنا نحمل هالسنة قولي امين

 

[boliana_q8]

وينكم بنوتات مالكم حس

 

[وجع قلبه]

قوه بنات .. بشرونا انشاللله وحده فيكم حملت ..

الله يسلمكم انا رحت حق دكتوره كلمة عسل عليها شوية .. اللي اي امل الراشد ..
ودخلت عليها اهي بكبرها .. مو مثل ماجده تطرشج حق مساعداتها ..

والله يابنات كلامها يريح ويطمن .. وقالتلي انه انا وريلي سليمين 100% بس انا دورتي شوي متخربطه ..
ووصفتلي القرص منظم الدوره .. وقالتلي انه وانا اخذ القرص ممكن احمل .. يعني مايمنع الحمل ..

ووايد حثتني عالاحاديث .. والدعاء .. وقراة القران ..
ووايد نصحتني انه اريح نفسيتي وما افكر بالحمال وباذن الله بيصير ..

بالضبط نفس كلام ال عرف لمن رحتله ..

بنات الحين انا وريلي سليمين .. والحمدالله .. بس ياربي تعبت وانا انطر ..
اكيد انتو تييلكم فتره تبجون وتتكدرون وتتعب نفسيتكم :eh_s(11): .. نفس مايصير معاي ..:eh_s(2):
لان الناس الحين صارت تتعمد انها تضغط عالمواضيع اللي نتحسس منها ..
الله يسامحهم .. ويرزقنا الذرية الصالحه اللي تملي علينا حياتنا ..
لان اللي عدت السنتين مثلي .. اكيد اكيد .. صارت حياتها روتين قااااااتل .. وهذا الوقت اللي صج محتاجين فيه ياهل يقتل الروتين ويحسسنا انه كملت حياتنا الزوجيه .. ومشينا بثاني خطوه من بنيات بيت خاص فينا ..

استغفر الله واتوب اليه ..
اللهم لاتذرني فرداً وانت خير الوارثين :yaaaaaarb:

 

[خاله كندا]

:yaaaaaarb:ياااااااااااارب يفرحنا قريب ويعوض تعبنا بالذريه :ioljnmlk:الي تصحينا من عز نومنا .:eh_s(2):..لجله نقوم وننسى النومه ونضمه لين انفاسه تختلط بانفسنا وونطلع صدرنا:eh_s(2): ونشربه ونحس بلحظه حنان وانتي تلمسين وجه البرئ وتمسحين دمعته :eh_s(11):باصبعك الصغير وهو حاط يده ع صدرتس ............واااااي يارب ودي احس بذا الاحساس :krkrkr:

 

[الفجِر]

بنات الانسداد يصير للي دورتها منتظمه كل ٢٨ يوم تنزل
والا بس يصير للي دورتهم مومنتظمه؟

 

[orchidia]

الفجر عادي الي فيها الانسداد دورتها جدا عاااااادية

اختي كان فيها ودورتها عاادية حيييييييل

أنا بأنطر سنة ان ماصار حمل سويت أشعة الصبغة

 

[aseel &soso]

حبيبتي وجع قلبه أنا مثلك أخذت نفس الدوا هوه منظم دوره قرص مدور نص حبوب ابيض ونصه بني أنا أخذته مده شهرين والثالث كلوميد وحملت هذي الدكتوره شاكره تستمري معها وانشأ لله نسمع خبر حملك وتبشر ينا الله يرزقك وانشأ لله هذا الشهر ابي أخد نفس العلاج ودي احمل بنتي الحين عمرها عشر شهور وما صار حمل رح أبدء بعلاج لثلاثة شهور وبعدين أخد كل ميد الله يكتب لي الحمل لي ولكل محرومه انشأ لله ادع لي بنات

 

[وجع قلبه]

حبيبتي وجع قلبه أنا مثلك أخذت نفس الدوا هوه منظم دوره قرص مدور نص حبوب ابيض ونصه بني أنا أخذته مده شهرين والثالث كلوميد وحملت هذي الدكتوره شاكره تستمري معها وانشأ لله نسمع خبر حملك وتبشر ينا الله يرزقك وانشأ لله هذا الشهر ابي أخد نفس العلاج ودي احمل بنتي الحين عمرها عشر شهور وما صار حمل رح أبدء بعلاج لثلاثة شهور وبعدين أخد كل ميد الله يكتب لي الحمل لي ولكل محرومه انشأ لله ادع لي بنات

ياحياتي فرحتيني .. وطمنتيني .. الله يرزقج ولا ينسانااا .. :eh_s(17):
ويرزق كل محرومه يااااااااااااااااااااااااااااااااااااااااااااااااااااااااااارب

 

[عهد الغرام]

بوليانا طمنيني عنج ووجع قلبه ترا التفكير يأخر استأنسي سافرو يمكن تنسين والله يرزقج الشهر انشالله

 

[boliana_q8]

شلووووووووووووووووووووونكم بناااات
شخبااااااااااااااااااااركم
ادري ادري من زمان قطعت عنكم
بس تدرون كان عندي عملية منظار فتحت الانابيب
الحمدالله قبل اسبوعين سويتها
وانفتحت الانابيب عندي اشكرك يا رب
وااايد فرحت من النتيجة كنت حيل احاتي

بس تعبت شوي من العملية يعني دش فيني هوا ولعب فيني لعب
تخيلوا احس فيه يمشي من ظهري يوصل لي ارقبتي ويطلع من اذني
الله لا يوريكم تحسين جنه روحج تطلع
وكله مجابلة الدفاية وحاطة كمادات ولزقات حرارة
بس الحمدالله ثلاث ايام وتحسنت حالتي
والحين كلش ما احس بشي بس شوي بطني متفوخ

وان شاء الله ابشركم بالحمل

ويارب كلكم تحملون

الي طولت بالعلاج وماحملت ظروري تسوي اشعة صبغة تتأكد من الانابيب

 

[عهد الغرام]

فرحتني بولئلنا بالتوفيق والحمدلله انشالله تبشرينا بحملج يأرب

 

[orchidia]

حبيبتي بوليانا الحمدلله على سلامتج كنت أحاااااتيج

عقبال ماتفرحينا بحمااالج يااااااااااااااارب

والله فرحت لج

 

[خلصناعاد]

مرحبا خواتي انا اتابع المنتدى من زمان بس مافكر اسجل فيه الا لما شفت خواتي اللي يعانون من تكيس في المبايض فحبيت افيدهم والله الشاهد على كلامي
اخواتي اللي تعاني من تكيس في المبايض عليها بالمقل قريب شكله من المره بس لونه اغمق شوي تدخن به راح يطل منها مويه كثير لا تخاف عادي واذا جتها الدوره تحط كسره منه في فنجال وتصب عليه قهوه وتتقهوى عادي والله ييرزقني ويرزقكم الذرية الصالحه

 

[دنيا جديدة]

اسباب منسية للجبير
http://www.youtube.com/watch?v=kCmvN7mlp6M

 

[عيون&الريم]

مرحبا شلونكم

انا صارلي سنة وشهر وماحملت بس انا الحمدلله كل شي فيني تمااام بس مادري عن زوجي للحين ما فحص بس الحمدلله على كل شي صج انه خاطري باليهاااال خاطري الابس ملابس وسيعه واسوي احلى شوبنق حق البيبي واسوي احلى بيبي شور
وامشي بالبيبي بكل مكان بالعربانة واحلى الملابس اشتري له واقوم ابووووووووسه حيل واشيله واخذفه>>>لاا والله اتغشمر
:d:d:d

وبس عسى الله يرزق كل محرومة

 

[boliana_q8]

عهد الغرام
اوركيديا

تسلمون حبيبات قلبي
الله يسلمكم من كل شر

وان شاء الله تبشروني بحمالكم

 

[boliana_q8]

خلصنا عاد

تسلمين على هالمعلومة
ان شاء الله البنات يستفيدون

 

[boliana_q8]

عيون الريم
انتي عديتي سنة الحين لازم تراجعين وتفحصين
انا مافيني شي وزوجي مافيه شي
والحين بيصيرلي سنتين ماحملت
اخر شي طلعت الانابيب عندي مسكرة

يعني ابدي راجعي واذا في مشكلة حليها
وباذن الله تحملين

 

[om_fajer83]

انا ودي اسوي اشعة الصبغة بس يقولون تعوووور

انا زوجي في دوالي هي اللي مأخرتنا سنتين الله يعين بسسس

 

[أملي بعد الله]

بنات مآدري جان تذكروني وله لاء :eh_s(22):

أنا كنت أدش بين فترة وفترة هني:eh_s(22):

أنا أبشركم خواتي أنا حامل بفضل الله :eh_s(22):

والحين بالشهر الثاني ماشاء الله تبارك الله :eh_s(22):

الفال لأختي بوليانا يااااارب وكل عروس تأخر حمالها ياااااحي ياقيوم يااااااربي

أنا حملت بعد سنة وشهر تقريباً

والحمدلله رب العالمين

بنات عليـــكم بالمرمية من بعد الله :eh_s(15):

كانت السبب في حملي من بعد رب العالمين سبحانه

شربتها من أول يوم لحد يوم 12 من الدورة

اسويلي دلة صغيرة تكفي كوبين ونص باليوم

واحطها مع شكر واصب عليها ماي حار واخليها تخدر واصب لي كل شوي

وكنت آكل عين جمل على الريج مخلوط مع لوز وزبيب

وآخر 3 أيام من الدورة كل يوم أشرب عصير اناناس طبيعي

وكنت أسوي رياضة

وقمت الليل بسورة البقرة أكثر من ليلة

وبرنامجي كان واااايد طويل بس تصدقون ماحسيت فيه

بكتبه لكم بالتفصيل

1- دلة صغيرة فيها دارسين وجنزبيل وشوية يانسون وعليها ماي حار = يكفيج كوبين ونص باليوم/ الجنزبيل يرقق جدار البويضة ويخليها تخترق بسهولة من الحيوان المنوي .
2- دلة صغيرة فيها مرمية وشكر وعليها ماي حار = تكفيج بعد كوبين ونص باليوم .
3- عين جمل ولوز وزبيب على الريج كل يوم لحد آخر يوم بالدورة وهو ممتاز للرحم.
4 - الرياضة وخصوصاً المشي تنشط الأرحام والتبويض .
5-عصير أناناس عدد 3 علب حق آخر ثلاث أيام بالدورة .
6-التدفي مهمممممممممم خلي الدفاية يمج ولبسي هدوم تدفي ودلاغات.
7-قيام الليل , وكثرة الدعاء والتقرب لله سبحانه وكثرة الإستغفار , وقراءة سورة البقرة وقيام الليل فيها .
8-عسل أصلي يومياً آخذ قفشة وأحط عليها رشاد أنثره وابلعه ينظف الرحم والعسل مقوي للرحم واااااااااايد ممتاز عن تجربة .
9-كليت عصيدة تمر وكثرت فيها التمر مع الدبس والفلفل الأسود والهيل والزعفران كليتها ثلاث مرات بالدورة .
10- كليت تمر مخلوط مع سمسم وسويدة ويانسون .
11- بعد ماتطهرين وبعد كل جماع رفعي ريولج وحطي تحتج مخدة عودة ونطري نص ساعة إلى ساعة وبعدين قومي غسلي .

وهذا اللي سويته يابنات وسبحان الله الله كتب لي الحمل ولله الحمد وعوض صبري ادعوا لي ربي يثبته والله يرزقكم

عاد تصدقون قلت لو ماحملت هالشهر خلاص ببتدي مراجعات بالمستشفى:eh_s(4):

لكن رحمة الله وسعت كل شيء وأكرمني له الحمد وله الشكر ولو أسجد شاكرة طول عمري ماوفيت ربي حقه

مانسيتكم والله انكم ببالي وحبيت أفيدكم ببرنامجي :eh_s(22):

وبإذن الله تبشرونا جريب بحمال كل وحدة فيكم
:yaaaaaarb: