مات النقاش بيني وبين ريلي

[اوركيدا]

السلام عليكم ..

بدش بالموضوع على طول ..

ماتت جميع طرق الحوار والنقاش بيني او بينه ..

الصبح مستعيل بيروح الدوام او عالعموم اول مايقعد من النوم ممنوع اي نوع من انواع النقاشات او للأمانه انا بعد الصبح مااقدر اكلمه في اي نقاش ممكن يوصل لنوع من الحديه .. اقعد له من الصبح مع اني ماشتغل بس عشان ازهب اغراضه او اتريق معاه هذا اذا تريق مره او بالكثير مرتين بالاسبوع ..

طول وقت الدوام مشغول .. اي وقت ادق عليه .. بالضبط هذي المكالمه ..

انا : ألو
أهو : ها !
انا: مشغول؟
أهو : اي في شي؟
انا : لا سلامتك .
أهو: جرااااااااخ .. يعني صك التلفون

نادر اللي يتصل لي يسأل عني .. ساعات تطول المكالمه شوي بس لو اييه خط واحد سيده يسكره او يعطيني جمله تسم البدن اني معطلته عن شغله!

الظهر .. ماله موعد رجعه معين لظروف شغله .. ممنوع أساله متى بترجع؟ مع انه نيتي من السؤال بس عشان اعرف اتغدى .. او انتظر .. او ساعات اييني متريق متأخر شبعان او يحط راسه وينام ..

ساعات مايرجع البيت يكمل مشاويره او يرجع العصر متكسر او ماله خلق شي وسيده ينام ..

يقوم من النوم مزاجه معتفس .. فطبعا مانقدر نتكلم ..
ساعات نطلع بالسياره واقول هيااااااا هذي حزتي من ابتدي بتكلم .. سيده يرد علي .. عاد احنا طالعين نستانس لاتنكدين .. اقوله عادي انا بسولف مابتهاوش .. انا بس ابي اقولك اللي في قلبي او مضايقني .. هذي يعني اعلنت الحرب او يا يسكت اهوا والطوفه واحد و يثور دمي .. او يقلب الدنيا على راسي ويسمعني من السم اللي الله لايوريكم.

بالويك اند .. لاتنكدين علي انا طول لسبوع تعبان او اللحين ابي استانس .. مابي مشاكل او عوار راس عندج حجي خليه بعدين او هالبعدين اللي عمره ماايي ..

لو بغصبه او باتكلم .. مابيتناقش ولا بيقولي ولاشي .. في احسن الحالات .. بيقولي اسف او بيسكت! .. او اسأله على شنو بالضبط قاعد تتأسف .. تنقلب الدنيا على راسي طبعا ويقولي انتي ماتعرفين شتبين كلشي مايرضيج الواحد لازم يحب ريلج عشان ترضين! والله يابنات انا لا عسره ولاشي بالعكس الكلمه الحلوه اللي طالعه من نفس الواحد تنسيني كلشي! بس اهوا مايبي يعرف لي ..

انا احبه او دايما اقول مشاكلنا عاديه .. بس وين العاديه لما يكون مافي نقاش بالمره ..
او شي ثاني طبع وايد كريهه في زوجي انه لما يعصب ينسى كل شي ويغلط بالأولي والتالي ويقط كلام والله استحي حتى اقوله ..

سب يقشعر له جسد الواحد لكني اسكت او اصبر روحي او ادعي له قايمه او قاعده تعبت .. حاولت اكتب له برساله , بمسج , اعزمه على مطعم او احاول اكلمه بهدوء ألف او ادور بالسالفه او اييبها عاديه ماكأنها شكوه .. اذا الطوفه بتكلم او بترد اهوا بيرد .. او اذا كلش كلش قالي اسف. فقط لا اكثر ولا اقل.

كل يوم اقول بنتظر يعتدل مزاجه قاعد يسوء ..
انا احبه او ادري انه يحبني او عنده مشاكل بس هالمشاكل ماتخلص , كلنا عندنا بلاوينا او مشاكلنا او انا مشاركته بكل شي .. او اسمع اللي بقلبه .. لكن انا ماعندي احد يسمعني .. لو بيصير لي شي مع اي احد يضايقني ودي اقوله .. دايما يحسسني اني ماعندي سالفه او مشاكلي ولا شي .. مايوقف وياي ابد او ياخذ اللي بخاطري .. أبد او هذي اللي ذابحني اكثر شي ..

سالفه عاديه اسولف له فيها .. بالصدفه اصيد انه ولايدري عن شنو قاعده اتكلم ... بس يقول لي اي , اي ..
مثال: قاعده اقوله اليوم عندي متحان .. يقول لي ها زين.. اقوله: اللحين وقت لمتحان: يقولي: اي زين! .. اقوله شنو زين اولاً متحان او ثانيا اقولك اللحين عندي امتحان او انا مقعده جدامك بالبيت ! .. طبعا اللحين صرت اسكت او اسايره بس اوريكم مثال .. باله ابد مو وياي ..

شي لازم اوضح لكم اياه .. دوامه كله انا ادري عنه او عن مشاكله .. او ماعنده ريلي سوالف ديوانيات او تلفونات .. ربعه اعرفهم او محددودين اللي يشوفهم يومياً او يمكن بالويك اند بالشهر مرتين يروح ديوانيات ربعه .. او تلفونه كله مقطوط عندي عادي .. يعني مو راعي لعبه ولاشي اصلا ماعنده وقت . بس مولاقيه تفسير لتصرفاته

استخدمت اسلوب التطنيش .. ابتدائاً من الليله .. كلمني رديت عليه على قد السؤال بالضبط مثل اسلوبه وياي ..حتى سألني مرتين فيج شي قلت له لا .. بتقولون هذي فرصتج دام سألج والله لو متكلمه جان اللحين قبت السالفه لي السمى .. يسألني او في نفس الوقت مايبي يسمع ..

صرت اخاف منه او اخاف من حياتي وياه .. والله لو ازعل او اموت روحي من البجي اكثر شي يسويه يلمني .. مايتكلم ذبحني .. مو انه مايتكلم .. يسولف عن الشغل .. عن المواقف اليوميه العاديه بس انا مايسمعني ... والله انا لاني ثقيلة ولاسوالفي ممله .. ولا افج حلجي ولا اسكت بالعكس .. هالسالفه بس طولت لكم فيها عشان تعرفون التفاصيل ..
انشاءلله اكون وصلت نقطتي وانتظر مشورتكم .. انا احبه او اهوا يحبني او ماكنا جذي قبل .. هالفتره بس صاير او كل يوم اقول باجر بيصير احسن صار لنا سنه او اكثر يمكن على هالحال .. يوم حلو او عشرة ايام ظلمه او كآبه..

انا نوعي احب الوناسه السفر السوالف اليمعات التغيير .. اهوا صاير شي ماينشرح والله!
شاسوي ​

 

[Pink Doughnut]

السلام عليكم اختي
بصراحة آنا مو متزوجة وماعندي خبرة بس ماحبيت ادش وماأرد عليج
اللي فهمته من كلامج انج محتاجة له يمج .. ودج تتكلمين معاه ومو لاقيته واهوا مو معطيج فرصة حتى !
من رايي احسن حل انج تييبين ورقه وقلم .. باسلوب حلو تكتبين له اللي بقلبج
منها تاخذين راحتج و تقولين اللي بخاطرج كله وتفكرين عدل بكلامج لان الانسان لما يتكلم بلحظات الانفعال غالبا يتحسف على كلامه او بعضه .. المهم عقب ماتكتبين هالرسالة .. ختميها بعبارة ( أحبك حبيبي ولا تاخذ بخاطرك إذا خانني التعبير بس والله من حبي لك أبي حياتنا تصير أحلى وأحلى)
ومايمنع انج تحطين له وردة وهدية يم الرسالة وان شاءالله خيـر
وسامحيني على القصور

 

[qa6wa_q8]

شوفي حبيبتي علييج بورقه تكتبينهاا وتغلقينهاا بمكاان يقرااهاا فييه ونطري النتيييييييييييجه والله يسخره لج ويسعدكم

 

[احلى من الحلى]

اشدعوى ريلج سكر على سى السيد كلميه ليه متى جذى انتى زوجتى ليش اتخافين منه لا قعدى معاه وقوليه اسمعنى لين الاخير انت مومتزوج طوفه اذا انت طول اليوم ماتعطينى مجال اكلمك حددليى وقت اكلمك
لاتخافين شنو بسويلج ربج معاج والله مايرضه بالظلم
قوليله اذا مااكلمك اكلم منو ؟؟؟؟؟؟؟؟؟؟؟؟؟؟؟؟

 

[جروح تلفانه]

اوركيدا.. انا عندي نفس مشكلتج بالضبط وكنت كله اشكي عند من هالشي وفعلا سمعت نصايح كثيره من ضمنها سالفة الورقه فعلاًً رحت وكتبتله اللي بجاطري وحطيتها بمخباته وبعد ماطلع الدوام دزيتله مسج وقلتله شوف اللي بمخباتك بس انا لما كتبت الرساله حطيتله ملاحظه تحت: وقلتله انا تعبانه حيل من هالمعامله وهالطريقه اللي نعيشها واكدت عليه يكتبلي رد وفعلا لماقعدت من النوم لقيته حاطلي ورقه على الطاوله: وقاياي انا احبج بس ما احب ابين هالشي ومو ضروري كل شي بقولج حبج وقال كلام مو مثل اللي كنت اتمناه؟
بس انا قمت اغير من حياتي صرت كل بين فتره وفتره اغير اللوك وازيد بهالكلام الحلو وادز من هالمسجات الزينه واذا كنت نايمه عند اهلي ورديت البيت لازم اكشخ حدي لاني اكون غايبه عنه يومين وجذيه شويه مرقعه بالسالفه


((اللي بيقرا سالفتنا بيقول هذيل هنود؟؟ هم وازواجهم بشقه وحده ويتكلمون بالرسايل))

اتمنالج التوفيق انشالله

 

[om-7arib]

طريقة حلوه للتغيير يا وردة العشاق
إن شاء الله تفيد اوركيدا... أنا و زوجي وااااااااااااااااااااااااااااااااااااااااايد نتكلم بالمسجات قمت ما أعرف أكلمه ويه بويه بصراحه من كثر ما أكلمه بالمسجات ,,

 

[الحب الخالد]

الله يعينج والله كسرتي خاطري مادري شنو اقولج بس سالفة الرساله حلوه جربيها
لكن الافضل لج انج ما تتاملين منه انه يتعدل بيوم وليله ترا صعبه وانا باعتقادي اذا انتي تبينه يتغير حتى اهوا يبيج تتغيرين
حاولي تكونين مثل ما يبيج بالاول وحطي له اعذار الرياييل غيييييييييييييييييير وايد عنه اخنا الحريم
الله يغيره للأفضل يارب ويسخره لج

 

[Hello_kitty]

الله يعينج حبيبتي..

والله فاهمتج وحاسة بكل كلمة تقولينها انتي محتاجة حنانه حبه مشاعره

محتاجة يعطيج من وقته واهتمامه...

حبيبتي هذا طبع ريلج مو من النوع اللي يقدر يعبر عن مشاعره يمكن يكون بقلبه كلام وايد حلو حقج

وحاس بتقصير معاج بس ما يعرف ولا عنده حتى الجرأة ان يتعلم اشلوون يتكلم!!


طبعه هذا ماراح يتغير بين يوم وليلة واذا تغير شي بسيط حاولي تأقلمين نفسج عشان ما تتعبين اكثر

وتكتبيله رسالة نفس ماقالوا البنات وطلعي كل اللي في قلبج حتى لو كانت ردة فعله على الرسالة مو مشجعة بس اهم شي طلعتي اللي بخاطرج... وبينيله ان اهو زوجج وحبيبج اذا ما سمعت منك الكلام الحلو ولقيت الاهتمام منك القاه من منو؟؟؟

انه مالي احد غيرك انتي زوجي وحبي وكل دنيتي....

وبعدين استنتجت من كلامج ان ريلج مصرقع عصبي لا تواجهينه وتكلمينه مباشرة بمعنى ما ينفع معاه تلومينه وتعاتبينه لان هالأسلوب ما يفيد وياه بيزيد ويضرخ اكثر ويقلب عليج السالفة...

الحل انج بدال ما تذمينه او تلومينه مدحيه قصي عليه بالكلام الحلو مثلا انه استانس عليك لما تلمني وتدلعني واي اموت عليك لي سويتلي جذيه>>اهنيه اهو بيطير من الفرحة وبيحاول يسوي اللي قلتي عليه
ويثبت ان هالشي فيه

قوليله واي عليك كلام يفتت الصخر تذوبني بكلامك اشعرفك هالسوالف الحلوة>>اهني بينتفخ ويصدق عمره وبيصير اسلوبه حلو معاج لانج اوهمتيه ان اهو جذيه او عززتي فيه هالصفة

وعليج بالدعاء الله يسخره لج ويحنن قلبه عليج يارب

ولا تضيقين خلقج اغلب الرياييل جذيه الحمدلله والشكر نار وشرار واعصاب ونفس خايسه

 

[ام ناييف]

انا لي 8 سنين متزوجه واحد نفس ريلج ما نتكلم بس بالعيون
اتكلم منيه الى بكره ما يرد يبتسم بصمت
مع انه لما يكلم ربعه اكثر الكلام له
عند امه وخواته يقول كل اللي في بطنه
انا لا ساكت وان الله فتح عليه وتكلم قال شي يسم البدن
صرت اتمنى سكوته بدل كلامه


هذا انا صابرة والله يفرجها لي ولك

 

[جوك احلى جو]

؟؟؟؟؟؟؟؟ ياربي ليش الرياييل جذي


داشه لقافه

 

[شمع تحترق]

حبيبتي انا مع اللي يقولون لج ابديها برساله و شوي شوي بيتغير طيعيني تري انا كنت جذي و الحين الحمد لله تغير

و عليج فيه بالمسجات و خصوصا لما تكونين مو معاه او بالدوام اهو

لا تخلين كل المسجات الحلوه من نكت عشان يبتسم شوي و أشعار و كلام حب و غزل

و خلج شاطره و تحرشي فيه لما يرد البيت من سوالف و غشمره و كله

و ما اوصيج بالمسجات اللي خبرج من ولهانه عليك و انتي رايحه بيعيها بالمسجات و الله بينتبه لج يا الغاليه مو بكيفه غصبن عليه

و اذا تقدرين عليه تسافرون يكون افضل و حسسيه انه معرس يديد و بشوفين يا قلبي بينسي الهموم انشاء الله على أيدج

 

[كـلا كـلا]

حبيبتي
انتي طلبتي راينا وانا بقولج رايي ولا تزعلين

اعتقد ان اهو يشوف انج نكدية لانه كل تشتكين وتبين تحلين المشاكل اللي على قولتج - عادية -
ولازم تعرفين ان طبع الريال غير عن المرة
احنا الحريم نحب نشكى حق بعض ونلقى تعاطف من بعض
بس الرياييل مايحبون يسمعون هالسوالف
واذا سمعها ماراح يكون متعاطف
لا - على طول بيفكر بحل عشان يعطيج اياه - وهذا طبع الريال
واذا كان يرى ان المشكلة مو مشكلة اصلا
بيعتبر انها مسألو عادية ما تستاهل النكد والبجي
اوركيدا
عيشي حياتج استانسي وخليج دايما مبتسمة
ونفسج حلوة
لا تنكدين عليه ولا تدقين عليه خليه اهو يدق
بتقولين ماراح يدق!
اوكي لا يدق
بس لما يرد ويشوفج مبتسمة وولهانة ( بي مو تتلزق أو تتشره) مو مادة البوز
بيشتاقلج
اهو يشوف انج لزقة ونكدية - عفوا مابي ازعلج بس هذا اللي فهمته


طلعي مع خواتج واستانسي
اقصد لا تبين له ان بس اهو اللي يعرف يونسج واذا ما طلعج معناته خلاص

باختصار

اقري كتاب رجال من المريخ ونساء من الزهرة

وموفقة

 

[اوركيدا]

السلام عليكم اختي
بصراحة آنا مو متزوجة وماعندي خبرة بس ماحبيت ادش وماأرد عليج
اللي فهمته من كلامج انج محتاجة له يمج .. ودج تتكلمين معاه ومو لاقيته واهوا مو معطيج فرصة حتى !
من رايي احسن حل انج تييبين ورقه وقلم .. باسلوب حلو تكتبين له اللي بقلبج
منها تاخذين راحتج و تقولين اللي بخاطرج كله وتفكرين عدل بكلامج لان الانسان لما يتكلم بلحظات الانفعال غالبا يتحسف على كلامه او بعضه .. المهم عقب ماتكتبين هالرسالة .. ختميها بعبارة ( أحبك حبيبي ولا تاخذ بخاطرك إذا خانني التعبير بس والله من حبي لك أبي حياتنا تصير أحلى وأحلى)
ومايمنع انج تحطين له وردة وهدية يم الرسالة وان شاءالله خيـر
وسامحيني على القصور

هلا والله حبيبتي ..
كلامج صح او انا وايد احاول امسك نفسي لما اكون معصبه ..
بس ساعات صج يطلع الحجي مني من الزوووور! .. او اتحسف عليه
انا انشاءلله راح اجرب سالفة لورقه وقلم المشكله اهوا ماينعرف له ..
ميته خوف اني اسويها ويقولي مااحب اقرى رسايل!! .. عادي اتوقع هالكلمه منه .. او وايد بتجرحني
لأني قبل على طول اطرش له مسجات خصوصا بوقت الخطوبه كنت كل ماقوم الصبح اطرش مسج ..
او لي زعلت اشرح له كلشي بمسج .. او انقى كلامي نقوه ..
او احاول مالومه بس احاجيه من باب انه عشان ماتصير بينا مشاكل! تصوري في يوم كلمني بعد ماطرشت له المسج .. ماياب طاريه او انا قاعده ساعه انقي بالكلمات!
جان اقوله قريت مسجي .. إلا يقول .. لا انا مب متفرغ او انا ماحب اقرى مسجات!! :0bee2e8d89:
مت من القهر حسيت كأنه كاتين علي ماي بارد! ..
او مايوز بين فتره او فتره ادز له لكن اذا الطوفه بتعلق اهوا بيعلق!

شوفي حبيبتي علييج بورقه تكتبينهاا وتغلقينهاا بمكاان يقرااهاا فييه ونطري النتيييييييييييجه والله يسخره لج ويسعدكم

انشاءلله ياعمري بحاول مع اني مااظن , لكن التجربه ماتضر .. مشكوره حبيبتي ..

اشدعوى ريلج سكر على سى السيد كلميه ليه متى جذى انتى زوجتى ليش اتخافين منه لا قعدى معاه وقوليه اسمعنى لين الاخير انت مومتزوج طوفه اذا انت طول اليوم ماتعطينى مجال اكلمك حددليى وقت اكلمك
لاتخافين شنو بسويلج ربج معاج والله مايرضه بالظلم
قوليله اذا مااكلمك اكلم منو ؟؟؟؟؟؟؟؟؟؟؟؟؟؟؟؟

باجرب جملتج , بس المشكله انا دايما ابي الوقت الصح .. او معاه هالوقت الصح عمره ما أيي! لاعت جبدي

اوركيدا.. انا عندي نفس مشكلتج بالضبط وكنت كله اشكي عند من هالشي وفعلا سمعت نصايح كثيره من ضمنها سالفة الورقه فعلاًً رحت وكتبتله اللي بجاطري وحطيتها بمخباته وبعد ماطلع الدوام دزيتله مسج وقلتله شوف اللي بمخباتك بس انا لما كتبت الرساله حطيتله ملاحظه تحت: وقلتله انا تعبانه حيل من هالمعامله وهالطريقه اللي نعيشها واكدت عليه يكتبلي رد وفعلا لماقعدت من النوم لقيته حاطلي ورقه على الطاوله: وقاياي انا احبج بس ما احب ابين هالشي ومو ضروري كل شي بقولج حبج وقال كلام مو مثل اللي كنت اتمناه؟
بس انا قمت اغير من حياتي صرت كل بين فتره وفتره اغير اللوك وازيد بهالكلام الحلو وادز من هالمسجات الزينه واذا كنت نايمه عند اهلي ورديت البيت لازم اكشخ حدي لاني اكون غايبه عنه يومين وجذيه شويه مرقعه بالسالفه


((اللي بيقرا سالفتنا بيقول هذيل هنود؟؟ هم وازواجهم بشقه وحده ويتكلمون بالرسايل))

اتمنالج التوفيق انشالله

انا ريلي عادي يطنشني بسالفة الرساله او حتى مايقراها او يذبحني من القهر .. كله يقولي انا مااحب اقرى! .. اقل شي اقولج مسجات حب اكتبها له من قلبي او اتعب عليها او لما اسأله شفت المسج .. يقولي " حبيبتي انا مب متفرغ للمسجات اللحين" أو " انا قايل لج ماحب اقرى مسجات! ".

او عن سالفة لنيو لك .. مايحب الشعر القصير , فانا حاطه حيلي بالصبغات او بالملابس .. او اهوا فيه الزين هالشي يمدح .. او يحسسني يعني من هالناحيه .. او للأمانه مايناديني إلا بعمري او حياتي .. لكن وقت السوالف او المشاكل او لما اتضايق .. اخر واحد يصف وياي او ياخذ اللي بخاطري اهو!

بس انشاءلله باجرب او ادعو لي!​

 

[اوركيدا]

طريقة حلوه للتغيير يا وردة العشاق
إن شاء الله تفيد اوركيدا... أنا و زوجي وااااااااااااااااااااااااااااااااااااااااايد نتكلم بالمسجات قمت ما أعرف أكلمه ويه بويه بصراحه من كثر ما أكلمه بالمسجات ,,

انا ريلي مايحب يكتب مسجات ابد .. حد No او Yes ..
قبل من زمان كان يكتب لي لما اسافر .. يعني بالسنه 3 او 4 مسجات ..
اللحين مافي ابد!

الله يعينج والله كسرتي خاطري مادري شنو اقولج بس سالفة الرساله حلوه جربيها
لكن الافضل لج انج ما تتاملين منه انه يتعدل بيوم وليله ترا صعبه وانا باعتقادي اذا انتي تبينه يتغير حتى اهوا يبيج تتغيرين
حاولي تكونين مثل ما يبيج بالاول وحطي له اعذار الرياييل غيييييييييييييييييير وايد عنه اخنا الحريم
الله يغيره للأفضل يارب ويسخره لج

انا بالنسبه للتغيير قاعده احاول .. او من يقولي شي عاجبه اكثر منه .. يعني ساكته عنه دايما عشان شنو! عشانه احاسب حق وقت اللي يكون تعبان او متضايق او لي عصب اخليه يطلع حرته فيني ويقط علي سم الهاري او اسكت او بعد فتره لي حس بروحه .. او اعتذر طبعا بكلمه وحده اسف .. مايشرح ويبرر اقوله معليه حبيبي مو مشكله انت معصب او نسيت الكلام اللي قلته لي .. حتى ساعات قبل لايتأسف .. ابتسم له عشان ابين له اني مسامحتك .. شاتغير اكثر من جذي عيزت او انا ادوس على نفسي عشانه ..​

 

[اوركيدا]

الله يعينج حبيبتي..

والله فاهمتج وحاسة بكل كلمة تقولينها انتي محتاجة حنانه حبه مشاعره

محتاجة يعطيج من وقته واهتمامه...

حبيبتي هذا طبع ريلج مو من النوع اللي يقدر يعبر عن مشاعره يمكن يكون بقلبه كلام وايد حلو حقج

وحاس بتقصير معاج بس ما يعرف ولا عنده حتى الجرأة ان يتعلم اشلوون يتكلم!!


طبعه هذا ماراح يتغير بين يوم وليلة واذا تغير شي بسيط حاولي تأقلمين نفسج عشان ما تتعبين اكثر

وتكتبيله رسالة نفس ماقالوا البنات وطلعي كل اللي في قلبج حتى لو كانت ردة فعله على الرسالة مو مشجعة بس اهم شي طلعتي اللي بخاطرج... وبينيله ان اهو زوجج وحبيبج اذا ما سمعت منك الكلام الحلو ولقيت الاهتمام منك القاه من منو؟؟؟

انه مالي احد غيرك انتي زوجي وحبي وكل دنيتي....

وبعدين استنتجت من كلامج ان ريلج مصرقع عصبي لا تواجهينه وتكلمينه مباشرة بمعنى ما ينفع معاه تلومينه وتعاتبينه لان هالأسلوب ما يفيد وياه بيزيد ويضرخ اكثر ويقلب عليج السالفة...

الحل انج بدال ما تذمينه او تلومينه مدحيه قصي عليه بالكلام الحلو مثلا انه استانس عليك لما تلمني وتدلعني واي اموت عليك لي سويتلي جذيه>>اهنيه اهو بيطير من الفرحة وبيحاول يسوي اللي قلتي عليه
ويثبت ان هالشي فيه

قوليله واي عليك كلام يفتت الصخر تذوبني بكلامك اشعرفك هالسوالف الحلوة>>اهني بينتفخ ويصدق عمره وبيصير اسلوبه حلو معاج لانج اوهمتيه ان اهو جذيه او عززتي فيه هالصفة

وعليج بالدعاء الله يسخره لج ويحنن قلبه عليج يارب

ولا تضيقين خلقج اغلب الرياييل جذيه الحمدلله والشكر نار وشرار واعصاب ونفس خايسه

حبيبتي بالضبط الاشيا اللي ذكرتيها انا محتاجتها ..
او مطبقة الكلام او بس باقيلي محاولة الرساله .. اللي ابيكم تساعدوني في كتابتها عشان ماتنقلب ضدي ..

تصدقين .. ساعات يطرش لي مسج بالسنه مره .. اقوله اني وايد استانست بالمسج .. او اتصل له كل شوي اقوله مب عارفه شلون اعبر لك شقد مأنسني الكلام اللي بالمسج ..
والله والله ياوخيتي جني اقوله! لاتطرش لي مره ثانيه .!!!

ساعات اقوله احب لما تمسك يدي بالسياره .. نااااااادر اللي يسويها ودي مره يبدي فيها اهوا او يسحب يدي .. مايسوي هالشي إلا لما يحس اني زعلانه ويكون صج جرحني او مايبي يعتذر .. يعني نادر لاني والله نوعي اطوف ..

تعبت مو عارفه شلون اشرح لكم اسلوبه الغريب .. بس الشي الوحيد اني دايما اشوف انه شره كثر خيره او هالشي مصبرني بس ودي احل مشكلتي ​

 

[اوركيدا]

انا لي 8 سنين متزوجه واحد نفس ريلج ما نتكلم بس بالعيون
اتكلم منيه الى بكره ما يرد يبتسم بصمت
مع انه لما يكلم ربعه اكثر الكلام له
عند امه وخواته يقول كل اللي في بطنه
انا لا ساكت وان الله فتح عليه وتكلم قال شي يسم البدن
صرت اتمنى سكوته بدل كلامه


هذا انا صابرة والله يفرجها لي ولك

يمه يعني هذي مستقبلي ! ..
انا بعد لانه نفسج .. لي يبي يتحجى مايسكت وياربعه .. بس وياي تقولين حالف!
شلون يقدرون شهالقلب! ..
عاد انا ماعرف حق لغتة العيون .. شهالوهقه!
الله يفرجها علينا .. امين

؟؟؟؟؟؟؟؟ ياربي ليش الرياييل جذي


داشه لقافه

بتعيشين او بتشوفين :tomato2:

حبيبتي انا مع اللي يقولون لج ابديها برساله و شوي شوي بيتغير طيعيني تري انا كنت جذي و الحين الحمد لله تغير

و عليج فيه بالمسجات و خصوصا لما تكونين مو معاه او بالدوام اهو

لا تخلين كل المسجات الحلوه من نكت عشان يبتسم شوي و أشعار و كلام حب و غزل

و خلج شاطره و تحرشي فيه لما يرد البيت من سوالف و غشمره و كله

و ما اوصيج بالمسجات اللي خبرج من ولهانه عليك و انتي رايحه بيعيها بالمسجات و الله بينتبه لج يا الغاليه مو بكيفه غصبن عليه

و اذا تقدرين عليه تسافرون يكون افضل و حسسيه انه معرس يديد و بشوفين يا قلبي بينسي الهموم انشاء الله على أيدج

انشاءلله باجرب سالفة الرساله بس ساعدوني بكتابتها .. باقولكم بالضبط النقاط اللي ابيها او ابيكم تساعدوني

بالنسبه للمسجات مافي فايده .. يكره المسجات او دايما يدقرني حتى لو تعبت اكتب له او اطلع له حجي من كل مكان مايقرى او اذا علق يقولي ماعندي وقت اقرى مسجات!!!!! اخ يقهر!

دايما لما ايي بتغشمر وياه يحسسني اني بايخه او ماعندي سالفه .. تمللت منه اهوا ثقيل الطينه! هههه ​

 

[اوركيدا]

حبيبتي
انتي طلبتي راينا وانا بقولج رايي ولا تزعلين

اعتقد ان اهو يشوف انج نكدية لانه كل تشتكين وتبين تحلين المشاكل اللي على قولتج - عادية -
ولازم تعرفين ان طبع الريال غير عن المرة
احنا الحريم نحب نشكى حق بعض ونلقى تعاطف من بعض
بس الرياييل مايحبون يسمعون هالسوالف
واذا سمعها ماراح يكون متعاطف
لا - على طول بيفكر بحل عشان يعطيج اياه - وهذا طبع الريال
واذا كان يرى ان المشكلة مو مشكلة اصلا
بيعتبر انها مسألو عادية ما تستاهل النكد والبجي
اوركيدا
عيشي حياتج استانسي وخليج دايما مبتسمة
ونفسج حلوة
لا تنكدين عليه ولا تدقين عليه خليه اهو يدق
بتقولين ماراح يدق!
اوكي لا يدق
بس لما يرد ويشوفج مبتسمة وولهانة ( بي مو تتلزق أو تتشره) مو مادة البوز
بيشتاقلج
اهو يشوف انج لزقة ونكدية - عفوا مابي ازعلج بس هذا اللي فهمته


طلعي مع خواتج واستانسي
اقصد لا تبين له ان بس اهو اللي يعرف يونسج واذا ما طلعج معناته خلاص

باختصار

اقري كتاب رجال من المريخ ونساء من الزهرة

وموفقة

حبيبتي انا كاتبه او مستعده اسمع النقد فعادي حبيبتي مافي زعل بالعكس اخذي راحتج ..
تهقين يعني انا ممكن اكون نكديه؟
بس والله اهوا السوالف اللي مايسمعها عاديه مو بس المشاكل .. يعني لو بسولف له باحداث اليوم او سوالف عاديه .. نادر مايتفاعل وياي او يرد علي او ياخذ او يعطي ..

انا اطلع على طول مع ربعي او خواتي .. او ارد عادي .. ما الزمه بالطلعه .. او ابتسم بس ساعات انقهر من زور .. مايقدر ايام الدوره اني اكون متضايقه .. سيده يقلب علي او انا اكون متضايقه فتكبر السالفه عرفتي ..

لكن انا انشاءلله بسكت او بشق له الحلج 24 ساعه .. ادري باتعب او وايد بيكون ضغط نفسي بس بحاول انشاءلله

مشكوره حبيبتي .. ​

 

[كـ غلا ــلي]

شوفي اروكيدا اغلب البنات انصوج بالرساله مع اني ضد الفكره وبقولج ليش! بس انتي جربيها من باب التجربه مره
دام على قولتج المواجهه ما فادت بس علميه انه يكون فيه نقاش شنو رساله اكتبها ولا مسج ترا والله يا بنات الزواج
مايصير بالطريقه هاذي حتا وحده من الخوات بنفسها ازلقت بلسانها وقالت : صرت ما اعرف اكلمه مباشر يعني عبالكم
جذي زين مره متزوجه قاعده وتراسل ريلها العشره عمرها ما تيي بالطريقه هاذي طالما ندخل الحداثه في علاقتنا
بتصير جامده اكثر من اول شاللي خلا الناس تنقطع عن بعض غير سوالف المسجات صار المسج حق كل شي ليش
العيز ليش ماكو تواصل الله ليش عطانا الصوت والحس ترا المواجهه ترقق القلب وتحننه لانه بشوف تعابير الوجه الحركات
وهاذا اثره واايد اكبر من الرساله .. انا ما اقلل من اهميه الرساله ولا المسج بس مو بالطريقه اللي تسوونها يعني
لا تصير عندكم عاده

انا اأيد الرساله من باب الفضفضه وهاذا شي مثبت علميا لانج تكتبين كل اللي ما تقدرين تقولينه وبالتالي نفسج
ترتاح بس ليش اعطيها ريلي شاللي يمنع اتواصل معاه مباشره ليش الحواجز اللي نحطها بالعكس اهوا لازم يعرف انه انا
معاه روح وحده .. عمركم شفتوا احد يكتب مسج حق روحه!! بنات اصحوا مو كلشي تاخذونه عاده
عالاقل عشان يبن مفعوله بالله اذا وحده كل مره بتدز مسج خلاص تعود الريال وعبالكم اب هالطريقه بيتكلم لا ابدا
والله اهو اللي فاك عمره كلمتين يكتبهم وخلاص ..تبي اليوم اكتبلها احبج يالله اكتب اشوراي خو الحجي ببلاش

نصيحه اخيره : اللي انتي تحتاجينه اهوا الابتعاد عن الحنه ولا تشكين عند ريلج ترا الرياييل يكرهون الطبع هاذا
وتهنيه سالفه الرساله زينه تشكي حق نفسج سبيه سوي اللي تبين بس هاا اخر شي شقي الورقه بايدج
وقطيها جذي انتي فضفضتي وارتحتي وغير هاذا ما صدعتي راس المسكين
الشي الثاني وحده من الخوات نصحتج بكتاب المرأه من المريخ والرجل من المشتري انصحج فيه
واايد حلو بس انا بعد فيني من طبعج لووووووووووووول اقرا وما اطبق
الشي يبيله صبر وتدريب ..اشلون ادرب نفسي اني ما اتنرفز بسرعه مو كل تصرف اهوا يسويه استاء منه
بس جان زين اقدر ..صج حريم لووووووووووووول

شكلي طولت عليج .. آسفه

 

[مرت ريلي]

مع ان المفروض تكونين انتي أول شخص يلجأ له ويقوله
كل شي ويتناقش معاج الله يهديه انشالله ويعينج

 

[بتبوتااا]

امممم شوفي حبيبتي اوكي خليه على راحته فتره وانتي خلج طبيعيه لاتبوزين وكل مايكلمج حسسيه انج قاعده تسمعينه ومو مطنشته ولما تردين عليه اي حبيبي وبعدين واذا مثلا قال لج يبيلي شغله قوليله انت تامر امر من عيوني

خلج جذي فتره المهم انج بهالفتره خلج دايما متسنعه ومتكشخه ولاتحسسينه انج متضايقه من شي ولما تلاقين الفرصه انه يضحك ويتغشمر اهني كلميه قوليله انا ابيك تفتح لي قلبك وتقول لي شفيك
انا مقصره بحقك احس شي ناقص بينا
وانشالله هالطريقه تيب نتيجه واذا كلش كلش حطيله اغنيه كارول سماحه طلع فيها هيك هودي مش عنيك هيدي مش نظراتك يا حبيبي ومش ايديك

سوري حبيبتي بس حبيت اضحكج شوي :tek: