طالبات مدارس الجهراء ... وسر التواجد الدائم في الحمامات

[جيتك تعال]

مسااء الخير حبيباااتي ....

ترددت وايد قبل اكتب هالموضووع ... يمكن لاني كنت اخذه بنظرة عادية ... لكن بجد تحول من العادي ومجرد الظاهرة ... الى اعتيااد دائم ...

أنا مدرسة في احدى ثانويات الجهراء ... ولاحظت كثرة تواجد الطالبات في الحمامات

الموضوع تعدى مجرد قضااء الحاجة ... الى الاقامة الدائمة والسوالف والضحك أمام المرايات

وزاد على ذلك انهن اصبحن يهربن من الحصص بحجة الذهاب لقضاء الحاجة ....

ولو تتبعانهن ... نلاقيهم كركرة وضحك دااخل دوراات الميااة ...

وساعاات بعد تاكل في لوبي الحماام .... وانا غرفتي يم حماام ويمكن يضيع مني يوميا ما يقارب الساعة المتفرقة الوقت .. وانا اطلعهم من الحماام ... ويطلعوون متذمراات

" يعني شنو ما ندش حماام " اصلا انتي مودااشة عشاان حاجتك ... انتي متسربة عن الحصة

والي زاد الطين بلة ... انه ناظرتنا السابقة لما رموو المدرسة قالت للمهندسين

لا تحطون ابوااب لمجمع الحمامات ... يعني حتى ما نقدر نسكره بين الحصص عشان نقضي

عالتسرب ... وكل وحدة تارسة ويهاا ميك اب على يونيفورم المدرسة يعني منظرها اصلا موشي

ما ادري انتو عندكم نفس المشكلة ؟؟؟؟؟

ولو سويتوو حلوول ... ممكن تعرضون حلوولكم يمكن نستفيد ونسوي مثلكم

بانتظااركم

 

[shahad al.3nezi]

إول شي يشرفني أني أول وحده ترد عليج ،،أنا طالبه بالثانوي وبالجهرا بعد الصراحه أنا وحده أقول حق الإبله بروح الحمام بس مآاروح سج بس لما أكون مليت من الحصه اشم هوى وارد ، واعير جو لمذه دقيقه وارد،!!! إذا تبين حل أنا أعطيج ياه على البساطه المفروض الاداره تمنع الخروج من الحصص حق الحمام بس للحاله الخاصه والطالبات الباجي يرووحون بال5 دقائق وأتوقع لو زدنا على هال5 دقايق ماتقصرون يابلأتنا بكتابه تعهد التأخير » الحمدلله ولا عمممري كتبته يعطيج العافيه

 

[سارا ديور]

مو بس بالجهراء هالظاهره نعاني منها بكل مكان انا مدرسه بالعاصمه
حتى بوقت الإختبارات تزيد سالفة الحمام يحطون الكتب داخل ويغشون منها

 

[جيتك تعال]

لجل عيينك

حيااك الله حبيبتي ....

حلوة صراااحتك .... بس يا قلبي ليش تمليين من الحصة .... اليوم الداارسي كله لك

وكله حصص لك عشاان تنجحيين ... وبخصووص التعهداات واايدة ... بس الطالباات اكثرهم ما يؤثر فيهم تعهد

بس فكرتك انه محد يطلع اى بنت احسن ... بس الكارثة حبيبتي هي الفرص

تلاقينهم معسكرين في الحماام ... ما ادري شلوون تضحي بالبريك مالها وتسكن الحماام

والمشكلة في بعض المدرساات الي تتهاون مع الطالبة وتطلعها

مشااركتك اسعدتني

 

[جيتك تعال]

سارا ديوور

فعلا اختي ظاهرة الغش بعد زادت من طلع قراار السماح للطالبة انها تطلع للحماام وقت الاختباار

ما ندرى منو المسؤوول عن هالقراار ... حتى لو وديناها حماام بعيد ممكن تكون حاطة اورااق دااخل ملابسها وتغش منهم

بجد مشكلة مو عارفيين لها حل ... والناظراات خوافات ما عنهم قراار حازم

حيااك الله

 

[طويت صفحة الماضي]

هههههههههههههه ذكرتوني باللي مضى يمكن منغثه من الحصه ولا من الابله انا بصراحه ايام مقررات الساعه اللي ماتعجبني كنت ماحضرها اقص ساعه لله يعينكم ياابلات

 

[PuPa^^SWeeT]

سوري انا بشتط بالحجي الحيين ( مزهبة الدوا قبل الفلعة )

اول شي احنا بمدرستنا كذا مرة انجك ممارسات مخلة للاداب بالحمامات بين بنات ( و اهمه بنات مو بويات ولا فيهم شي )

قالوولنا لاتطلعونهم

انا ما اطلع

يتني بنت ابي الحمام قلت حمام لا بعد الحصة ( بنت بالمتوسط لو فعلا مو قادرة تمسك نفسها يبين )

ردت مكانها ولا حلت التطبيق اتضيع الوقت بالسوالف ( فلانة حلي حلي )

خلصت حصتي و البنت طلعت برةة
قلت اكييد راحت الحماام

ردييت قسمي 5 دقايق ولا التلفون يرن ( الوكيلة ) اتقوول ليش ماخليتيها اتروح الحمااام شيكون موقفج لو سوتها بعمرها ؟؟؟؟


بنية بين ال 11 و ال 14 اتسوييها ؟؟؟؟؟؟؟؟
انزييين و امنا بالله بنية مالها حالة خاصة

و فوق هذا ردت اتضيع اتسولف يعني ماكان فيها ؟؟؟؟؟؟؟؟؟؟؟؟؟؟؟؟

الادارة مع انها كل يومين ثلاث انجك سوالف و انكتب تعهدات

مع هذا متهاونيين ليلحييين ؟؟؟

شلوون مادري

والاهل انتو اتخربطون وشنو هالحجي بنتي متربية

درينا انج مربيتها عدل ( انزييين صديقات السوء شلوون مالهم تاثير ) ؟؟؟؟؟؟؟؟؟؟؟؟؟؟؟؟؟؟؟؟

عجب العجااااب

انا عندي طالبة فصلووها من المدرسة والسبة هالسالفة

وصراحة افتكيييت لأنه بس ابي الحماام ابي الحماااام

غير السجاير و الموبايلات اللي انجكها

سوالف سوالف

 

[أريام الكويت]

لووووووووووووووووووول موضوعج جا بوقته بس الظاهرة منتشرة بكل الكويت الطالبات يروحون الحمام بس عشان يفترون وترد الحصة بس الحل وانا اللي متبعته وطالباتي يعرفوني ما حد يطلع نهائي بس والله اليوم ما طلعت طالبة وبعد جم دقيقة شفتها لونها نخطف وصراحة طلعتها بس المفرووووووووض ما تطلع المعلمة الطالبات لأن الطالبة مسؤوليتها لما تنتهي الحصة ومشكوووووره علي الموضوع.

 

[جيتك تعال]

فستق وبندق

انا اكتشفت انه الحماام الي يم قسمنا هو الوحيد الي فيه مراياات

البااجي شايليينهم ... قلت للوكيلة شيليهم وبنشووف

طويت صفحة المااضي

ههههههههههههااى يعني كنتي شيطوونة ... بجد لو اسالفة منها فايدة كان زين
بس حراام وقتها يضيع والبريك يضيع .. احس هالبناات ما يستاانسوون من كثر مو مكبرة رووحها بالمكيااج
والحجااب كله سبرااى وماايل ما ادري ما يطييح تلاقين صمااخها موقادرة تحركه وع قلبها عسل

PuPa^^SWeeT

صح كلاامك عزيزتي فعلا كم مرة نجك حركاات باايخة في الحمامات ورساايل منحلة
غير الشاتنج داخل الصف على الدفااتر والمدرسة تشرح مو منتبها

وع قوولتك ان طلعتي الطالبة قالو ليش تطلعينها ؟ وان منعناها " ليش ما طلعتيها هذي مسؤولية "
يعني طالبة ثانوي .. متى تتحمل مسؤولية نفسها شوى ؟
ليش مصممين يتعاملون مع الطالبات على انهم اطفال
وفالحيين بس لما اجتماع او شي يعرضون لنا انجازات مدرسة عبدالعزيز حسين النموذجية
مع العلم انه هالمدرسة شنو الي خلاها ترتقي ... انه حملت الطلبة وولي الامر مسؤولية تعليمهم
وكانو صارمين في تطبيق اللوائح والقوانين ... واحنا يا خلاف خوف اداراتنا ماله حد

الله المستعاان

 

[جيتك تعال]

ارياام الكويت

انا ابدا ما اطلع الا طالبات الحالة الخاصة ... فقط وحدة واطلعها ببطاقة خروج طالبة باسمي

بس المشكلة بعض المدرسات الي ما ادرى تخاف من الطالبة ولا شنو سالفتها تطلع البناات

ويفتروون والمدرسة فوضى ما فيها ترتيب ابدا ما ادرى شبتسوي المديرة لما يمرونها اللجنة

يجيكوون على نظافة ونظام مدرستها

العفوو حبيبتي ... حضوورك اسعدني

 

[دلوعه ناعمه]

افففففففففف اياااام الدراسه اصلا بعض الابلات يلوعوون الجبديعني شنوو ننحكربصف لييش اهو صف ولامحكر الحمدالله والشكر الوااحد يالله له خلق عمره من الصبح بعد له خلق الابلات وملاقتهم ووووكان عندنا ابلت رياضيات غصب طييب نضحك بحصتهااا وبس اتعلق ولي ماتضحك الله يعينهاااااا وانا ادري ان ابلتنا مووجوده بالمنتدى خخخخخخخخخ بـــــــس اللحمدالله افتكيييت وتخرجت من الثانويه والمغثه اللي فيهاااا لؤؤؤؤؤؤؤؤؤؤؤل

 

[ام لولووو]

لوووووووووووووووول هههههههاااااااااااااي بايعتها شلون عرفتي انها بالمنتدى

 

[امي الحنونه]

وجه نظري انا بالجهرا وانا لاحظت فعلا احسسسن تصرف تسويه مداررس تعهد واذا عادتها مره ثانية فصصصصل راح يؤثر وووووووناظره ماتقصر

 

[جروح ودموع]

والله ايامنا احلى ايام ما كان عندنا هالمسخره اللي نشوفها الحين وكنا مرتبين وملتزمين بالزي المدرسي ونخاف من المدرسات ونحترمهم الحين اشوف الزمن تغير الطالبات يروحون المدرسه المكياج تارس الويه ومريول المدرسه ظييييييج وقلة ادب وما يحترمون احد الله يرحم ايامنا احلى ايام

 

[ن ت ا ل]

انا اقول ارحموا من في الارض يرحمكم من في السماء وبلاش تدقيق علي حتي الحمامات

 

[توتي فروتـي]

ن ت ا ل

.......

احنا اذا دققنا بالحمامات مو عشانه., لان نخاف على مصلحة الطالبة .,


انتي حكمي ع البلاوي الي تصير في الحمامات .,

الطالبات مسوؤلية علينا


بارك الله فيج .,!!

 

[PuPa^^SWeeT]

انا اقول ارحموا من في الارض يرحمكم من في السماء وبلاش تدقيق علي حتي الحمامات

لوووووووووووووووووول تعلييقج مو وقته موضوعنا ويين و انتي ويين

 

[جيتك تعال]

ما ادري ... بس شلون ما ندقق في الحمامات ... هالبنات هالاياام يسوون بلاوي
افرضي دشو الحماام شوو شي مع بعض ... او اتهاوشو ... او اى شي ...
لا تنسين انه اى شي تتعرض له الطالبة داخل المدرسة الكل بيكون مسؤول عنه

بعديين انا اشووف انه من وااجب الطالبة حضور الحصة ... سوااء اعجبتها او ما عجبتها
لان اصلا هي جااية تتعلم ... ومارااح تتعلم وهي ناايمة بالحمامات
لو ما تبي يضيق خلقها خل تقعد ببيتهم تتونس احسن

وبعديين لو ما تعودت تحترم حصتها ومدرستها رااح تفقد احتراامها لكل شي ...
وهذا مو زيين لها .... بعديين هذي مصلحتها ... اذا ما تحملت مسؤولية نفسها
بااكر شلوون بتتحمل مسؤولية بيت وعيال وتعليم وغيره

والمدرسة اصلا مكان للدراسة ... مو للفراارة والتخشش في كل مكان

صرااحة غريب هالجيل ... جيل ماله خلق اى شي ... حتى مصلحته ماله خلقهااا

 

[PuPa^^SWeeT]

معاج 100%

 

[توتي فروتـي]

جيتك كلامج مضبوط ونتمنى من ادرات المدارس بجميع المناطق الشدة والنظر بهذا الامر وعدم التهاون فيه.,