حياج الله نور الكويت وان شاء الله انج اسم على مسمى
بالنسبه لي
العلنيه ما تغير من المو ضوع شي لان كلنا عرفنا اللي دار بالجلسه اول باول
بس ممكن اعرف رايج ب عدم التعاون
انا اهلي بكيفان والفيحا ونسايبنا بالضاحيه
بس انا بالثالثه
هلا دكتورة الله يحييج
اولا بالنسبة للجلسة العلنية انا تهمني وايد ليش؟
لأن من حقي والدستور كفل لي هالشي
من حقي أحضر واسمع الأثنين وحججهم وعلى اساس هالشي اقرر اذا آنا مع التعاون أو عدم التعاون
ممكن انتي عرفتي اللي يدور بالجلسة اول بأول بس آنا ماعرفت ! ومن وين اعرف ؟
وبالنسبة لرايج الكريم انه خلوها سرية عشان الفاظ بعض النواب هذا موعذر ابدا
ماشاالله سلوى الجسار بدعت بالألفاظ وعلني ,, وكل ماتكلم مسلم البراك قامت تشوش عليه
وتبسمت لما انعرض فيديو الدكتور عبيد الوسمي وهم يطقونه
وهالكلام موكلامي كلام جريدة الراي ومعروف عنها المصداقية
عزيزتي
لما تتفضلين وتقولين الا اذا صار مع الدائرة الرابعة
تدرين اني بنت الضاحية وترعرت فيها اني احسد اهل الدائرة الرابعة على نوابهم ؟؟
بتمسكهم بالدستور اللي خلاااص مالنا غيرة اذا راح على مستقبل عيالنا السلام
تدرين يعني شنو اذا راح الدستور ؟؟
يعني كلمن بيبوق ولا احد يقدر يحاسبه !
شوفي بعينج منو اللي قاعد يستذبح على تعديل الدستور واذا انتي ذكية بتعرفين منو اقصد
كلهم سراق المال العام .. اللي انهبوا ايام الغزو ومابعده مباشرة وماكان في مجلس عشان
احد يحاسبهم
ماشبعوا يبون بعد , ذاقوا حلات المليارات عشان جذي قاعدين يحاولون يعدلون الدستور شوي شوي
وعلى مايجي جيل عيالنا الا خلاص حالهم وحال الوافد واحد
أنا خلاص مايهمني شي الحمدلله عشت حياتي وتخرجت وماخذه حقي اللي كفله لي الدستور
بس باجر عيالي وبناتي اذا اكبروا وين حقهم ؟
بالنسبة لرايي اليوم واهو راي اهلي كلنا ضد التعاون ,,
لأن ببساطة اللي صار بندوة الحربش كللللة غلط بغلط ولو اشرح لج الاسباب بيطلع الصبح وانا ماخلصت
الدكتور اللي انسحل وانضرب اليوم احنا مانشوفه مطيري ولا نشوفه بدوي ! نشوفه كويتي
يعني من متى نشوف كويتي ينسحب جذي ؟؟
اوكي غلط بكلامه في قانون ياخذ مجراه شلووون تسحبونه وترفسونه ؟؟
ابدا اهل الكويت الشرفا مايرضونها
بس اصحاب تعديل الدستور شوي شوي يبون الكويتي جذي مايلاسنهم وسووا هالشي انذار لغيرة
يبون نصير مثل بعض الدول اللي يمنه بس هيهاات هيهاات
يمكن انتي مستغربه ليش راينه مطابق لراي الدائرة الرابعه
اقولج ليش ؟
لان جويهل وسكوب اقدروا يفككون الشعب الكويتي ويصنفونهم داخل السور وخارج السور
وداخل السور راي ,, وخارج السور راي
داخل السور مع ,, وخارج السور ضد
لاياحبيبتي كل الكويت وحدة وكلنا اهل وانسبا وعلى راي واحد
ولا احد بنى الكويت الا عوايلها وقبائلها
ومثل ما اهل الدائرة الرابعة عندهم الزين والشين حتى الدائرة الثانية عندهم الزين والشين
استجواب اليوم غير عن كل الاستجوابات السابقة اللي كنا نرفضها
استجواب اليوم اهو رد لكرامة الكويتيين وانذار لكل من يتجرأ يسحب ويرفس كويتي
وصراحة الحكومة فاااااشلة بكل ماتحمله الكلمة من معنى عايشة تخبط بتخبط
وبعطيج مثال لما انضرب الجويهل طلع بيان من مجلس الوزرا يستنكرون هالشي
وزارته رولا دشتي وغيرها
وين المجلس مايستنكر حادثة ضرب الصحفي محمد السندان ؟؟
بعد هذا صحفي لا هو نائب ولا شارك بالندوة ولاقال شي واصاباته بلييغه واحتمال كبيير اصابته بالشلل !
وشنو الفرق بين جويهل والسندان ؟ شنو الجويهل احسن من السندان فيه ؟
اسفه طولت عليج بس حبيت اوصلج المعلومة وليش انا ضد التعاون واتمنى انه المعلومة وصلت عدل
واي استفسار انا حاضرة
