الظاهر رياييلنا متفقين على هالحركات
طبعا هالتلفون لازم..غير انه مجابل ربعه اغلب الوقت هالمره يصيرون غالين وقت الطلعه
مره كلمته قال شنو اهو سجن؟ وبغا يبديها زعله قمت وطوفت وطنشت بمزاجي
والمصيبه ياريت مكالمه بودقيقه دقيقتين،لا اقل من ربع ساعه عييييييييييب ومستحيل
بس صار موقفين من عقبهم وقفت له وقفه خلته يتسنع شوي
اول واحد كنا رايحين السينما وعلى اساس عقبها نتمشى ونتعشى على قولتهم هههه
طبعا حده حده وصلنا، قعدنا بأمان الله وانقطع السيرفس عن التلفونات والفلم تووووووووه بادي
الحبيب قام يفاقق جنه قاطعين عنه الهوا، قعد جم دقيقه وبعدين قال تذكرت شغله ضروريه يبيها صاحبي بدق وراجع لج
اوكي طلع
انطر..انطر...انطر...الفار مو لعب بعبي مثل ما يقولون الا ياني الطاعون من كثر الفيرران
بنات تخيلوا امانه حسبتله من طلع ثلث ساعه
@@ هذا وين راح
قمت خذيت قشي وطلعت عشان يلقط السيرفس واكلمه..مشيت واتلفت يمكن يكون بالممر يم الصاله مااااكو احد!!
المهم وانا امشي وصلت عن طلعه السينما بس انا للحين ما طلعت...دقيت عليه : وينك؟ اطااااااالع والا الاخ قاعد مع اثنين من ربعه بكرسبي كريم
واهو مايدري اني شفته..اشوفه قام عنهم وعافس ويهه قالي كاني ياي بس رحت اشتري ناتشوز
قلت له ناتشوز والا دونت؟ اهو بقق عيونه وقام يتلفت
جااااااااااااااااان اششششششششششخط جدامه ولا جني اعرفه.....بس طبعا مو جدام ربعه....اهو اهني تعوووووومس
والله يابنات مت مت قهررررررر ماحسيت بروحي امشي والا اركض
المهم دشيت ايكيا واهو وراي..جان ادش الحمام تكرمون والحمدلله مافيه احد جان اقعد ابجي ابجي من القهر
وعقب طلعت عند المغسله وغسلت ويهي كللللللللللللللللللللللله عقب الكشخه
وطبعا كنت مطفيه الجهاز اول ما كشفته
وطوووووولت بالحمام..جان ألبس نظارتي الشمسيه وكان حزه مغرب هههههههههه بس مابي احد يشوفني
خو الافنيوز الاهل كلهم يطلعونلج هناك,,,\
طلعت والا اهو ويهه منقلب ويحاول يكلمني وانا منطشه وارد امشي بسرعه واهو يلحقني لووووووووول بدعت
وعشتو كنا صافطين السياره تحت المواقف يم لينوتر عساس العشا مالت علي وعلى العشا فوقي
عاد تخيلوا بنات من ايكيا لما هناك وانا شبه راكضه واقعد ابتون بين العالم واهو مو ملحقني عشان لانصير شبهه والا خايف ربعه يشوفونه
ونزلت عن السياره وبوزي لي القاع
اهو لما وصل والا الشرررررر يشع منه اول شي خفت لما شفته بس مسكت روحي
رقع الباب وقام يزف بالسياره يبي يقلب السالفه علي
وانا سااااااااااكته سااااااااااااااااااكته بس اتنفس بصعوبه لاني مقهوره
وغصبن علي نزلت دموعي وهم ساكته...اهو يوم شاف جذي جان يتأسف ويعتذر
وليته ما اعتذر..قلبت السياره فوووووووووق تحت خليتها تمشي على تاير واحد
قلت له الحيييييييييين ابي افهم من كثر طلعاتي معاك اللي تسوي فيني جذي؟
انا مالي حق؟ عيشتك بس نوم وربع
انت شنو من بشر؟
ربعك معاك من عقب المغرب لما الفير...طلعات ضحك وناسه
وانا لي الهم والغم وضيقه الخلق؟
الحين لو انت طالع مع ربعك بتطنشهم عشاني؟
تكون طالع معاهم وانا اصادفك بنفس المكان بتسحب عليهم وتقعد معاي بالقهوة؟
قاعد تجابلني مثل ما تجابل ربعك؟
قاعد تخرب طلعات ربعك مثل ما تخرب طلعتي معاك واهي بالسنه حسنه؟
روحاتك بالهبل مع ربعك
غدا...عشا..سهر..لعب..ضحك ..وناسه
انت لو يحصلك اتييب عيال من ربعك جان ما تقول لأ
انا لما قلت جملتي الاخيره جان اصحى حق روحي واسكت .......خفت قلت الحين بيذبحني
اهو اول شي التفت علي بسرعه مبقق عينه ومنصدم وعقب بطهااااااااا ضحك الله يهديه
لي درجه سفط وماقدر يكمل يسوق...وانا اهني بطيتها بجي
قلت له احر ما عندي ابرد ماعندك
قال ياحلوووووووج وانتي معصبه..تقلبين الدنيا واتييببين عالم يديد
وبس عقب مساحل وحنه ورنه طخيت
* تذكرت بعد موقف قديم يمكن هم خلاه يتوب نهائي..مره كنا بمطعم وبسم الله شحليلنا تونا بنطلب واخترنا وجذي (وهذي الفتره الوحيده اللي اهو يبادرني بالسؤال) عقب جم سالفه خفيفه يابوا المقبلات وطقطقنا...قام ودق على واحد من الربع
وانا طناش قلت بستانس بطلعتي...لا الريال مطول ومشتط بالسوالف...يابو المين كورس..الاكل برد ولا حط ايده بشي
يأشر لي اكلي..قمت احوس بالشووكه...عاد هني انا طنقرت وحدي تضايقت..سويت روحي مكسوره الخاطر لووووول
مادري من الواهي اللي فيني شكلي كان يبين والا من التمثيل هههههه
المهم اهو يستعبط ويمد بوزه ومادري شيسوي..ماوعيت والا المسؤول لبناني واقف على راسي : ان شاءالله كل شي على زووؤكون؟
الحبيب اشرله..وانا ابتسمت ابتسامه حسره وقالت له ثانكس..قام جندس شوي وقال مدام اذا الاكل في شي بغيرو..قلت له لا شكرا الاكل مافيه شي
(هني الاخ حسيته خلى السوالف وقام يخز)
رد اللبناني (مادري كسرت خاطره والا اهو حنان) : بس عفوا اذا بدك بشيل الاكل ليسخنوا .؟
هني عاد الحبيب قال حق رفيجه بعدين اكلمك...قام ونفس عاللبناني وقاله يبا خلاص قلنا لك مافي شي الاكل
اعتذر اللبناني وراح
قالي الحبيب بنفس:شفيج؟
قلت : مافيني شي
قال: ليش ماكليتي عيل؟ برد الاكل
قلت له ناطرتك
قال شنو تبيني اوكلج يعني؟
جان اطالعه بنظره المسكينه لوووووول ومارديت عليه قلت له لا شكرا
اهني دق تلفونه...وهم طقها سوالف...اشرت له اني بروح الحمام تكرمون
وانا طالعه جان ادفع الحساب واهو ماشافني
دقيت دقه وحدة لقيته خط ثاني جان اسده...خذاله جم دقيقه ورد دق قال وينج قلت له اذا خلصت عشا انا ناطرتك عند السياره
ماوعيت والا يايني فشششششششقه وهم معصب
قال انتي الحين تحنيييييييييين وتحنييييييييييين تبين تطلعين اخرتها جذي تسوين؟ اشكليتي بالله على هالحنا؟لا ودااااااافعه الحساب ومخليتني جني طرطور
قلت له بعصبيه كليييييييييت غثاااااااااااا...وهالغثا ماكلته من قبل بالبيت ماله داعي اكله بالمطعم
واستمريييينا على هالحنه والرنه لما كلمته بهدوء وفهمته غلطته وان كل شي له حق وكل وقت له ناسه
اهلك..شغلك..ربعك..مرتك
قلت له انا ويني من بين هذول كلهم؟ بذمتك وبصلاتك انت احكم
قام واعتذر والحمدلله عقبها تسنع
وعلى طاري الاهل..يمكن ولا وحدة فيكم اهل زوجها يغثونها بطلعتها مثلي...عسى الله يتمم عليكم
انا الله يهداها خالتي فنانه بهالسوالف..وطبعا عشان اهي امه عمري ماكلمته عن حركاتها اذا بغينا نطلع
بس يوم سالفه السينما وعقب ماردينا البيت وقعدت اتفاهم معاه طلعت الماضي كله وخليته يعرف الحق من الباطل
واهو بنفسه حس واعتذر ووعدني انه يلزم حدوده
والحمدلله تغير
يعني اعطيكم مثال على سوالف امه: انا عندي حموان وحموات يعني ريلي مو وحيد امه
المهم امه عسى ما حست ان في مشروع طلعه لالالالالالالالالالالازم تدور لها حجه عشان تخرب الطلعه
مع ان عندنا سايق وغير السايق عيالها
وبنات لحد يقولي هذي امه ومادري شنو\..كل شي بالمعقول...وانا ربي يشهد اني عادتها مثل امي..لكن الحركات اللي تسويها مكشوفه ومفهومه
تخيلوا مره سألت ريلي يوم شافته بيصعد يبدل عشان بنطلع قالت له عندك شغل؟ قال لا بس بنطلع..خير يما امري...قالت لا وما لأ
لزم عليها ...قالت له ابيك تودي هالملابس حق ابوك في (جبد) ...قال لها والسايق وينه ؟ قالت ويييييييييه مودي الخدم السوق مساكين خل يغيرون جو
!!!!!!!!!!!!!!
شرايكم بنات؟
ياني الحبيب والا انا لابسه وشوي واخلص...قام يلف ويدور وامي ما امي
قاللي بس مسافه الطريج وانا اللي راد..
مسكت اعصابي وقلت له روح بحفظ الله بس انا بروح بيت اهلي
قال خوش عيل امر عليج هناك
نزلت وسلمت على خالتي وشافت كشختي وعطتج ذيك الابتسامه قالت وين رايحه.؟ قلت لها بيت اهلي
قالت عندكم مسايير؟ قلت لها لاوالله بس ولهانه عليهم من زمان مارحت لهم
قالت ايييي..سلمي عليهم
طلعت والا الخدم والسايق موجودين......تعوذت من ابليس وبلعت العافيه ورحت بيت اهلي
وعقب مدة ادق عليه قال شوي وارجع
وهالشوي صارت لج ساعتين..عقب الساعتين دق قال انا قريب ردي البيت عشان ابدل اهدومي ونطلع
رديت البيت والا صخهههه ماكو احد..!! قلت الحين يوصل
عقب مدة دقيت والا الاخ متعومس..ها فلان وينك؟
قال والله شسوي الوالدة تبيني اقطها عند اختي (واخته بيتها بقلعه وادرين)
اثاريه كان واصل قلبي وامه زاهبتله
قال والله شوي وارد (وكان الوقت جريب العشا) وانا اسمع حجي بس مو واضح مادري شيخربطون يكلمونه.....سديته...عقب دق قال حبيبتي ماقدر اخلي امي اختي لزمت الا تتعشى وماكو احد يردها البيت
تبين امر عليج تتعشين معانا ؟
قلت له لا...عوافي
وطفيت جهازي خير شر
وقعدت ابجي بفراشي لما نمت من كثر البجي
وانتوا عارفين باجي سيناريو الحنه والرنه والزعل
وهم مره حماتي الكبيره مسافره مع ريلها ومخليه بنتها عند امها والبنت بغله بالمتوسط....ذاك اليوم واحنا بنطلع جان تقول خالتي اخذوها معاكم
حرام خل تستانس
نعم؟؟
وليش بناتج الثانين مايطلعونها (طبعا اقول بقلبي)
قلت لها خالتي بس اخاف نتأخر..قالت لا وييييييه لا تتأخرون خلوها تلعب وتتعشى وردوا مبجر عشان تنام
طبعا سبع البرمبا طق الصدر...وخذاها ...وانا بوووووووز ...ماوعينا والا هالتلفون...,والا خالتي تقول حق ولدها مر على عيال اختك فلانه واخوك فلان خل يونسون فطومه مره وحدة
والا الحبيبه داقه على بناتها وعيالها وقالت لهم السالفه وهذول زاهبين
الحين وصلت حدي....ماقدرت اعلي صوتي بالكلام لان البنت العوبه ينيه تغطج بالماي وتطلع ناشفه
قلت له ردني البيت وانت كمل برنامج يا ماما انيسه...قام يرقع ويبتسم عشان هذي لاتفطن...واهو اصلا توهق لانه مايبي يجابل يهال بروحه
قام يساحل وحالته حاله وعفيا وما عفيا وانا بستانس وياج وانتي وما انتي
قلت له شوووووف ماكدونلد السره واحنا اللي رادينهم بيوتهم...قال ماشي
عاد انا طنقرت وقلت ماني مكمله الطلعه واهو الحبيب وعدني يعوض هالطلعه بس يقطهم البيت
المهم نزلت والا عمي وخالتي قاعدين وخالتي قالت وي مسرع ما رديتوا (عاد انا بقلبي انقهررررررت وحرتني ..قلت الا اقلب السالفه عناد )
قلت ويي لا خالتي انا راده ابدل وبنطلع ...أسم الله عليهم اليهال شياطنين جنهم اول مره يشوفون ألعاب (سبحان من نطقني لووول)
جد عمي سائل عن بنت حماتي وخالتي قالت له رؤوس اقلام...بس يوم درا بس السالفه قام وزفهم كلهم
اسم الله عليه عمي عااااااقل وحقاني والحمدلله يحبني
قام قال شكوو رازة اليهال معاهم ؟ قالت خالتي وي شفيها ؟ شصار الحين؟
وهم زف ريلي
بعد عمري عمي....انا هني تشققت ورحت غيرت ملابسي عالسريع ووطلعنا
عاد بعد عمري عمي ما خلاها بقلبي ماشاءالله عليه يقص الحق حتى من نفسه
يوم زارتنا حماتي الصغيره عقب جم يوم مع ريلها وكانت بس بيسلمون عالسريع واهم طالعين
قام عمي عقب ماطلع ريل حماتي جدامي نادا بنت حماتي الكبيره وقال حق بنته طلعيها معاكم..قامت انبرصت حماتي وخالتي عصبت وشلون مالون...وصكت بينهم
قام وخزهم عمي وعصب ..عاد انا عشان لا توقف قلوبهم استأذنت وصعدت فوق
وانا صاعده اسمعه فديته يقول مستحيه من ريل بنتج ومو مستحيه من اللي سويتيه في بنت الناس؟ خربتي عليهم طلعتهم؟
يالله اهااااااا بس لا يكثر الحجي...روحوا اشتروا للبنت عشا وردوها ..كاني قاعد انطر
اللهم لك الحمد........بنات بس لا تشوفون عقبها خالتي وبناتها وااااااااااااااااااي يا النفسيه وااااااااااااااااااااااااااي يا البوز
لووووووووول.......محد قالكم تحرشوا
سوري قرقت وايد بس هالموضوع طلع سواااااااالف كانت تحرررررر
