رد : كل مايخص مجهزات التغذيه بالتربيه والحاضره تعلم الغايبه
(( نصيحتي ))
جودو وظيفتكم مصدر رزقكم لا تهزكم سوالف وتعليقات تلعب بنفسياتكم وتخسركم وظيفتكم
اللي يكلمج وجه لوجه زاري على الوظيفه لا تنزلين عينج وتأتئين بالرد
حطي عينج بعينه وببتسامه تغيضه ,, قولي الحمدالله ربي ما قصر وأغناني وبهالمناسبه
تفضل هذا حلو وقهوة الوظيفه
لا يبين عليكم تأثير كلامهم
دايم تذكروا وضعكم قبل الوظيفه وبعد الوظيفه عشان تصرون على تمسكم برزقكم
على فكره حتى أزواجكم راح تتغير معاملتهم لكم للأفضل بعد الوظيفه لانه راح يلاحظون ميزانيتهم تغيرت للاحسن
وبالنسبه لي يا بنات لا تضحكون علي او تستحقرون رايي بهذي الكلمه
من بعد مرور استلام كذا معاش !!
أول شي إتسوينه لنفسج إشتري ذهب لو بسيط أساور خفيفه خاتمين سلسله تراجي ومعاهم ساعه وعبايه زقرتيه وجنطه وتكرمون شحاطتها طقم
بتقولون لي ليش ّ
جوابي / لما تسيرين وإنتي كاشخه بعد الوظيفه والذهب يلصف هذا ردج على اللي يبي يعلق !!
خلي يبين عليج النعمه ,, شلون وظيفتج اللي يحرجونج فيها خلتج تلبسين ذهب وتكشخين أكثر من أول ولو أني متأكده الكويتيه من فضل رب
العالمين دايم ربي حاليها
أعرف بنت قبلكم من سنين بنفس وظيفتكم تماما ,, والله كانت ضاربه اللي يعلق بالطوف ما ترد على بشر
تبارك الله التغيير كان واضح وضوح الشمس لا تشوفونها شلون تحوف نفسها إشتراك بالصالون ولبس وأثاث بيت وصبغ والمواعين الزقرتيه
لضيوفها وشلون الماده خلتها توجب بالمناسبات ,, طلاعة والده ونزالت بيت وعانية عرس وغيرها
و المكياج اللي بخاطرها تاخذه ,, وكان زوجها حاط لها خدامه من قبل وظيفتها بس بعد الوظيفه إطلبت خدامه ثانيه لان تبارك الله عيالها
واجد ,, أخر ما سوت راحت لعيادات تعابل بشرتها وصارت ورده ,, شقول لكم بعد كانت إداوم والله تبارك الله أحسن من أقدعها مدرسها
معاشها دبلات عنها وكانت تلبس هالعبي اللي كل وحده تقول الزود عندي بالدوام بس وقت الشغل تلبس الروب وبعدين تقطه
حالها حال المدرسات .
بينوا للي حولكم أهمية وظيفتكم ,, ترى والله ألاف اللي يتمنونها .
ألحين الوظايف بالتفق ,, والسنيين الجايه أصعب وحاجاتنا تكثر والأسعار شابه نار
كلن يركض ورا الدينار ,, لا تصدقين اللي يقولج والله لو قاعده في بيتج أشرف لج ,, ترى لا إحتجتي تعبين كرت لخطج محد ماد ايده وقال هاج
حبيباتي شعور لا يوصف لما يجيج مسج من البنك ( لقد تم أيداع 510 دك في حسابك ) يا نعمة الله يا رب لك الحمد اللي أغنيتني من منت
البشر ,, ترى حتى زوجج لما يعطيج وهو ملزوم بالأنفاق سبحان الله تحسين مرات يعطيج من غير نفس ومرات بالمناجر .
وأكيد طبعا حاطه في بالج لسته طوييييييييييييييييييييله مشتهيه أشتري كذا وأبي كذا وتاكلين بعمرج ,, وزوجج مره يفرطها يعطيج ومرات صبري
الشهر الجاي .
إنزين لما يجي العيد ما ودج بخريده عيديه أنصاف وأرباع للجهال وانتي مسيره على أهلج
وأخيرا أقول الله يغنيكم بحلاله عن حرامه
على فكره نسيت أقول لكم باجر كلن يشحذ السلف منكم
إهداء لمشرفات التغذيه
لا يصيب إحساسك الناشط برود ,,, لا تزال أجزاء فينا مزهره
كم بنينا فالعمر صرح وسدود ,,, وكم حلمنا أحلام حلوه مبهره
( والقبوط ) إكثار يا الضبي الشرود ,, أسف من ألحين وأرجو المعذره
