قالي جب جدام اهله

[توووفية]

مو بس الحب اللي يقوي العلاقة بين الزوجين اللي اهم منه الاحترام وريلج الحمدالله فيه دين ويصلي يعني ادعيله وابوي كيلا يقولي اللي يصلي قلبه فيه رحمة الله يخركم حق بعض والله يعينج بس لا تتخذين اي قرار قبل لا تصلين صلاة استخارة

 

[شــــــــــــــوقــــه]

عفستي سالفتج فوق تحت

اول شي كنتي صح ماله داعي يغلط بس تترجينه ليش راح يتعود الريال يحب الي تحقره

حطيها حلقه بإذنج

الله يصلح حالكم

 

[روبرتوكافالي]

اللي سويتيه غلط ومليووون غلط والله العظيم لو انتي بنتي جان اقص لسانج قص شسالفه ماتبون الريال يقول لكم ادنوا علي وراكم الا قلتوا له طلق لاحول ولاقوة الا بالله

يابنتي الريال ماقال شي دش الصاله معصب المفروض تقوليله مالك الا طيبة الخاطر ياقلبي ثواني والاكل عندك حتي لي قال لك جب قوليله مشكور ويزاك الله خير يابعدهم وابتسمي بويه اهله وقوليلهم مالي غناة عنه بوعيالي لو يطقني يمون وتالي صعدي غرفتج واذا بخاطرج شي مضايقج المفروض تصلين ركعتين وتستغفرين من وسواس ابليس اللي يطحن براسج ويوزج علي خراب بيتج
ولي ياج الدار ابتسمي له قوليله ماهي عوايدك يالغالي تغلط لاني اعرفك ريال مايطلع منك الغلط ولا العيب بس ودي اعرف شاللي خلاك تقول لي هالكلمه جدام اهلك عسا ماقصرت بحقك وانا مادري ومن هالكلام الناعم تتشرهين عليه بحب وخوف ورجا من الله انه يهديه لج ويسخره لج وتالي تعرفين اشفيه مافيه وتطيبين خاطره وتكون ازمه وعدت علي خير وسلام


سالفتج كلش ماهي سنعه ابد طرشيله مسج وقوليله ضفرك يالغالي بالكون ومافيه وغيرك ابد بالقلب مافيه ولوعطوني كنوز الفرس وكسري وكل ياقوت الشام مابيه لانك انت الغلا كله ولوماوجودك بحياتي يالبعد عيني جان حتي هالعمر دونك صحت مابيه <<<<< تخصص اصلاح ذات البين

شوفي ياقلبي الوقت يمر والثواني تركض وراها دقايق وساعات وابليس مامات ليش تفرحين ابليس واعوانه بزعلتج علي ريلج وتخلينه يتفاخر جدام ربعه ويقول شفتوا اشلوووووووووون فرقت الريال عن مرته

تعوذي من ابليس ومالج الا بيتج وريلج يالحبيبه كلنا زفونا رياييلنا وياما طقونا خالاتنا امهات رياييلنا وياما سفلوا بجد جدنا السابع عشر وقلنا لاجل عين تكرم مدااااااين وشوفي الحين اشزينا سمنه وعسل

يايج الشهر الفضيل تذكري يمعاتج معاه عالفطور تذكري محاسنه كلها تذكري كل ضحكه حلوه بينكم ولا تخلين كلمه تافهه من حرفين تهدم حياتج وتخليج تعيشين بتبهذل طول العمر


نصحتج لله وعسا ربي يهدي سرج ويسخر لج ريلج ويبعد عنج الشر واهله اللهم آمين

​

يسلم فمج

وصح الساااااااااااااااانج

جزاج الله خير على هالنصيحه

 

[روحي ابوي]

الله يسخرة لج

 

[أنا Top أنا]

رد : قالي جب جدام اهله

الحين يقولج وجهج يسد النفس وتحبينه ؟؟؟

استغفر لله على شنو تحبينه من زين اطباعه ؟؟ يعني ؟؟

هذا واضح انه ما صدق على الله انج تقولين جذي؟؟ وعلى طول قالج روحي لبيت اهلج ولا شوفي الاهانه رايحه مع السايق واهو قاعد يقرق بتلفونه ؟؟؟ يمـــــــــــــاي شكلج طايحه بجبده .. يبا مفهومه السالفه الرجال ما يبيج !!!

 

[dectora 7elwa]

صج انج غريييبه:eh_s(10):

 

[جـــواهر]

المفروض لمن غلط عليج قدام اهله تسكتين وماداحرينه
وتمسكينها عليه وتحقرينه عشان يصير الحق عليه ..

 

[(m & m)]

^

مع الاخت جواهر هذ الي كنت قوله بالضبط

 

[فطفط ام يزن]

رد : قالي جب جدام اهله

بصراحة لازم تحقرينة جم يوم اهو اذا بيكلم ليش يتزوج وثانيا لازم يتعلم الادب سوري بس الي يسب جدام اهلة ممكن يسب جدام عيالة باجر لا وممكن باي طلعة بالسوق ولا بمطعم هم يهزئج جدام الناس انا ما انصح بالطلاق لاكن انصح ان توخرين شوي عشان يحس بقيمتج واللة يبنات ريياييل هالوقت يبون من يوقفهم عند حدهم وقبل كل شي طلبي من اللة يهدية حقج بس الي يسامح مرة ممكن يسامح الف مرة والي يغلط مرة ممكن يغلط الف مرة

 

[eng.meema]

هم رديتي دقيتي عليه وترجيتي بعد انه يردج
عيل اشحق رايحه بيت اهلج ؟؟ يكون ابتقرصينه يعني ؟؟
صدقيني ريلج ريلج عارفج عدل عدل ويدري شنو تفكيرج واهوه بقلبه يقول مردها لي ومردها اهي اللي بتيي وتترجاني
وفعلا هذا اللي صار
حبيبتي ترا انتي قاعده اتخربين بيتج بيدج مايصير جذي كل ما غلط طبطبتي عليه واخر شي تروحين انتي تترجينه يردج
راح يستقوي عليج وكل مره بيسوي هالحركات لأنج ساكتتله وما تقدرين على فراقه ومردج له
على فكره ترا روحتج بيت اهلج ما قرصت الريال ولا بطيخ دام اخرتها ترجي ماكان له داعي اتروحين بيت اهلج ويدق ابوج وادق خالتج وتكبرين السالفه
قراراتج وايد متلخبطه حبيبتي راجعي نفسج
انا ما أيد انه الوحده ادخل احد ابمشاكلها بس مثل هالبنت لازم ادخل وحده احد كبير يحل لها مشاكلها لأنه كلش ما تعرف تاخذ قرارات واخرتها اهيه اللي قاعده تنظلم وتتعب واهوه مستانس ويخربط ولا همه شي

 

[عذبه الروح]

على طاري سالفتج ذكرتيني بقصه قديمه

وحده دايما تتهاوش مع رجلها والعلاقه مو ذاك ازود ولما راحت عند ابوها الكل واقف معاهاا الابو قال تبينا ولا تبين رجلج قالت ابيكم

قال خلاص اوك بدلي ملابسسسج وطبعا البيت كان عباره عن غرفه وحده يعني وين تبدل تتفصخ جدام ابوهاا واخوانهاا !؟@@




شي طبيعي بتوقف ورا زوحها وتبدل

عاد الابو بين لهاا ان رجلها سند لها واهو اللي يحميهااا

وبس لوول

الله يفرج عليج ويهدي زوجج ويسخره لج

 

[حكاية شهرزاد]

احس بيرجعج .. لانه الموضوع كان بلحضة كان انه مو طايق شي ..

توكلي على الله .. احنا في نقطة من خير والبلاء كله دار مدارنا قولي الحمدلله ..

 

[^^المهره^^]

اهيا واضح ان اللي صار فجر تراكمات وايده من قبل كنتي تسكتين عنها
لان لو على هذا الموقف بس بقولج ردة فعلج اووفر و غلط
بس انتي تقولين انج سنتين صابره و متحمله عصبيه و طنازه و طق
فا اللي يطوف ويسكت على الغلط دايما جذي اييله يوم و ينفجر ويعطي ردة فعل قويه على موقف ممكن انه ينحل بهدوء
بس انتي ثرتي من اشياء موايد مو بس من كلمة جب جدام اهله

انا مره اخوي قال حق مرته جدامنا يابقره
ماردت بولا كلمه و ظلت ساكته لي اخر الزواره ولا كلمها ترد عليه على قد السؤال وهو نوعه عصبي عصبي لي درجة ان لا عصب مايشوف جدامه ولا عصب و قال الكلمه تلاقينه يتحسسسسسف وهو اصلا يحب مرته يموت عليها
وكانت هذي اول مره يغلط فيها عليها جدامنا
وكلنا حسينا فيه ان يبي يساحلها يطلب منها تصبله جاي ولا اي شي و تالي يشكرها و بس يطالع ويها وهيا ماكو اي ردة فعل
كلمتني عقب يومين تقولي عبالج انا ما تأثرت ولا كان ودي اقوم اطق جنطتي و اطلع؟ بس تقول احترمت وجودكم اول شي و 2 شي قدرت كونه عصبي ومايمسك نفسه بس مو لدرجة ان جدام الناس عاد تقول بس ردينا البيت انفجرت بجي وهو حس بتأنيب الظمير ويا اعتذر وراضاني ووعدني مايعيدها و صج لي يومج ماعادها لان حتى امي بعد امسحت فيه الارض على اللي قاله حق مرته لانها صج بنت حلال وماتستاهل

فا انتي الله يهديج يمكن لو ساكته و محسسته انج مختنقه من كلمته بس احترمتيه و مارديتي عليه جدام اهله جان تحسف

عموما الحين الكلام مامنه فايده احسن شي تسوينه الحين انج تهدين وتطخخين السالفه قد ماتقدرين انا ماشوف ريلج حاله ميئوس منها يعني الحمدلله لا سكر ولا مخدرات ولاهو معقد نفسيا ولا شاذ جنسيا
مشكلته بشوية اطباع و ماكو شي مايتغير مع الصبر وشوية ذكاء الامور تمشي ان شاءالله

 

[آهات الليل]

الله يصلحكم ويهديكم لبعض ان شالله ياقلبي تعوذي من ابليس ولاتجادلينه خلي يتكلم ليما يمل وخليه هو يرجعج ن بيت اهلج
لاتعطينه مجال يغلط عليج كلللللش لايتعود دخلي ابوج او اخوج بالموضوع وانتي معاج الحق مو اهو وكلهم بوقفون معاج ياقلبي
ربي يهديكم ان شالله

 

[**دانات**]

الصراحة ضيعت وقتي مع هالموضوع

 

[يمة يادلبي]

اعوذ بالله شهالـ رياييييييييييييل

 

[L A T T E]

لا تكلمينه كلش ولا تييبيله طاري الطلاق او طاري اي شي ثاني

خلج ببيت اهلج و نطريه بنفسه بيردلج.. بس دامج تدزيله مسجات طلقني ومتى نتطلق جذي بتنرفزينه زيادة

طنشييه

 

[تنـــاســـانــي]

تتطلقين علشان (( جب ))

والله حبوبه انتي غلطانه ،، المفروض راده عليه بهدوء و منقدته على نفسه جدامهم ،،


وايد رياييل يغلطون على حريمهم جدام اهلهم على بو سي سيد ،، بس انتي تقدرين تغيرين هالشي ،، مو استعسار السالفه ،،

و شدراج ان اللي دقت عليه بنيه يمكن يعرف احد هناك ،، على طول حكمتي ،،

حتى لو نقول انج متنرفزه منه و ساكتتله مو هذي السالفه اللي تنفجرين عليه ،،

و مو كل مشكله تطلبين فيها الطلاق ،،

اكبر غلط سويتيه اهوا غلط بس انتي غلطتج اكبر ،،

لا تطولين السالفه و لا تصرين على الطلاق ،، ردي حق بيتج باقرب وقت و صلحي اللي بينكم السالفه ما تسوى ،،

تقدرين تغيرينه و تخلينه ما يغلط عليج جدام الناس ،،

الله يهديكم و يصلح بينكم

 

[لجين]

رد : قالي جب جدام اهله

نا ما قريت كل الردود .. بس انصحج

انج تطرشين له احد يهديه ويحاول يردج يا قلبي

تحملي .. ودوسي على قلبج شوي وبالنهاية بترتاحين

والله المراه بيدها يحترمها الرجال ولا لأ بس بالصبر

والحكمة مو العصبيه ..

الله يهدي سركم

ومنو الحين بالكويت ما يغازل ولا عنده رفيجه

على خليها على الله ..

 

[lovely jojo]

الله يهديكم