مرحبا بنات مشكورين حبايبي على سؤالكم عني
و باقولكم اللي صار بالتفصيل
اليوم المنتظر ( يوم العملية ) هههههه: مرتني صديقتي الساعة سبع و كنت ميته خوف دخلت المستشفى الساعة ثمان وقعت على أوراق و دفعت باقي المبلغ و على فكرة العملية كلفتني 1800 دينار بحريني و الكورسيه 60 دينار و الأدوية تقريبا 20 دينار المهممممم دخلت الغرفة و ياتني دكتورة كشفت علي خذت الضغط و التنفس و دقات القلب و الحمدالله كل شي تمام و سألتني اذا مسوية عمليات قبل و اذا عندي أمراض و قلت لها ان عندي ربو قامت قالت حق الممرضات يحطون لي بخار. و بعدين يابوا لي لبس العملية عاد اهني قلت صار الصج و حسيت ان جسمي كله يرتجف. بعدين ياتني مساعدة الدكتور و صورتني بعدين ياني الدكتور و خطط جسمي و قعد يهديني, و بعدين ودوني غرفة العمليات و ياني دكتور البنج و سألني كم سؤال و قلت له ان انا قومتي من البنج شوي صعبة فقالي لا تخافين ان بعطيج كمية مدروسة و ركبوا علي أجهزة الضغط و القلب و شافني قاعدة ارجف و اقوله ماقدر اتنفس ابتسم و قالي نفسج مافيه شي قام و عطاني دوا مهديْ حسيت اني وايد ريلاكس.
و ماوعيت الا و مساعدة الدكتور و الممرضات قاعدين يلبسوني الكورسيه و قومتي من البنج مرييييييييييييحه جداً و النفس تمام بس الألم كان فظيع و كنت ابي انقلب يمين و يسار و الممرضات كل وحدة ميودتني من صوب و دوني الغرفة و على طول حطولي مسكن في الوريد و منوم و قالي الدكتور سكري تلفونج و نامي و قام سكر ستاير الغرفة و طفى التلفزيون و نمت
على فكرة بنات مدة العملية كانت قليلة بالنسبة حق الأشياء اللي سواها لي يعني دخلت غرفة العمليات الساعة تسع و نص و طلعت الساعة احدعشر و نص, و الدكتور ممتاااااااااز و حبوب و جنتل مان مو مثل دكاترتنا اللي كل واحد يكلمج من طرف خشمه, و العناية ممتازة و انا طلعت في نفس اليوم بعد ماارتحت و الالم خف شوي بس بعد الألم ترا مو سهل خاصة المؤخرة و الظهر و من كثر يألموني ماحسيت بألم بطني بس عطاني مسكنات و مر أول يوم على خير.
اليوم الثاني: الألم خف وايد و الله يا بنات ان صديقتي مسويه مثل عمليتي بس بدون تكبير و تقول ان الألم اللي حست فيه كان فظيع و لمدة ثلاث أيام و رابع يوم ابتدى يخف بس انا الحمدالله من ثاني يوم خف علي الألم وايد حتى ماخذيت المسكن الا لما ييت بنام. و قعدت الصبح و خذيت شاور بساعدة صديقتي و هذي كانت نصيحة الدكتور قالي لازم تتسبحين ثاني يوم. و عطيت الخدامة تغسل الكورسيه لأن كان متروس بيتادين ( الدوا اللي يطهرون فيه الجسم في العملية ) و لما جف خذته صديقتي جففته اكثر بالستشوار
و لبسته. و ترا قومتي و قعدتي شوي صعبة يعني لازم احد يساعدني.
اليوم الثالث: قعدت من النوم و قدرت اقوم بروحي بدون مساعدة و رحت الحمام الله يعزكم و بعدين قعدت اتمشى في البيت شوي و شربت عصير برتقال و الألم اليوم شي لا يذكر بس احس بشد في بطني و ظهري و الله يا بنات ان الدكتور يده خفيفة وايد يعني كنت متوقعة ان الالم بيذبحني بس والله ان بس حسيته أول يوم و ثاني خف وايد و اليوم لا يذكر و حتى الزروقة بس في ظهري و مو وايد بس جسمي متورم و خاصة ظهري من كثر ما هو متورم حاسة انه في مستوى مؤخرتي بس بطني فلااااااااااااات وناااااااااااااسة .
و ماقدر احكم على النتيجة من ألحين يعني تو الناس كل شي فيني متورم و الدكتور قالي ان بعد اسبوعين التورمات بتخف وايد
انا وايد مستانسة و مو ندمانه اني سويتها و نصيحة يابنات اللي تبي تسوي هالعملية تسويها عند هذا الدكتور بس نطروا أشوف النتيجة النهائية و بعدين اقولكم حكمي النهائي
و اي سؤال يابنات انا حاظرة و من عيوني
