استطلاع : اذا سئلوج عن الاخلاق حق الزواج تقولين الصج ولاتسترين !

[موت وميلاد]

السلام عليكم ورحمة الله وبركاته



اذا سئلوج عن بنت او ولد يعني عن اخلاقهم ودينهم

سواء كانو هالاشخاص قراب لج مثل ولد خالتج بنت عمج او بعاد عنكم بس تعرفون اخلاقهم

تقولين الصج ولا تسترين عليهم !!!


انا ما اقصد اذا كان لهم ماضي وتابو

لا طبعا اهني لازم تسترين لانه الله يحب الستر


بس اذا كانو بهالفتره راعين خرابيط يعني قز وهياته وموصوب الدين


بتقولين الصج!!


ولا بتسترين عليهم وتقولين ان شاءالله بعد الزواج يتغيرون!!


قولو الصج بنات من غير مثاليات ​

​

 

[دلوعة أبوهآ]

والله عن نفسي ماعمري انحطيت بهالموقف
بس لو صار لي .!

إي بتكلم وأقول الصراحه
لان هالشي زواج وعشرة عمر ..,
حرام أظلم ناس وثقوا فيني وجوو سألوني ..

ومايصير اكذب أو اسكت وانا أكون عارفه شي ومتأكده منه ..,

بس بنفس الوقت .! ماراح اتكلم واطلع كلام ع غيري الا لما أكون متأكده مليون بالميه
وشفت بعيووني مو أحد قال لي ..,

ووقتها اكون قلت وسويت اللي علي .. : )​

 

[puppet]

ما عندنا جذي بالعايلة .. لو اتخيل في ممكن أقول : أني ما احتك فيهم وايد

خل يسألون أحد ثاني .. لأنه ما يجوز تنبشين أغلاطهم !! هذا رايي

 

[happy&single]

والله ما اعتقد اني بقول شي لان حرااام يمكن صج تغيروا ،، ومن ستر على مسلم ستره الله يوم القيامة
وقذف المحصنات من كبائر الذنوب ،، عاد ليش احط نفسي بموقف استاثم فيه ويمكن صج البنت ولا الولد تغير

الله يستر ويغفر ويمحي الذنوب احنا منو عشان ما نسامح وننسى ونستر !؟

وساعات الظاهر شي والباطن شي ثاني
بمعنى ساعات ناس شكلها يوحي بالديانه والسنع واهي من بره هلا هلا ومن داخل يعلم الله
وساعات بنية مفرعه ولبسها مش ولا بد بس مصليه ومسمية واخلاق ما كو احسن منها
عـــــــدل؟
الله يستر علينا فوق الارض وتحت الارض ويوم العرض يارب ويسخر لنا من عبيده من يشهد لنا بالخير ويستر علينا خطايانا
فكل انسان خطاء وخير الخطائين التوابين

 

[mamanoonaa]

بقول الصج وجنه الورد
اتستر عليهم وباجر اخدع الناس ويتحسبون علي ولا ايي واحد موزين حق بنتي الله لايقوله ويكونون متسترين عليه وانغش فيه

 

[Hello_kitty]

ما اقول اللي اعرفه بس ما امدحلهم بالولد او البنت اقول مثلا جمله مختصره وتوصل المعنى

ما انصحكم بالنت او ما انصحكم بالولد ووووووووبس

 

[الحــــياة]

اذا شي جايد اقول.

 

[وحشني شوف الكويت]

اذا سنعه و أخلاقها كويسه أكيد راح أمدحها وأقول الصدق ..
إذا البنت لك عليها طبعن ماراح اخدع الناس وأقعد أمدحها ! وبنفس الوقت ماراح أكب العشا وأقول ترا البنت فيها وفيها !
امممم ما ادري بصراحه ايش راح اسوي ;/ بس أتوقع راح اقول "سوري يعني بس سالفة الزواجات طلعوني منها" لول p;

 

[عمشه جآكسون~]

صراحه حرام لازم نقول الصج لان اذا خذوا البنت او الولد باجر يدعون علي ماتسوى علي ...

انا مره جذي تقدم لي واحد واهلي سألو عنه واخته كل يوم تدق اجيكم ؟ اجيكم ؟ قال اخوي لامي قولي لهم احنا مو اي احد يشوف بنتنا اول شي نسأل بعدين نرد لهم خبر يشوفونها او لا ...

والناس تمدحه بس باقي واحد الي هو ولد عمه وهو رجال معروف قالت امي لابوي اسأله عنه سأله ابوي قال له يا ابو فلان انا بعتبر بنتك بنتي ولو انا مكانك ما ازوجه لان فيه وفيه وفيه اشياء والله ماتنقال والناس تمدحه المشكله ومطيرينه للسماء ...

ولهاليوم ابوي وامي يدعون له لان خوش واحد وقد الامانه ...


والي فيهم شي محد طقهم على ايدهم وقال سوو شي ولاتخلون الناس تكلم لو مو مسوين شي الناس حطتكم على راسهم ...


بس انا صراحه من ناحيتي الي حيل معااااااهم حيل (( بقول لهم والله ناس مايصلحون لكم واكتفي بهذه المقوله ))

واذا مو حيل معاهم بقول له (( روحي سألي عنهم عدل لأن ما اعرفهم عدل !! ))

لأن انا ما ابي اقص على الناس وباجر ينقص علي الي احبه لنفسي احبه للناس ...

وهذا رأي بالموضوع


مشكوره اختي على موضوعج ...

 

[شوشو الشقيه]

بصراحه لو احد سئلني عن شخص
اقول
بصراحه الله ستار
وانا ما اعرفهم عدل
سئلوا احد غيري
انا ما احب اخرب على احد
يمكن هذا الشخص اعتدل ليش اظلمه عشان ماضيه
يمكن هذا الرجل او البنت اعتدلت واستقامت
كلنا يصيبنا فتره طيش
من اختك مشوشو في ناس واايد تصيبها فتره طيش بعدها تستقيم في اخلاقهااااااااا

 

[روح مغليهآ]

اقول بشكل عام اذا البنت زينه,,, والنعم فيها خوش بنت بدون تفاصيل
واذا موزينه اخلاقها بقول ,,, الله يستر عليها لان مايصير اجذب فيها حرام وبنفس الوقت بدون تفاصيل

واذا كانت موزينه وتابت ,,, بمدحها لان الزواج نص الدين والبنت تابت

 

[لحن الغروووب]

والله الصررررراحه راحه

بس على حسب اللي يسأل اذا كان كفو ولا عنده نقل كلام أعطيه الصراحه بس اذا كان العكس لالالالا

 

[CUTE ENGINEER]

الصراحة أقول الصج

بس عادة إذا أحد سألني أقول اللي أعرفه وأقول لهم سألوا

أحد غيري بعد

 

[دوت نت]

اذا فيهم مدح امدح

اما اذا فيهم عيوب اقول مااعرفهم عدل اسالو عنهم

اما اذا شي مايترقع وجايد اقولهم

وعلى قولتهم من استشارك دخل ذمتك

 

[vogue grl]

صراحه مادري بس عجبني ردين شوشو الشقيه و happy&single

 

[آلسحرآلحلال]

مادري موقف صعب الصراحهـ
والحمدلله مانحطيت فيهـ ....
بس اكيد مراح اقول العيوب ... الواحد لازم يستر على خلق لله ..

 

[{ عبره وهلت }]

..{ اسكت واقول مادري اذا مو زين ابد
..{ واذا لا والله ناس ونعم امدح واقول
........................... الصج

هذا زواج والسؤال ذمه وضمير ..
وانا اخاف اظلم فـ اسكت احسن



.~

 

[المـــــها]

بصراااااااااااااحــــــــــة


أقول مادري أو ما يصلح لج !!! أو الله يهديه إن شاء الله

يعني تلميح لأنه زواج و ما سالوج إلا و انتي ثقة بالنسبة لهم

فإذا كان زين الحمدلله و يا بخت من وفق راسين بالحلال

أما إذا كان أو كانت راعين سوالف

ف الله يهديهم ،،

 

[((*فروووحه*))]

تــم التصويت
اقووول الصج

 

[مزآجيه!]

مـدري..!



موقف صعب..!


بس بحآول أقول الله يستر علينآ وعليهم..


كيفهم هم يفهمون