فيني تحلطــم وتقرطـــم ياخيــه !!؟

[happy&single]

بالمدرسة علمونا ان الانسان اجتماعي بطبعه
لأن لازم يعيش ضمن مجموعة لا يستطيع ان يعيش مفردا ،، أبدا
هذي حقيقة لكن حاليا وبزمن الانترنت والموبايل والبلاك بيري صعب ان نقول انها حقيقة !!

هل اللي عندها اصدقاء وااايد على النت تكون شخصية اجتماعية؟
هل اللي عندها بالبلاك بيري قروبات وااايد شخصية متحدثة ؟
هل احنا الحين بنات مثل امهاتنا وجداتنا في قعداتهم وسوالفهم ؟؟؟؟

للأسف تغيرت الحال ووالبنات والشباب مايعرفون اشلون يتكلمون بمجالس الرياييل ومجالس الحريم
قاموا ما يعرفون السنع والتوجب ماتلقين اللي ينقال عنها رد وبدل ..

والحجي الكويتي اللهجة الحلوة اللي اختلط فيها مو صج وأي شي وملاااقة وماك شكن!!!!؟؟؟
بالله عليكم ماك شكن شنو؟؟؟؟؟؟؟؟ مصطلح غريب عجيب
كل واحد ووحده فيهم ماتعرف كوعها من بوعها .. اكيد بيسألون شنو كوعها وبوعها !! يا حظي عليكم سألوا اهلكم بقولون لكم :bbbiu:
ماقمنا نسمع واخزياه وياحافظ وعييلت " تصغير يابت عيال" ووايد كلمات نسمعها الحين من الممثلين اللي بالمسلسلات اللي المفروض كويتية
وكلها غلط الريال يقول حجي المرة والمرة تقول حجي الريال وعد وخربط بالالفاظ الغلط ،، على قولة عيال هالوقت بدليات !!

يقولون الاوليين كل وقت ما يستحي من وقته ،، فعلا احنا بزمن الاطباع تغيرت ومفهوم السنع والواجب والعيب تغير
اكيد انا مع التطور والحداثة بس في ثوابت لازم ما تتغير بصمة تميزنا ككويتين وكخليجيين حسافة تنقرض

لهجتنا أمثالنا حتى حزاوينا منو منكم تعرف قصة مهنا ومرت أبوه؟؟ وقصة تريترة وعروج ؟؟ وقصة بير زويلة ؟؟؟ دوروا كتب بزة الباطني واقروها لكم ولعيالكم

منو يعرف اشلون نطبخ اكلاتنا الكويتية ؟؟ مو شرط سويتيها بس اتعرفين اشلون الطريقة؟
المطبق والمجبوس والمرقوق والمموش والمعدس ومحروق صبعه وميدم والمحمر و .. و.. لاحظتوا اغلب الاكلات تبدأ بحرم الميم ؟ تعرفون ليش ؟؟ فكروا شوي

منو يعرف يرقص سامري فيكم بنات ؟؟ سامري مو شرقي وهز وسط
ياحلو رقص السامري الثوب مغطيها بهالزري ورقص فيه نعومة ورقي ،، الله وأكبر يا نصيبي وانا وش بيدي كل ما عدلت واحد يميل الثاني .. الله ياحلاة الكلمات
مو يالتاكسي ودني لا اسوي شي بنفسي !! هذا حجي بذمتكم ؟

تعرفون الزهيريات؟ اقروا هذي ..
أرابع الوحش وادعي مثلهم وحشي
و آخذ على الراس من رمل الثرى واحشي
من عقب ذيك المعزه صرت أنا الوحشي
واصبحت مفجوع هم أهلي و هم مالي

منو منكم يدري ان البنت لا تزوجت تقعد في بيت ابوها مع ريلها اسبوع وعقبها التحوال لي بيت اهل ريلها وامها تزورها ثالث يوم عقب ماراحت يسمونه الثويلث ، منو فكرت تدور على هالمعلومة من باب الفضول حتى؟

انا ما اقول خل نلبس البخنق والثوب انا اقول لبسوا ثوب اهلكم وتكلموا لهجتهم وعرفوا عاداتهم وتقاليدهم وتراثكم ونقلوها للاجيال اللي وراكم وللي وراكم ،،
اللي ماله أول ماله تالي .. بس كنت ابي اتحلطم عن خاطري من حر مافي حشاي
لما اشوف وحده حجيها مقولب ولما تسمعني تقول وااي عتيجه ؟؟ عتيجه عتيجه هذا حجي اهلي وحلاة الثوب رقعته منه وفيه ،، عدل ؟؟

 

[so_what]

والله كلامج صح و 100 % صاير الحجي يتغير مع الزمن مثل ما كل شي متغير ، احلى حجي حجي الاوليين يا زينه والله عسل والحين استغفر الله تقولج جمله كلمتين عربي و الباجي انقليزي مادري يعني موضه و لا عبالها جذي بتصير اكشخ و اذرب

 

[~*~الملكة~*~]

:27d66a9c24b146327bf


لزووووم التطور :O_SHH_:


كا انتي للحين تعرفين هالكلمات ومحافظه عليها

يعني هاللهجه للحين موجوده مااندثرت ولاصارت عتيجه :fun:

 

[pink Engineerah]

اي والله معاج حق ياريت الكل نفسج

 

[جنى q8]

حبيبتي واللــــــــــــــــــــه كلامج كله صح
انتي مثل اختي تقط لها جم كلمه اقعد اضحك عليها عبالي بدليه اثاريها هي الصح وانا الغلط خخخخخ

انا اكثر كلمه غاثتني ماك شيكن شكووو

صمونه اش دخلها بالي عنده تلفووون

يعطيج العافيه حبيبتي

بس صج قبل لا انسى

تكفين جاوبيني

فعلا توني الاحظ ان اكلاتنا تبتدي بحرف الميم صج ليش ؟؟؟؟؟

 

[اللوحة الناقصة]

كلامج عدل حبيبتي

وذكرتيني بكلام غنيمة الفهد الباحثة في التراث الكويتي

كانت كاتبة مقالة بالجريدة عن هالموضوع وشلون اندثرت اللهجة الكويتية

وحاطة بعض العبارات القديمة في لهجتنا الحلوة الي ما قمنا نستخدمها

واستبدلناها بعبارات من دول عربية مثل مصر او دول الشام

وقالت السبب ان من اول ما ابتدو ايون مدرسين عرب الكويت

ولان لهجتنا غريبة عليهم بدال ما نعلمهم لهجتنا احنا قمنا نكلمهم بلهجتهم علشان يفهمون علينا ونسينا لهجتنا مع الوقت

طبعا مع احترامي لهم كلهم بس المفروض كل دولة تحافظ على تراثها الي اهو هويتها وجزء اساسي منه اللهجة


وتصدقين الموضوع له علاقة بعد بالمحيطين فيج

يعني مثلا انا عندي رفيجتي واختها اربع وعشرين ساعه مطيحين في بيت يدتهم

وتعالي عاد سمعي كلامهم ،، يونسون يقطون كلمات كويتية قديمة

يعني واايد من الي يحتكون بكبار السن من اهاليهم تلاحظين كلامهم كويتي قديم

عكس الي يماشون الي من طقتهم عرفتي

وما قلتي لنا ليش الاكلات الكويتية كلها تبدتا بحرف الميم ؟؟؟ اثرتي فضولي


وتسلمين عالموضوع القيم ​

 

[غربــــة اِحساس]

ياحلوج ياهابي ..

تدرين عاد الجيل القادم بيكون اسوأ من الحالي الي قاعدين نتحلطم عليه ونقول مايعرف الكلمات والاكلات الكويتيه

بيكون جيل لهجته كويتيه ركيكه نظام خدم !!

بنت اختى تنادي اختها الاصغر : انتى ليش في خوف ؟؟ ههههههههههههههه

مالومهم مجابلين هالخدم والفضائيات والامهات يالله يلحقون يدوامون ويدرسون عيالهم

الزمن تغير والوقت اختلف قبل على الاقل الحموله كلهم عايشين في بيت واحد

وياخذون الحجي والنطق الصح من الجد او الجده

يعني حتى البيت نظامه اختلف ماتبين اللسان يتغير معاه

وترى صج الي تتكلم كلمات كويتيه اصيله يقولون عنها نظاام قديم او بالاصح عيوزه لوول

 

[توته وااااااااو]

عدل كلامج

 

[الحــــياة]

كلامج صح100%

 

[أمواج البحر]

احنا فيها

عيالنا جيل المستقبل نكلمهم بكلامنا و بلهجتنا

عيالي اكلمهم حجي الكويتي الاصلي و ما يفهمون علي

اترجم لهم الكلمه عقب اهم يستعملونها

مثل مره قلت حق ولدي العود .. روح ييب جنطتي الدعمه

تنح بويهي وقالي شنو يعني دعمه

قعدت اضحك عليه هههههههههههه قلت له يعني لون بني

احاول كثر ما اقدر ادخل لهجتنا الاصليه بحجيهم

وان شاء الله ما تندثر لن صج ما في احلى من لهجتنا الاصيله

وشاكرتلج على الموضوع

 

[أحبه موت]

عدل كلامج حبيبتي الحين اذا الوحده ماتكلمت وقطتلها على الماشي جم كلمه بالانجليزي ماتصير كويتية وماتعرف شي ومو ستايل كلش
واايد كلمات من اللهجة الكويتية اندثرت حتى لمن نسمع يداتنا يتكلمون مانفهم بعض المرات عليهم
بس أبي أعرف ليش كل أكلاتنا تبي بحرف الميم؟؟؟

 

[The purple]

وناااااااااااااااااااااااسه حبيتج

انا متربية ابيت يدي وحافظه بيوت الفريج وكل يمعات حريم الفريج كنت اروحها

وعندي وحده من رفيجاتي كانت عايشه بـ لندن وكل ما اقط مثل جدامها تقولي : وااااااااااااااااو عيديه i likw your way

وساعات اتوهق انسى الكلمه شلون اقولها !! بلهجتنا ولا كلمات الحين أو أصلاً الكلمه صح ولا كلمة بلاد الشام !!

و امس بنت خالتي تقولي : وعليه معطينها عوينه , بنت خالتي صغيره بس اللي كبرها على طول يقولون : صكوها عين ! < جنها وحده من الربع ماكو ذرابه


مشكوووره وصج يبيله نسوي حمله بالمنتدى حق التراث والكلمات وحتى الأسلوب ~

 

[شوشو الشقيه]

تسلمين اختي
من قال اني البنت الي عندها قروب
والبنت الي عندها اصدقاء واايد في النت اجتماعيه
بالله عليكم
اصلا بصراحه انا لا اؤيد فكره عمل قروب في النت تماما
انا صديقتي الصدوقه قالت لي تعالي دخلي قروبي قلت لها مشكوره انا ما احب سوالف القروب لانها تجيب مشاكل وجع القلب
انا انسانه احب اكون وحدانيه بروحي هنا استانس والله رديت عليها هذا الرد
ما يعجبني سوالف قروبات في الايميل واو قروبات في المنتدي
ما يعجبني فكره القروبات في الانترنيت بصراحه
والصراحه راحه
هذه صديقتي الي اعزهااااااا واايد واايد قلت لها
كذاااااااا
وحتى الاصدقاء في المنتديات ما يعجبني
لاني بطبعي احب الوحده والهدوء ولا احب يزعج مخي ويعكر مزاجي
اصلا اي اجتماعيه الي يقول الي عندها اصدقاء في النت
اي اصدقاء اصدقاء وهمين احد يقول عن اصدقاء النت اصدقاء
بالله عليكم
ما تعرفون اصلهم ولا فصلهم ولا عائلتهم ولا اود من او ابناء من ولا تعرفون وين يسكنون وشنو اخلاقهم
هؤلاء لا يسمونهم اصدقاء انما زملاء او علاقات سطحيه
الصديق غير
بصراحه ما انكر في في النت اشخاص طيبين من البنات حبوبات حلوينات
ولكن بصراحه
احنا ما نعرفهم عدل ولا نعرف اشكالهم نتخاطب معاهم فقط بالشاشه
ايش ضمناااااا ان هذه البنت ما تكون ولد يكلمناااااااااااا
او هذه الولد ما يكون في اصل بنت
يعني احنا بصراحه ما نعرف اخلاقهم ولا حدودهم ولا شيء عنهم
غير الي يكتبونه لنا في منتديات او مواقع تعارف
جمل في جمل
ولكن هل فيه تخاطب حسي في تخاطب او مشاركه
ما ادري بصراحه
بس ما يعجبني هذه النوع من الافكار
بعد ما ادري يمكن تغيير فكرتي عن قروبات مع الوقت
الله اعلم
بصراحه
من اختكم شوشو الشقيه

 

[happy&single]

so_what
ما ادري من قالهم الذرابة انه ناخذ لهجة مو لنا ولا طبايع مو لنا ؟؟
الحين ياحافظ يا عقايل الله لي قالت وااااي مو صج .. هذي الذرابة؟؟

~*~الملكة~*
ان شاءالله ما تندثر
وودي ودي كل البنات ما يخلون هاللهجة الحلوة قميضة عليها

pink Engineerah
يلا انتي فيج الخير والبركة ،، حاولي ما اتكلمين الا بلهجتنا وخلوا عنكم الحجي اللي مو لنا

 

[ابيار علي]

انا قلبي يعورني من اقرا كلام جذي..
الله يكثر من امثالج الغيورين على تراث الكويت

 

[~*~الملكة~*~]

تسلمين اختي
من قال اني البنت الي عندها قروب
والبنت الي عندها اصدقاء واايد في النت اجتماعيه
بالله عليكم
اصلا بصراحه انا لا اؤيد فكره عمل قروب في النت تماما
انا صديقتي الصدوقه قالت لي تعالي دخلي قروبي قلت لها مشكوره انا ما احب سوالف القروب لانها تجيب مشاكل وجع القلب
انا انسانه احب اكون وحدانيه بروحي هنا استانس والله رديت عليها هذا الرد
ما يعجبني سوالف قروبات في الايميل واو قروبات في المنتدي
ما يعجبني فكره القروبات في الانترنيت بصراحه
والصراحه راحه
هذه صديقتي الي اعزهااااااا واايد واايد قلت لها
كذاااااااا
وحتى الاصدقاء في المنتديات ما يعجبني
لاني بطبعي احب الوحده والهدوء ولا احب يزعج مخي ويعكر مزاجي
اصلا اي اجتماعيه الي يقول الي عندها اصدقاء في النت
اي اصدقاء اصدقاء وهمين احد يقول عن اصدقاء النت اصدقاء
بالله عليكم
ما تعرفون اصلهم ولا فصلهم ولا عائلتهم ولا اود من او ابناء من ولا تعرفون وين يسكنون وشنو اخلاقهم
هؤلاء لا يسمونهم اصدقاء انما زملاء او علاقات سطحيه
الصديق غير
بصراحه ما انكر في في النت اشخاص طيبين من البنات حبوبات حلوينات
ولكن بصراحه
احنا ما نعرفهم عدل ولا نعرف اشكالهم نتخاطب معاهم فقط بالشاشه
ايش ضمناااااا ان هذه البنت ما تكون ولد يكلمناااااااااااا
او هذه الولد ما يكون في اصل بنت
يعني احنا بصراحه ما نعرف اخلاقهم ولا حدودهم ولا شيء عنهم
غير الي يكتبونه لنا في منتديات او مواقع تعارف
جمل في جمل
ولكن هل فيه تخاطب حسي في تخاطب او مشاركه
ما ادري بصراحه
بس ما يعجبني هذه النوع من الافكار
بعد ما ادري يمكن تغيير فكرتي عن قروبات مع الوقت
الله اعلم
بصراحه
من اختكم شوشو الشقيه

لووووووووووول مضيعه العنوان:tomato2:

 

[~*~الملكة~*~]

لا انشاءالله ماتندثر لهجتنا

امواج البحر انا وايد اقوول دعمه بس يتطنزون علي:tomato2:

 

[happy&single]

جنى q8
الله يعافيج وماني قايلة لج نحيسة
فكري سهل السؤال ..

اللوحة الناقصة
غنيمة الفهد حجيها يونس صح
بس اهلنا من عمر درسوهم الفلسطينين والمصريين ما انعوت حلوجهم!! كاهم شحليلهم حجيهم كويتي بحت
بس عيال هالوقت اللي عفسوا اللهجة وقاموا يضيفون عليها مصطلحات غريبة عجيبة
ياحلو حجي اليدات ومو بس اللهجة السنع والمنع في الاسلوب والطبايع .. جان زين نوصل نصهم

غربــــة اِحساس
حلت دنياج ياقلبي ..
يا امي الشاعر يقول :
نعيب زماننا والعيب فينا وما لزماننا عيب سوانا
شكو المشاغل والتدريس بالسنع والحجي !؟ ،، ماكو اكثر من شغل امهات قبل تغسل الهدوم وتحلب واتييب عيال واتربي واترضع؟؟؟
وتنظف و..و... مشاغل وااايد بس ربت رياييل وحريم ماكو مثلهم.
بس امهات الحين ما تقعد تسولف مع عيالها تحازيهم تكلمهم تاخذ وتعطي ومعاهم عشان يتعلمون منها هذا الفرق
قعدي مع عييلج وسولفي وغني معاهم وونسيهم بينسون حجي الخدامة كله ،، عسى الله يخليهم لج

 

[happy&single]

أمواج البحر
زين تسوين الله يجعل كل الامهات مثلج يارب
واذا ييتي على التسأل عندنا وياج خير مثل ذاك اليوم اقول حق اختي هذا البيت لونه "مــدودم" ماتت من الضحك
تقولي شنو؟؟ حتى امي تقولي انتي عتيجة حيل وين طرت عليج هالكلمة!!
حق اللي ما يعرف المدودم يعني لون اييب القامت مطفي مو حلو : )

أحبه موت
لا انا متفائلة ان شاءالله بناتنا فيهم الخير والبركة ويخلون عنهم سوالف لووول وكاااك ويعرفون ان مالهم غناة عن لهجتهم
اصلا اشلون الواحد يصير له هوية يعرفون هذي كويتية ولا سعودية ولا لبنانية؟؟

واااي ذكرتوني ،، يا كرهه كلمة صبـــــــاحو اللي هابين فيها هالايام ،، ياشين شي ما شابه اهله

 

[happy&single]

شوشو الشقيه
حياج الله يا الشقية
ويا وخيتي ليـش ما كملت قريتي باجي الموضوع ؟؟؟ هذي العيله وما تسوي
ناطرتج : )