الاستحمام بعد الولادة مباشرة

[malekaa]

السلام عليكم جميعا​

بنات حبيت اسأل هل السباحة بعد الولادة مباشرة مضرة للوالدة وانه مو زين حق الجرح اذا ولادة طبيعي اتمنى اللي عندها اي فكرة عن هالموضوع تفيدني لانه انا عندي وسواس السباحة وداخله على ولادة وناس تقولي مو زين وناس تقول عادي بلييييز اللي عندها دراية بالموضوع تفيدني والله يجازيها خير ان شاء الله

ادعولي الله يقومني بالسلامة​

 

[سموره 87]

الله يقومج بالسلامه

 

[ساشا]

شوفي انا ولدت بالصباح بالليل وقعدت من النوم رديت بيت اهلي على الحمام على طوووووووووووووووووووووول
سبحت غسلت شعري وخليت الماي يمشي علي شوي بدون تفريك ولووووية بس على الخفيف لان توني مخيطة

والحين بنتي عمرها 13 ..... لا ضرني ولاشي

توكلي على الله ... بس ديري بالج جسم عن جسم يفرق ... وخلي الباب مو مقفول ووصي امج او اختج تتفقدج

ومالج شر ان شاء الله

 

[روحي زوجي]

مثل ماقالت ساشا جسم عن جسم يفرق اختي تسبحت وجاها ابو وجه وبنت عمتي سخنت والسبه شعرها مو راضي ينشف وماتت الله يرحمها لان كان بالصيف والتكييف مشتغل ,,,

والحمدلله على كل حال ,,,

ترى معروفه ان الوالده ماتتسبح الا بعد اسبوع بالنسبه لي تسبحت ثالث يوم او يمكن بالسابع مااذكر بالضبط بس مو اول ما اولد ,,,


والله يقومج بالسلامه ...

 

[Pinkish Lady]

عسى الله يهون عليج ويقومج بالسلامه
شوفي حبيبتي انا ولدت مرتين وكل مره في مستشفى غير
يوم اللي اولد كله نايمه ومرتاحه وما اقوم من السرير
ثاني يوم من الصبح اقوم واتسبح والحمدلله ما فيني الا العافيه
بس حطي بالج لازم احد يدش معاج لا تدشين بروحج وحطي لج كرسي قعدي عليه وانتي تسبحين
ولبسي كل هدومج بالحمام وهلله هلله بالدلاقات والملابس الداخليه الطويله وضروري تنشفين شعرج
وما عليج الا العافيه انشالله
حتى طول ايام النفاس اسبح يوم وترك

 

[ام ريان3]

عسى الله يقومج بالسلامه حبيبتي على حسب مثل ما اقلو جسم عن جسم يفرق والمستشفى السستر تسالج اذا تبين تسبحين ولالا

 

[نوت الحب]

الله يقومك بالسلامه
كان ودي اساعدك بس ماعندي خبره

والاخوات ماقصرن

 

[malekaa]

مشكووورين ياقلبي كللللللللللكم ويرزقكم بالذرية الصالحة يااااااااااااارب

 

[كتكوته و اموره]

الله يقومج بالسلامة
عادي تسبحي بس اهم شي بدلي هدومج بالحمام و تدفي عدل عشان ما يلفحج هوا

 

[ام عيون عسلية]

انا اللي اسمع فيه ان قبل الولاده على طوووول تتسبح وعقب تروووح الطبيب !!

وعقب اسبوووووع يالله تتسبح!!

 

[*ماي الورد*]

سبحان الله الجسم يطلع منه صنان تكرمين بعد الولادة الطبيعية مادري ليش تحسين نفسج مو طايقة روحج
ومو حلوة تستقبلين الناس و انتي فيج ريحة
انا اسبح ثالث يوم عقب ما اطلع من المستشفى
بس البس عدل بالحمام وا غطي شعري

 

[malekaa]

عدل كلامج كريمه وانا استقبالي بيكون بالمستشفى مو حلوه تكون ريحتي موزينه
شكرا ام عيون عسلية

 

[شمس ٍمطله]

عادي انا تسبحت وانا قاعده على كرسي ولبست ملابسي ونشفت شعري فالحمال وعاااادي جدا
بالعكس ترتاحين لكن تحملي من المكيف والهوا


والله يقومس بالسلامه

 

[كريستال]

عسى الله يهون عليج ويقومج بالسلامه
شوفي حبيبتي انا ولدت مرتين وكل مره في مستشفى غير
يوم اللي اولد كله نايمه ومرتاحه وما اقوم من السرير
ثاني يوم من الصبح اقوم واتسبح والحمدلله ما فيني الا العافيه
بس حطي بالج لازم احد يدش معاج لا تدشين بروحج وحطي لج كرسي قعدي عليه وانتي تسبحين
ولبسي كل هدومج بالحمام وهلله هلله بالدلاقات والملابس الداخليه الطويله وضروري تنشفين شعرج
وما عليج الا العافيه انشالله
حتى طول ايام النفاس اسبح يوم وترك

:tek:

 

[malekaa]

يعني اذا تسبحت الصابون او الشامبو اللي اغسل فيه شعري ما يأثر على الجرح ادري اني حنانه بس لاني خايفة

 

[أم حموووود]

لاعادي مايأثر بس عاد مو تستخدمين شامبو وصايون بعطر مركز

 

[malekaa]

شنو الشامبو اللي تنصحيني فيه

 

[الصعيريه]

انا لما ولدت بنتي ثاني يوم تسبحت
بس عقب سمعت انه موزين النفااس تسبح على طوول يقولون على الاقل تقعد اسبووع بس ويييييييييع احسه لوووعه...

 

[وهج الخير]

يعني اذا تسبحت الصابون او الشامبو اللي اغسل فيه شعري ما يأثر على الجرح ادري اني حنانه بس لاني خايفة

السلام عليكم
والله يهون عليك وعلى كل الخوات بالسلامه والعافيه باذن الله تعالى
بلى ياثر بس الفلبينيات ما راح يخلونك لا تخافين تساهيل اهما يفرونك يمين ويسار لووول لما تخلصين بس لا تدخلين بروحك الحمام خل يكونون تكرمين بالحمام معاك لان الوحده تحس انها تمام التمام فجاه يغمى عليها واسم الله عليك وعالخوات لان وحده من بنات عمتى صار فيها جذيه واسم الله عليكم والله تساهيل انا خواتى كلهم نفسك وخايفين موت ولولدوا تساهيل لان النيرسسز ما يخلونهم ويارب يسخرلك السسترات الطيبين وخواتى اهما نفسك استقبال بالمستشفى
واذا عمليه اسم الله عليك يارب وفال الله ولا فالى يضبطونك لا تخافين ابد بس اخذى الشامبو الخاص فيك وكذا فوطه معاك والله سهااااااااااالات لا تخافين وعسى ربى يفرحك ويفرح الخوات باولادهم وذريتهم باذن الله

 

[leza_q8]

السلام عليكم ورحمة الله وبركاته ..

ااحنى طبعنا ما نسبح الا سابع يوم مو الولاده

وقبل الولاده بالشهر التاسع كل يوم نسبح لان السبوح يريح جسم الحامل من التعب وبعد تخليها تسترخي وتشجع على الولاده

وبعد الولاده ب7 ايام نسبح كامل " سبوح كامل "

بس اختي انتي بالمستشفى لازم تغسلين جسمج كل يوم بالماي والصابون تعرفين عرق ودم فانضف

بس مو ضروري شعرج وممكن ناس تقول الشعر يدهن " عادي انتي بنفاس " محد بعلق

والي بعلق ماعنده سالفه بصراحه

بعدين ترى جد ادا حاشج هوى بعد لنفاس يبهدل رفيجتي حاشها هوى وعليه صج كانت طول الاربعين من مستشفى الي مستشفى كل يومين يطلع فيها شي