تجمع امهات العالمية الامريكية

[Fouz]

شلونكم أمهات

كاراميلا ما طلبتي شي افا عليج راح أحط لج كل المعلومات و اذا تبيني ادزهم لج ايميل ما عندي مانع، و عليكم بألف عافية يارب تستانسون و تغيرون جو و مثل ما قالت لج المدرسة ان شاءالله ما يضيع على ولدج ولا شي أهم شي وناستكم


بيزيدون الرسوم؟؟؟؟ ليش؟ اشدعوة الحين الرسوم هينة و كل سنة تزيد والله انهلكنا، و 5% يعني زيادة 50 دينار على كل ألف، يعني مرو زيادة ولدج الله يحفظه 150 دينار و فوقها جم دينار، الله يعين اللي عنده أكثر من ياهل،، مروو اذا حصلتي شغل عطيني خبر هههه انا باخذ امومة يعني ماكو معاش الله يعين الرياييل على المصرف

 

[bella bambina]

صباح الخير أمهات اشلونكم ؟
آنا موافقة يزيدون الرسوم على شرط يسنعون مدرسينهم
أم الحوراء عيالي مواليد شهر 10 و 11 غصب يقبلونهم ويلوعون جبدي المدرسات بمراحل الروضة دايما يقولون لي عيالج متأخرين عن باجي الصف وخاصه بالكتابه لأنهم أصغر من الباجين ولو احنا بأمريكا جان ما قبلوهم حدهم مواليد 9 ولما يبتدون بالابتدائي ياخذون امتيازات !!!!!!

 

[ام الحوراء]

السلام عليكم أمهات
إي والله بيلا إنشالله بسوي اللي قلتي عليه خل أشتريلي printer هاليومين و أقعد أطبع في هالأوراق و آخذها معاي إنشالله
أم الحوراء حياج الله نور التجمع
الله إعافيج والله ريمان ما قصرت فجت لنا هالتجمع منه نفيد و نستفيد بنفس الوقت و كلنا بنات التجمع اكثر من خوات ولا وحده فينا تبخل عالثانيه بأي معلومه أو مساعده تتعلق بالمدرسه
الله يسلمج آنا أشوف وحده عند باب الهده ولها نيرسري وهم نفس مشكلتج ولدها مواليد شهر يناير وحاولت إنها تدخله كيجي 1 ما قدرت
عقب ودته الغانم دخلوه كيجي1 قالولها العالميه ما تقدرين تنقلينه عندنا إلا لما يصير غريد2 ونسويله إختبار ونشوف إذا يقدر يمشي مع طلبتنا في قريد 2 ولا إنزله غريد 1 ثاني شي وتقول يننها ولدها كلش ما حب المكان فا قررت إنها تدخله نيرسري بالعالميه ولا هالبهذله
وصاجه نفس إلعام التسجيل شهر 1 بس ترى ديري بالج النيرسري بسرعه يسكر لأنه كلاسين بس
فإذا إنتي فعلا راغبه بالمدرسه قوليلها بدفع 100 دينار من الحين بحجز لها كرسي عادي يرضون ولما يمتحنونها على شهر 3 إذا نجحت يخصمون فلوس الإختبار جنه 35
أو45 دينار والباجي يكمل فلوس رسوم الدراسه أما إذا ما إنجحت الله لا يقوله ياخذون رسوم الإختبار ويردون لج كاش باجي ال 100 دينار
إنشالله أكون أفدتج
وليييييييين ليش هالزياده بعد إبروحه رسومهم ماشالله لاإله إلا الله

حبيبتي يعطيج العافيه على الافاده يعني يمكن ترفض بنتي امبى شلون يعني اسجلها بكذا مدرسه احسن والا شرااايج؟؟

شي ثاني بسال عن الرسوم شلون طريقة الدفع يصير اقساط ؟؟
اذييتج انا اسفه بس صج احس اني محتاره وخايفه لانه اغلب المدارس شهر 1 التسجيل

 

[Fouz]

صباح الخير،، شخباركم أمهات

بيلا شلونج، قوليلي شنو اعتراضج على المدرسين و متى حسيتي انه عنهم مشاكل، نورينا لان عندج خبرة اكثر منا، و شنو سويتي لما حسيتي بضعف المدرسين كلمتي الادارة؟ ردوا عليج والا طناش؟؟ و مشكورة ادري سألت وايد بس تفاجأت لما قلتي مدرسينهم يبيلهم تعديل


أم الحوراء حياج الله ويانا، برد عليج على ما تشبك كاراميلا
انصحج تسجلين بأكثر من مدرسة لان العالمية ما راح تقبل الا مواليد 2006 حق كي جي 1، و بالنسبة للرسوم مثلا كي جي ون رسومهم 1630، دفعنا بعد اجتياز المقابلة 450 دينار و بعدين مع بداية الدراسة تدفعين دفعتين كل وحدة 590 وحدة بشهر تسعة و الثانية بشهر 1

 

[Miss_Tiger79]

السلام بنات انا يديده يشرفني اني انضم لكملاني وااايد استفدت منكم يعطيكم العافيه بس امانة مو كل الصفحات قريتها ,
انا الحين عندي مشكله رحت بسجل بنتي قالتلي التسجيل شهر واحد بس للاسف بنتي مواليد 1-2007 راح تدش حضانه مو اولى روضه عاد اهي الحين بحضانه اتوقعت على شهر 9 الياي يدخلونها روضه تصير 3 سنوات و8 شهور يعني ما بقى شي على الاربع

شراايكم بنات تتوقعون في حل ؟؟؟

لا وشي ثاني قالتلي راح اتزيد الاسعار 5% هااااا قولولي شرايكم

ام حوراء
ليش يحطونها حضانه
عاد بنتي مواليد شهر1 بس تروح روضه السنه اليايه انشالله
ليش ما يقبلون مواليد سنة 2007
بس اهيه بدخلها التكامل

 

[bella bambina]

هلا والله فوز الحمدلله حبيبتي بخير
أول شي المفروض المدرسات ما يكونون عربيات العام بالحضانه كانت أبلة دلول هندية لهجتها خواره وما تعامل اليهال عدل ولما كلمت الناظر بدلها بلبنانية والعام أبلة ولدي بكي جي 2 كانت وايد عصبية وما تعرف تعامل عيال الروضة وعقدت ولدي وعيال الصف من كثر ما تصرخ وتعصب عليهم ولما وصلت حدي وتهاوشت معاها حطت عليه زيادة والمساعدة بلغتني بهالشي وما رضو يغيرون صفه فكنت العام على أعصابي بس الحمدلله السنة أبلته تينن وممتاز بكل المواد مع انها كانت تبي تخليه يعيد كي جي 2 ولما قلت هالشي حق أبلته الحين تقول هذي غبية
هذا غير مدرسات العربي يدرسون التربية الاسلاميه وتدريسهم مو قوي
وبنتي لما كانت بقريد 3 كانت يوميا تييلي البيت مو فاهمه الرياضيات وكنت أرد أدرسها ولما سألت باجي الأمهات كانو يقولون نفس الكلام

 

[Fouz]

أهلين بيلا

مع الاسف كل شي حظ، بالله شنو ذنب اليهال يصيرون عند مدرسات يعقدونهم، بس كلامج عدل بالنسبة حق المدرسات مادري ليش مو أجانب، كل شي عاد ولا الهنود يخربون لهجة اليهال، انا عندي فلبينية والله مأثرة على بنتي كانت ما تقول five تقول Pipe نفس الفلبينيات، الحين أعلم الثنتين بنتي و الخدامة

عفية شسم مدرسة كي جي 2 لا تطيح بنتي عندها؟؟!! عاد انا بنتي وااااايد حساسة أمس رادة زعلانة لان ابلة العربي ما حطت لها طباعة على ايدها ،، تقولي ماما انا مو شاطرة علشان ما حطت لي بعد شلون لو تصرخ يمكن تستخف بنتي

بس تدرين وين المشكلة بيلا؟؟ المشكلة ان في وايد أمهات ما يتكلمون و يحاولون يغيرون الوضع ،، المفروض شكاوي على طول علشان محد يقول ما تكلمتوا،، يطري علي بحضانة بنتي قبل كان في مدرسة خلت بنتي تكره تشوف الشمس لان اكو مدرسة تنطر الليل و تشوفينها تلعب و تسولف، بدون ما أبالغ اسبوع كامل انا بحضانتها و غيبتها لما غيروا صفها، حتى لما يقولولي المديرة مشغولة أقولهم انا ما عندي شغل بقعد لما تفضى،، بالعربي زهقتهم لما غيروا الصف

 

[bella bambina]

فوز كان ولدي العام عند مس سيسي ومو بس آنا اللي اشتكيت عاد آنا علاقتي وايد زينه بالمدرسات والأغلبية أعرفهم بس طلعتني عن طوري وكنت محاولة قبلها باللين والورد والهدايا قلت أكسبها يمكن تحن على ولدي بس يومها كانت سيارتي مبنشرة وواصلة متضايقة وتفاجأت انها زافه ولدي لأن غلاف الواجب مو موجود وآنا ناسية أحطها مو غلطة الولد وكان الواجب تعطيهم اياه يوم الاحد ويسلمونه الخميس وما رضت تاخذ الواجب منه وحطت له اكس وولدي مو فاهم ليش وآنا مفهمته ان الواجب اللي مسويه ممتاز فحط راسه داخل المكان اللي يحطون فيه جناطهم وظل يبجي ونادو له الأخصائية فلما وصلت وشفت ولدي بهالحال ينيت وصرخت وعفست الدنيا وقلت لهم ماأمشي الا لما تنادون مستر ديف الناظر القديم ودقيت على ريلي قلت له بنقلهم كلهم وظلو المدرسات الباجين يهدوني وبعد أسبوع الناظر صالحنا مع اني كنت رافضة بس ما باليد حيلة

 

[bella bambina]

فوز دلول تقول أبله عصام حطت لهم طباعة لأنهم قالو قرآن
آنا بعد بنتي متأثرة بالفلبينية تقول تيت teeth وماوت mouth وما ترضى نعدل لها تعصب والله لازم يحطونها عند مس سيسي عشان تأدبها

 

[mr000]

السلام عليكم أمهات! والله بيلا خوفتيني ألحين قمت أحاتي بنت ولدي لأني قاعده أقنع أبوها ندخلها من الحضانه بالعالميه وهو وده الخليج أو مدرسة الكويت الأنجليزيه بصراحه هذي الكل يمدحها ومدرساتهم كلهم بريطانيات وتعاملهم يهبل مع اليهال بنت أخوي من كثر ماكانت تحب المدرسه كانت تلزم عليهم بالصيف يسجلونها بالنادي مال المدرسه فكانوا يضطرون يأخرون سفرتهم علشانها لما يخلص النادي وبصراحهم تدريسهم قوي بس آنا مو مشجعته عالنظام البريطاني وأذا جذيه آنا أفضل الدوليه الأمريكيه بعد هذي أذا الياهل مادش من الروضه صعب تالي يقبلونه!والله آنا من ألحين أحاتي ولدي بالثانويه مادري اشلون مستوى مدرسينهم والمواد صعبه أقوله أنت مالك حظ بالمدارس كل مدرسه نسمع أنها زينه ولما ننقلك لها تخترب وينتقلون المدرسين الزينين منها!آنا بمر يوم عند جيهان وبسألها عن الحضانه والروضه ليش المدرسات عرب وبسحبها بالكلام بشوف ليش المدرسين كل واحد حده سنه وسنتين ويمشي ولدي يقولي الأداره اذا شافوا مدرس عليه شكاوي من الأهل بالتدريس يمشونه مثل مس ساره العام ومثل الهنديه مالت الساينس هالسنه الأهالي اشتكوا من لغتها ومارضوا أنها تدرس عيالهم فغيروها!!اذا هذا السبب زين مومشكله!!

 

[Fouz]

بيلا شفتي الخبر اليديد، مس ميرنا مشت و قاعدين يدورون لها بديل!!! الله يعين استغفر الله عاد بنتي تحبها و تقولي اليوم انها غايبة علشان مريضة ما تدري انها مهي رادة ما يندرى شسالفتها وياهم


وي وي وي والله ما تنلامين تعفسين الدنيا، اذكر حتى قمر قالت عنها سيسي الفهد مادري الفهيد تقول وايد شديدة مادري لبش حاطينها حق الروضة مساكين،،، ماوت و تيت هذي بلوة االفلبينيات كل الفاظهم غلط،، و عسى الله يبعد هالسيسي عن عيالنا قطيعة تعقدهم

 

[Fouz]

هلا والله مرو، بيني و بينج ماكو مكان بيرفكت و ما ندري وين الأصلح، انا رفيجتي عيالها بالابداع و هم مصادفة مشاكل بس تقول اللي اعرفه احسن من اللي ما اعرفه، ولدها باولى ابتدائي تصدقين المدرس مالهم يقولهم قصة تخرع كل خميس و يسكر الليتات و يقول اللي يخاف chicken على قولته يروح الصف الثاني والله تقول ولدها قام ما ينام بالظلمة من الخوف، يعني المشكلة ماكو مدرسة ما تسمعين ان فيها مشاكل بس شي أهون من شي

 

[mr000]

فوز اشرايج تسوين مثل بداية السنه تكتبين حق نوره الغانم رساله تستفسرين منها عن النقاط هذي يعني جنسية المدرسات ومستوى التدريس لأنه أهم شي التأسيس وموبس اللغه مهمه حتى الرياضيات مهم يعني آنا ولدي من الغانم ماحصل له مدرس ماث عدل بغريد 1و2 ولما راح التكامل هم في غريد 4و5 ماكانوا مدرسين الماث زينين لأنهم أصلا مو تخصص ماث يدرسون كل المواد بس في غريد 6 كانت لبنانيه جنسيتها أمريكيه وتخصصها رياضيات بصراحه خوش مدرسه وتدرس بضمير فهذا التذبذب بمستوى المدرسين وايد أثر عليه بالماث سنه ممتاز وسنه يطيح مستواه لي cوd!

 

[Fouz]

مرو انا مفكرة اكلمها شخصيا، خصوصا بعد أزمة صف بنتي و بنت بيلا، المدرسة الاساسية مشت و اللي مجابلتهم الحين المساعدة و الله العالم اذا ما كملت معاهم الى اخر السنة، فبشوف اذا الوضع ما تعدل ودي اخذ موعد و اكلمها لان الواحد متعني و متكلف لان يبي شي عدل ، انا ما صدقت بنتي تأقلمت و بعدين المفروض المدرسة تكون عقودها صارمة و لازم يحسبون حساب المفاجآت يعني شلون مدرسة وحدة تسيطر على صف كامل!! انا اليوم صج ضاق خلقي يوم عطوني الورقة، و كلامج عدل بالنسبة حق مستوى التدريس بس مشكلتي ما أقدر اقيم مستوى التدريس على مرحلة بنتي، يعني فرقت علي وايد بالعربي قامت تعرف شوية أحرف حتى القرآن صار عندها أسهل مع اليهال و بالنسبة للانجليزي اسم الله عليها كل اللي عطوها اياه كانت ماخذته بالحضانة ماكو شي يديد اللهم الا اشياء بسيطة

 

[نواري]

حبايبي امهات بغيت اسال عن المدرسه الامريكيه american school of kuwait منو تعرف شيء عن مستواها التعليمي ورسومها فيدوني حبايبي

 

[mr000]

توه ولدي يقولي مدرس الانجلش موموجود والصبيان يقولون خلاص راح عاد كان خوش واحد مادري شالسالفه وبتييهم مدرسة صف ثاني شديده! علشان تخسف درجاتهم

 

[mr000]

إي ومال الساينس ماراح يرجع بعد الإجازه وبيدرسهم مستر غبرييل اللي يربط شعره عنقوص! قلتله يربطه وإلا يفله كيفه المهم يطلع زين بالتدريس والتعامل!

 

[mr000]

فوز والله أدري ماكو مدرسه بيرفكت مثل ماقلتي وآنا بالاجتماع قالتلي أم عن الدوليه إنها نفس الشي ماتختلف عن العالميه بس آنا وايد أسمع إن مستواها قوي

 

[mr000]

أمهات أشلونكم أمس ويا الزحمه الظهر شي مومعقول ولدي العود طلع من البيت 1 ونص بياخذ أخوه ماوصله إلا 3ونص وهذاك فقير واقف ينطر وماوصلو البيت إلا 4وشوي

 

[mr000]

اشراح نسوي بيومين المؤتمر ولانقدر نغيبه عنده امتحانات وتيوترينج!