ياحظي المنسدح وشفيك مشقيني قمـ يامال الوجع قم غير احوالي

[مـ سهله ـو]

ان ما سوتها انا اروح لاحمد واقووله طالق

 

[MeeMeeYoo_2]

:dddds:

حبيبتي عدلي فوق الاميلات مكتوب بدريه مو منيره

يعطيج العافيه [/QUO
ويي ماعارف اعدل :0bee2e8d89: الظاهر حدي اندمجت بالدور وغصب اخذ مكان منيره :dddds:

ستري على ماويهتي:ggdw:

لووووووووول عادي عادي

 

[MeeMeeYoo_2]

ان ما سوتها انا اروح لاحمد واقووله طالق

لوووووووووووووووووووول تخيلي

 

[Sara.M]

ماعتقد طلبت الطلاق

 

[MeeMeeYoo_2]

ماعتقد طلبت الطلاق

Me 2 :0bee2e8d89:

 

[م.بدوره]

لأ منيره ما تطلقت ماعفرت وعفست الدنيا عليه وخذت اغرضها وطلعت لأ ما سوت كل هذا .. حطت راسها ونامت ,,نامت واهي تتمنى انها ماتقعد بس كرهت شي زواج شي اسمه ريل شي اسمه حياة

رن تلفونها قريب المغرب وكانو نايمين اهي من تعب الطق واهو نايم من المجهود اللي سواه بتمرين المصارعه مادري الملاكمه اللي مارسها مع منيره

منيره: الووو

الخاله : الو منيره نزلي وديني خيطان

منيره: خالتي ما ادلها

الخاله : انا ادليج مو مشكله وبعد احمد قال يبيج تشترين اغراض حق مطبخكم

منيره : ان شالله خالتي

احمد : اذا تعبانه لا تروحين

منيره : مافيني الا العافيه عادي

احمد : خلاص عيل وانا بروح الديوانيه

راحت منيره ودت خالتها والبنات خيطان وبعدين راحو محل الكترونيات وطلع حساب اغراض منيره 60 وعن احلال والحرام من فلوس احمد مو منيره هالمره

ردت منيره البيت ظهرها كان ذابحها ضلوعها تعورها من الطق ..اول مره تحس بالالم هذا الم نفسي وجسدي
الخدامه صعدت الاغراض فوق ونادوها تحت ..منيره بروحها دخلت الاغرض وكانو حيل ثقال ورتبتهم ورتبت الدار وعطرتها وبخرتها كالعاد .. وحطت بخوره يديده وطلعت المبخر على الدري عشان يتبخر البيت كله ... وانتي شكوو يامنيره تبخر ولا تعفن .. طيبتج وغباءج الزايد اهم اللي بيودونج بستين الف داهيه


رد احمد البيت ولما شاف ذراع منيره انصدم اثار الطق طلعت وواضحه وتخرع ..عرف انه صج مو انسان اللي يسوي جذي كان وحش يوم طقها هالطق

احمد : منيره مو احد يشوف ايدج

منيره : مو فخر اقول حق الناس اني انطق كل يوم


اخر الاسبوع وداها بيت امها وطبعن بالحسره عليها تروح عند امها واذا وداها ما يخليها تقعد اربع ساعات بالكثير ويرد ياخذها

احمد : لا تخلين احد يشوف ذرعج ولا تشتكين علي حبيبتي

منيره : ان شالله

ماراح اشتكي يا احمد او اخلي احد يشوف ايدي مو عشانك..بس عشان امي المره العوده مابي اغثها .. مابي اغثها لما تعرف انه بنتها كل يوم تنطق وتنسب ..مابي اغثها واهي زوجتني عشان استانس بحياتي واستقر

وعدت الزواره على خير وردت منيره بيت ريلها وامها ما تتدري بشهر الفات شنو صار حق منيره حسبت من ردت حق ريلها واهي مستانسه معاه وانه تعدل معاها وصار خوش ريال وتعلم الدرس

اللي يدري يدري .... واللي مايدري يقول خمطة عدس


وتمر ايام هالاسبوع وكان كل يوم كالعاده من تزوجتك منيره لازم تنغثواهي تسكت لازم ايي لها سطار عند اقل حوار بينهم .. يمكن ماراد طقها مثل ذيك الطقه بس كان يطقها اسطارات ويرد يراضيهاويعدي يومهم عادي

 

[غزآل.آلكويت]

يعطيج آلعآفيه

يآلله كملي

 

[م.بدوره]

اليوم كان يوم الاحد منيره واحمد قاعدين يطالعون التفزيون ..طلع ممثل متين

احمد السمبتيك : ويع شنو هالجسم

منيره : لاتعيب باجر وارك عيال

احمد : موقاعد اعيب بس شوفي الله لا يبلينا

منيره : لا تعيب انا اخوي بسام من كثر ماكان يعيب على جسمي طلعو بناته جسمهم اردى من جسمي

احمد : واخوج شكو يطالع جسمج يخيل عليج

منيره: شنو هالحجي بس جسمي واضح واكيد ماراح البس عباية جدام اخواني

سكتوو وعادي مر اليوم مافيهم شي ..عادي اليوم طبيعي نوعن ما

ثاني يوم بليل احمد طلب من منيره تسوي له عشى او بالاحرى تسوي حق البيت كله عشى

نزلت منيره ودخلت معاها حماتها الصغيره تساعدها وسوو خوش عشى

وطلعت لقت ريلها شابك بصاله ولمحت من الحوار اللي بالمسنجر انه قاعد يسولف عن دلال وانه رفيجه مستمر يناديه بودلول

منيره انسدت نفسها عن العشى وما اشتهت تاكل ما نخلص من سالفة دلول ما نخلص

العم وعلى العشى موجه الحجي حق منيره

العم : هذي ديايه شنو مقليه ولا مشويه

منيره : مقليه عمي

العم : شلون يعني على الجوله مسوينها

منيره : أي عمي قاليتها

العم : وشنو اللي داخلها هذا

منيره : بصل وفلفل عمي احمد يحبها جذي

العم : هذي حشوة السمج

منيره : لا عمي هذي غير عشان تسحب زفرة الديايه

منيره ما اشتهت تاكل اول شي من اللي شافته بالكمبيوتر وثانين من حنة عمها اللي ماكانت بوقتها ..يعني الجنه مسويه العشى كله اكل واسكت ليش هالتعليقات

منيره وضعج يذكرني بباب الحاره لما الجنه تتطبخ وتخدم بيت الحموله ... وين في جناين يسووون جذي انتي يا منصب وشهاده واصل تخدمين وتطبخين بالمطبخ ومرت حماج اللي قاعد بالبيت لا شغل ولا مشغله قاعده بصاله تنطرج انتي تييبن لها العشى "صبرن جميل والله المستعان"

صعدت منيره دارها ولحقها احمد

احمد: شفيج منفسه على بوي

منيره : مانفست بس اهو وايد سال وكنت اجاوبه

احمد : وليش ما تعشيتي

منيره : مو مشتهيه

احمد: لو مو طاله بالجهاز ماشفتي شي مايعجبج :eh_s(14):

منيره : وانا تكلمت عن اللي شفته ؟؟

احمد : لا بوج لا بو اللي يتزوج طز فيج زين

منيره وبس تهورت على الوضع اللي اهي فيه : تتدري شلون طز فيك انت :ggdw:

وطلعت منيره من الصاله تتدري بيي لها شي اللحين انحاشت للحمام ماتبي تنصاد وتنطق

بس وصل لها احمد قبل وعطاها ذاك السطار

احمد : طقيتج شنو تبين تسوين كاني طقيتج

منيره :..............................

احمد : لا تخزيني جذي تكلمي شنو تبين تسوين

منيره : ..........................................

ولانها حقرته بس كانت تخزه عطاها بالضبط ثمن اسطارات كل خذ اكل اربع اسطارات

ولما وقف منيره دخلت الحمام وتسبحت حست بنار بخدودها ليش انطق ليش ما يمسك ايده طيب اسطار واحد كافي ليش يزيد

احمد كان ناطرها برا الحمام وكالعاده يبي يراضيها بس منيره مو قادره ترضى بس تعبت من الطق

تعرفون احمد شنو سوى

طقها أي عطاها جم سطار بعد وقام يصرخ : انا من امس محترق والسبه اخوج

منيره : اخوي واخوي شكو

احمد : اخوج ردي وحقير في اخو يشوف جسم اخته

منيره : لا تقول عن اخوي جذي واهو ماقال شي غلط

احمد : اكيد بينج وبين اخوج علاقه انتي

منيره : @@ انت مينون مريض مو طبيعي انت الردي مو اخواني

ماكان منه الا ورد يسوطر فيها وايد سوطرها لدرجه انها رفعت ايدها وعطته سطار خلته ينصدم ويطلع برا الدار


أي مدت ايدها على ريلها يمكن يحس بلي اهي تحس فيه ... انت انسان مريض يا احمد تفكيرك وصخ تفكير انسان موطبيعي .... وطبعن كالعاده راضها مارضت بس اسكتت وقامت تعيد الشريط الاشهر اللي فاتت ب6 اشهر بس عاشت حزن مو طبيعي .. عاشت ماساة .. المفروض اهي عروس صارت منحوس مو عروس

يالله ياربي لا تخلي احد يعيش نص اللي عاشته منيره ..قلت لكم صارت اشياء وايد ماذكرتها اهني اشياء ما تتمنون اعداءكم تصير لكم ....

يا عل الله يجازي صبرج خير يامنيره ..يالله حظج قوم ويصحى من غفوته .. ويعدل احوالج



ثاني يوم الصبح واهي بالدوام

الام : منيره شلونج يمه شخبارج

منيره : الحمدلله بخير انتي شلونج

الام : الحمدالله اليوم بنروح شاليه خالتج فدوى قولي حق ريلج وتعالي خالاتج كلهم هناك

منيره : اقوله يمه وارد لج خبر

منيره (( قوه حبيبي اهلي بيروحون الشاليه ميخالف توديني لهم ))

احمد (( اوديج بس بشرط ماتقولين عن اللي صار امس ولا تشتكين))

منيره(( ماراح اقول شي بروح اغير جو واستانس ))

العصر ومنيره قاعده تزهب نفسها حق الشاليه وتلبس هدومها يت تهاني ودخلت عندها الغرفه وقعدت تسولف استحت منيره تقول لها بطلع مع انها كانت لابسه المفروض تهاني تحس انها بتطلع

تهاني : شكلج بتطلعين

منيره : أي والله بروح الشاليه مع خالاتي

منيره ما كانت تبي تقول لها تعالي تبي تاخذ حريتها مع اهلها شوي

يرن تلفون منيره ولا اختها تقول لها يلا وينج

تهاني بصوت عالي : انا انا مايصير ايي

هديل : حياها الله خل تيي

منيره : ايي حياج الله تهاني تعالي شدعوه

تهاني : اقول حق البنات يلبسون كلنا نروح وناسه

منيره : ؟؟؟؟؟؟؟؟؟؟؟؟ حياكم الله

 

[مـ سهله ـو]

عقققققققققققققد شنو هذا لا حيا ولا شي

 

[منيرة خالد]

شنو هالغبيه رفعت ضغطي على شنو راضيه تعيش معاه
وااااااااااااااااااااااااااااي

كملي متابعتج وانا منقثه

 

[أم حـمد]

مشكوره حبيبتي علئ القصه وعفيه ناطرينج علئ احر من الجمر

 

[م.بدوره]

وركبوو منيره وحمواتها السياره مع احمد ..طبعن احمد على طول يستعمل سيارة منيره

ولما وصلو الشاليه دز لها مسج (( ما اوصيج عن الحجي الزايد والشكاوي ))

منيره (( ان شالله ))

وسلمت منيره وانصدمو اهلها لما شافو انها ساحبه حمواتها معاها مايدرون غصبن عنها

خالتها ناديه : حلمانه فيج منور انج مجابله ريلي (( اللي ياب معرس الهنى )) وقاعده تبجين وريلي مو عارف شنو يسوي

منيره : الظاهر يايه لكم شكايه عن قريب

وقعدو بو اربع ساعات جذي .. وصارت مناقشه عن الازواج ما الازواج طبعن منيره بشكل غير مباشر قالت رايها عن الزوج اللي ما يحترم نفيه ويطق لازم ينرفس

وحماتها قالت لأ المره تستحمل شنو يعني تنطق امي كانت تستحمل


امج يا تهاني استحملت لانها تبي الجنسيه مو حبن بابوج 

خلص يومهم وردو البيت وسوت منيره حق احمد عشى ونامو عشان دوامات باجر


من الصبح ومنيره قلبها مقموت خلاص مو قادره تستحمل اهي صج تكره احمد مو قادره تتحمل بس عاف الخاطر من سالفة شنو قال عن اخوها حست انها مع انسان مريض .. اكرهته بلحظه تمنت له الموت بس اتعوذت من ابليس حرام يروح من جيس اهله

ردت من الدوام ما تغدت حتن احمد كان نايم ماتغدى حطت راسها ونامت يمه

احمد يقعدها : قومي انا يوعان لو عندي مره مثل الاوادم جان اكلتني

منيره : اللحين انزل اسوي لك اكل

ونزلت منيره لقت نص ديايه بالفريزر احمد لازم عيش عشان يشبع والديايه يبيلها وقت عشان تفج

حطيتها بالمكرويف وخلتها 7 دقايق فجت بسرعه

على طول ركبتها وحمستها وحطت البهارات وعلى ما تطبخ شوي صعدت تصلي

احمد : شنو بتسوين لي اكل

منيره : ركبت ديايه بس ربع ساعه خل تستوي اقط عليها العيش

احمد : مايمديها تفج

منيره : حطيتها بالمكرويف وفجت واللحين طبختها

احمد : انا ما اكلها جذي تلوع جبدي

منيره : احمد المكرويف الناس تطبخ فيه اذا ما اعجبك الاكل قطه بويهي

احمد : هذا اللي بيصير

ولبس جنه بيطلع بعدين الظاهر قال ليش اطلع وكلف نفسي فلوس عشان اكل انطر اشوف طبخة منيره

منيره تعرف تطبخ وشاطره نوعن ما بالطباخ

نزلت كملت طباخها وطبعن كالعاده لازم الخاله اتيي تنبش من وراها ..شي منيره تعودت عليه الخاله جنها كانت تغار انه احمد يمكن يحب طباخ منيره اكثر من طباخها ويتعود عليه


وخلص الاكل وانجبته منيره وطلع خوش شي

الخاله : حطو العشى مره وحدع عيل احنا بناكل

وانجب الاكل كله ..احمد ياكل والخاله اطلع العيوب باكل منيره وتخليه وتاكل شي ثاني

احمد : بقورتي

منيره : @@

تهاني : قال منورتي شفيج تخزينه جذي

منيره :

وقعدو يسولفون عن الذهب فقالت منيره كلمه اللي اهي ماو (( يعني ذهب مو صجي ))

الخاله : ماو يعني رانجو هههههههه شنو هالكلمه

يا خالة منيره مو الكويتين اللي يقولون رانجو وانتي اللي يايه تعلمين منيره الحجي الكويتي الله يازمن

احمد بدى يعيب ويطنز على المفردات اللي تقولها منيره

تتدرون كل بيت وله مفردات خاصة فيه وهذا شي طبيعي

منيره : تبتسم وتاكل

تتكلمو عن الزواج الثاني

احمد : انا اخلي منيره اهي اللي تخدمني وتخدم مرتي الثانيه

منيره : ليش شاريني من مكتب اسكناني (( منيره لا عصبت ما تعرف تسيطر على لدغتها ))

احمد : اسكناني خخخخخخخخخخخخخخخخخخخخخخخ

الخاله : قوليها قوليها مره ثانيه

منيره : اشكناني

الخاله : كا تقولها عادي

احمد بدى يسولف : انا منيره ما شفتها حلوه الا بيوم العرس

منيره : عطني 300 وارد حلوه مثل العرس

الخاله : لا والله احنا اولى بهالـ300

منيره : خلاص اكيد وحده يوم عرسها بتصير غير والحمدالله انك شايفني من غير ميك اب يوم خطبتني

احمد : ما رفعت عيني عدل وشفتج كان ظلمه

الخاله وبنتها : خخخخخخخخخخخخخخخخخخخخخخخخخخخخخخخخخخخخخ

احمد : اصلن انا بعد العرس لقمطت ويهها بيدي من المكياج اللي فيه

وبدو يضحكون على منيره ومنيره ساكته .. شالت الاكل اللي على الطاوله وصعدت فوق

دخلت الحمام تسبح ...عشان تنسى اللي صار لهاا تحت


طلعت منيره من الحمام ولبست ..وراحت الصاله لقت احمد قاعد ومنتفخ الظاهر عشان منيره صعدت من غير ماتقول له

ومنيره حقرته ولا كلمته وقعدت تمشط شعرها ,,ودخلت الخاله عليهم طبعن طقه وحده وادرعم الوضع طبيعي

الخاله : بيي اشوف المسلسل عندكم

منيره : حياج الله خالتي

الخاله : اروح اسبح وايي

قام احمد من الصاله وراح غرفته ...منيره نوعن ما محتره ليش منتفخ المفروض انا اللي انتقخ

راحت لقته نايم على العفسه راحت شالت الاغراض اللي على السرير واهو كان يطالعها

احمد : شتبين

منيره: ارتب العفسه

احمد : ذلفي عن ويهي

منيره: احمد لمتى جذي لا في احترام تحت ولا فوق شنو هالعيشه

احمد : انا اقولج اكلي تبن وطلعي برا

منيره : واذا ماطلعت ولا راح اكل تبن


احمد : بتاكلين ز.. وبتطلعين عيل

منيره : تتدري حياتنا اكبر مصخره ولازم اعدل حياتي انا

احمد : ذلفي انا اقول لا اقوم لج

راحت منيره المكان اللي كل ما تضايق تروح له عرفتوه اتوقع ؟؟؟ ............ أي عزكم الله الحمام

لا يامنيره بس كافي صبر الله ماراح يحابيج اذا طلعتي استحملتي وايد .. حياتج مصخره ماراح يتعدل ما راح يتسنع ... اهو وصخ وتربيته اوصخ لا اخلاق ولادين ......انسان مريض انسان عنده احساس بالنقص

طلعت منيره لقته قاعد ومعصب يعني ..خذت تلفونها وبهدوء : انا راح اتصل على اخوي ياخذني

احمد : طز فيج وباخوانج

طلع برا الدار ..لان اتوقع مثل كل مره مجرد تهديد ؟؟؟وصج كانت منيره تقول اتصل ما اتصل اتصل ما اتصل اتحمل ما اتحمل ...زين واذا اخوي ردني شلوون راح يذلني اكثر احمد ...لأ خلاص ماراح اتصل

 

[*FaRaWlA*]

امبي بس كافي شالذل والاهاانه الي قاعد يصير لها !!!!!!!!!!

صج احمد مو كفو هالمنيره

 

[م.بدوره]

منيره : الو ضاري شلونك

ضاري : هلا منيره شلونج وشلون ريلج

منيره : الحمدالله ..ضاري وينك

ضاري : بالدوام عندي خفاره ..خير شفيج

منيره اقول ما اقول اقول ما اقول

منيره : لا بس كنت بتغدى عندك باجر

ضاري : بروحج ولا مع ريلج

منيره : لا ياخوي بروحي

ضاري : منيره شفيج صوتج مو طبيعي

منيره انفجرت وقامت تبجي : بس مليت واللي يرحم والديكم تعالو خذوني

ضاري : طولي بالج احمد ماد ايده عليج

منيره :اهو طق اهو سب اهو اهانات كل يوم على الحال بس ما ابيه

ضاري : اخذي اللي تقدرين عليه واللحين تيين بيتي

صكته منيره من اخوها وقامت يابت جنطه صغيره وحطت اغراض دخل احمد عليها انصدم

احمد : شنو تسوين

منيره : اخوي قال لي اطلع اللحين من البيت

راح رطض على تلفونها شاف انها صج مكلمه اخوها

احمد : مو بكيفكم مالج طلعه من اهني

منيره بهدوء : اخوي قال لي طلعي وماراح اكسر كلمته (( انتي ما صدقتي احد يقولج طلعي يامنيره ))


راح احمد يركض يكلم اخوها عشان لا تطلع.. وبعدين شافته يا وقال لها انا راح اوصلج بيت اخوج دامج على ذمتي

منيره : لا مشكور عندي سياره

احمد :راح اماشيج

بعدين عرفت منيره ان ضاري قال له (( ربع ساعه منيره ما تكون ببيتي راح اييب العسكر اللي عندي وافجر بيتكم كله واخذ اختي ))

واهي نازله خالتها تكلمها ماترد عليها حماتها منيره ماترد ماخذه جنطتها ونازله ...اي احد يحاول يردها تقول: اخوي قال لي طلعي وماراح اكسر كلمته

العم وقف ورا سيارتها عشان لا تتحرك واتصل على اخوها ونفس الكلام انقال له "منيره خلال ربع ساعه تكون ببيتي ولا ايي بكبري لها "

اهم يدرون شنو اخوانها بس ما اعرفوهم الا وهم يضحكون اللحين شوفو الويه الثاني اللي ما صدقتو انهم يطلعون عليه ... حسبتو الناس تبالغ لما قالو لكم اخوانها رياييل ويخرعون

ما اكرمتها يا احمد واهي عندك واللحين ترتجف ما تتدري اخوانها شتو بيسووون لك ... اكلها عدل ياردي اكلها يوم اهنت بنت الاحرار واستحملتك ماقلت خلاص اكرمها واعدل من نفسي لأ طغيت و طغيت حسبت انه سكوتها رضى منها وضعف ما تتدري انه سكوتها من طيب اصلها وانها تبي تعطيك فرصة ثانيه

 

[م.بدوره]

راحت منيره بيت ضاري واستقبلتها مرت اخوها ودخلتها ترتاح عشان باجر لما يطلع ضاري من الخفارة يكلمها

بهالوقت طبعن ضاري اتصل على بسام اخوهم العود وقال له ولما بسام قال حق امه .. الام قالت كل شي تعرفه عن ريل بنتها وانه اهي اللحين الام تقول مثل ماكنت اقول لها استحملي دامها وصلت للطق انا اللي ما ابيه وخلاص يطلقها لانه العوي عوي مايتعدل

وثاني يوم تيمعو الاخوان والام كلهم على الغدا ببيت ضاري وسمعو كل التفاصيل من منيره ..

ضاري : تبينه يامنيره ولا لأ

منيره: لأ مابيه

بسام : واحنا بعد نقول جذي مشروع زواجكم فاشل

ضاري : حللينا يااختي انا ماسالنا عنه

منيره : محللين بس ما احللكم ان خليتوني ارد له اخليها برقبتكم طول حياتي

بسام : ومنو بيردج له لا تحاتين ولا يقدر يلمسج بشي اذا اهو يبي يعيش

انفصلت اخيرن منيره عن احمد ..طبعن اهو من انفصالهم ماطرش احد يكلم اهلها او شي واهله كلش طبعن مايعرفون السنع حتن ما حاولو ياخذون بخاطر الام

امها اتصلت عليهم عشان الطلاق قالو يمكن ينصلح ما بينهم .. الام قالت لأ مانبي نبي الورقه مانبي محاكم

ماردوو خبر .. الظاهر قالو نحقرهم مصيرهم بيهدون ونروح ناخذ البنيه بعد ماتوديها امها الصالون حق ولدنا

اهل منيره انطرو خبر منهم اسبوع..عشان لا احد يلومهم اذا سووو أي شي

وبعد الاسبوع راحو محامي ووانرفعت القضيه

مع الايام بتخلص القضيه وبتصير منيره مطلقه من انسان حرام يقولون عنه ريال

وهل راح يستمر حظج يامنيره ردي ..... ياعسى حظج يقوم والله يعوضج خير

اللهم اجرها بمصيبتها واخلف لها خيرا منها

 

[م.بدوره]

ايي نسيت اقولكم يمكن منيره خلصت قصتها مع احمد وخلصت مع اوس .. ونهاية القصتين كانت بنسبه لها جرح عميق بالقلب

بس بقصتها مع احمد عرفت منو اللي يحبها ومنو اللي لأ ..

تتدرون اعز صديقاتها يوم عرفت بانفصالها .. قلت لها ما اتشرف امشي مع وحده مثلج " مطلقه يعني " صداقتنا انتهت

وناس من عايلتها واقراب حيل تشمتو فيها

وناس ماتوقعت يوقفون معاه ..صارت لهم مواقف معاها

جزى الله الشدئد كل خير ... عرفت بها عدوي من صديقي

 

[kity]

امبي منيرة من صجها شنو هااذا لو شنو ماصابر على الذل والإهانات ماقول اليوم يتعدل ومادري شنووو


مااكون لي هالدرجه سفيها واسكت عن حقي لا والله اقول ابلغ اعلم افضحه واهم شي انا اهو منو عشان اخاف ع مشااعره

احد يبسني ويهيني ليش اقعد معاه ليش انشالله اعنس ولا اني انهاااان


اف امبي حدي حدي منقهره ليش جذيييييي



متىتحطين لنا البارت الي بعدو

 

[غزآل.آلكويت]

مو معقوووله هآلمنيرره

بنت نآس و بنت خير ونعمه آرخصت بكرآمتهآ
وعزتهآ توهآ تدق على آخوهآ ولآ وتفكر بعد

مآ آدري ليش آحسس فيهآ مو بآلغه شووي!

يآلله بليز كملي بشوووف شصير ترخص بنفسهآ ولآ ترد كألعآده

 

[kity]

اي احسن زين سوت ومفرووض تسوي هاذا الشي من زمان لأنه احمد مو كفوووو

وانشالله ربي يعوضها بالريااال الصالح والذرية الصالحه

 

[م.بدوره]

اي اي وبعد نسيت اقولكم احتمال قصة منيره ما خلصت

منيره صار لها شهرين وفوق منفصله .. القضيه ما خلصت بس تعالو شوفو شنو صار لها من شهر وشي قبل الرمضان بشوي اهي طالعه من الدوام

..................... : منيره ال...
منيره : اي ياهلا

...........: ماعرفتني انا ماجد

منيره : اسفه اخوي ماعرفتج

ماجد : كانت خالتي يارتكم من زمان بيت ال.....

منيره : اييييييي ياهلا شلونك شدنيا فيك ...عاد من مده وصلت لنا بطاقة عرسك مبروك صج متاخر بس مبروك

ماجد : ووووووويه انتي قديمه صار لي سنه وفوق مطلق

منيره : ويييي ليش

ماجد : خليها على الله .. انتي شلونج ذاك اليوم طريتي على بالي سالت خالتي عنج قالت تزوجتي
منيره : انفصلت من شهر وشي بس ناطره ورقتي

ماجد : انتي تطلقين مينون اللي يفرط فيج
منيره: كل واحد ياخذ نصيبه
ماجد : الله يعوضج باللي احسن منه انشالله ورا عدتج تلقين المعرس يم بابج نفس عنوانكم ما تغير صح .

منيره : اي هذا اهوو

ماجد : خير انشالله الله بيعوضج خير

تتوقعون ماجد بيتقدم حق منيره ..خصوصن انه اهي عرفت بعدين قام يسال من وراها عن اسباب طلاقها .. ومتى تخلص قضيتها .. وكل يومين ناط لها بالدوام يسال عن شي بمجال تخصصها

الكل درا ان ماجد حط عينه على منيره ويبيها حتن اهي درت بس مالها خلق تصدق او بالاحرى ماتبي ..ماتبي تخوض اي تجربه فاشله مره ثانيه .... وتتدرون ماجد شنو اهو..ولد طبقه معينه بالكويت مو بسهوله يناسبها احد

تهقون منيره حظها المنسدح يقوم مره وحده ويرزقها واحد مثل ماجد ؟؟

انا وانتي واهي ومنيره وماجد كلنا ننطر نهاية هالقصة .. اللي صج مالها نهايه

الا انا ندعي ان منيره تخلص مشاكلها والله يعوضها باحسن من احمد مليوم مره

(( اشكركم حبيباتي على تشجيعي بكتابة القصة .. وان شالله لي لقاء اخر معاكم .. بقصة يمكن حقيقيه مثل قصة منيره .. او قصة من وحي خيالي ... لذلك الوقت لكم تحياتي وتحيات منيره اللي تنطر دعاءكم لها بالخير ))[/color]