الرضاعة الطبيعية .... جد واجتهاد

[ميــآســهـ ..!]

بنات ابي كلام اكيد

الرضاعه ترهل الصدر او ما تاثر عليه؟؟

وتشد البطن او هم ما تاثر عليه ؟

خايفه ارضع ويترهل صدر .. بروحه صاير شكبره

 

[كتـ زوجي ـكوته]

انا اكل ادويه انفاس و ارضع ولدي يأثر على بطنه؟؟ يلويه؟؟

 

[بحر الغموض]

السلام عليكم بنات اشلونكم

حبيته ويحبني
بالنسبه لسؤالج ماعندي رد اكيد له
انا اول مره ارضع
بس الاكيد ان الرضاعه تشد الرحم وترفعه حتى لما ترضعين راح تحسين بالرحم ينشد معاج
الاكيد الرضاعه زينه للبيبي وزينه للام
والترهل ياينا ياينا سواءا حملنا او لا لان حجم الصدر والكبر يرهل الصدر
على الفكره الحمل بنفسه يغير الصدر


كتكوته
جم عمر ولدج؟
ماظن ان اكل النفاس ياثر لاني اكلت منه وكل امهاتنا جذي محد ياب طاري الرضاعه بشي من باب انها تاثر

 

[Q8_Rose]

السلام عليكم

مراسي
انا قاعد احاول اخفف مرات الشفط بس المشكله انه صدري يتحجر وينترس فلازم اشفط ووقاعد اشفط عشوائي يعني باليوم اربع ولا خمس مرات كل ما احس صدري ييبس ويعور جذي عادي ولا اسوي نفس ماقلتي اقلل مرتين ولا ثلاث مرات باليوم؟ بس المشكله صدري ييبس ويذبحني شالحل؟؟

 

[بحر الغموض]

وعليكم السلام

كويت روز اذا ييتي تشفطين لا تشفيطنه كله

اشفطي بحيث تحسين ان التكتل خف

اشوي اشوي اللي اعرفه ان الفطام يبيله تعب ماعليه اتحملي اشوي

 

[ipink]

اللسلام عليكم
شلووونكم

شخباركم يوم الاربعه تطعيم بنتي الشهر الثالث وين يغزون وجم ابره؟ وشلونه حدي متصروعه وخايفه عليها

 

[درة أهل الطولات]

راااااااااااااااااائع

 

[بحر الغموض]

وعليكم السلام
اي بنك لاتخافين
اظن اهي ابره وحده تكون على الزند من فوق
ماتخوف
بس لو لايحوشها الماي ولا تلعبين فيها لو طلعت شي او تغيرت

درة الله يتمم عليج ويقومج بالسلامه وتشوفين مولودج بصحه وعافيه

 

[ipink]

بحور
اي انشالله الله يسهل وماتعور وايد حبيبتي بنتي للحين اسمالله عليها بتصير ثلاث اشهر ونتفه

 

[مراسي الحب]

بنات ابي كلام اكيد

الرضاعه ترهل الصدر او ما تاثر عليه؟؟

وتشد البطن او هم ما تاثر عليه ؟

خايفه ارضع ويترهل صدر .. بروحه صاير شكبره

مع ان ردود البنات ما شاء الله اتكفي وتوفي ... بس بصراحة ضحكتيني لأنج رديتي على روحج ابروحج

صدرج كبر وخلص وبعد الولادة يفش... يعني موضوع الترهل ما له علاقة بالرضاعة علاقة مباشرة ... ورضاعة البيبي بصراحة تسوى

بنوكة توني مطعمة ومادري ليش بس اسهل من نوني ... نوني تقرحت مكان الابرة وعلمت نفس اللي في زنودنا ... خلودي اسم الله عليه للحين ماكو شي

 

[بحر الغموض]

اسم الله علي بنتج عادي يمكن طبيعتها جذي
على فكره بنات اهتموا بتعريض البيبيات للشمس الصبح

 

[opera]

بحوووره شمسنا تحرق !!

مو شي كلش مو نفس شمس برا اللي الواحد يقول اطلع اتشمس شوي

شمسنا تصلخ اليلد


هذاك اليوم رايحه الصبح اشتري جم شغله وكنت مشنقله بدووري معاي


يوووو لا تشوفين اشصار فيه ويهه طماطه .. ويبتله ماي عشان يشرب المسكين من كثر الحر شربه مره وحده

 

[مراسي الحب]

هههههههههههه حبيبي مسكين

 

[بحر الغموض]

الله يهداج ماقلنا بالشمس اللي تصلخ

مايطلعون البيبي الا الصبح يعني صلي الفير وقعدي اشوي لما تبدا الشمس تشرق بتكون بارده اهني يطلعون البيبات

حرام لاتطلعينه بمشاوير
انا اقصد ممكن تفتحون البرادي تفتحون الدريشه يطقه الشمس

 

[مراسي الحب]

اليوم تهاوشت مع زبونة .... طالبة نفنوف لون .. وتبيه لون ثاني ... قلت لها ما عندي القماش ... قالت الا دوري لي ... وغصب لقيت .. انزين ما ابيه ابيض من فوق ابيه احمر .. ما عندي اذا قدرت اسوي لج ... المهم خلص النفنوف لقيت الخياط امسويه ابيض من فوق بس من تحت اللون اللي تبيه ... واتحن تبيني اوصله ... قلت خل يوصل لها ابسرعة ... واللله السايق الساعة 12 طرشته ... دقت علي والسايق بالطريج قلت لها كاهوا يايج ... عقب قمت تسبحت وصليت ... ومخلية التليفون سايلنت علشان خلودي ما يقحص من كثر الاوادم اللي ما يسكتون ... المهم الساعة واحدة اطالع التليفون ولا 15 مسد كول ... تخيلوا الساعاة 1 الفجر ... 15 مرة داقة ... دقيت عليها ... خير اختي جان اتقول النفونوف من فوق ابيض مو احمر ... قلت لها قلت احاول .. ما صار .. شنو تبيني اسوي؟؟ أاخر النفنوف ولا اوصلج اياه؟؟ جان اتقول بس انتي قايلت لي ... قلت لها ما وعدتج ... قلت لج اشوف ... وبعدين شنو فيكم ... عندكم حالة وفاة اللي داقة 15 مرة؟؟ جان اتقول لي ... اي ما اتردين!!!!!!!!!!!!!!!!!!!!!!!!!!!!!!!!!! ابيه بغيت ازنطها ... قلت لها الواحد ما يتحرك ما يدش حمام ما يصلي؟؟ اختي ما شريتيني.... تبين النفنوف ولا ترى فلوسج بترجع لج ... ما تسوى علي هالبيعة ... قالت خلاص ابيه ... خلي السايق يرجع ... كلمت السايق ولا راد من القرين وصل كيفان ... تبيني ارده الحين ... رديت دقيت عليها ... ولا المفاجأة ... رد علي ريلها ... تخيلووووووووووووووووووووووووووووووووا

قلت له اخوي وين مرتك .. جان يقول عندها حريم وانا اللي برد عليج!!!!!!!! ... ولا الاخ بيتهاوش .......... قلت له تبون النفنوف باجر ايييكم ... بس الحين ما يرجع السايق الساعة 1 ... قال لي ليش ما يرجع السايق ... قلت له انا اصلا كلامي مع مرتك ... مومعاك ... انا عندي ريايييل يكلمونك .... جان يقول لي باجر عقب الفطور اييبه ... ولا قبل الفطور ... قلت له باجر متى ما صار له وقت اييبه ... مو على كيفك ... عنده جدول توصيل ... والله هسترت ...

المهم من الحرة دقيت على اخوي وقلت له يزفه ... ودقيت عليها وقلت لها خلي ريلج يم التليفون اخوي بيكلمه ... جان يقول له اخوي تبي ... تعال اخذ النفنوف من كيفان ... وانا دقيت على السايق قلت له باجر اتمر على بيتهم تعطيهم العربون ... عن الحنة الزايدة ... يبون النفنوف اييون ياخذونه من البيت ... ناس مو صاحية والله ... وزعلان ... يقول حق اخوي الاسلوب لازم يكون احسن ... اي اسلوب ... 15 مرة داقة!!!!!!!!!! والله العظيم ناس غريبة ... لا وداقة الساعة 1 الفجر ... مادري من قايلها انا تحت امرها باي وقت!!!!!!!!!!!

 

[بحر الغموض]

مراسي حددي لج وقت للمكالمات احسن لج
ولاتشدين معاهم

ردي عليهم على قد الكلمه وبرود ردي لا تحرين عمرج وتكبرين السوالف
هذيله ناس فاضيه

 

[مراسي الحب]

بحورة ... انا كنت اوكي ... بس لما كلمني ريلها .... حدي عصبت .... شاكو ريال داش عرض؟؟؟ وياي اتوريني مراجلك ؟؟؟ ناس بتاهاوش وبس ... اللي بط جبدي داق يتهاوش ... ياي يصارخ علي ... تخيلي ... يحسبني بخاف ولا انا طوفة هبيطة!!!

قلت لها ... مو عاجبج اللون ... بدليه ... انا هذا اللي اقدر اسويه ... لا وكنت انا امسوية لها خصم ومتفقين على السعر ... عقب ياية تبي اتنزل زيادة ... ما يصير ... انا اتفقت معاج على سعر ... خلاص ...

 

[أم حيدر]

مراسي صلي عالنبي

انا منج اردلها الفلوس واقولها يفتح الله - شغلتج يبيلها مقاقة والحريم يلوعون الجبد

بنات شلونكم شخباركم - ما فيني شدة اسولف مرهقة :/

 

[opera]

مراسي صج الله يعينج على هالاشكااال


واي حرتني شكووو مخليه ريلها يكلمج .. يعني مو عارفه تتفاهم اهي ولا تبي تخرعج يعني .. ولا تبيج على كيييفها

بس زين سوا اخوج قاله تعال اخذه من كيفان

بس صج مثل ما قالت بحوووره خليلج وقت يدقون فيه

او يطرشون مسج





عاد هذا اليوم لبست النفنوف اللي اخذته منج .. يازينه وياحلاته علي


والله رووووعه حتى ريلي عجبه ..

 

[ipink]

صباح الخير
شلووونكم

مراسي الله يعيينج عالزباين صج في ناس ماتستحي عبالها شاريتج داقه الساعه 1 لو انا منج احقرها لي اليوم الثاني خل تموت من الحنه لوووول

طلعت صور بنتي برنت بسويهم اب البوم بس ابي البومات حلوه من وين ؟
وخالتي خيطتلها نفنوف قرقيعان معنه ماعندنا بس شي عادي اب بيت امي لانه بيت اهل ريلي عندهم حاله وفاه بس طلع رووعه النفنوف اهوا نص خام امي الزايد والوالده مستانسه بنتي بتلبس نفسها

تصدقون ودي اصور بنتي بس المشكله تينني ماتخلينا شرايكم ناس تقول لي لا اول قرقيعان صوريها وناس تقول لي مايسوى لانها توها ثلاث اشهر وماتقعد وتينن ؟؟ انتو شرايكم