~~~ ذميت ظلمك وانا من عادتي مدحك ~~~ بقلمي

[عجيد الريم]

السلام عليكم ورحمة الله ...

بما أن هالمشاركه هي أول مشاركه لي في هالمنتدى

فحبيت أني احط قصه كتبتها من فتره ..

واتمنى انها تعجبكم ...

انا كتبتها باللهجه الأماراتيه جان استصعبت عليكم كلمه قولولي ومن عيوووووني بشرحلكم اياها

اخليكم الحينه ويالقصه

_______________________________________

ذميت ظلمك وانا من عادتي مدحك ...




تعريف بأبطال القصه




عائلة علي .:::




علي + رفيعه = حمد( 29 ) محمد (25) موزه ( 25) محمد وموزه توأم



حمد+ خوله= الغلا (3سنوات ) روضه(شهرين)




* عايلة راشد+نوره = شيخه ( 23) خالد (27)




ام علي وراشد بعدها حيه ... وساكنه بيت راشد ....





نشت شيخه الصبح على صوت حد يدق الباب شوي وبيجلعه ...حست ان حد مات .. قلبها كان بيوقف ... على طول ركضت صوب الباب اول مابطلت الباب شافت يدتها واقفه بمكنستها ...



شيخه وهي مصدومه ومبهته ::يدووه بلاج؟؟؟



ام علي ::عنبووه لو اصمخ جان سمع من متى ادق الباب ؟؟؟؟ بلاه رقادج رقاد بقر ؟؟؟؟



شيخه حست انها بتنتحر من يدتها ::يدووه الحينه كسرتي الباب عسب تشتمين بدى زامج ؟؟؟



ام علي ::سود الله ويه عدوج ..قومي صلي الفجر ... هكم قاموا الصلاه ...



شيخه وهي تتثاوب ::انزين يوم بنش بصلي خليني ارقد ...



ماحست شيخه الا والمكنسه يايتنها على جتفها ..



ام علي ::سودى الويه ..الحينه صلاتج ماترومين تصلينها ..وسهرانه مسودة الويه من امس وتشوفين هذيلاك اللي يترقصن والحينه الصلاه تعايزتي عنها ...قومي عن ويهي ...



شيخه تحاول توقف يدتها ::يدووه شو بتسوين ؟؟؟



ام علي ::اقولج خوزي لا تييج الضربه الثانيه ...



دخلت ام علي الحجره ..بطلت الليت .. وبطلت الستاره مع ان الشمس بعدها ماطلعت ...وآخر شي مسكت ريموت المكيف ..هوست على كل الفصوص زين ماحرقته ...الين ماتسكر المكيف ...يوم التفتت شافت ان حجرة شيخه لايثه ..اجياس الجبس والكولا على الطاوله .. من غير ان شيخه مطلعه ثيابها من الكبت عسب ترد ترتبهم مره ثانيه ..فشيخه مفرفره كم بدله على الأرض الين ماتحصل كيس تحطهم فيه ...



ام علي :: شيخووه بخبرج ؟؟؟



شيخه وهي منسدحه على الشبريه :: همممممممممممممم



بلاها حجرتج جنها زريبه ؟؟؟



شيخه بغت تضحك بس يودت عمرها ان ضحكت تدري انها بتنضرب ..



ام علي ::خلصي صلاتج ونشي نظفي حجرتج ..وان حصلت شي لايث والله بالمكنسه على راسج



شيخه ترفع ايدها وباعلى صوتها :: الهييييييييييييي ..الهييييييييييي ..ارحمني ...ملييييييييييييييييييييت ...



ام علي ::تدعين عليه ؟؟؟ يال...................



شيخه وهي تقاطعها :: يدووووووه والله ماادعي عليج ..بس خليني والله بصلي ..ارحميني الله يرحمج دنيا وآخره ...



ام علي وهي بتطلع من الحجره ::يالله نشي ... وان شفتج منخمده لا ارشج بالماي ...



شيخه ::نشت وهي بعدها تتثاوب ... سايره بتتغسل وتتوضى عسب تصليJ



اما ام علي ::فدارت على الحجر عسب تواعيهم ...



طبعاً سارت صوب حجرة خالد ...



ونفس الموال سوته في خالد ...



ام علي ... يدتهم من صوب ابوهم ...طيبه وايد ..وحبوبه ..صح ان محد سالم من شرها ..بس مع هذا ضايفه جو حلو على البيت ...




الصبح الساعه 7:30




بيت علي ...




كانت رفيعه في غرفة الطعام تحط الأكل على الطاوله ...



لأن علي ريلها عنده دوام وعيالها نفس الشي عندهم دوامات ...



حطت الأكل وسارت فوق ...



اول شي سارت صوب حجرتها تشوف ريلها ...



وعقب سارت صوب حجرة موزه ...



اول مادقت الباب ...



موزه من داخل ::منو ؟؟؟



رفيعه :: يالله امي بسرعه وراج دوام



موزه :: لحظه امي أبدل ثيابي ..شوي وبظهر ..



رفيعه ::خلصي بسرعه بتتأخرين ...



موزه :: ان شالله ...



موزه وهي ترد تتكلم في التيلفون :: هلا حياتي .. اسمحيلي عمري تأخرت عليج ..المهم خليني الحينه بسير اشوف الأهل .. وبرد اتصلبج ..



سكرت موزه عن اللي وياها على الخط ..ولبست عباتها اللي كانت مفصلتنها مثل كندورة الرياييل ... بالضبط ..اللهم انها سودا بس عشان تنعرف انها عباه ...



ولبست شيلتها ...وشلت السويج ... وشلت نظارتها الشمسيه وطلعت من الحجره ونزلت تحت ...



اما رفيعه فسارت صوب حجرة ولدها ...



اول ماسارت ..



شافت انه مب موجود في غرفته ..



عرفت انه اكيد طلع لأنه مول مايحب أييلس في البيت ...



نزلت رفيعه تحت وشافت ان موزه بنتها موجوده ..



موزه ::صباح الخير ...



رفيعه ::صباح النور ...



موزه كانت كعادتها ماتحب تيلس في البيت تاكل ... سوتلها النسكافيه وسارت صوب الطاوله وشلت الجرايد وطلعت ..



رفيعه :: وانتي كل يوم على هالحاله يامي لا ريوق ولا شي ...ايلسي كليلج شي ..



موزه ::ماعليه امي يوم برد باكل الحينه متأخره عن الدوام ..يالله فمان الله ...



رفيعه +علي ::فمان الكريم ...



رفيعه ::وحليلها هالبنت من كثر ماتتعب حتى مول ماتهتم في عمرها ... شوفها شقايل هلكانه وحليلها ...



علي::روحها حد قاللها تتوظف في آخر الدنيا ... قلتلها سيري اشتغلي في المطار ... الا سايره مدينة الأعلام تتوظف ..ليش مادري ؟؟؟



رفيعه ::خلها تسير وين ماتبا المهم راحتها ...



علي ::يالله الله يوفقها ان شالله ...



رفيعه ::آمين ويرزقها بولد الحلال ان شالله ...



هالوقت ..ركبت موزه سيارتها ... وسارت على طول صوب الشيشه ...



نزلت من السياره وتوجهت صوب السجاير ...وخذتلها علبه ..وسارت صوب الكاشير ...



دفعت البيزات وطلعت ...



كان واحد واقف صوب الكاشير ..اول ماشافها حس ان الدم يغلي في عروقه ..مع انه مايعرفها بس حس بحجم الدمار اللي هي فيه ...شكلها وتصرفاتها ومشيتها ونعالها (اكرمكم الله ) كله يدل على ان هالأنسانه فيها شي غير طبيعي ... بس كل اللي قاله ((اللهم لا تبلينا )) ..




موزه ..اول ماركبت سيارتها ...شغلت المسجل وطلعت الولاعه الموجوده وداخت ... مثل كل يوم صبح ..نسكافيه ..وسجاير ...وعشان تطير الريحه عندها دهن عود .. ولبان وعطر ...



.................................................. ..............................................




شقة حمد ....




طبعاً عشان ماننسى .. حمد هو اخو موزه .. وولد رفيعه + علي ..



متزوج وعنده (الغلا ) و (روضه)




كانت خوله هذاك الوقت تبدل ثياب الغلا ...



لأن اليوم شي تحليل شامل لبنتهم ..



خوله وهي تبدل ثياب الغلا ... كان الحزن في عينها ...



حست كيف انها من الحينه تعبانه ...بنتها غامضتنها وايد ...



شافتها ونزلت دمعه من عينها ...



هاك الوقت دخل حمد الغرفه ...



شاف ان خوله تبدل ثياب الغلا وشافها انها دمعت كعادتها كل يوم ....



حمد :: خوله ؟؟؟



خوله وهي بعدها منزله راسها صوب الغلا :: هلا ...



حمد ::بعدج مصره على اننا نسير مستشفى ثاني عشان التحليل ؟؟؟



خوله صدت على حمد :: حمد ... انته فقدت الأمل بس انا مافقدته ...ادري ان الدكاتره كلهم يجذبون ...انا قلبي يقولي ان بنتي مافيها شي ....



حمد ::خوله وبعدين وياج ؟؟؟ بنتنا مافيها شي ... كلها نسبه قليله والحمدالله على كل حال ...



خوله وهي مقهوره من رد حمد :: نسبه قليله ؟؟؟ انته تدري شو معناتها هالنسبه ؟؟؟ معناتها ان بنتي ماتقدر تعيش مثل باجي اليهال ؟؟؟ معناتها ان بنتي بتعيش طول عمرها مسجونه بهالمرض ...



حمد ::ومنو قالج انه مرض ؟؟؟ منو قالج انها مسجونه ..بنتج حالها حال باجي البنات ..بتكبر وبتتزوج وبنشوف عيالها ان شالله ...



خوله ::مابا ..مابا بنتي تكون منغوليه ...



حمد حس انه فقد صبره :: خوله ... انتي انسانه فاهمه وعارفه ..شو منغوليه ؟؟؟ حرام عليج ؟؟؟ هذا اول كانوا يسمونهم منغوليين ... الحينه اسم الم ........



خوله :: كمل كلامك ...قول انه مرض لاتجذب على عمرك ولا عليه ...



حمد ::اللهم طولج ياروح ... خوله .. حبيبتي ...نحن عايشين ويا شي ولازم نتأقلم وياهالوضع ...الحينه يمكن شفنا فوق ال 7 دكاتره وكلهم قالوا نفس الشي ..بنتكم فيها متلازمة داون ..لازم نعيش ونأقلم عمرنا ..والحمدالله على كل حال ..ياخوله الله يهديج ابعدي عن أفكارج هذي ...



خوله :: بس انا مابا بنتي تتعالج ويالمعوقين ... ماباها تكون أقل عن غيرها ...



حمد :: شو فيهم المعوقين ؟؟؟ طول عمارنا نشوفهم بنظره أقل لأنهم معوقين ومن هناك هم أذكيا ..ولو بس حد يعطيهم المجال بتشوفينهم أبدعوا ..خوله خافي ربج ... الحمدالله ان بنتنا فيها نسبه قليله .. احمدي ربج انها مانولدت عميا ولا ماتمشي ... هذي حبيبتي اسمها متلازمة داون ... مجرد ان تفكيرها أقل عن سنها والحمدالله ... قولي الحمدالله ...



خوله ::الحمدالله ماقلت شي ..بس الله يخليك عطني هالفرصه الأخيره وأوعدك اني بثبت على العلاج عند دكتور واحد ... بس هالمره الله يخليك ...



حمد وهو يمسح على راس حرمته :: ان شالله هالمره آخر مره عشان خاطرج .. بس لازم عقبها نثبت عند دكتور واحد ...



خوله :: ان شالله ... ردت خوله تشوف بنتها وقلبها معورنها أكثر واكثر ... شلتها وحضنتها ... وتمت تبوسها ...




في بيت راشد ...




عقب ماتريقوا وخلصوا ... توه خالد بيطلع من البيت الا ويشوف جدامه عوشانه وبخيته ...



بخيته هي ربيعة ام علي ومسكينه عميا ماتشوف بس الجذب في دمها .. اما عوشانه فهي العقل المدبر للشله الكريمه تلقونها دايماً يايبه الأخبار قبل مايذيعونها في القنوات ..ولازم مسويه تأليف وأخراج بسيط ...وكل يوم عاقه هالشله في مصيبه ...

 

[عجيد الريم]

خالد اول ماشافهن ابتسم ..وايد يحب هالثنتين على سوالفهن ... شاف ان عوشانه ميوده عصاة بخيته عسب ماتطيح وعسب تدليها البيت عدل ...



اول ماشافهن



قال بيلعوزهن شوي ...



مشى وسوى عمره دعم بخيته ..



بخيته :: وخيبه ... شو هاللي دعمته ... عويش .. عويش..



عوشانه وهي ميوده قلبها :: بسم الله ..يابوك شوف ..بطل عينك وينها عينك في سقف راسك ؟؟؟



بخيته وهي طبعاً ماتدري منو هذا اللي دعمهم ... :: منو هذا ؟؟؟ هدي عصاتي بمردغه ..اقولج هدي عصاتي ...



عوشانه ::بس خليتها تثور الحينه ؟؟؟



هدت عوشانه عصاة بخيته :: يالله عندج اياه شوفي شغلج ...



بخيته شلت عصاتها .. وتمت تدورها في الهوا عسب تضرب اللي دعمهم ::وينه هدوني عليه اقولكم هدوني عليه ...



خالد :: امي بخيته .. اتريي هذا أنا ..



بخيته :: منو انته ؟؟؟



خالد :: انا خالد ..



بخيته وهي تحاول تتذكر :: ولد منو انته ؟؟؟



خالد ::امي يايه بيتنا وتقولين ولد منو ؟؟؟ انا ولد راشد ...



بخيته وهي متلومه فيه :: ويييييييييه ولد راشد ..يابوك ماعرفتك اسمحلي ... تعال بسلم عليك ...



توه تقرب منها خالد عسب يسلم عليها الا تلشطه بالعصا ..
بخيته :: مسود الويه تتحسبني ماعرف سوالفك ... شفت بنيات يتمشن وقلت بدعمهن ؟؟؟


خالد :: منن هالبنيات ؟؟؟


عوشانه :: نحنا جي طايحات من عينك ؟؟؟ محلاتها بخوت ويانظارتها اللي جنها تلفزيون وكندورتها الزرقا المخططه بالأحمر ..


ومحلاتني أنا ماتشوف كشختي ؟؟؟


بخيته ::ويييييييييه من زين الكشخه .. ولا جني عطاتنها نعالي ...


عوشانه ::بس انطبي ... تعال انته بقولك ؟؟؟


خالد :: هلا يااحلى قمر ...


عوشانه وهي تكفخه ::طب ثمك ... يدتك وين ؟؟؟


خالد :: داخل بعد وين بتسير ؟؟؟


عوشانه :: هي زين .. يالله سر انته ومااباشوفك اليوم لا تي من وقت تفهم ؟؟؟


خالد ::جي ؟؟


عوشانه ::خل البنيات ياخذن راحتهن .. مالنا بارض كل دقيقه نتغشى ونتغطى ... قم عن ويهي ...


خالد :: خلوني بيلس وياكم ...


عوشانه وهي تصرخ على بخيته ::بخوت .. الشطيه بالعصا بسرعه ...


بخيته :: وينه ..وينه ؟؟؟


خالد :: خلاص عوذ بالله منكن مب عيايز .. عصابه ...


شرد خالد ونفذ بجلده ...


اما بخيته وعوشانه .. فدخلو البيت ...عسب يزورن ام علي ...


دخلوا الحوي وهن يصرخن :: يااهل البيت ...


عوشانه :: جنهم الا رقود ؟؟؟


بخيته :: شيرقدهم القايله ...


عوشانه :: وانتي ردج جاهز ؟؟؟


بخيته ::نشي عني ..


وتصرخ بصوت عالي :: ام علي ... أم عليوي ...


شوي وشافوا ام علي طالعتلهم برع ... :: هلا والله ... حياكن ...


مشت عوشانه ونست بخيته وراها :: بخيته وهي تمشي سايره صوب المطبخ ... ياامي وينج من متى نزقرج ؟؟؟ قلنا اكيد مب صاحيه ؟؟؟


عوشانه :: ردي ردي وين سايره ؟؟؟ هناك المطبخ ؟؟؟نحن هنه ...


بخيته وهي تكمل طريجها ماحست بعمرها الا وطايحه على ويهها...


بخيته :: وابويييييي تكسرت ظلوعي ... حسبي الله عليكن من مسودات ويه ... عويش ..عويش ..


عوشانه وهي تيود عصاتها :: هااااااااااه ؟؟ وشلج تمشين روحج تراني واقفه وياج ؟؟


بخيته :: ردي نعالي اللي سلفتج اياه .. ويهج مب ويه حد يعطيج شي ...


عوشانه :: اللي يسمعج يقول انه نعال ألماس .. ولا جنه زنوبه ... انطبي ونشي ويايه يالله ...




هذي هي بداية القصه ...
ادري انه جزء قصير ...
بس سويته كتعريف لأبطال قصتنا ...
ان شالله تكون أحلى عن قصةخيانة الذكرى ..
وان شالله كل أسبوع بنزل جزء يديد ....

 

[الطموحه]

ما شاءالله عليج اختي عجيد الريم قصه روعه كانها تمثيليه نشوفها وعايشين احداثها واللهجة مفهومه من صياغ الجملة:eh_s(15):
مثلا عسب وايد متكرره وكان معناها علشان او باللغه العربيه((لكي))بشد الياء صح؟:eh_s(6):
وحياج الله ننتظر المزيد والله يوفقج وتصيرين اكبر كاتبة روايات :eh_s(9):
ويسلم لي قلمج والله يعطيج العافيه

 

[عجيد الريم]

ما شاءالله عليج اختي عجيد الريم قصه روعه كانها تمثيليه نشوفها وعايشين احداثها واللهجة مفهومه من صياغ الجملة:eh_s(15):
مثلا عسب وايد متكرره وكان معناها علشان او باللغه العربيه((لكي))بشد الياء صح؟:eh_s(6):
وحياج الله ننتظر المزيد والله يوفقج وتصيرين اكبر كاتبة روايات :eh_s(9):
ويسلم لي قلمج والله يعطيج العافيه

يامرحبابج غناتي بنت الديره ...

صح كلامج الغاليه ... عسب يعني علشان خخخخخخ

ماشالله عليج زين حصلت وحده بتشرح الكلام ....

وان شالله يكون الجزء عجبج الغاليه ..خصوصاً شلة العيايز خخخخخخخخ

تسلمين على هالمرور اللي فرحني والله وماتقصرين ..

اختج::عجيد الريم ...

 

[lelostech]

هههههههههههههههههههههههههههههههه
تونس
يعطيج العافية اختنا عجيد الريم
بصراحة ماشاء الله روعة
وموزة هذي يبي اللي يأدبها، صراحة كااااااااسرة خاطري
بدااااية موفقة وناطرين التكملة لا تتأخرين علينا

 

[الطموحه]

يامرحبابج غناتي بنت الديره ...

صح كلامج الغاليه ... عسب يعني علشان خخخخخخ

ماشالله عليج زين حصلت وحده بتشرح الكلام ....

وان شالله يكون الجزء عجبج الغاليه ..خصوصاً شلة العيايز خخخخخخخخ

تسلمين على هالمرور اللي فرحني والله وماتقصرين ..

اختج::عجيد الريم ...

والله شلة العيايز هذي نكته مت من الضحك الله يطول باعمارهم ههههههه
ومستحيل اكون وحدة تشرح الكلام مهما يكون العين ما تعلى على الحاجب لانج يمكن من الامارات وانتي افهم باللهجة الاماراتيه وننتظر المزيد وان شاءالله ما تطولين علينا والله ادمعت عيني على بنت خوله ولو انج تسوينها تمثيليه تنجح يالله نتعاون انا وياج والبنات في المنتدى ونسوي التمثيليه :eh_s(9):
وبالتوفيق يالغالية

 

[عجيد الريم]

هههههههههههههههههههههههههههههههه
تونس
يعطيج العافية اختنا عجيد الريم
بصراحة ماشاء الله روعة
وموزة هذي يبي اللي يأدبها، صراحة كااااااااسرة خاطري
بدااااية موفقة وناطرين التكملة لا تتأخرين علينا

يامرحبا يامرحبا الساع ....

ربي يعافيج غناتي ..ومشكووووووووووووره على مرورج الحلو ...

وان شالله تعجبكم التطورات في القصه

والسموحه فديتج ...

اختج::عجيد الريم

 

[lelostech]

مشكووووووورررررررةةة وااااااااااااااااااااااااييييييييييييييييد
اختي عجيد الريم
خووووششش قصة عشنا جو اماراتي بحت
ولا تتأخرين علينا

 

[عجيد الريم]

والله شلة العيايز هذي نكته مت من الضحك الله يطول باعمارهم ههههههه
ومستحيل اكون وحدة تشرح الكلام مهما يكون العين ما تعلى على الحاجب لانج يمكن من الامارات وانتي افهم باللهجة الاماراتيه وننتظر المزيد وان شاءالله ما تطولين علينا والله ادمعت عيني على بنت خوله ولو انج تسوينها تمثيليه تنجح يالله نتعاون انا وياج والبنات في المنتدى ونسوي التمثيليه :eh_s(9):
وبالتوفيق يالغالية

فديت قلبج يابنوته ...
تسلمين غناتي على ردج الحلو فديتج ...

وان شالله يعجبكم الجزء الثاني حبيبتي ويكون بالمستوى المطلوب

اختج::عجيد الريم ...

 

[عجيد الريم]

وهذا هو الجزء الثاني ..


والسموحه على التأخير




في بيت راشد ..


عقب مادخلن العيايز البيت ... يلسن جدام التلفزيون وتمن يسولفن عن الأيام الخوالي ..وكل وحده تتمدح في عمرها ومن هناك كل وحده تجذب على الثانيه ...




في غرفة شيخه ..


كانت شيخه منسدحه على الفراش .. ماعندها كليه لأن الأجازه بدت ... وطبعاً سهر وأكل ورقاد بس ...


وهي راقده جان تسمع صوت التيلفون ... كان صوت التذكير ... كانت حاطه تذكير في تيلفونها .. بس من كثر ماكان فيها رقاد خلت التيلفون روحه يدق ... بس لأن الصوت كان حاشرنها فنشت ... يوم نشت شافت انه تذكير بعيد ميلاد (( قمرهم كلهم )) تمت تشوف الأسم من تأثير الرقاد كانت مب مستوعبه منو هذا قمرهم كلهم ... شوي وانتبهت انه اليوم عيد ميلاد محمد ... بطلت عينها .. ويلست بسرعه ... وسارت غسلت ويهها ... وبدلت ثيابها .. وردت عند التيلفون .. جان تكتبله مسج (( كل عام وانته بخير )) وطرشت المسج لمحمد .... كان ودها تتصل وتسولف ...بس استحت ..حست انها حركه غلط ... المهم انها طرشتله مسج والسلام .... تم قلبها يدق ...وماكانت تبا محمد يرد عليها ... نشت من مكانها وبطلت الستاير وسكرت المكيف ... ونزلت تحت عند يدتها ...




محمد هو ولد عم شيخه ... من بينهم مثل مايقولون حب طفوله.. ... أحلى مافيهم ان حبهم ظاهر للعيان ... يعني الكل يدري بقصتهم ... بس شيخه تحب تكابر ... ماتحب تبين للشخص اللي تحبه أي شي لأنها بجذه بتحس انها انسانه رخيصه...فكانت وايد تقسى عليه ...




محمد اول ماوصله المسج .. كان هاك الوقت في الدوام .. من زحمة المراجعين .. حس انه وده يكسر التيلفون ... مول مب وقته ان حد يطرشله مسج الحينه ... بس قال بشوف المسج على السريع ... اول ماشاف منو مطرش المسج ... طنش المراجعين وتم يشوف المسج... حس ان قلبه بيطلع من مكانه ... ياربي كيف أحب هالأنسانه ... بس مصيبتها تكابر ..الين متى مااعرف ...


رد محمد مره ثانيه وانتبه على المراجعين وهالمره كان يخدمهم ويخلص معاملاتهم وهو فرحان ....




الساعه 11 الظهر في المستشفى ..


كان موعد الغلا عند دكتور الأطفال ...


كانت الأم شالتنها والأبو وياهم ...


أم الغلا كانت خايفه ان الرد يكون مثل كل مره ...


كانت متمسكه ببنتها عدل ... وكل ماحد طاف تغطي ويهها عن يعرفون ان بنتها فيها متلازمة داون ...


دخلوا ويلسوا جدام الدكتور وكان هاك الوقت الدكتور يشوف نتايج التحاليل ...


الدكتور :: زي ماهو مبين ان بنتكم فيها متلازمة داون ..


خوله وهي تجادل الدكتور ... وحاسه انها مب متحمله هالكلمه ::دكتور بنتي مافيها شي ليش كلكم تحاولون تجذبوني ؟؟؟


الدكتور :: ياام غلا ... لازم تتئبلي هالموضوع ..خصوصاً ان بنتك فيها نسبه ئليله جداً ...


خوله :: دكتور الله يخليك دورلي حل ماابا بنتي تتعالج وحالها حال المعوقين ...


الدكتور :: ومين ئال انها معوقه ؟؟؟


خوله :: كلامكم ... كل حد يشوفني يقول بنتج فيها متلازمة داون ..حفظت هالكلام الله يخليكم غيروه تعبت ...


حمد وهو يكلم الدكتور :: اوكي دكتور شو هو اللي نسويه في هالحاله ؟؟


الدكتور :: اللي عليكون هلأ انكم تجيبوها كل سنه مره عشان تحليل الغده ... والتطعيمات راح تاخذها عادي متل أي طفل عادي ... ولازم تتأبلوا هالوضع ...خصوصاً انها صغيره ولازم ماتحسسوها انها غير عن بائي الأطفال ...


خوله حست انها منهاره .. هذا ثامن دكتور يقول نفس الكلام ....


ماقالت أي كلمه غير انها طلعت من غرفة الدكتور وسبقت حمد السياره ...


وكانت شاله بنتها وقلبها معورنها ..تشوفها وتصيح ..مب عارفه شو تسوي ولا كيف تتصرف ؟؟؟


تخاف ان الكل يشوف بنتها نظره على انها منغوليه ... اكيد بيعيبون على بنتي ... اكيد بيتطنزون عليها ...


حمد هاك الوقت كان منحرج من حرمته صد على الدكتور وتأسف ...


وعقبها طلع من المستشفى


اما خوله فكانت في السياره تصيح ... وتفكر في مستقبل بنتها كيف بيكون ...


وتمت بهالتفكير الين ماحست ان حد بطل باب السياره ...


التفتت وشافت انه حمد ...


حمد كان معصب من تصرف خوله .. بس لأنه مقدر حالتها فكان ساكت عنها ...


اما خوله .. فمن كثر ماكانت تعبانه ..طلبت من حمد انه ينزلها بيت أبوها شوي ...




الساعه 2 ونص ...


رن تيلفون موزه ...كانت هاك الوقت بعدها في الدوام ماخلصت ... اول ماشافت الشاشه قرت (( غناتي )) ابتسمت وعلى طول شلت التيلفون ...


موزه ::هلا والله بغناتي ...


ايمان :: هلا عمري وينج ؟؟؟


موزه :: بعدني ماطلعت ...


ايمان ::مواز حبيبي ...


موزه ::هلا غناتي آمري ...


ايمان :: شو رايج نسير الحديقه اليوم ؟؟؟


موزه :: منو بيسير ؟؟؟


ايمان :: مادري بس اللي اعرفه ان ربعج كلهم بيسيرون ...


موزه :: مادري بشوف ... بس اذا سرتي روحج ماتلومين الا عمرج ...


ايمان :: لا حبيبي لازم تكونين ويايه ..سرت مره وحده وكل حد كان يبا يتعرف عليه مافيني ...


موزه :: خلاص اليوم المسا برد عليج خبر ...


ايمان :: اول ماتقررين ردي عليه لأني بتعدل ...


موزه :: اوكي تمام ...




سكرت موزه عن ايمان .. واتصلت على طول في امها وقالتلها انها بتطلع وياربعها ..بس بترد تبدل ... خصوصاً ان باجر اجازه وعلى قولتها تبا تطلع وتشم هوا ...


طبعاً الأم ماقالت لأ ... على طول وافقت بدون ماتسأل منو ولا متى بتردين ...


ردت موزه واتصلت في ايمان .. وقالتلها ان اليوم الساعه 6 المغرب بتمر عليها وبتسير ...بيكونون البويات تيمعوا




بيت راشد ...




بس بذكركم بعايلة راشد عشان ماتتلخبطون ...




* عايلة راشد+نوره = شيخه ( 23) خالد (27)




كانت نوره سايره تحط الغدا حق العيايز ... لأنهن متعودات يتريقن ويتغدن وعقب يظهرن من البيت ....


اما شيخه فكانت منسدحه جدام التلفزيون وتجلب القنوات وبخيته وعوشانه يهذربن وياليده ...


شيخه تحب بعد تيلس وياهن وتحس انها تعز عوشانه وبخيته مثل معزتها ليدتها .. فكانت تاخذ راحتها وتتكلم في أي موضوع بدون أي مشكله ...


عوشانه وهي ترمس شيخه :: يابوج راسنا دار وانتي تجلبين التلفزون ...


شيخه :: شسوي ياامي مب محصله شي عدل ....


عوشانه :: جي غيرتي عن التمثيليه ؟؟؟ خليها ...
شيخه :: ملينا من هالمسلسل كل يوم يعيدونه ...


وهي تجلب القنوات .. حطت على برنامج ...وتمت تشوف البرنامج وطنشت العيايز ..


شوي جان تحس ان حد يلس صوب راسها بالتحديد على شعرها لأنها كانت طايحه على الأرض وشعرها ماشالله من طوله فكانت ناشلتنه ...


شيخه :: آآآآآآآآآآآآخ راسي ...


عوشانه وهي تشل شعر شيخه بأيدها وتفره الصوب الثاني :: ياامي اربطي راسج بيحسدونج ...


ام علي ::يابوج تعبت وانا ارمس ... مب طايعه اقوللها بيحسدونج ماتسمعني ..


بخيته :: يحسدونها على شو وياكشتها ..جنها مخمه مجلوبه ....


عوشانه ::رمست ... اقولكن بنيات انطبن شوي ...


ردت عوشانه تشوف التلفزيون ..شوي جان تسأل شيخه ..


عوشانه :: شيخه أمي بنشدج...


شيخه :: هلا امي قولي ..


عوشانه ::مني هذي ؟؟؟


شيخه :: اي وحده فيهم ؟؟؟


عوشانه :: هذي اللي تناقز ؟؟؟


شيخه :: هيييييييي ..سلمج الله هذا برنامج رياضه ...


عوشانه :: شسمه ؟؟؟


شيخه :: ماالك الا هيفا ...


عوشانه :: هي هذي أسمها هيفا ؟؟؟


شيخه :: هي امي ...


عوشانه :: شتسوي .. رياضه ؟؟؟


شيخه :: هي ماتشوفينها ؟؟؟


عوشانه :: الحينه هذي العيوز تسوي رياضه واحنا ميلسات وكل وحده متكسره ... لا ابويه انا بعد بسوي ماالك الا عوشانه ...


شيخه :: والله يامي انج متشببه ماتعرفين شبتسوين بعمرج ؟؟؟


عوشانه :: انطبي يالله انطبي ... من زينج اللي مب فالحه الا في أكل ورقاد ... وين أيامنا أول ..والله كنا نزيغ من اهالينا ومانيلس ويالكبار ..الا انتن مادري شقايل مستويات ...


بخيته :: بلاها حرجت العيوز ؟؟؟ شوقلتولها ...


عوشانه :: انطبي انتي لاأكرخج على راسج بالعصا ...


ام علي :: انتن اييه .. خلونا في سالفتنا الحينه ... ردي انتي العيوز ياللي ماتدرين شو بتسوين في عمرج آخر شي ...




في الصاله ::


دخل خالد الصاله وهو يتكلم في التيلفون ويضحك ...


اول مافتح الباب انتبه ان ابوه يالس يشوف التلفزيون .. ارتبك


راشد صد على ولده .... وتم يشوفه ...


خالد :: خلاص انا شوي وبرد اتصل ...سكر خالد عن اللي كان وياه على الخط ...


وسلم على أبوه ...


راشد :: عليكم السلام .. منو كنت تكلم ؟؟؟


خالد وهو مرتبك :: ربيعي ..


راشد :: انزين سر بدّل ثيابك ورد بكلمك في سالفه ...


خالد :: ان شالله ابويه ...


وسار خالد داخل ... يتغسل ويبدل ثيابه ...


راشد طيب وايد ...بس مشكلته انه عصبي ...وعصبي وايد مب شويه بعد ...


تم راشد يشوف التلفزيون ويترياهم يحطون الغدا ....


نوره كانت مشغوله تحط الغدا حق العيايز ..




اما البشاكير فكانوا يحطون الغدا في الصاله حق راشد وحرمته وعياله ...


شوي جان يطلع خالد من غرفته .. وسار يلس عدال ابوه ... ويت نوره ويلست وياولدها وريلها ... بس شيخه كانت يالسه ويالعيايز تتغدى ...


خالد كان يتريا يبا يعرف ابوه شو يبا منه ؟؟؟


تم يفكر الين ماقطع تفكيره صوت ابوه ..


راشد :: خالد كم عمرك الحينه ؟؟؟


خالد انصدم من سؤال ابوه .. معقوله أبو مايعرف كم عمر عياله ؟؟؟


خالد وهو يشوف ابوه :: 27 ...


راشد :: يعني كبرت ... متى ناوي تعرس ؟؟؟


خالد استانس .. كان وده انه يفاتح ابوه بهالموضوع .. خصوصاً انه وده يخطب البنت اللي يحبها من زمان ...


خالد :: والله ودي يابويه .. بس كنت أدور الفرصه اني اكلمك بهالموضوع ...


راشد :: خلاص مادام ودك تعرس .. من اليوم بنسير نخطب البنيه ..


خالد وهو مستانس اكثر ::صدق ابويه .. انزين .. ماتبون اول شي تعرفونها منو هي ؟؟؟


راشد :: شقايل بعد مانعرفها ...تراها بنت عمك ...


خالد انصدم ... منو بنت عمه ؟؟؟؟


راشد :: بلاك سكت ؟؟؟ بقربلك أياها ... موزه بنت عمك علي ....


خالد حس انه وده يجلب الطاوله ... شيبا بموزه بنت عمه ؟؟؟ من زينها .... تم يشوف ابوه ومصدوم ...


راشد :: نوره شو رايج ؟؟


نوره وهي مستانسه .:: شو شورايي بعد ... اكيد بوافق .. هذي موزه .. مربايه أحسن تربيه ...


خالد :: وانا مالي شور ؟؟؟


راشد :: شور شو بعد ؟؟؟


خالد :: انا مااباها ... انا في بالي وحده ثانيه ...


راشد وهو متمالك أعصابه ..:: جي منو في بالك بعد ؟؟؟


خالد :: انا اعرف وحده وودي أخطبها ...


راشد :: من وين تعرفها ان شالله ؟؟


خالد :: تعرفت عليها ..


راشد وهو يصرخ من قمة راسه :: تعرفت عليها وودك تاخذها ؟؟؟ جي ان شالله وين عايشين في امريكا ؟؟؟ تخسي الا انته تاخذلي وحده من الشارع


خالد :: هي مب من.........


راشد ::جب .. مالك الا بنت عمك ... وان خذت وحده ثانيه ..انسى ان عندك ابو تفهم ولا لأ ...


نش راشد من على السفره وخلى ولده منصدم باللي قاله ...


خالد مايبا الا مروه ... ومايحب حد غيرها ... ابوه يبا يدمر حب 3 سنين؟؟؟ شو هالقساوه ؟؟؟


نش خالد من على السفره هو بعد .. ودخل حجرته وشل سويج السياره وطلع ...


اما نوره .. فماقدرت انها تقول شي لأنها ان تكلمت بتكون هي الغلطانه ... ففضلت السكوت أحسن ....

 

[عجيد الريم]

في بيت علي ...


كان حمد متنكد .. نكد الدنيا على راسه ...


كان يالس في الصاله ويشوف روضه بنته تلعب بألعابها ... وتذكر كلام الدكتور يوم قاله عن الغلا ...


ماتمالك نفسه .. ودمعت عينه ... قبل كان يسمع ان متلازمة داون تصيب الأطفال اللي أهلهم كبار في السن وتجاوزوا سن الأربعين ... بس عقب خابت توقعاته كلها ..وطلع هالمرض ماينعرف شو سببه .. ومااكتشفوه ليش الين الحينه ... حس انه مخنوق .. مايعرف كيف بيساعد في تربية بنته الثانيه .. من يشوفها ماتهون عليه انها تكون بهالحاله ..بس مجبور انه يساعد خوله انها تتقبل وضع بنتهم ...


محمد هاك الوقت كان توه داخل البيت ...


وشاف اخوه بهالوضع ...


محمد كان مستانس وماكان وده يخرب فرحته ...


بس يوم شافه تقرب منه ..



حمد ماحس بأن اخوه يلس عداله ...


محمد :: حمد ..حمد ......... بوروضه ...


حمد انتبه ان حد يزقره ::هلا ... نعم ؟؟؟


محمد :: شوفيك متنكد ياخويه ؟؟ عسى ماشر ؟؟؟


حمد :: ماشر ... بس اليوم سرت المستشفى ... وهذا ثامن دكتور يقول نفس الكلام عن بنتي ...


محمد يحب الغلا اكثر وحده ... واكثر حتى من اخوانه ... يمكن لأنها مريضه ويشفق عليها ... بس المهم انه يحبها وايد ...


محمد :: ماعليه ياخويه .. هونها وتهون ... وان شالله ربك بيفرجها ...


حمد :: الحمدالله على كل حال ... بس ياخويه الحرمه غامضتني .. مابقالها الا شويه وتتخبل .. مب عارف كيف اتصرف ...


محمد :: ماعليه لازم تتحملها ... هذي مهما يكون ام عيالك ... تحملها وحاول انك تكون وياها وتساعدها تتجاوز هالأزمه ....


حمد ابتسم لأخوه ...


محمد :: يالله نش .. انا يوعان .. قم نسير نتغدى ...


حمد:: يالله ... والتفت على روضه ...


رواض يالله حبيبتي نسير ناكل ...


روضه :: انذين بابا .. بث وين يدي ؟؟؟


محمد :: يدج في غرفة الطعام .. قومي حبيبتي ...


نشت رواض من مكانها وسارت تركض صوب غرفة الطعام .. عسب تيلس عدال يدها ... قبل ماتي يدتها وتاخذ مكانها ...





الساعه 5 ونص ..



في الحديقه ...


وصلت موزه الحديقه وكانت ايمان وياها في السياره ...


ايمان كانت لابسه تنوره قصيره وبدي قصير ....
نزلوا من السياره


وكانت تمشي ويا موزه ولاصقه فيها ....


وصلوا صوب الباركنات .. وتمت واقفه ويالشله .. وحاطين أغاني ويترقصون كلهم ....


وشي من بعيد شلة بويات كانوا يتمشون ويقردنون شله ثانيه ..


بين هالضحك والمصخره ..




كانت شيخه هاك الوقت واصله عند البوابه ..


اتصلت في عليا ربيعتها ...


شيخه :: ألووووووو ..


عليا :: اخت شيخه وينج حضرتج يالسه ادور في السياره أدورج ...


شيخه :: وسم ان شالله .. واقفه عند البوابه من الصبح ..مكبرها الحديقه مااروم امشي هلكت ...


عليا :: جي المدموزيل شو لابسه في ريلج ؟؟؟


شيخه :: بعد وحده يايه الحديقه ... شو بلبس غير جوتي رياضه ؟؟؟


عليا بسرعه :: عفواً الأخت شو قلتي ؟؟


شيخه :: شو شو قلت جوتي رياضه بعد شو ؟؟


عليا :: اقولج يمعة بنات تقوليلي جوتي رياضه ؟؟؟ اذبحج ؟؟؟


شيخه :: وجي تذبحيني شو مسويه ؟؟؟


عليا :: وشو مسويه بشعرج ؟؟؟


شيخه :: لافه الكشه بعد شو مسويه ؟؟؟


عليا بأعلى صوتها :: هذي اللي بتجلطني ... وينج انتي مااشوفج ؟؟؟


شيخه :: انا الحينه امشي صوبكم .. انتي وين ؟؟


عليا :: انا في السياره ...يايه صوبج ... اتريي جني شفتج ....


شيخه :: هي شفت سيارتج يالله تعالي صوبي مت من الحر ...


عليا وصلت صوب شيخه وفتحت الجامه ...


على طول دخلت شيخه السياره وتمت تهف على عمرها بالشيله ...


شيخه ::ويه متنا من الحر .. ماحصلتوا تتيمعون الا اليوم ؟؟؟


عليا :: شنسوي اليوم البنات كلهم بيتيمعون ...


شيخه :: في حد من ربعنا هناك ؟؟؟


عليا :: هي عواش وحصووه وريمووه


شيخه :: زين عيل ..


عليا وهي تتوجه صوب يمعة البنات .. شافت شيخه ان هناك أشيا وايده غلط ..


اول ماوصلت صوب الباركنات ..


شافت الكل متيمع هناك ..


شيخه :: وجي متيمعين صوب الباركنات ؟؟؟


عليا :: ترى صوب الشاليهات ظلام هنه يتيمعن البنات ...


شيخه :: أهااااااااا ...


اول مانزلت شيخه عقت عباتها في السياره ...


شيخه وهي تشوف البنات :: بخبرج عليوه .. جي البنات ملبسات قصير وحالتهن حاله ؟؟؟


عليا :: شكلج بعدج ماشفتي شي مول ..تعالي نسير وياشلة المتاعيس ..بس مادريبهن وين ...


شيخه :: شو هالشله المفلوعه أخس عن شلة يدتي ...


عليا مسكت شيخه وتمت تمشي وياها ... وتمن يتضحكن ويسولفن عادي ..


شوي جان تي وحده وراهم ..


.. :: هلا والله هلا .. صوبنا ياحلوه ياام السبورت ...


شيخه صدت على عليا :: عليووه شو السالفه ؟؟؟


عليا وهي تضحك :: بدوا يهلون بوياتنا العزيزات ...


.......:: صوبنا ياقمر لاتتغلين .. رقمي 050 ....!@#$%^&*


شيخه حست ان راسها دار ردت صدت على عليا :: وقامت ترقم بعد ..لايكون اليوم يوم الشباب ؟؟؟


عليا ::والله يوم بنات بس مادريبها بلاها هذي ...


كملت شيخه طريجها :: وانتبهت على بنت عمها موزه ...

شيخه ::فديييييييتها بنت عمووه هكي ... متولهه عليها والله اتريي علايه بسير اسلم ...


شيخه توجهت صوب موزه وهي تبتسم ...


شيخه بصوت عالي :: موزه ...


موزه التفتت على شيخه :: هلاااااااا


شيخه وهي تلوي على موزه ::تولهت عليج يالعنزه وينج من زمان ماشفتج ...


موزه ::وانا اكثر ..شحالج وشحال امي العوده ؟؟؟


شيخه :: الحمدالله انا بخير ..امج بعدها تجابل الشله المفلوعه ...


ايمان وهي معصبه :: خير ان شالله منو حضرتج ؟؟؟


شيخه وهي منصدمه وتشوف أيمان :: عفواً ؟؟؟


موزه وهي تتدارك الموقف :: هذي شيخه بنت عمي ...


ايمان ::اهااااااااا ..هلا شحالج ؟؟؟


شيخه وهي تشوف لبسها وتصرفاتها ومب عايبنها الوضع :: الحمدالله بخير ...


وردت صدت على موزه :: مواز حبيبتي انا بسير اوكي ..يالله باي ...


كملت شيخه طريجها ..


وهالوقت كانت وحده يالسه ويا موزه ..


منى :: موزوووه .. هذي القمر منو ؟؟


موزه ::بنت عمي ..اسمها شيخه ...


منى :: عرفيني عليها ...
موزه ::مافيني ماعندها هالسوالف ...
منى ::انتي مايخصج انا بتعرف


موزه :: اوكي كيفج نشي ويايه ...


موزه ردت زقرت شيخه ...


موزه ::شيخه ..تعالي شوي اباج ..


شيخه وهي تسير صوب موزه ..خير مواز قولي ؟؟؟


موزه ::ربيعتي انعجبت فيج وتبا تتعرف عليج ..


شيخه وهي منصدمه ..::شو ؟؟؟


منى :: بسألج انتي عندج وحده تحبينها ...


شيخه بعصبيه :: شو تخربطين انتي ؟؟؟


منى :: شو شو تخربطين ارمسي عدل .. انا يايه اتعرف عليج ..شفتج حلوه قلت انج رقيقه مب دفشه جذه ..


شيخه :: شو حلوه ..حلج بطنج ..استحي على ويهج ...


منى وهي محرجه يودت شيخه من قميصها ::انتي ايييه احترمي عمرج .. ماعرفتيني انا منو ..انا ادوسج في بطنج وامشي ...


شيخه وهي تدفرها ::تخسين الا انتي ... يالمستريله ..


موزه ::منوووه نشي عن بنت عمووه مايخصج فيها ..وشيخووه عن طولة اللسان سيري خلاص ..


شيخه التفتت على موزه :: لازم اسير مسودة الويه ..هذيل هم ربعج ؟؟؟ مالت عليج وعلى ربعج ...كل وحده مستريله وترقم جنكم شباب صدق انكم ماتستحون والله لو أقول حق اخوانج شوفي شو بيسووبج ..


موزه وهي تتقرب من شيخه :: انتي أيييه ..ان رمستي والله لا يكون آخر يوم في حياتج ...


شيخه دفرت موزه بعيد ..وسارت صوب عليا ...


وهي تمشي ..اتصلت في اخوها خالد ...


خالد :: ألو ...


شيخه وهي تصيح ::خالد ..الحينه تعال خذني ...


خالد وهو زايغ على أخته .::بلاج ؟؟؟


شيخه ::مب رايمه اتم ولا دقيقه في هالمكان الزباله .. كل وحده شاذه وحالتهم حاله ..الله يخليك بختنق تعال ...


خالد ::: اوكي الحينه ياي ...




الحينه ياترى ..




شو مصير خالد ؟؟؟ هل بيوافق على طلب أبوه ؟؟؟


وشيخه :: هل بتقول لخالد عن موزه ؟؟؟


وخوله .. كيف بتتصرف ويامرض بنتها ؟؟ وحمد بيتقبل مرض بنته او بيبتعد عنهم ؟؟؟


ومحمد .. هل بيعرف بسوالف أخته ؟؟؟

 

[الطموحه]

تسلمييييييييييييييييييين
اختي عجيد الريم والله فقدناج وفقدنا القصة
واذا امكن ما تطولين علشان نقدر نلم الموضوع لاني راجعت عالحلقة الاولى وقريتها بسرعة علشان اتذكرها
((تدريين الكبر شين)):eh_s(6):
لا تطولييييين علينا :eh_s(4):
بانتظارج:eh_s(15):
والله يعطيج العافيه

 

[عجيد الريم]

تسلمييييييييييييييييييين
اختي عجيد الريم والله فقدناج وفقدنا القصة
واذا امكن ما تطولين علشان نقدر نلم الموضوع لاني راجعت عالحلقة الاولى وقريتها بسرعة علشان اتذكرها
((تدريين الكبر شين)):eh_s(6):
لا تطولييييين علينا :eh_s(4):
بانتظارج:eh_s(15):
والله يعطيج العافيه

ربي يسلمج يابنت الديره ..

وصدقتي ياختي الكبر شين :eh_s(6):

بس شسوي ياختي المنتدى ماطاع يفتح عندي من فتره ...

السموحه غناتي ..وان شالله مااطول في الجزء اليديد

اختج::عجيد الريم ...

 

[lelostech]

ماشاء الله

مبددددددددعة ببمعنى الكلمة

يعطيج العافية

بس واللي يعافيج لا تطولين علينا والله اندمجت بالقصة

 

[عجيد الريم]

ماشاء الله

مبددددددددعة ببمعنى الكلمة

يعطيج العافية

بس واللي يعافيج لا تطولين علينا والله اندمجت بالقصة

يامرحبابج اختي الغاليه نورتي

ربي يعافيج غناتي ...

وان شالله لي عوده بالجزء اليديد

 

[عجيد الريم]

ماشاء الله

مبددددددددعة ببمعنى الكلمة

يعطيج العافية

بس واللي يعافيج لا تطولين علينا والله اندمجت بالقصة

يامرحبابج اختي الغاليه نورتي

ربي يعافيج غناتي ...

وان شالله لي عوده بالجزء اليديد

 

[ArEEj]

فديتج والله
تسلمين يا الغاليه
قصتج غاااااااااويه
<<< صارت اماراتيه

يعطيج العافيه والله انى احب اللهجه الاماراتيه

 

[عجيد الريم]

فديتج والله
تسلمين يا الغاليه
قصتج غاااااااااويه
<<< صارت اماراتيه

يعطيج العافيه والله انى احب اللهجه الاماراتيه

يامرحبا ملايييييييييييين ولايسدن ....

فديت قلبج الغاليه تسلمييين على مرورج الغاوي ...

صدقيني ردج فرحني وايد ...

تسلمين اختي الغاليه اريج وماقصرتي ..

وخليني دوم اشوفج منوره الصفحه ...

اختج::عجيد الريم ...

 

[Miss_Hopless]

يعطيج الف عافيه عجيد الريم وتسلم ايدينج ولا تطولين علينا بالتكمله

 

[عجيد الريم]

يعطيج الف عافيه عجيد الريم وتسلم ايدينج ولا تطولين علينا بالتكمله

ربي يعافيج اختي الغاليه وتسلمييييين فديتج على مرورج الحلو ...

وان شالله الغلا مابطول بالجزء اليديد

والسموحه...