موضوع خاص للأستفسارات المتعلقة بالأسنان

[‏@ام حمني@]

مرحبا دكتوره انا عندي مشكله متعبه نفسيتي تكفين دكتوره ساعديني الله يجزاج الجنه.مشكلتي ان رحت لأكثر من دكتور سواء خاص او حكومي قالولي انه اسناني صفتهم زينه ومتساوين ونظاف مافيهم تسوس الحمدالله لك يارب لكن المصيبه اذا تكلمت او ابتسمت ابتسامه صغيره تبين عندي
اللثه وفيها تقدم وانا متعبه نفسيتي هذي المشكله ما ادري شسوي والله انه دايما ايدي على حلقي لا ضحكت.فكرت اتفخ شفايفي عشان شفايفي ما يرتفعون اذا ابتسمت لكن خفت بعد ماشفت شفايف شيماء علي .تكفين انصحيني ولا تهملين سؤالي وشكرا

 

[Mrs_Orchidia]

السلام عليكم


الله يعطيج العافيه دكتورتنا

الحمدلله انا اسناني حلوه و ما فيها شي ما عدا الناب اليمين ناط!! يعني طالع لي برة و مرتفع

و ودي الصراحة اعدله و ضروسي راح تصير صفة وحدة بعدها ..

شالحل؟؟ لازم تقويم كامل.. و اذا اي شنو البدييل؟؟



و شنو احسن انواع تبييض الاسنان الحين؟؟





و شكرًا مقدمًا حبيبتي

 

[Mrs_Orchidia]

???????????????????????

 

[^^DADDIES GIRL^^]

دكتوره انا سويت تلبيس بعيادة الميدان بردو ضروسي الامامية نهائي والحين الشكل كلش مومضبوط السالفه في لها حل ولا لأ بليز ترى صاكه فيني الدنيا

 

[يا ليل مطولك]

السلام عليكم
دكتوره لحقي علي انا امس شلعلي الدكتور ضرس الطاحن اللي ورا الناب بضرسين واليوم خدي منتفخ وفي بقعه ورديه تحت بين الذقن والخد


حدي خاااايفه شسوي وعادي افرش على مكان الضرس المشلوع

وشكرا

 

[بنوته22]

سلام عليكم

مشكلتي يا دكتوره عندي بروز ف الثه مو حيل لكن عندي ابتسامتي من الامام حلوه لكن من جنب يلاحظ الفرق بين الاسنان العلويه والسفليه

وقرر علي الدكتور تقويم وخلع الاضراس العلويه الثنين منهم

وانا جدا خايفه من الخلع ومن النتيجه الاخيره وخايفه اندم ع عمل التقويم من الاساس

شرايك يا دكتوره ف خطوره من عمل التقويم لاني سمعت التقويم له سلبيات
انا عمري23سنه

 

[سيدة عربية]

السلام عليكم
الله يعطيك العافية دكتورة
دكتورة أسناني الامامية من الاسفل شبه شفافه مو بيضاء وفيهن تكسر شو سسبب ؟؟ وشو العلاج ؟

 

[مثايل30]

دكتورة بنتي عمرها 7 سنوات لعبت وطاحت على فمها وانكسرت وحده من الاسنان الاماميه( الثنايا ا) وما ادري شسوي الحين وشنو تنصحيني فيه
ومشكوره مقدما

 

[nazek_q8]

دكتوره يعطيج العافيه على الجهد الطيب وعساج عالقوه

عندي استفسار بخصوص تركيب الاسنان الامامية

انا عندي ضرس وحد شالعته ومركبه جسر حق 6 الامامية والحين بشيل القديم وبحط تركيب يديد ابي يكونون صفتهم وشكلهم احلى

المهم شافني الدكتور وقالي بزرعلج مكان الضرش المشلوع ضس وعظم لان يقول العظم نازل

هل ضروري هالشي يعني اذا ما سويت زراعه راح يتغير شي بالنسبه للعظم انا ما اشوفه مبين وشكله عادي وقالي هم برفع شويه اللثه وبصراحه خايفه من الجراحه


وسؤال ثاني
شنو احسن الجسر او تركيب الاسنان سن سن منفصل؟؟

 

[رولكس ذهبيه]

السلام عليكم دكتوره انا رحت لطبيب اسنان وقالي بسوي الاسنان الاماميه فينيرز يعني قشور بورسلان وراح ابيض الاسنان اللي تحت بتبييض منزلي اقل اضرار الحين سؤاليي هل هي ابتسامة هولييود المقصوده وقالي راح تظل معاج الحشوات 10 او 15 سنه

 

[*الماضي على ويش نعيدهــ*]

السلام عليكم
دكتوره انا عندي ضرس الناب ملبسته قبل سنتين احس انه يتحرك
يصير اشلعه واسوي زراعه؟؟
وشرايج بالزراعه زينه ولا لا؟؟
وودي اسوي تبيض بالليزر ابي رايج بلييييز

وشككرا

 

[روحي تحب]

السلام عليكم يعطيج العافيه دكتورتنا والحمد الله على سلامتج,,,,, سامحيني راح أأذيج باسئلتي بس عسى ربي لايخلينا منج انتي ماقصرتي

وعليكم السلام ورحمة الله و بركاته .. الله يسلمج حبيبتي و حياج الله تنورينا باي وقت

اولا : يصيير يعالجون سنيين علاج عصب مع بعض في يوم واحد ؟ بالنسبه لحالتي عندي سنيين يم بعض لزق واصلين للعصب

اي حبيبتي يصير عادي .. اذا كانو الضرسين صغار تخلصين نفس الوقت اللي تحتاجينه حق ضرس كبير اما اذا الضرسين طواحين تحتاجين وقت اكثر شويه و هكذا ..

ثانيا : وهل علاج العصب يقدر اي دكتور يشتغله ولا لازم دكتور متخصص بعلاج العصب ؟
لانه حسب معلوماتي كل تخصص له دكتور يعني جراحه الفك مثل خلع ظرس العقل لها دكتورمتخصص والدكتور اللي رحتله يقول اهو يسوي كل شئ حتى تجمييل واللي اعرفه حتى التجمييل لازم يكون متخصص ويريت واللي يسلم عمرج من واقع خبرتج اذا تعرفيين دكتور شاطر بعلاج العصب قوليلي عنه

يفضل يسويه اختصاصي طبعا بس الحين الدكاتره بالخاص قامو يسوون كل شي عكس عندنا بالحكومه ممنوع احد يسوي غير تخصصه ماعدا دكتور الاطفال اهو الوحيد اللي يسوي كل شي و الله حبيبتي ماعرف احنا بالحكومه معزولين عن العالم الخارجي ..

ثالثا : بما انه ماعندي فكره عن طريقة العلاج عند الحكومه من زمان فممكن اسأل متوفر عندهم جل للتخدير قبل الأبر وهل يفييد يعني ممكن يساعدني بتفادي ألم الابر؟

الجل متوفر فقط عند عيادات الاطفال ماعدا ذلك تقدرين تشترينه من الصيدليه و تاخذينه معاج .. طبعا يفيد اللي يعرف يستخدمه اهم شي اولا تنشيف لمنطقه تماما بعدين تحطن الجل على مكان الحقن و تنطرين ثواني قبل الحقن .. الجل راح يخليج ماتحسين بغزة الابره بس راح تحسن بالبنج و اهو يمشي ( مادري فهمتي قصدي ؟ )

رابعا:من اسبوع سويت تنظييف اسنان اللي متعوده عليه بالخاص انه الدكتور اهو اللي يسوي التنظييف بس هالمره بالمستشفى العسكري اللي سوته مساعدته دكتور قالتلي عندج التهاب باللثه واستعملي المضمضه وتكفي هل برايج اذا كان عندي التهاب تستدعي الحاله اني اروح حق اخصائي علاج لثه لعلاج الالتهاب ؟


"]لا حبيبتي ماتحتجين باذن الله المضمضه كافيه .. استخدميها حس الارشادات و عقب ماتخلصين كورس العلاج في مراجعتج القادمه خليها تجيكلج اذا راح الالتهاب ولا لا .. طبعا الزياره كل 6 شهور مخلال هالفته تلتزمين بالتفريش الصحيح و استعمال الخيط السنني و المضمضه..
حياااج الله حبيبتي

مشكوره دكتورتنا وماقصرتي عساج على القوه يارب

 

[Mrs_Orchidia]

???????????????????????


Hello

 

[رولكس ذهبيه]

السلام عليكم دكتوره انا رحت لطبيب اسنان وقالي بسوي الاسنان الاماميه فينيرز يعني قشور بورسلان وراح ابيض الاسنان اللي تحت بتبييض منزلي اقل اضرار الحين سؤاليي هل هي ابتسامة هولييود المقصوده وقالي راح تظل معاج الحشوات 10 او 15 سنه

وانا دكتوره خفت من كلامج عن التلبيس والتبييض انا قالي الدكتور ان التبييض المنزلي افضل واقل اضرار وانه يقدر يسويلي بالعياده التبييض واغلي سعر بس اهو نصحني بالتبييض المنزلي وانه راح تسير حساسه بالبدايه وبعدين لا شرايج دكتوره

 

[الغاليه نونو]

دكتووره وينج ياقلبي لحقي عليناااااااا الخدامه ضرسها شب عليها مره وحده والحين ماااعندي احد يوديها الطبيب عطيتها حبتين بروفين 600 علشان تطيب وراها شغل باجر ياقلبي

وكلمتني اختي تقول لي موزين البروفين حبتين مع بعض لا يكون يصير فيها شي وابتلش مووو وقته كلش يخطوني بالجريده ويكتبون بالخط العريض( المعزبه التي ذبحت خدامتها بحبوب بروفينات



تكفين يمه ردي علي ترا قلبي يرقع من الخرعه

 

[ام سعود ديكسون]

الغالية نونو لا تخافين انا استعمل بروفين حبتين لوووول وكاني شخصيا مافيني شي خليها تعض حبة مسمار عدلة=بهار القرنفل مومسامير حديد صدقيني ماكو ع الطب بالاعشاب عوار الضرس بيطخ لان القرنفل يخدر منطقة الالم وسوري اعتذر اذا رديت بدال دكتورتنا بس كسرت خاطري خدامتج

 

[دااانوه]

دكتووره وينج ياقلبي لحقي عليناااااااا الخدامه ضرسها شب عليها مره وحده والحين ماااعندي احد يوديها الطبيب عطيتها حبتين بروفين 600 علشان تطيب وراها شغل باجر ياقلبي

وكلمتني اختي تقول لي موزين البروفين حبتين مع بعض لا يكون يصير فيها شي وابتلش مووو وقته كلش يخطوني بالجريده ويكتبون بالخط العريض( المعزبه التي ذبحت خدامتها بحبوب بروفينات



تكفين يمه ردي علي ترا قلبي يرقع من الخرعه

لاااا يمه لااتحاتين

ان شاء الله ماعليها شر

وااايد ناس ياخذون حبتين بروفين ان شاء الله مايصير لها الأ العافيه

<< تتخيل الموضوع اللي بالجريده :krkrkr:

 

[softlady]

بروفين 600 وثنتين ؟؟ ترى وايد

 

[ضمى روحي]

دكتوره انا عندي التهاب في اللثه وصار فيه

ضمووووور

في اللثه عند الناب من الجهه اليمنى والحين جالسه اشوف شي بسيط من الضمور من الجهه اليسرى
وش اسوي؟!!

وش الحل وليه صار عندي ضمور باللثه نفسيتي دمااااااار:0bee2e8d89:

 

[دكتورة أسنان]

مرحبا دكتوره انا عندي مشكله متعبه نفسيتي تكفين دكتوره ساعديني الله يجزاج الجنه.مشكلتي ان رحت لأكثر من دكتور سواء خاص او حكومي قالولي انه اسناني صفتهم زينه ومتساوين ونظاف مافيهم تسوس الحمدالله لك يارب لكن المصيبه اذا تكلمت او ابتسمت ابتسامه صغيره تبين عندي
اللثه وفيها تقدم وانا متعبه نفسيتي هذي المشكله ما ادري شسوي والله انه دايما ايدي على حلقي لا ضحكت.فكرت اتفخ شفايفي عشان شفايفي ما يرتفعون اذا ابتسمت لكن خفت بعد ماشفت شفايف شيماء علي .تكفين انصحيني ولا تهملين سؤالي وشكرا

هلا حبيبتي ..
مشكلتج اسمونها gumy smile الابتسامه اللثويه مادري الترجمه صح ولا لا :eh_s(6): المهم في لها حل انج تسوين رفع للثه طبعا وقت العمليه مافي الم بس بعد العمليه ولمده لا تقل عن 4-5 ايام راح تتعبين شويه و تاخذين مسكنات .. طبعا هذا اذا ماكانت المشكله بالشفايف نفسها في هالحاله الحل مو بعملية رفع اللثه .. حياج الله