مستحيل اعيش من دونك..روايه كويتيه قصيره..واقعيه..

[دبة زمانها]

هاااي السلام قوه مرحبااااااااا يا احلى عضوات يا قمرات...عساكم اب خير...
انا لي واايد مشاركات في هذا القسم بس ما نزلت رواايه...والحين بنزل لكم روايه وانشالله اكون مو مقصره معاكم اب وله شي
القصه حدهاا رووعه و واقعيه ومادري شنو اقول عنها..اقول اخليكم مع الرواايه انتوا اقروها وحكموا..
7
7
7
7
7
7
مستحيل أعيش من دونك
هذا عنوان روايتي اللي دارت إحداثها في دوله الكويت وهي قصة واقعيه نسجها القدر وكتبتها الضروف,وعشان
اكون صريحه وياكم انا قررت اكتبها لمعرفتي الشخصيه في بطلة
القصه الاولى,تعرفت عليها في ثانويتي كنت
في اخر كورس في الثانوية وكانت البطله تكبرني بسنتين تقريبا 0
حسيت ان فيها اختلاف من بين باقي زميلاتي وصارحتها بشعوري
وطلع احساسي في محله وبدات تروي قصتها اللي بسببها تاخرت دراسيا
وعشان ماامللكم ببدا في القصه مباشره ,وسلوبي في قصتي هذي
اخلي القارئ يقرب من الشخصيه ويسمع القصه مباشره من البطل
وقرب من ادق التفاصيل عشان يقدر يسمع ويشوف من خلال القراءة,
وسامحوني اذا زل قلمي او اذا لم تحوز قصتي على اعجابكم ’
الحبن استأذن بخليكم مع البطلة من الفصل الأول من القصة




رهام
انا بنت كويتيه عاديه اعيش حياتي مثل اغلب بنات الخليج,من اسره احواله الماديه جيده,واصلي بدويه يعني من احد القبايل المعروفه في الكويت,افراد اسرتي ثمانيه مع امي وابوي(4بنات وولدين والبنات هم الاكبر)ترتبي الرابعه بين اخواني واشهر الشخصيات في قصتي من خواني (منيره –مشاعل -فاطمه)لانهم لكبار,
وكاغلب العوايل في الخليج وجود بيت يتجمعون فيه خميس اوجمعه,وهذا البيت بيت عمي "محمد"وبلاساس بيت جدي الله يرحمه,وكان بيت عمي كل خميس يكتض في بنات العايله اللي اعدادهم قولوا مشاء الله ثلاثين
وحقيقتي المره اني كنت لين عمر 14سنه ضايعه بطوشه تقدرون اتقولون البطل الصامت وماكان لي أي دور سوى المطاريش (رهام جبي هذا ..رهام حطي ذاك (
وكنا في اغلب العطل مثل الصيف والربيع نقضيها مع بعض مخيمات او سفر وشالهات,يمكن بتقلون وناسه بس كان بنسبه لي روتين ممل,ومع وضيفتي اللي كنت اسويها للاسف كنت مرسال غرام بين شباب وبنات العايله وطبعا كان نص شباب العايله مايعرفون اسمي واذا تأزموا قالوا تعالي يابنيه"آآآه كنت مصخره ليش ذكرتوني"
وطبعا تسالون نفسكم ليش هذا التجاهل من الكل,عشان اكون صريحه في ثلاث اسباب -الاول لاني كنت صغيره ونتفه ومافيني شي يجذب مثل غيري من بنات عمامي, -وثاني كثرة العدد في العايله,- وثالث يرجع لشخصيتي كنت خجوله واميل للعزله واعيد واكرر ان هذي كانت فتره من حياتي لين كملت14سنه

برد لجمعتنا "بنات العايله"طبعا حديثهم في كل جمعه ينقسم قسمين الاول احاديث منوعه من اهتمامات البنات سواء في الموظه او المكياج .....والقسم الثاني لاشهر شخصيه في العايله "السوبر ستار"مشعل ولد عمي محمد,كان الحديث عنه طويل بس كله ذم في سلوكه وتصرفاته وشلون شافته مريم مع بنت جيرانهم وشلون اسمعته فاطمه اكلم وحده وللي شافته يغازل امس في السوق وووو.....,شقول وشخلي
بس على خرابطه هذي كان فيه شيئين مايختلف عليهم اثنين -الاول انه اجمل شباب العايله -وثاني حبه لدراسته اللي خلاه يتفوق وكمل دراسته بأمريكا
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

خلوني ابدي معاكم من نقطة تحولي في سنت 2001 قمت من النومي كلعاده نزلت الصاله لقيت امي وبوي وخواني يتريقون
ابومحمد:صباح الخير على بنت ابوها
حبيت راسه وراس امي:صباح النور لكم كلكم
ام محمد:تعالي تريقي حبيبتي
رهام:انشاء الله يمه
مشاعل:مدلعينج رهام اليوم بزياده
ابومحمد:والله رهام من زمان عيون ابوها واللي مو عاجبه كيفه
ام محمد:افا يا ابو محمد والباقي
ابومحمد:غالين وفي القلب بس رهام غير
فاطمه:اموت وعرف اشمعنا رهام
ابوي: انتي مو بتموتين من الفضول من اللقافه ههههه
وكلنا ضحكنا وهذا عادة ابوي لازم يضحكنا الصبح عشان برايه يكون يومنا كله فرح
فاطمه: لاتتهرب من الرد يا ابو محمد جاوب
ابومحمد: بدون لحد يزعل رهام حنونه وهاديه ومتاكد من كل تصرفاتها انها بنتي العاقل
ام محمد: أي والله رهام من بد بناتي احس انها بتكون اصبر وحده فيهم وأحكمهم
منيره: يبه امدحنا لو خميس واحد مثل رهام ترى احنا اللي مو وياك في البيت
مشاعل: يعني اسبوع انا وثاني منيره وثالث فاطمه"لانهم متزوجات"
ابومحمد: كلكم غالين من غير مامدح
فاطمه: لا امدحني ماتبي تمدحني ولا شلووووووون
ابومحمد: فطوم الحلوه الشيخه العاقل هههههههه
ام محمد: منيره ترى اليوم بنروح بيت عمكم
منيره: شنو جديد كل اسبوع عندهم
ابومحمد خذا حمود اخوي وطلع: نوره الساعه سبع خالصين
ام محمد: انشاالله يا ابومحمد
ام محمد: اليوم في حفله مسويتها مرت عمكم محمد
فاطمه: حفله ليش
منيره: يمكن مشعل وصل
ام محمد: أي مشعل رد وامه مسويه حفله
فاطمه: توكم اتقولون... مادري شلبس
مشاعل:البسي البدله السلفر(رمادي(
منيره :بدق على سعد يجيب عقدي الالماس
واستمرو اناقشون امور الحفله وشنو راح يلبسون ,اما انا كنت افكر شلون اقعد في البيت وقنع امي تخليني’لاني مثل ماقلتلكم اميل للعزله ومااحب الزحمه ولا الروتين الاسبوعي الممل ,وبلفعل لقيت خطه تفكني من الحفله وحضورها
رهام:يمه يمه ؟؟
امي:تعالي يا رهام انا بغرفتي
رهام:يمه انا تعبانه بطني يعورني
امي :من شنو شنو ماكله ولا حاشج برد من المكيف جم مره قلت لج قصري عليه
رهام :مادري
امي:خلاص شربي شي دافي ونامي وتصيرين زينه واذا حسيتي بزيادت تعب تعالي اقول لبوج يوديج المصتوصف
رهام :لا يمه ماله داعي بس بنام
رحت وفكرت بخطه ثانيه لان خطتي فشلت ,,,,,وساعه 6
امي:رهام عسى راح العوار
رهام:راح بس فيني نوم خليني وروحي الحفله
امي:أي قولي من الاول انج ماتبين اتروحين شوفي اذا على قولتج فيج نوم نامي في غرفة ساره بنت عمج بس قعده مافي سامعه مجنونه اخليج بروحج!
طبعا رضخت لراي امي وماقدرت اقاوم ورحت اكشخ ولبس بس كشخت بنت عمرها14 سنه,لبست نفنوف ازرق مزموم من الصدر والايدين ولين الركب كان فيه قصات وشرايط كان حلو ومناسب عمري مشطت شعري الاسود اللي كل العايله تشهد انه روعه في الجمال سوئ طول او كثافه او نعومه وابوي يعشق انه يمشطه وسويه اخيوط الحرير ,حطيت قلوس"مرطب"وهذي كانت كشختي
لبست وجهزت ولبسو خواتي ورحنا الحفله
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اكمل بعد الردود...مع حبي وتحيااتي للكل:دبة زمانها....:33_1185028183: :hjy5jewf:

 

[miss 3yara]

انا قاريه الروايه من قبل وهي حلوه بس انا دخلت وقلت لازم ارد دامها من حبيبتي دبة زمانها

 

[دبة زمانها]

يا بعد قلبي والله فديييييييييييييييييتج....نورتي والله حيااج.....
صج احببببببببببج بعد طوايفي وهلي انتي....اسعدني مرورج وردج...

 

[ღ TőOőma ღ]

الرواااااااااايه شكلهاا روووووووعه نفس صاحبتها
فديييييييتج كمليها دامها منج بقراها
لايوقف لايوقف على قولتج لوول

 

[a7la_frawla]

اي والله كملي حدي فيني فضول اعرف الباجيييييييي
يعطيج العافيه حبيبتي

 

[دبة زمانها]

الرواااااااااايه شكلهاا روووووووعه نفس صاحبتها
فديييييييتج كمليها دامها منج بقراها
لايوقف لايوقف على قولتج لوول

فديت اللي تفداني انا...وثاانكس حيااتي وااي لا ما استحمل احرجتيني لوول..
ههه انشالله الحين بكمل..

 

[دبة زمانها]

اي والله كملي حدي فيني فضول اعرف الباجيييييييي
يعطيج العافيه حبيبتي

افا عليج دقايق واكمل الباجي عشان خاطر عيونكم...الله يعافيج..نطري التكمله..

 

[دبة زمانها]

وهذي التكمله لاحلى عيوون....
7
7
7
7
كانت مرت عمي مو مبقيه احد ماعزمته ولكل كان كاشخ ,وطبعا تجمعنا كلنا بنات عمامي وقعدنا الصاله الداخليه او مقر التجمع مثل مانسميه وبدت السوالف واجذب عليكم ان قلت اني كنت مو مستمتعه لانه أي بنت طبيعيه تستانس بسوالف مع قرينتها ,وبين ما كنا نسولف طلبت مشاعل مني اجيب ماي حقها,ورحت المطبخ لقيت مرت عمي تعطي اوامر لسيرفس اللي جايبته وقبل مااطلع نادتني
مرت عمي:رهام حبيبتي ممكن تروحين غرفتي اللي فوق راح تلقين على التواليت علبه مخمل اخضره فيها عود آسفه ماقدر اخلي الخدم ادشون الغرفه ولا مااعنيج
رهام:عادي ياعمه ماطلبتي شي
رحت لطابق الفوقي اللي كان عكس الطابق الاول كان هادي حد السكون تسمع فيه دب النمله ,دخلت الغرفه وكانت مرتبه واول ماقربت من التواليت سمعت صوت خرفشه طالعه من غرفة الملابس اللي داخل الغرف
رهام:منو......منو داخل؟؟؟؟
وقفت الخرفشه وخفت
رهام:منو ؟؟؟منو
وفجاه طلع آخر واحد كنت اتصور اني اشوفه خصوصن بهلقرب
رهام:مش......عل"بصوت متردد"
مشعل:منو انتي؟؟ليش داشه غرفة امي ياشيطانه"ببتسامه ونوع من السخريه"
رهام:انااااا....ر ..رهام
مشعل:هلا رهام شلونج "بكل برود" "على اساس اني بنت صغيرونه "
وقرب مني وباس خدي وطلع,بكل برود طلع وهو يدندن ,تصنمت في مكاني وحسيت مثل تيار من الكهربا لسعني,نسيت شنو جابني فوق ,وبيني وبين نفسي اقول هذا مشعل اللي يذمونه كل بنات عمامي باسني اللي مايستحي ,وبدون شعور بدت ادموعي تنزل على خدي ,خفت اذا درو بنات عمي وخواتي شراح يقولون,وبين كل هذي لفكار رد الصوت اللي هز كل خليه بجسمي
مشعل:نسيت اقول انتي بنت عمي سالم ولا بدر ولاحمد ولابنت وحده من عماتي
وبين ماكان يتكلم لاتشفون وجهي من الدموع وطبعن انتبه وقرب مني
مشعل:ليش تبجين احد مسويلج شي عشان اطقه
حرني في بروده وشلون يكلمني جني ام خمس اسنين
رهام:انت ماتستحي شلون تبوسني يااا
قاطعني وهو يضحك
مشعل:زعلانه عشان بوسه على خدج هذا "وبسرعه"هذي وحده ثانيه على الخد الثاني عشان مايزعل
نحشت بسرعه وطلعت برا الغرفه وهو منفجر من الضحك,كنت خايفه حد الفزع تفكيري طول الحفله مشتت حسيت اني سويت جرم فضيع0

مر اسبوع على السالفه وكنت مشوشه ولكن ظل فيني شعور لمتنان اللي كنت خايفه حتى بيني وبين نفسي اطلعه .اعترف اني ممتنه لمشعل بغض انظر عن قصده من اللي سواه ,هو اول من انتبه لي ولانوثتي ,يمكن قصده قبله لبنت صغيره بس انا متاكده ان القبله الثانيه كانت على خلاف الاولى شعور جميل اتحسه كل بنت لما تشعر بهتمام الجنس الثاني لها .

وفي جمعه من جمعتنا دار حديث بين البنات بخصوص مشعل
مريم: انا كلمتها وقالتلي بعضمت لسانها انها تكلم مشعل
ساره: هذي دايم سوالف مشعل اخوي
مريم: ساره اسمحلي اخوج ماخلا احد
منيره: لايكون قلتي للبنت انه ولد عمج
مريم: ليش مجنونه قلت انه رفيج اخوي
فاطمه: وشسم سعيدة الحظ يحظي هههههه
مريم: مها
ساره: عاد اتصدقون في شي متغير في مشعل
ريم: شنو؟؟؟ تاب يعني
ههههههه الكل ضحك لانه من سابع المستحلات بنسبه لشخصيته اللي نعرفها
ساره: لا صدق الولد متغير اول كنت اعرف اسم البنات اللي يكلمهم من تلفونه او يكتب فيهم شعر بس هذي المره كاتب بس حرف
منيره:أي حرف ؟؟؟
ساره : r
فاطمه: مالت عليج من اليوم تقولين متغير ومتغير وآخرتها يكتب حرف ,بل عقل ياذكيه اكيد الاسم ريم او رحاب او رهام هههههه
الكل ضحك بس انا فزيت مثل الملسوعه
رهام: ليش اسمي مافي غيري
مريم: ليش زعلانه قلنا اسم ريم بعد وفاطمه اتغشمر
رهام: مااحب الغشمره الثقيله هذي
منيره: رهام لاتسيرين حساسه كلنا كنا نتغشمر
حسيت بالحراج واحس اني لفت انظارهم لردة فعلي وبدون اراده مني بكيت وبررت الموقف
رهام: دايم فاطمه تحرجني وتحرش فيني
فاطمه : حقج على راسي بس لاتبكين"وباست راسي"
غيروا الموضوع بس حسيت اني جاهل بتصرفي اللي سويته وحسيت بخنقه فرحت دار جدتي.

وصلنا الشقه وكانت روعه ونظيفه ومرتبه .. كل شي كان فيها,عباره عن ثلاث غرف ,مطبخ,صاله,حمامين "وانتو بكرامه" اثاث غايه بالبساطه
ميل للمدرن ومثل ماقال مشعل باب شقته على باب شقتنا0
دخلنا الشقه ورحت مع ابوي غرفته ورتبت ملابسه وطلعت له ملابس نظيفه وفوطه ودش يسبح
طلعت ولقيت عمي ومشعل بصاله
عمي:رهام حبيبتي سولنا جاي(شاي)
مشعل :تلقين في المطبخ كل شي
دشيت المطبخ وسويت لهم جاي وطلعت
عمي لمشعل:باجر الصبح لاتاخر بالقومه
مشعل:اوكي.. بس انت خلك جاهز
.. بعد ماحطيت الشاي ..
رهام:عمي وين جنطتك؟؟
عمي: ليش؟؟؟
رهام:برتب اغراظك وطلع لك ملابس نظيفه
عمي:احد قالج اني شايب مثل ابوج
رهام:ههههه لا بس ابي اريحك
عمي:لاتريحيني ولا شي روحي نامي ورتاحي
مشعل:خلاص رهام خليه سويتي اللي عليج
رهام:وانت مشعل ماتبي شي
.. مشعل طالعني بنظره خبث..
عمي:اش يبي بعد؟؟؟ احنا بضيوفه مو هو
مشعل مع بتسامه رقيقه:مشكوره رهام ماتقصرين

ماقدرت مارد البتسامه ببتسامه ونظره بنظره,راح مشعل شقته ودشيت غرفتي كنت تعبانه حدي ماصدقت اخذ شور ونمت على طول,وكانت نومه عميقه ماقمت منها الا على صوت جرس الباب,فزيت من فراشي وطالعت الساعه وكانت8,00 قمت بسرعه وطليت على الصاله مالقيت احد رحت غرفت ابوي لقيته نايم,وصوت الجرس مستمر رحت صوب الباب
رهام:منو؟؟؟؟؟
مشعل:رهام انا مشعل بطلي
رهام:ليش وين عمي حمد؟؟؟؟
مشعل:انا وياه في السياره قومي عمي وجيبي الاوراق الطبيه وانزلو
رهام:اوكي روح وحنا بننزل وراك
قومت ابوي ولبست وجبت كل الاوراق الخاصه بحالة ابوي,وقعدت انطر ابوي يخلص,كنت لابسه بنطلون جنز فوقه نفنوف زيتي لين الركبه وملفع زيتي

(عشان التوضيح ابو رهام مريض ويلزما علاج او فحوصات فراحوا عند مشعل بأمريكا طبعا عقب ما رد من الكويت رد لأمريكا مره2 )
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وبين ماكنت انطر ابوي سمعت صوت الجرس ورحت ابطله
رهام:منو؟؟
مشعل:انا بطلي
بطلت الباب
مشعل:صباح الخير انشالله نمتوا عدل
رهام:صباح النور نمت نومت المرهق
مشعل:اسم الله عليج
حاولت اخفي احراجي وناديت ابوي
رهام:يبه عمي ينطر تحت بسرعه
مشعل:تريقتوا
رهام:لا انتوا استعجلتوا علينا
مشعل:حتى انا قمت على صوت عمي حمد ماخلاني اشرب ماي بس الحين شبعت
رهام:شلون شبعت وانت ماكليت
مشعل:هههههه رهام انتي "وسكت"
رهام:انا شنوا؟؟؟؟؟؟؟
ابوي اهني وصل ,نزلنا كلنا وركبنا السياره
عمي:مشعل ليش طولت ؟؟؟؟؟
مشعل مرتبك:لا بس مالقيتها
عمي:ها تبون اريقكم ولا بعد المستشفى
ابوي:لاااا يابن الحلال انا اذا شميت ريحه المستشفى والادويه بتنسد نفسي
مشعل:عمي انت تبي اتعذبنا
عمي:خلاص شوف مكان النتريق فيه
ودانا مشعل كفي شوب وتريقنا فيه ورحنا على طول المستشفى.. وفي المستشفى دخل مشعل مع ابوي لطبيب لقسم الفحوصات لمده ساعه ونص...

بعدين طلع مشعل بروحه
عمي:بشر يا مشعل
رهام:شنو قال الدكتور
مشعل:كل شي تمام بس يبي يخليه في المستشفى لاتمام باقي الفحوصات
رهام:شنووووو؟؟؟بس انت قلت ان ابوي بسوي فحوصات ويراجع بس
عمي:رهام لاتنفعلين لازم ابوج ينام في المستشفى ويتمم لعلاج ولا ليش متعنين وجاين
رهام بكل عصبيه والدموع على خدها: لا مشعل قول للطبيب ابوي مايقدر يقعد في المستشفى اكثر من ساعتين الله يخليكم
مشعل:رهام انا ابيج اتساعدينا على اقناع عمي والسالفه راح تاخد اكثر من اسبوع ونص وانتي عارفه انه لازم يجري هالفحوصات ..صح؟

رهام وهي تبكي: بس .... انزين بحاول اقنعه
قرب عمي وظمني ومسح ادموعي
عمي:بس يارهام انتي عاقله بارك الله فيج
رهام:بس بنام وياه
عمي : رهام...توني اقول عاقله شلون اخليج انتي مع ابوج بروحكم واذا نمتي مع ابوج يعني انا بعد بنام ونسوي عليه زحمه واحنا جايين عشان ياخذ فصل من الراحه والنقاهه مع العلاج
مشعل:والمستشفى مو بعيده تقدرين تقعدين مع عمي طول اليوم بس وقت النوم.."وتقاطعه رهام"..
رهام:خلاص وينه الحين
مشعل حس بمدى انفعال وتوتر ريهام وخوفها على ابوها ..
دخلنا على ابوي وبعد محولات خياليه في اقناعه اقتنع ورضا ينام المسكين مع كرهه لريحه المستشفيات
مر اسبوع كان قمه في الملل من الشقه لين المشتشفى ومن المستشفى لشقه وعمي كان من النوع اللي مايحب يروح مكان مايعرفه ,وكان مشعل يحاول يقنع عمي انروح أي مكان نتمشى بس كان يقول اذا طلع ابومحمد تمشينا كلنا0
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 

[دبة زمانها]

بكمل بعد ما اشوف ردودكم الحلوه والعسللل....
مع حبي واجمل تحيااتي لكم ..يا اغلى واحلى نااس../اعضااء؟! :دبة زمانها :hjy5jewf:

 

[عيون ابوها]

كملي امانه لاتطولين

 

[دبة زمانها]

كملي امانه لاتطولين

افا عليج دقايق اي دقايق ثوااني يا بعد روحي انتي والبارت عندج...نورتي..

 

[دبة زمانها]

وهذا البارت لاحلى متابعين..
7
7
7
7
وفي يوم من الايام الممله ،كالعاده قمت انا وعمي لبسنا وطلعنا ويا مشعل قاصدين المستشفى وعند باب الشقه
عمي:لحظه نسيت بوكي انطروني دقيقه وراد
مشعل:شوف احنا بنقعد نتريق بذاك المطعم وانت الحقنا
عمي:خلاص بس اطلبولي وياكم
مشعل:ابشر
اول ما غاب عمي عن عيونا
مشعل:مشينا
مشيت وراه وكان يمشي بسرعه وانا امشي شوي اشوي
مسك ايدي وقال: بسرعه
حسيت بكهربه فظيعه .. وتوتر كبييير .. شلون مسك ايدي؟؟!! .. امبيه مايخاف ؟ انا مو قاعده اتحرك .. هو اللي قاعد يحركني
.. وعبرنا الشارع عشان نوصل الكفيه ,بس ..؟! مشعل لف لاتجاه غير اتجاه الكفي اللي اشر عليه,هديت ادي من ايده و وقفت
رهام:مشعل وين رايح انت قلت هذا الكفيه؟؟
مشعل:تذكرت ان اكلهم فاشل بس في واحد الصوب الثاني احلى وشيف مسلم!!
رهام:وعمي...
مشعل: بدق عليه بس انتي بسرعه
استغربت اصراره على السرعه بس قلت يمكن عشان مانتاخر على ابوي
بمسك ايدي مره ثانيه بس كانت غير بدا يضغط عليها بقوه بعدين يرخي ,حسيت ان بعدنا اكثر لدرجت اني ماشوف عمارتنا,وقفت
رهام:مشعل لو سمحت ممكن اتقول وين المطعم اللي تقصده
وقف وعقد حواجبه وقال:انتي مازهــقــتــي ماطقــتـج الغلقه على هذي الحكره,صارلي اسبوع اقنع عمي امشيج وانتي ماحاولتي اتبينين انج زهقانه
رهام:مشعل انا مو جايه اتمشى واضن انت عارف هالشي .. صح ؟!
مشعل:اوكي انا وياج انتي جايه مع عمي لانه تعبان وكل يوم تروحين تقعدين اقباله التسولفين لين ينام ولما ينام الظهر تقرين مجله لما يقوم في هالوقت عمي مو محتاج لج لانه نايم مافكرتي حتى تاخذين لو فره في المستشفى
رهام:احد اشتكا لك
مسك ايدي وقال:لا بس احب اسوي الخير
سحبت ايدي وقلت: لو سمحت ردني
مشعل:تبين اتردين ردي بروحج
رهام:لا والله
مشعل:رهام خلج واقعيه الحين انا وياج انحشنا من عمي والحين معصب يدور علينا تبين تنزفين على شي يوى ولا تنزفين لانج مشيتي خطوتين
طالعته بنظرت اشمأزاز ,بس مسك ايدي ومشاني
مشعل:خليني اوريج اماكن بروعه في احلى ولايه في امريكا
رهام:شوف انا بتمشا وياك بس مو معناه اني رضيت لا لانه ضايق خلقي ودي اشوف الاماكن اللي اهني
مشعل:وانا هذا قصدي وشي ثاني.........
رهام:شنو؟؟
سكت...
رهام:شنو الشي الثاني؟؟
مشعل يحاول يغير الموضوع: في بحيره روعه تبين اتشوفنها
رهام:صج مشعل
مشعل:وغلاج عندي
وضغط على ايدي...
مشعل:ليش ايدج بارده مع ان الجو رطب؟؟
مارديت عليه....
وكمل:تخيلي حياتي في هذا المكان شنو تعتقدين...؟؟
رهام:اكيد مستانس....!!
مشعل:بالعكس اعد ليام عشان ارد الكويت..!!!!؟
رهام:غريب.....!
مشعل: ليش غريب من الطبيعي ان الانسان يحن لديرته وهله..!؟
رهام: بس الانسان اللي مو نفس شخصيتك؟؟
مشعل:شنو تعرفين عن شخصيتي؟؟
رهام:بدون زعل ؟؟؟؟!
مشعل :بدون زعل!!
رهام:انك مثلا مغازلجي وعيار؟؟!!!
مشعل:هذي صورتي عندج؟؟!!
رهام:هذا اللي سمعته..!!
وقف وماحسيت الا وحنا بحديقه اتجنن
مشعل: وانتي ماتعرفين انه من الظلم انك تحكم على الواحد من شي سمعته ماشفته..؟؟!!
رهام:انا مالي الا الظاهر واللي ينقال ..
وكملنا مشي
مشعل:والله يا رهام بربي اللي مااحلف فيه كذب اني مازلت على اللي اسويه ..اغلب الشباب منهم عيال عمي وعمامي نفسهم
رهام:ليش تحلفلي انا مالي شغل احلف لناس..؟؟!!
وقف وهد ايدي

مشعل: انا عرفت بنات وكلمت بنات ما انكر بس بعمري والله شاهد مامسكت ايد بنت مثل مامسكت ايدج..
قلبي صار ادق بسرعه وايدي قامت اتعرق وحسيت اني ابي ارد وبس...!!
سكتنا وكملنا الطريج وافكار وجمل تدور في بالي ابي اقولها بس فذيك اللحظه فقدت قدرتي في الحوار والرد ,وسلمت الحديث لمشعل دون مقاومه...
مشعل: رهام انا ماصدقت تجي فرصه اقدر اكلمج فيها عن بنفسي وكنت متاكد من نظراتج انج ماخذه فكره عني مثل غيرج
...وانا ساكته ...
مشعل: رهام فكري بواقعيه ادري في بالج اني اقول هذا الكلام لاني متعود اقوله,انا صدق كنت انطر فرصه وكنت مبجهز الكلام اللي بقوله بس والله كله تبخر.. وووومادري بس يا ليت اتكونين فاهمه
رهام في برود: هههه والله مو قادره افهم كلمه
وقف وبنفعال..
مشعل:مافهمتي؟؟؟
رهام:أي...؟؟!!
طلعت في عيونه لقيت الدمع مغرقها وايده اللي مسكني فيها ترجف حسيت كاني قدام طفل ثاير ينطر أي كلمه عشان ينفجر بالبجي..
مشعل:رهام .........انا بغيت........بقول.......انتي.......انا
رهام:مشعل تره اتخوفني...؟؟!
مشعل:رهام يمكن..........او اكيد,,,,,,,,,, بس ........انا احبج والله احبج
كان موقف رهيب هز كل كياني وحسيت اني بردانه وسحبت ايدي وحاولت امشي واعطيه ظهري بس مسك ايدي
مشعل:رهام الله يخليج اسمعيني للاخر وراضي لاتردين بس اسمعي...
وانا احول اسحب ادي ومااشوفه: مشعل تاخرنا على عمي لو سمحت...
مشعل: رهام انتي غيرتي حياتي من ذيك المره اللي شفتج بغرفة امي وانتي بخيالي مع انج كنتي صغيره بس عجزت اشيلج من بالي حبيت الطهاره فيج حسيت بشي فيج يميزج عن الباقي ,رهام اشوف فيج بكره وشوف بعيونج دنيا حلوه ,رهام والله يشهد على كلامي من ثلاث اسنين وانا مخلي كل الخرابيط اللي تسمعونها ومقابل دراستي وافكر كيف صرتي لين شفتج في المطار,ماكنت ادري انج بتجين وبين ماكنت ادور على عمامي شفت عيون اعرفها سوادها ماكانت غريب اعرف هذا الوجه هذي رهام البنت الصغيره لا صارت انضج من اني اقولها الصغيره,رهام لو بقول كل اللي بقلبي اخاف اطيح من طولي..
وسكتنا ومسك ايدي وكملنا مشينا بصمت لين..
مشعل :رهام فكري شنو بنقول العمي حمد
رهام:مالي شغل
مشعل:لا والله لو لا حبج ما نحشت فيج
محاول اني اغير الموضوع
رهام: وين البحيره؟؟؟؟؟؟؟
مشعل:أي بحيره؟؟آه تذكرت
وقفنا عند عربة ايسكريم وسالني شنو ابي وخذنا ثنين ايسكريم وماي
مشعل:شنو كنا نقول؟؟؟؟
رهام: البحيره
مشعل: طيب شنو تعريف البحيره؟؟
رهام: اشفيه اللي صار فجأه مدرس جغرافيه ههههههه
مشعل:هههههه
وقف تحت شجره وحفر برجله حفره صغيره وصب فيها الماي
مشعل:البحيره عباره عن بقعه من الماء تحيط بها اليابسه من كل جانب...
رهام:والله اش هالاسكتشاف؟؟؟
مشعل:هذي البحيره شرايج مو حلوه..؟؟
رهام:هههههه ههههههه يا عبيط
مشعل: الله قوليها بعد طلعه منج كنها انت حلو او انت بطل..!!
رهام: هههههه لا انت عبيط ويا استاذ عبيط فكر اش نبنقول لعمي يا حظي
مشعل: صج انا حظج؟؟
رهام : مشعل فكر وبس..
مشعل:عندي فكره حلوه
رهام:شنو؟؟؟؟؟؟؟؟
مشعل:اقول ان احنا قعدنا ننطره بعدين انا رحت ادق تلفون على واحد من الربع وردينا مكاننا وماجيت وردينا بالشقه مالقيناك وقعدنا ماجيت فطرينا النروح المستشفه
رهام:وعمي جاهل بصدق هذي القصه
مشعل:لايصدق اشراح يسوي بزفني بمصخرني فدوه لعيونج...
وقف تكسي ورحنا المستشفه وطول الطريق وهو يطالعني من فوق لتحت كنه اول مره يشوفني,وانا افكر في الزف باللي ينطرنا وميته من الخوف
ـــــــــــــــــــــــــــــــــــــــــــــــــــــــــــــــــــــــــــــــــــــ
واول ما وصلنا لقينا عمي ينطرنا عند ابوي ومعصب حده
عمي:شرفت يا اخ مشعل
مشعل:وينك ساعه اندور عليك
عمي:وين كنتوا انت صاحي ولا مجنون قلت بتقعد انت والهانم في الكفيه مايمديني اصعد وانزل الا ونتم مختفين
مشعل:قعدنا في الكفيه وطلبت ورحت ادق تلفون على رفيقي
عمي:تعال وين تلفونك كل ماادق ماترد ليه
مشعل: هذا السبب اللي خلاني ادق على رفيقي لاني ناسي تلفوني عنده
ابوي: حمد يمكن الولد كان يخالفك يعني لما كنت في الشقه كان بالكفيه وبلعكس
استمر النقاش داير بينهم مشعل"يشلخ"يكذب وعمي طايح فيه زف 0
من ذاك الموقف وعمي مايخليني مع مشعل ثانيه وحده,الله يهداه كان صاك صكه مو طبيعيه,ومر الايام ومابيني وبين مشعل غير نظرات ,ونظرات كانت سرقه من ورا عمي ,وبعد ماخلص كورس العلاج ,الحمد لله كانت صحت ابوي ممتازه وتدعي للفرح...

وجاء موعد رجوعنا للكويت ديرتي الغاليه اللي مهما بعدنا عنها الشوق يرجعنا
والوحيد اللي كان متضايق مشعل وكان مبين على وجهه
عمي:خلصتي يا رهام
رهام: كل شي جاهز
ابوي:انا بنطركم تحت
مشعل:وين لجناط
عمي:رهام يلا يا يبه
رهام:كاني خلصت
وكنت كاشخه ومتمكيجه ولابسه عدسات و لابسه عبايتي وملفعي لبستي الكويتيه
,لاني كنت صدق مستانسه ان ابوي بخير وبرد لهلنا0

عمي:الله يا رهام اش هالكشخه؟؟
رهام: اكيد بكشخ مو برد لكويت..!!؟؟
مشعل وهو يطالعني بنظرات حزن: ياليت اقدر ارد وياكم
عمي: تشطر وخلص وانا اسويلك ذاك العشا اللي كل يتكلم عنه
مشعل:مليت
عمي:هاك يا دكتور مشعل شيل لجناط
لف عمي صوب المرايه يعدل نفسه,وطلعني مشعل واشر اشاره بمعنى "هذي
جنطتج"ورديت عليه بنفس الطريقه معناها "أي"
وطلعنا كلنا وركبنا السياره وكنت طول الوقت افكر ليش سأل عن الجنطه
ولما وصلنا المطار
بعد الضم والعناق,مشعل تاثر حيل
ابوي يضم مشعل :مشعل مايصير اللي تسويه انت رجال..!!
مشعل:الغربه شينه يا عمي..؟؟
عمي: بكره ترجع وجيب ذيك الشهاده اللي ترفع الراس وان جبتها وعد ازوجك..
مشعل:ابشر ياعمي بس لا تنسون سلموا على ابوي وعمامي وعيال عمي كلهم
ابوي: المهم انت دير بالك على نفسك..
مشعل:انشالله,رهام سلمي على امي وخواتي..
رهام: يوصل..
ودعته وانا قلبي يتقطع عليه ماتوقعت ان مشعل المستهتر يكون بهذا القدر من الحساسيه ويكون قلبه رهيف لهذي الدرجه,صدق المثل اللي يقول اللي مايعرفك مايثمنك ,وبفترتي القصيره اللي قعدتها مع مشعل اكتشفت ان الكلام اللي كان يقوله سعد زوج منيره "ان عيب مشعل الوحيد انه على نياته وسبب السمعه اللي ماخذها انه يشوف اللي حواليه بعين وحده وهي عين الطيبه ونيه الحسنه"ماكنا نصدق كلام سعد عن مشعل بس عقب ماعرفته اقتنعت 50% انه مظلوم بس اصابني الشك احياناً0 كانت الرحلة طويلة وقضيتها بالتفكير بمشعل وشخصيته وسبب سؤاله عن الجنطة ,أول ماوصلنا استقبلنا الكل بدموع الفرح والورد وكنت مشتاقه لآمي حيل وظليت ضامتها لين رحت أنام بغرفتي أول مادخلت غرفتي طحت على فراشي وضميته وبين ماانا مسترخيه تذكرت سؤال مشعل والجنطة,فزيت على طول وبطلت الجنطة ,وكان في جيبها البراني ورقه , ايدي كانت ترجف بطلتها وقريتها وكان نصها كتالي :
"حبيبتي:رهام
وسامحيني على كلمت حبيبتي اللي ماعمري نطقتها لحد بصدق مثلج,لانج فعلاحبيبتي,ولا احد غيرج حبيبي ,كنت ابي اودعج وداع الاحبه بس فشلت كل ماحولاتي لان كان عمي حمد بالمرصاد,فمالقيت غير اني اكتبلج ويمكن قلبج يحن ويرحم حالي وتغير فكرتج عني.وسبب الرساله مو بس وداع ابي اقولج خططي المستقبليه بس قبل مااقول الخطط ابي اقول شي:

مدري القصايد فيك وش يمكن تكون؟؟؟
لاصرت صفحه مالها بالغلااا طي
مابيك تسأل كيف اتنا اغليك وشلون؟؟؟؟
الغلااااا كله فيك انا اشوفه شـوي
بس يكفي اشوفك كل شي بها لكون
وشوف كل الكون دونك ولا شي

وهذي الابيات جات تشرح مافي القلب .وانا ادري بحالي وانتي تقرين الرساله بكون مثل اليتيم.بس بمنن قلبي بمخططاتي المستقبليه,اول ما ايي لكويت راح اطلبج من عمي ,واتمنى يكون حكمج وردج رحيم فيني ,واذا كان ربي راح يبتليني ويعذبني في دنيتي بيكون رفضج لي ,لاتقولين اني ستعجلت بقراري لاني اول مره اخذ قرار سليم بحياتي والحب يارهام صعب نقيده بقيود الوقت والزمان لانه طبيعته متهور مايعترف بالوقت ولا الظروف واخر كلامي شي هز كياني لما اكتشفته"مستحبل اعيش من دونك"
مشعل
انا راد

قريت لورقه فوق العشر مرات في كل مره اضمها لصدري واضحك وقول ,مشعل احبك اكيد احبك متى بترجع متى؟؟؟
كنت مستانسه على الرساله وطايره من الفرحه ,لين دخل ذاك الهاجس اللي خرب علي فرحتي,ردت فعل خواتي وامي اكيد بيرفضون حسب رايهم اللي سبق ذكره عن مشعل واللي انا كنت معاهم فيه,تحول شوقي لردت مشعل الى خوف وقلق,كنت مااقدر انام الليل من التفكير بس بدون فايده,وبالآخر سلمت نفسي لقدر يحكم بلي يبي0
ـــــــــــــــــــــــــــــــــــــــــــــــــــــــــــــــــــــــــــــــــــــ
يالله انتظر ردودكم .. وانشالله تكوون الروايه اوكي وحلوه...وسامححوني اذا كان في تأخير او شي مو عاجبكم..مع حبي:دبة زمانها

 

[اخت-اخوها]

كملي عاد لا تعلقينا

 

[dlo3t^baba]

واااااااااااااااي حدي اندمجت بلييييييييييييز كمليها
ومشكووووووره ^_^

 

[.:!:. ونس .:!:.]

كملي
ناطرينج

 

[ضحكه قمر]

شكرا على القصه الحلوه وتتظر التكمله ان شاء الله
اختك ضحكه قمر

 

[qema87]

kamlaaaaaaaaaay plzzzzz endmjt

 

[n00ni]

كملي حبيبتي

 

[دبة زمانها]

كملي عاد لا تعلقينا

لا انشالله ما اعلكم وراح انزل البارتات بعد شوي وحيااج نوريتي..

 

[دبة زمانها]

واااااااااااااااي حدي اندمجت بلييييييييييييز كمليها
ومشكووووووره ^_^

انشالله الحين اكملها وحيااج ... نورتي الروايه اب نورج..