الكافيه في مجمع امنية
نفس المجمع الي فيه فندق ايبيس
بالسالمية شارع سالم المبارك
مقابل ليلى غاليري
كنت ناوية اروحه يوم الاثنين عاد تصدقون ؟ بروح استطلع اشوف الوضع
صايره احب اقرا بكافيهات
و ذاك اليوم فازعه من 6 و نص الصبح جان البس و اروح ستاربكس مشرف " مادري ليش مع اني مقاطعه ستاربكس ...!.!.!.! "
و ما عجبتني قعدتهم كلش مو مالت قراءة بصراحة مع انه اعرف وايد ناس يروحون يقرون هناك ..ناس معانا برابطة الادباء و جم واحد من الجريدة كان قايلي عنه انه مكانهم كبير و شرح و جذي ..
بس ما يه في بالي انه الناس هذوله شبااااااب مو بنات فعادي عندهم الوضع يقعدون يمدون ريلهم عالطاولة او الكرسي الي جدامهم فياخذون راحتهم ..
فالقعده مو حلوة حق بناااااااااات ! ستاربكس مشرررف مو مال قراية بناااات !
اهو حلو حق قعده لانه صج شرررح و كبير
و مادري الصبح حسيته ازعاج ! يعني وايد طلبه قاعدين يدرسون الظاهر مالوت الكلية الاسترالية و جامعة الخليج لانهم في مشرف ، و بعدين عالساعه 9 من طلعو الطلبة من امتحانات متوسط و ثانوي لقيتهم يو الكافيه و صار لويه حده !
المكاااان الي اعتبره حلو و مناااااسب حق قراية بنات
ذا كوفي بين آند تي ليف ، الي جبال الديوان الاميري ...
معزووووووووووول و مافيه قطوووووووووو
و كذلك ... كافيه سوبريم المنطقة الحرة " بس اتوقع رح يصير زحمه ذيك الايام ماكان زحمه عشان توه فاتحينه و محد كان يدري عنه "
و هم بعد عندكم ستاربكس سلوى فاضي ..
وووووووووووو .. ساعات يطق ببالي اروح عند البحر اصفط و شوي اسدح الكشن " شوي مو حيل " .. اسكر البيبان و ابطل الفتحه الي فوق اذا الجو حلو .. و اقعد اقرا
و اشغل قناة 92.5 ! وايد حلوة كلها موسيقى هااااادية .. انصحكم تسمعونها والله بنات تريح الاعصااااااب
احسن من مارينا اف ام المزعجه
ياربي القناة كل مالها و تصير اتفه و اتفه و اتفه
ليش جذي
لا اغاني سنعه .. لا برامج حلوة ... كله تمصخر و مواضيع فاضية و ازعاج
و 103.7 خووو هذي دنيا بروحها استغفر الله العظيم
و البرنامج العام صراحة احب اسمعه بس مو كل وقت
احب مسلسلاتهم الي يحطونها عجيييييييييبه ، و هم بعد احب نجوم على القمة ، و نافذة على التاريخ " خووووووووش برنامج عجيب " ، و احب عند جهينة الخبر اليقين
))))
يعني انا راديو سيارتي الى حد ما الي يركب معاي تلوع جبده !
يا بحطله البرنامج العام اسمعه مسلسل اذاعي ..
او احطله bbc arabic اسمع اخبار ..
او موسيقى هاديه
و اذا فاصله حدي رح اشغل سي دي كله اغاني نقازية عبيطة !!!!!!!!!!!!! طبعا لا تسألوني شنو هالاغاني لانه فشله ... رح يبين لكم شكثر ذوقي هابط
و مابي اطيح من عينكم بصراحة
بس يكفي اني اقولكم فيه اغنية انكسرت الشيشه ..و على هذا المنوال يعني !
