حيــــــاكم الله
حرام تحرمني من الصوت والشوف
وحرام تذبحني بزهرة شبابي
وحرام تقطف وردة الحب بسيوف
وحرام تهجرني وتطير صوابي
لا تبتعد عني ترى القلب مخطوف
ما بقى الا الجسم داخل ثيابي
::
هلت دموع العين عند الوداع
وارسلت دموعها شوق وحنين
قال ودع ما يفيد الامتناع
الشقي مقسوم مير الله يعين
يا حسايف وقتنا والعمر ضاع
نجتمع يومين والفرقا سنين
::
يا صاحبي عسى ربي يخليك
ارفق بقلبي وارحمه يا حياتي
ارحم غريق في غرامك يراعيك
بعدك عذاب وشوف زولك غناتي
بين العرب لساني دوم يطريك
وماظن ينسى من يسوي سواتي
متعلق قلبي يودك ويغليك
وعسى غلاكم ما يسبب وفاتي
::
شخصن تتلاشى صورته
بعد فرقاه
وشخصن تموت بصورته
مانسيته
وشخصن تباشر بالمطر
يوم تلقاه
ولو في يدك تعطيه عمرك
عطيته
::
لو ضاقت الدنيا على
راعي الطيب
يبقى شذى طيبه على
الناس طايب
للغيم في صدر الثرى
صوت ترحيب
والطيب هو فعلك
يا راعي النجايب
وفي كل يوم تشرق الشمس
وتغيب
وتبقى انت الحاضر
والكل غايب
::
اشياء كثيرة ما تخليني
انساك
اعيشها واطرد بقايا
سرابك
لك ذكريات باقية
لو فقدناك
صوتك وضحكاتك
وكلمة هلا بك
حتى المكان اللي شهد
يوم لقياك
للحين يبكي من سبايب
غيابك
::
اخطيت في البعد
كيف اخطيت
اخطيت يا قرة اعياني
افرض ولو كنت انا زليت
تبعد وتصبح علي جاني
يا غاية القلب ما حسيت
ما شفت همي واحزاني
ما شفت حالي كيف امسيت
ما شفت دمعي على اوجاني
::
يا سيدي بالحب والحب
سيدك
يا بعد من حبيت روحي
تناديك
لو ابتعدت سنين شوقي
يعيدك
مرساك قلب كل ما به
شواطيك
يا ليتني بسمة فرح
تضمني بيدك
وعيني تباريك
مهما نقصك الشوق
روحي تزيدك
ومهما ضما قلبك من الحب
برويك
::
اكيد تدري صوتك العذب
لاغاب
احس نفسي تنكسر
من غيابه
كذا غيابك للحزن يفتح
ابواب
غصبن علي البس شقاه
وثيابه
حبيت صوتك وان تثيقلت
كذاب
من يعشقك لا غبت يفقد
صوابه
::
كلما اسمع كيف حالك
ينقبض جفني على دمعة
تقول الحال دمع ومهزله
وابلع العبرة واقول
بخير والهم انجلى
وآخر الهرج اتلعثم فيه
وانفض اوله
ليش غبت وانته اللي غيرك
ما ملى عيني الا همس صوتك
في زمان البلبله
::
قالوا حبيبك يقرا الشعر
قلت ايه
يقراه بعيوني قبل
تسمعونه
لولاه حتى طاري الشعر
مابيه
لكن كتبته لاجل خاطر
عيونه
اكتب لغيره والقصايد
تجي فيه
كن القصايد حالفه
ما تخونه
::
لمت نفسي ولامني وقتي
معاك
اشتكي من هم وابكي
من الم
يا خطاي اللي توافق
مع خطاك
لا سلم حبي ولا حبك
سلم
انت اعز الناس ما تجهل
غلاك
معتقد هالحب ياتي
من عدم
كل ما مروا علي هذا
وذاك
كلهم لا شي وانت بس
المهم
::
ابعرف يابحرذنبي.....
وش اللي بس سويته
أنالاعمري جرحت إنسان
ولاعمري بكيته
ابسكت يابحروأمشي
وأخلي ضيقتي فيني
أبسكت وابتعد عنك
وادور من يواسيني
تصدق يابحر إني
توقعتك تشيل الهم..
ولكني انصدمت انك
غرقت بدمعة من عيني
::
لاتسألوني وش جرى في حياتي ..
خلوا همومي بالحشا مستقره...
الصمت ثوبي والمواجع عباتي...
والحزن كله وسط قلبي مقره..
لو أستعين بواقعي وذكرياتي..
أحيا وأموت بالثانيه ألف مره..
همي تجمع من جميع الجهات تجاوز
(((حدود الفلك والمجره)))
::
ودي ولكن كيف تحقيق "" ودي""
عيا زماني لايجيلي على"" الكيف""
وفصلت من خام الشقا ثوب ""قدي""
وكسيت نفسي بالمنا ""والتحاسيف""
ياما تمنيت الدقايق ""تهدي""
وياما تمنيت الشتاء ينقلب""صيف""
::
أسألوا الآهات إش كثر أشتكت!!
أسألوا الدمعات كم مره نزفت!!!
أسألوا عيوني كم مره بكت!!!!
أسألوا شفاتي آخر مره ضحكت!!!
أسألوا السعاده ليه ودعتني واختفت!!!
أسألأوا الأحزان ليش هامت فيني وسكنت!!!
اسألوا الأيام ليش طعنتني وجرحت
::
أميل للعزله وابعد عن الناس
مابي عيون الناس تنظر لحالي
قلبي من الحزن تايه منحاس
وعيني تهل الدمع ياعزتالي
جو السعاده تبدل بالأنفاس
من يوم ماجابتك لي الليالي
اذرف دموع الحزن واقول لاباس
ومن القهر تصفق يميني شمالي
::
الليل طال ولابد النور باإشراق
(( والعمر كله ماضياً بجروح وحروق))
واليوم مالي غير قسام الارزاق
فيه الرجاء فضله على كل مخلوق
له ابتهل وادعيه والدمع دفاق
وثوب الصبر من خطوة اليأس مشقوق
::
وين إنت يامبعد عن القلب همه
ليتك ترد بالصوت لاقلت وينك
