نكمل الجزء الثالث من رحلتي في تحويل مسار حياتي نبدأ بسم الله الرحمن الرحيم.
وصلت دور العمليات بسرير العمليات بعدها ياني الدكتور خالد يشوفني ويطمنيي ويشوف معداتي كامله بعد ساعه الا ربع دخلوني غرفه العمليات اخذت كمام البنج وماادري الا عقبها تقعدني الممرضه على الساعه2 الظهر وقعدت على ألم فضيع في بطني من البربيش ومكان العمليه تاكدوا اني بخير وكل شي تمام أخذوني جناح الجراحه الجناح الثاني في الدور الثالث .
ظليت ساعتين ما اقدر ابطل عيوني وأحس الدنيا تدور فيني :tongue22:ماحسيت الا الدكتور طلال دشتي يحرك السرير لي فوق ويطقطق ظهري يعني يسويلي مساج هههههههه كيك بوكسينج ويزفني انتي ليش نايمه يلا قومي امشي بسرعه يلا بدون دلع قلتله اليش قالي عشان مايصير فيج تخثر بالدم وعشان تحركين الدروه الدمويه مشيت بالجناح مره وحده وماقدرت دخت ورديت نمت .
على الساعه 6 المغرب دخل الدكتور خالد العنزي مع قروب الدكاتره وقالي انتي ليش نايمه قومي امشي قلتله ما اقدر دايخه يقولي لا ببجي الحين تكفين لاتخلين دموعي تنزل هههههه دكتوري دمه خفيف المهم عطاني شي انفخ فيه عشان يطلع البلغم مال البنج لانه اذا ظل راح ينزل على الرئه ويسبب ارتفاع حراره وهذي صوره الشيشه :016:
وبعد في شي ثاني طلعت معاه من العمليه اللي اهوا البربيش من مكان المعده عشان تطلع الدم الفاسد ووصخ العمليه وانتو بكرامه
مكانه يعور شوي مو وايد .حبيت اقولكم انه أول يوم من العمليه في تعب والم ولكن مع المسكنات يروح الالم بعد يومين من العمليه بديت اتحرك مع قليل من الالم ولكن لما امشي واتحرك يخف العوار وايد طبعا الممرضات لازم يمرون كل ساعتين علي يتاكدون من الدرب غير ابره السيوله اللي كل يوم لازم اخذها ومكانها يعور حيل لما يمشي الدوا :eh_s(2):غير انهم يسحبون دم كل يوم صبح عشان يشوفون نسبه الدم يعني بالكويتي صرت مشخال .
اليوم الثالث من العمليه بدى الوضع يصير طبيعي في القومه والقعده وعطاني الدكتور ماء ملون عشان يشوفون في تسريب والا لا من مكان البربيش وهذا لون الماي احسه جنه صابون لولو والا ديتول زقاصين علي فيه بس مافيه طعم عادي طعمه ماي بس ياربي مااستسغته نفسية
وبنفس اليوم مرتني أخصائية التغذية حنان رقدان وعطتني نظام الأكل اللي لازم اتبعه من الاسبوع الاول وهو بس سوائل شفافه مثل عصايرتفاح الاناناس والرمات والتوت والعنب شوربة دجاج او خضار صافيه لمده 3 اسابيع تقريبا طبعا شاي وقهوه وحليب وعصير برتقال ومشروبات غازيه ممنوعه بتاتا وعطتني موعد عشان اراجعها في السرداب بالمستشفى الامير عياده التغذية نسيت اقولكم شي عطتني بروتين علبه مثل الحليب قالتلي اضيفه على ربع كوب عصاير او شوربة باليوم 8 مرات لاني مو قاعده اكل بروتينات, غير الماي اللي لازم اشربة على طول ويكون بطل الماي معاي بالجنطه بكل مكان.
عقب ماخلصت وشربت الماي الاخضر عطوني عصير تفاح ربع كوب مع شوربة دياي(شوربه هوا مثل شوربه النفاس) شربت العصير وحسيت اني ماكله جدر مجبوس دياي.
بعد ماتم التاكد انه كل شي ماشي تمام:rerrerek: وبعد 6أيام و5 ليال وقع دكتوري على ورقه الخروج وعطاني طبيه لمده اسبوعين اقدر اجددها لمده اسبوعين غير ورقه موعد للدكتور ووصفه فيتامينات اللي لازم اخذها .
باجي شي واحد بس البربيش شاله لي الدكتور علي الصفار وكان سهالات ألم بسيط وراح ورجعت بيتنا سالمه غانمه وانشاالله الاسبوع الياي ببدي امشي لانه الدكتور وصاني بالمشي .وأي استفسار أنا حاضرة:eh_s(21):
