اذا كنتوا من متابعين اخبار و خبيرات التجميل اكيد راح تكونون سمعتوا عن هالاسفنجة العجيبه
عبارة عن اسفنجة تتبلل بالماي و بعدها تستخدم في توزيع الفاونديشن
طلبتها تقريبا قبل 3 اسابيع ومافكرت استخدمها الا امس لاني مو مقتنعه اني راح اانبهر فيها
لكن اللي صار العكس!
اولا علشان اكون عادلة في تقييمي قررت اني اجربها مع فاونديشن ماحبه و استخدمته مره او مرتين و ماعجبني و صارلي جم شهر ما استخدمه
ليش؟ لان حسيت ان مالها معنى اذا استخدمتها مع فاونديشن انا احب شكله علي و ممكن احصل معاه نتيجه حلوه بالفرشة او لما اوزعه بأصابعي
و هم لاني أميل للفاونديشن اللي تغطيته خفيفه الى متوسطه و ماحب مظهر الفاونديشن الثقيل على ويهي
قررت استخدمها مع الفاونديشن الثقيل اللي تكلمت عنه
و النتيجة؟ تغير رايي تماما بعد ما استخدمت الفاونديشن مع البيوتي بلندر
اول شي لاحظته انها خلت الفاونديشن طبيعي لدرجة اني حسيت ان ما يتميز عن بشرتي و مع هذا عطاني التغطية اللي ابيها
ثانيا لما حطيت الكونسيلر و الكونتور الكريمي و الباودر و الهايلايت الكريمي فوق الفاونديشن و طبطبت عليهم بالبيوتي بلندر كل شي اندمج مع بعضه و صار منظر طبيعي و الدمج صار بروفيشنال مع اني مو بروفيشنال و توني باديه استخدم كونتور كريمي صارلي شهر وطبعا مو يوميا لاني احس انه شي حلو حق المناسبات مو الطلعات اليوميه
باختصار البيوتر بلندر سهلت علي المهمه واايد
حتى لو تكثرين من البرونز او الكونتور او حتى البلش كل اللي عليج انج تردين تطبطبين على المنطقه بالبوتي بلندر و كل شي راح يتضبط!
بالنسبة لطريقة استخدامها شوي كانت غريبه علي بما اني متعودة على استخدام فرشة للفاونديشن و بالفرشة اوزع الفاونديشن بطريقة دائرية على الويه كله
لكن بالبيوتي بلندر المفروض تضغطين بشكل عمودي على البشرة باستخدام الاسفنجه كأنج تضغطين الفاونديشن لي داخل البشرة بطريقة الطبطبة و مو المفروض انج تمسحين فيها على البشرة نفس الفرشة
وهذا معناته ان خطوة الفاونديشن تاخذ شووي وقت اطول مع البيوتي بلندر من الفرشة او الاصابع
عاليمين شكل البيوتر بلندر قبل لا تتبلل بالماي
و عاليسار شكلها بعد 5 دقايق من تبليلها بالماي ... لازم تنطرون لما توصل حق شكلها النهائي قبل لا تبلشون في استخدامها .. و بعد ما تتنظف و تنشف راح ترد حق حجمها الطبيعي
هل راح استخدم البيوتي بلندر كل يوم؟ لأ .. لعدة أسباب..
1- مو كل يوم احتاج استخدم فاونديشن ثقيل و علشان جذي راح استخدم فرشتي المفضله حق مكياجي اليومي الخفيف
2- استخدامها ياخذ وقت أطول من الفرشة مثل ما ذكرت
3- استخدامها اليومي معناته تنظيفها بشكل يومي و الفرشة انظفها مره بالاسبوع بس
4- اللي فهمته من الرفيوز اللي قريتها عن استخدامها بشكل يومي انها بسرعه تتلف مع الغسل و الاستخدام المتكرر و يحتاجون ان يبدلونها بسرعه علشان جذي افضل الاحتفاظ فيها حق المناسبات
