3 عيال وبدون خدامة

[ام غازي الصواغ]

مرحبا بنات شلونكم؟
حبيت اكتب لكم معاناتي بعد ما ولدت
انا عندي عند 3 اسم الله عليهم ربي يحفظهم
غازي وسارة وسالم اخر العنقود سكر معقود:eh_s:
مطبعا كان عندي خدامة ووديتها المكتب / المسعدة طلعت حامل
والى الان ما حصلت خدامة،،،،تعالوا شوفوا معاناتي والتعب على اصوله
غسيل الملابس يوميا وكوي وسبوح لعيال يوميا وغير الخم والترتيب ومسح لغبار وباقي شغل البيت اللي ما يخلص
بس المشكلة الرئيسية النوووووووم كل ما انوم واحد يقعد الثاني حاولت اعدل نومهم ماكو فايدة
شسوي :bbbiu:
وكل ما انظف مكان القى عيالي موصخينة :rgewrg: وارد انظف من جديد تعبت والله الله يعين

 

[ام يارا]

الله يعيييييييييييييينج انا و حده بس موقادره

مشاءالله عليج اذا انتي متحمله

ليش ما تجربين تروحين حولي يقولون في خدم على كفاله المكتب تاخذينها على طول و لج مهله تجربين 3 ايام

عسى الله يكون بعوج يارب

 

[ام دودو المزيونه]

وضعك نفس اختي 3بنات اكبر وحده 5سنوات ونص والصغيره سنتين ونص والوسطيه اربع سنوات صارلها بدون خدامه من سنتين والحمدالله صج تتعب بس عايشه ومرات تييب وحده كانت تشتغل خدامه عندي واطلعت تشتغل بره وبكفالة ريلي فتيي حق اختي لحتاجتها تغل الحمامات وترتب معاها بس مره بالشهر
اختي يابت جم خدامه بس مالها نصيب فيهم الي حوله وشايله بنتها وتدعم بالنت الباب ووحده باقتها ووحده تتميرض لما ملت ودخلت الأتثنين الصغار حضانه والكبيره روضه والحمدالله ريلها مساعدها بس للأمانة مرات تمل وتتعب وكل غايبه من الدوام وخصم راتب لأن مرات الحضانه امسكره او موزينه او اهي تعبانه مع العيال والأكل غالبا من بره وعلي هالحال
اختي جربي مكاتب حولي الرميح وبن خلدون تلقين مسترجعات انا يبت مسترجعه من هناك اكثر من مره والحمدالله زينين وفي علي كفالة مكتب والله يعينج

 

[البندري22]

عادي حبيبتي من زين الخدامات حبيبتي انا مر علي 7 خدامات وحده كملت عندي سنتين والباجي كل وحده جم شهر اللي 7 شهور واللي 6 شهور واللي 3 واللي شهر واللي واللي


كل وحده فيها عيب وكنت اطوف الاولى حاولت تسحرني مع اني مخليتها يادهينه لاتنكتين بس شتقولين
والثانيه لسانها يلوط اذانها وتحملتها سنتين
والثالثه عيوز تلوع الجبد ووصخه
والرابعه ممثله درجه اولى تسوي نفسها طيبه واهي من وراي تطق عيالي ونفسها خايسه وشايفه روحها عالفاضي
والخامسه انحاشت وكانت راعية تلفونات تغسل والموبايل باذونها وتطبخ والموبايل باذونها وتنظف والموبايل باذونها اخر شي قلت الموبايل بس بغرفتج لما تشتغلين ما ابي اشوفه ثاني يوم انحاشت
والسادسه عينها زايغه وتحب الرياييل
والسابعه عمى بعينها تطق عيالي وديتها برمضان

انا عندي بنت وولد بنتي 3 ونص ولدي 2 ونص وبنتي هالسنه اولى روضه وانا ساكنه عند حمولتي ومرتاحه
صراحه تعقدت من الخدامات جربت كل الجنسيات

فلبينيه واندونيسيه وسيلانيه وهنديات

شقتي صغيره وسهل ترتيبها نظام ميداس وايكيا وصفاة الغانم يعني ذربه ومرتبه وكل شي مرتب عندي

وغداي حمولتي يطرشونه لي شقتي مايقصرون وعشاي انا اسويه يعني مرتاحه

والغساله فل اوتوماتيك الحمد لله مرتاحه اخذ الملابس ناشفه ونظيفه
وبشتري غساله صحون وارتاح

وللعلم انا موظفه يعني ادوام بعد لاتقولون تعب صج تعب بس قسم بالله شريت راحتي النفسيه
شقتي بس اننا وريلي وعيالي ما ابي الخدامه ويع احسها مهما بينت اننها طيبه لابد تشوفين منها الغش


وصراحه احس بسعاده وانا اشتغل ببيتي حتى زوجي احسه مستانس مع انه يقولي اكيد تبين خدامه مستحيل تستمرين جذيه بس انا اقول حتى اشعار اخر

الحمد لله بس اكره شي عندي الكوي ويع تلوع جبدي افكر اخذ خدامه نص دوام بس يوم بالاسبوع تكوي كل شي كل اسبوع

ولدي بدخله حضانه انا الحين انزله عند خالتي واهو ينام مايقعد الا الظهر

وصراحه لاشفت البيت نظيف وريحة الخلطات والبخور تفوح منه وماعندي خدامه تلوع جبدي احس براحه ماوراها راحه


قلتلج تجربتي يمكن تفيدج بشي ومع السلامه :hjy5jewf:

 

[๓ίşś зśŏłả..!]

رد : 3 عيال وبدون خدامة

الله يكون بعونج
انا عندي وحده الي اهيا بنتي عن 10 يهال << اسم الله عليها
وخدامه بعد عندي مو قادره عليها
شلون انتي 3 وبدون خدامه الله يعينج بصراحه

بس حبيبتي ليش ما تاخذين خدامه اختج او امج اذا كان ما عندها شغل وايد
على ما تطلبين خدامه

 

[آهات الليل]

رد : 3 عيال وبدون خدامة

هلا ياقلبي شلونج والله يام غازي انا عندي بنتين وال3 بعد اسبوع ولا اسبوعين ولا بعد جم يوم بتطلع وهم ماعندي خدامه والله تعب حيل بس شسوي مجبوره ظروفي ماتسمحلي حاليا اجيب خدامه
ومتحمله احاول اوفق بينهم وبين البيت وبين ابوهم والله يعطينا الاجر ويصبرنا
ايه صج سلمي على خواتج

 

[ريماا]

رد : 3 عيال وبدون خدامة

لله يعينج خلى زوجج يدورلج بالمكاتب يمكن لله يرزقج بوحدة سنعة
حتى لوماحصل يروح كل بعد جم يوم يشووف يمكن يلاقى او طلبى طلب ولله يعينج عالنطرة قزريها بالمؤقتات فى اعلان بالوسيط يوفرلج خدامة بالساعات قزرى فيهم ولله يرزقج بالسنعة ان شالله

 

[MyLittleBerry]

رد : 3 عيال وبدون خدامة

انا عندي 3 الله يخليهم

ماحب الخدم بس معوده عيالي ان يساعدوني بالتنظيف ( ام مجرمه )

علشان باجر اذا كبرو ينظفون من وراهم

 

[ام اغلى الناس]

هههههههههه لا تجيبين لي طاري النوم
صارلي يومين طبيه مو قادره انام من الحبيب ... انطر ابوه يجي من الدوام وانام لي شوي
الله يعينج
اما التوصيخ ... فيه خيمتين بينهم ممر داخلهم كور صغار .. عرفتيها؟
جيبيها و خليهم يلعبون داخلها
او داخل حباسه و فيها العابهم

 

[شانييل]

والله البيت من غير خدم جنة ما بعدها جنة
عسى ربي يغنينا عنهم بالعافية
حطيلج غسالة تغسل وتسبع وتنشف مرة وحدةوالغسيل مو كل يوم لأ مرتين بالاسبوع
وغسالة مواعين قطي فيها المواعين مرتين باليوم
وتعلميلج جم طبخة سهلة التحضير

وهمن عيالج شيلي كل الدثرة الي يعفسونها
مثل ألعاب السلة العودة خشيها وطلعي بس جم لعبة وإذا خلصوا منهم يردونهم وييبون ألعاب ثانية

والال مو كل حزة وبمكان واحد لا يوسخون البيت

وبس
راح يكون عفستهم بغرفة المعيشة باجي البيت مرتب
وعلميهم يساعدونج بالغصب مو بالطيب
والله أنا بنتي صراحة تدخل البيتزا بالمايكروويف بنفسها وتصب لها العصير بقلاسات البلاستيك مالوتهم
يعني تقوم بروحها وإهية عمرها 6 سنوات
أما الشولة منموع عليهم ولا الاشياء الحارة

والخدامات تقدرين تييبلج وحدة مغمضة سيلانية أشوة م الجنسيات الثانية تطخ لو إنها مو نظيفة
ومسترجعة لما تطيحيلج على وحدة تمشي الحال
والله الحال من بعضة والله يعينا ويعينج

 

[بنت عطا]

جربت العيشه بدون خدامه لما ماكنت أداوم أقسم بالله راحه الغسيل الغساله اتوماتيك الاوتي كانت تساعدني خدامة خالتي والتنظيف عقب الغدا امسح وأخم وهم عقب العشا عقب ماينامون عيالي والبخور على طول اهم شي تنظمين شغلج وتحطين لج جدول بكل مهمه بوقتها وجذي بترتاحين

 

[بنت عطا]

بعدين وينج يالقاطعه ؟؟؟؟من زمان مدري عنج

 

[أم حمد =)]

ماقول غير الله يعينج .. بس حاولي تنظمين وقتج ..

وصج مثل ماقلتوا بنات البيت بدون خدم راحه .. صج تعب بس اهون من وحده تغثج او تتعبين على ما تتعلم واخر شي تقولج ودوني :/

 

[مي الحلوة]

رد : 3 عيال وبدون خدامة

انا الحمد الله قعدت من غير خدامة سنة كاملة..والله كنت صج اتعب بس فعلا راحة نفسية كل شيء اسويه
بأيدينى ومتاكدة من نظافته..وعودت عيالي على التنظيم والاعتماد على النفس..وخدامتى بتروح يعد3 شهور وناوية اقعد
فترة من غير خدامة..لان شقتى صغيرة وولدي الصغير عمره 3 سنوات..

 

[كشختي ماركه]

رد : 3 عيال وبدون خدامة

الله يعينج
بس مثل ماقاالت أم حمد=)
لازم تنضمين وقتج

 

[انصاريه قمره]

نفس حالتج انا عندي بنت والثانيه بالطريج الله يخليهم لي انشالله

 

[flower-kf]

حبيبتي ام غازي انا نفس مشكلتج عندى 3 اطفال اسم الله عليهم وصارلي خمس شهور بدون خدامه صج راحة بس تعب بنفس الوقت وتعب اكثر اذا كان اعيالج تحت بعض والحين بعد مع المدارس والدوامات وكل يوم تاخير غير انج مجبوره تطبخين حق اليهال عيزت ايب بهل خدم ولا وحده قعدت فوق 15 وحده والسبب اني مركبة كاميرات مراقبة بكل الشقه وواضحين نفس المحلات بس شسوي من عمايلهم اهم خل يتسنعون واشيل الكاميره واقولهم بالمحلات والمستشفيات وبكل مكان الحين في كاميره وكاهم قاعد يشتغلون ماقالو شي وبعدين على قولتهم لاتبوق لاتخاف بس اهم يبون يلعبون على كيفهم وانا بصراحه حاطتهم حق اعيالي اخاف عليهم من الخدم خدم الحين مونفس قبل تامنين عندهم على اليهال الحين ناس قاعد يحطون كاميرات حق الذهب والالماس واحنى اعيالنا اغلى مانحط لهم

 

[حبيبي سهلي]

حبيبتي جيبي خدامة مؤقتة باليومية تهبل وعندي وحدة اخت خدامتى نظيفة ومأدبة وتهبل مع عيالي مع أن عياليكبار 9-10 وفاهمين وكبار بس حيل يحبونا دقي عليها اهي تاخذ 70 بالشهر وماتبات عندج تلفونها 65942214

 

[& دلوعه زوجها &]

والله شوفي يالغلا مدامهم بصحه وعافيه

هذا المهم عسا الله يتمم عليهم ويخليهم لك

انا عندي عقدة شي اسمه النوم احب نومهم يكون بموعد واحد

وبديت فيهم من امس الساعه 12 تلاقينهم كل واحد بسريرة

ويالله من الساعه 11 الصبح اقومهم ولاينمون الا ولدي بس انومه الضهر معاي ابو سنه ونص

وماشالله لاجت الساعه 12 كلهم نايمين من غير شر وادخل غرفتي وانا مرتاحه من بنوتاتي

بس اهم شي قوميهم ونوميهم جميييييييييييييع

والله يعيننا ويخليهم لنا يالله

 

[eman84]

الله يعينج صج تعب بس هم رااااحه والله من غيرهم
الخدم احس بس يطالعون شنوو سويتي وشنو لبستي وشنو شريتي قطيعه ولقااافه

الغسيل مو الا كل يوم ليش ؟؟ خلي يومين بالاسبوع الغسيل و الكوي ماعدا اذا اشياء يومية عمليه مثل ملابس المدارس
والطبخ سهل صدقيني مايبيله شي وحوسي بالمطبخ ساعه وراح تبتكرين اكلات سهله ولذيذه و بالويك اند سوي شغلات وفرزنيها حق اسبوع جدام والله اعرف وحده ماشاء الله حتى المروقات تفرزنهم ترد من الدوام بس تسوي العيش
والتنظيف خلي طول الاسبوع من فوق لي فوق والويك اند تفرغي عاد حق الارضيات و التنظيف العميق بعد شتسوين وعودي اعيالج يساعدووونج و اللي يقطوون يشيلونه
وبخري و سنعي والله يعينج بعد شتسوين