يوم الجمعه العشا علي عطوني افكار بليز

[ذهبه غاليه]

ال

سلام عليكم
شلونكم بنات
انا حمواتي وحريم حمواني كل يوم جمعه على وحده تتكفل بالجاي والقهوه والحلو والفطاير والعشا
واذا تحب تضيف اي شي ثاني يميز يومها كيفها
ابي افكاركم ومساعدتكم وخبراتكم شنو مفاجآت او اشياء غريبه وحلوه اقدر اضيفها
طبعا تبدي قعدتنا من بعد صلاة العشا فيدوني بنات ابي شي فناتك
ناطره ردودكم​

 

[ذات الهمة العالية]

للرفع ساعدوها خاصة اللى عنده خبره

 

[زهره الجلنار]

اب اب

 

[ذهبه غاليه]

بنات وينكم

 

[أم نواف غير]

موفقين انشالله

 

[ام زهقانه]

حطي فواكه. فطائر حلويات حليب دافي. كستنا هههههه
والله عليراحتك

 

[أم راشد المطيري]

سوي صينية بشاميل وورق عنب ومحاشي كوسا وفلفل وباذنجان
سوي فطاير بعجينة العشر دقايق تكون تقديم سوي بيتزا كبيرة للعشا

سوي حلو كب كيك تلقين بالجمعية العلب الجاهزة وتلقين انواع وياها من داخل الكريمة وزينيها بالكريمة من فوق
او سوي دونات تلقين اهني طريق للدونات وصبي الخلطة بجهاز الدونات وزينية من فوق

 

[F.L.O.N.A]

حبوبة سوي عشا شغلات بسيطة مثل بوفيه

كبة بلبن ، ورق عنب ، بشاميل ، كبب ،سله موالح ، سلطات ، ميني بيتزا ، بوب كورن الدجاج ( جاينيز ) كلها شغلات ما تاخذ وقت في تحضيرها ولذيذه عشان بليل ما يثقلون بعد

تبين اعطيج طريقة حلوة للورق عنب والكبة بلبن والجاينيز انا حاضرة

 

[F.L.O.N.A]

اي ونسيت اقولج بالنسبة حق الحلووو

سوي حلووو الكؤوس البلاستك ، تلاقين القلاصات البلاستك مع صينيتهم بالجمعية على دينارين وشي ، الطقم فيه 12 تقريبا مع صينيتهم

سوي فيه حلويات باردة مشكله او نوع واحد

مثلا حلووو فليك او الاوريو او التوووووت او السينامون والحليب او اي شي تحبينه
ارضيه كيك ساراكيك والخلطة اللي تبينه وزيني بقطع الكاكو والا البسكوت والا الحلاو نص ساعه ما يطول

 

[ام الدرر]

حبوبة ماذكرتي تبين افكار للضيافة بس ولا للعشا كله
عالعموم العشا اتصور بما انه حمولة اكيد ماشاءالله العدد وايد فانتي مجهزة نفسج ومفكرة شبتسوين
الضيافة
سوي انواع مشروبات حارة غريبة
مثل شاي الفواكة - حليب زنجبيل اذا مو متعودين تحطونه -
اختي بيمعتنا سوت مغات اللي يشربونه المصاروة بالنفاس تحصلينه بالجمعيات وطريقته سهله عالعلبة جنه محلبيه حارة وسايحه بس معاه يوزهند
اشتري موالح صغيرة وحطيهم بصحن استكانة الشاي
ودرابيل ميني وقرص عقيلي وحطيه بصحن كوب الحليب
طلبي وحدة تسوي صاج او اذا عندج مكان معلم شاورما بكامل عدته
وفي محلات كنافة يسوون شغلهم بالبيت عندج
سوي زاوية لليهال ماكينة بوب كورن وشعر بنات واذا تبين نافورة ككاو
هذا اللي في بالي ​

 

[ذهبه غاليه]

فديتكم حبايبي ماقصرتوا
ام الدرر وين احصل نافورة الكاكاو والبوب كورن اذا تعرفين ارقامهم ياليت تفيديني

 

[ام الدرر]

فديتكم حبايبي ماقصرتوا
ام الدرر وين احصل نافورة الكاكاو والبوب كورن اذا تعرفين ارقامهم ياليت تفيديني

الكتروزان على طول عندهم ​

 

[عذبة السجآيآ]

اطلبي من حريم 3 صواني ونوعين سلطة

وروحي محل بي كي واخذي الملفوف والورق عنب من عندهم روووعه على 5 دنانير او دقي يوصلونه لج

وواخذي حلو نوعيين


وعلى العشاء حطي كلينكسات نفس السفره نفس اللون وصحون بلاستيك وقفاش وشوك وسكاكيك

جيبيهم معاج او جهزي الطاولة من المغرب ونثري عليها ورد او حطي شمع

وحطي قلاصات فيها 3 انواع عصير وقلاصات ماي

 

[سحايب برنس]

حبيبتي انتي توج عروس شكو عليج دوريه عشا لو قايله فطاير وحلى مقبوله
عموماً نصيحتي لج اذا لازم ولابد العشا خلي زوجج يطلبه من بره توج عروس حبيبتي والمفروض الدور مايمشي عليج ولاتكثرين حركات وسوالف كل ماكان شغلج خفيف ومرتب كل ماكان احسن ونافورة الكاكاو والشورما وهالسوالف لاتسوينها الحين نطري شوي هاذي نصيحتي وانتي ادرى بوضعج

 

[&موناليزا&]

عزيزتي رفع لعيوووووووووونج

 

[الأميرة جوري]

طلبي العشا من حريم يعنى بوفيه صغير...

 

[miss_Ba6oOo6a]

الله يعافي التاجرات كل شي يسوون
واذا حابه انتي
سوي حليب وشاي كسنته درابيل بطاط عاديه مع اجبان وسوالف نفس مالت الجمعيه وبطاط الحلوه
وكب كيك الجاهز اخذي المطاحن او التاوة حطي فوقه نوتيلا وبدعي بالتزين
او طلبي احد يسوي صااج تغيير وحلو