اخواتى في شغلة من زمان خاطري أتكلم فيها من المواضيع اللي اقراها في هذا القسم و بعد اذن المشرفات ..... اذا يسمحونلي ان لايقفل الموضوع حتى لو اختلف فيه النقاش طالما الاحترام موجود و في النهاية كل شخص له رأيه هي مجرد وجهة نظر مع نصيحة من القلب من اخت تحبكم في الله و ارجو انكم توسعون صدركم علي.
دائما ألاحظ المواضيع من هالشاكلة:
• ولدي الأبلة طقته على ايده .....شسوي فيها اذبحها هال.... !!!!!!!
• ابي بنتى تكون بلبل بالنجليزي شنو احسن مدرسة خاصة انا مايهمنى الا الانجليزي انه يكون قوى لان احنا زمن العصر و .... و ..... و احنا بزمن اللغة الانجليزية مهمة و .... و .....و ابي اضمن مستقبلهم ......
• بنتى نست الدفتر و الابلة خانقتها ....شسوي فيها
• ولدي الدروس صعبة عليه و الابلة كله تخانقه اروح اطلب نقله لصف ثاني !!!
• انا اهم شي عندي الإدارة و الاهتمام ..... ابي مدرسة خاصة تهتم بولدي او بنتى ..... اهم شي عندي الاهتمام (ان كل شوي يتصلون يقولون شغلة عن ولدي و اذا نزل مستواه يتصلون فيني بعد)
• بنتى بأولى ابتدائي و توها ..... ابي احط لها مدرسين خصوصيين لانى موفاضية ادرسها
• و غيره و غيره
في جلسة مناقشة مع مدرسات ابتدائي ...... قالولي شغلات تطلع عيونكم.... زمن اول ننطق بالمساطر و يقرصوننا على اذننا علشان نخاف من الأبلة و نحترمها ..... صار فينا شي ! .... متنا ........ ألحين بس اذا وقفت الولد او قالتله كلمة جات الام تركض و معصبة ليش طاقة ولدي و ليش تعاقبيني انا ولدي مايتعاقب ولدي غير ....و النتيجة شنو ..... عيالنا مدلعين لو نلمسهم على الكتف تروح البنت تركض عند امها ....الأبلة طقتنى .....و الأم بسرعة تفزع بدون ماتفهم المشكلة و تروح تتهاوش .... حتى الأبلات ملوا و ماينلامون .....هذا غير قلة الأدب ..... تناقشي مع أي مدرسة وشوفي شنو اخلاقيات الأطفال...... مدرسة تقوللي : عندي طالب ابتدائي متعود يتفل على الأبلات و علم ربعه وصاروا يقلدونه .... ولد ثاني يحط علوج على الكرسي ...... ولدي نفسه قاللي ...... يمه في ولد عندنا عنده مقص يقطع المساحات قطع صغيرة و طول الحصة يحذفهم على الأبلة لما تلتفت على اللوحة و تشرح يحذف عليها من ورا كل شوي يحذف قطعه!!!!!! في ولد ابتدائي (لاحظوا ابتدائي مو متوسط) جايب معاه تلفونه و خاشه و يطلعه بالخش حاط فيه صور اباحية و رسومات جنسية قذرة و صور فيديو مفاصيخ ..... يوريها ربعه بالمدرسه ..... هذا ابتدائي
اما البنات ..... فشغلهم بسكات و من تحت لي تحت .... لاتقولون صغار مايفهمون ..... كل شي يفهمون و كل شي يعرفون ....... في سالفة كل اهل الكويت اعتقد يعرفونها ... بنت بالبتدائي من بعد الهدة بدل ماتنطر ابوها يجيها .... من جرأتها راحت مشي الجمعية بروحها .....الابو جا يدور على بنته مالقاها بالمدرسة انهبل الابو ..... و من بعدها طلع قرار ان بعد الهدة كل الأطفال يظلون داخل المدرسة و الام او الاب يستلم بنته من داخل ....طبعا عيال الكويت مالهم خلق ينزلون من السيارة علشان يجيبون عيالهم فبعضهم خالفوا القرار على مسؤوليتهم. و الكلام من مدرسة ان البنات بعد صار لسانهم طويل .... مايحترمون الأبلة ..... يراددونها ..... كأنها كبرهم ...... و اذا قالتهلهم الأبلة شي و الا خانقتهم.... راحوا قالو حق امهم (يمه الابلة طاقتنى)..... وحدة من الطالبات قايلة حق ابلة ..... انا اخلي ابوي ينقلك من المدرسة كلها يخليك تدرسين بمدرسة ثانية.
وين الأخلاق .....وين احترام المعلم ..... عيالنا صاروا و طلعوا من تربية خدم ولازم نكون صريحين مع نفسنا و ننقذ هالجيل....جيل تربية خدم .... لان اساس تكوين شخصية الطفل بعمر الروضة و الابتدائي ..... وبعدين الاطباع و الاخلاقيات تظل لما يكبر ....وين ايام قبل ووين ألحين ..... شنو السبب .... تبون تعرفون السبب ...... بس لاتزعلون ..... السبب يقع على الأم اكثر من الأب ..... هل في حوار بينك و بين بنتك او ولدك ..... ياحبيبي الأبلة لازم نحترمها ..... اعتبرها مثل امك الثانية ...... الأبلة نسمع كلامها حتى لوخانقتك مايخالف اكيد انتى سويتي شي غلط ...... الأبلة ماتخانق الا يمكن اذيتوها و سويتو إزعاج بالصف ..... مايخالف يمه الأبلة مثل الأم عادي تخانقك تبي مصلحتك علشان تحل الواجب و تدرس عدل ...... يماما الكلام الوصخ الله يعاقبنا عليه ...... ترى الله قاعد يشوفك وانتا بالمدرسة فدير بالك تقول كلمة وصخة او مسبة ..... يابنتى (اذا برابعة ابتدائي) ..... ياحبيبتى انتى حرصي على الصلاة علشان الله يحفظك و يوفقك ... ترى اللي مايصلي تصير له اشياء موزينه بحياته....... وغيره من الحوارات اللي كلها حنان الأم ......هذا غرس الأخلاقيات ..... مو من اسمع او اشوف شي على طول اروح اتهاوش مع المدرسة .... جذيه حتى البنت يقل احترامها لأبلتها و تقل هيبة المعلمة عندها .
صار اجتماع اولياء الأمور بمدرسة عيالي .... ألقت الناظرة كلمة للحين اثرت فيني بصراحة خوش كلام ........ز قالت: احنا مشكلتنا مو الطالب ...... مشكلتنا ولي الأمر ...... الطالب احنا نربيه و نحط القونين و يمشي عليها و اللي يخالف يتعاقب ..... بالتوقيف بالدرجات باي شي ..... لكن ولي الأمر يبي الشارة علشان يجي و يتهاوش
و اضيف بالنسبة للمدارس الخاصة المختلطة ..... خواتى ديربالكم على عيالكم شالفايدة اذا ولدك 100متفوق و اساسه قوي 100% بالنجليزي..... و لكن بالأخلاقيات صفر ......و الطفل يوميا يقضي نصف يومه بالمدرسة ترى المدرسين الأجانب عادي عندهم كل شي حتى لو باس ولد بنت داخل الصف.. المدرسة راح تبتسم و هذي ترى صارت في مدرسة خاصة اجنبية و مواعد بالفرص كل بنت لازقه بالولد ...... و لما ترجع البيت محد يدري شنو سوت بالمدرسة ....الولد اذا من صغره كل شي عادي عنده البنات مع الأولاد في كل شي .... هذا لما يكبر يصير ماعنده غيره على خواته و تقل النخوة و رجولة الموقف و يصير ماكو عادات و تقاليد لان من صغرة متعود ان كل شي عادي البنت تلزق بالولد عادي ..... هذا شلون راح يفتح بيت لما يكبر و على شنو راح يربي عياله !!!.
حرصتى انه ولدك يحفظ قرآن او يتعلم يقرأ من القرآن مثلما حرصتى انه يصير فلته بالنجليزي و يقرأ قصص انجليزي .
انا اسفة خواتى و سامحونى اذا شديت بالكلام ولا اقصد شخص معين او اخت معينة ... و يعلم الله ان كل مافي قلبي اقوله بحسن نية و نابع من حرصي على جيل شبابنا القادم.
التعديل الأخير:
.. صج حرااام 
