يا ابلات تكفون ابي الخبر اليقين مليت من الفراره بالوزاره

[اللولو000]

االسلام عليكم يا ابلات المنتدى

انا اختكم خريجه من كلية التربيه من جامعة الكويت من 6 سنين لاني سافرت على طول ويا زوجي كان يدرس بره
وألحين الحمدلله رجعنا الديره وبغيت اتوظف اللي صار قدمت بالوزاره وانقبلت بسرعه فوري الحمدلله بس المشكله صار لي شهر اعابل بالوزاره اول شي قدمت ملفي عندهم بس كان في غلط ان الديوان حاط لي اني خريجة اداب موو تربيه وعشان جذي حولوني للمقابله الصعبه والامتحان اللي هد حيلي حده صعب كان وما عديته

بعدين قريت من بنات المنتدى ان التربويات ماله داعي يسون مقابله ويروحون على طول للمنطقه التعليميه التابعه للمنطقه اسكنهم رحت ووديت كل الاوراق وخلصت الفحص الطبي واليوم رحت للمنطقه التعليميه
وكنت متوقعه االمسؤوله تقولي اسم المدرسه اللي بتعين فيها واستلم ورقة مباشرة العمل منها عقب قالت لي ويييييييي
شهادتج قديمه من 2006 روحي وزارة التربيه وقدمي ملفج هناك
انا حدي انحبطت وياتني البجيه عقب كل هذا ردتني مره ثانيه للوزاره وانا ميته خوف يعيدون لي المقابله لانها وايد عسره وفيها امتحان عقب تسألني لجنه وموجهين يخرررعون واكيد البعض جربها

عفيه اللي تعرف وعندها خبر هل راح يعطوني مباشرة العمل باجر اذا رحت وزارة التربيه وقدمت اوراقي ونتيجة الفحص الطبي ول بيقولولي لازم مقابله ؟ حزتها الله يعيني راح اموت من :eh_s(11)::eh_s(16):*

 

[المـــــها]

للأسف مادري!!
بس يعني فيهم غباء مو طبيعي
الحين انتي تعطينهم شهادتج مصدقة من الجامعة و كلية التربية ،، و هم يسووون معاج مقابلات !!!!!!!!!!!!!!!!!!!!!
و فوق هذا الغلط و الاهمال منهم مسجلينج آ داب
اولاغسلي شراعهم بس قولي الغلط منكم شنو مسجلينج آداب الحين عرفوا غلطهم
و شهادتج اللي جبتيها مو تارسة عينهم !!!!!!!!!!
قهر و الله




الله يوفقج حبيبتي
ادري مافي اغث منهم هالباردين !

 

[اللولو000]

المها حبيبتي تسلمين على ردج
اي والله يا قلبي حدهم لوعوا جبدي ومليت من كثر ما اروح حتى تعقدت وقمت اخاف باجر بروح لهم وما ادري شنو الصدمه اليديده اللي بواجهها
الله يستر وانشاء الله يكتب الخير لي ولكم حبيبتي

 

[*ماي الورد*]

الله يسهل عليج
فيه نقص في بعض التخصصات المفروض يعجلون بالتعيين

 

[PuPa^^SWeeT]

شهاللوية


حبيبتي روحي وزارة التربية و اذا قالولج مقابلة دبريلج واسطة و تنجحين على طول

 

[Angel_store]

up up up

 

[اللولو000]

بوبا تسلمين يا عمري
اي والله رحت اليوم وقالوا لي لااااااااازم مقابله وصكت فيني الدنيا
بس المعين الله بدرس وبروح اقدم وانشالله احصل توصيه تفيدني

 

[طالبة1990]

الشهادات القديمة لااازم مقابلة

بس مايسقطوونج ابد

ادرين ليش

لان اذا سقطتي لازم تروحين وزارة ثانية

والتربوية مايصير تروح لوزارة ثانية الا بكتاب انهم مستغنين عنج

ف لما يسقطونج تقولين لهم عطوني الكتاب ف اهمه مايبون يعطونج الكتاب

فيضطرون ينجحونج حتى لو مانطقتي بحرف



يعني لاتحاااتين

اعرف وحدة صار لها سنة بس من تخرجت

وتخصصها رياض اطفال يعني تخصص متكدددس عندنا

ومع ذلك طلبوا منها مقابلة لانها مو حديثة التخرج

وكان ودها تسقط عشان تروح الاوقاف

بس نجحوها

بس مو معنى كلامي تخوريينها


الله يوفقج ويقدم لج اللي فيه الخير

 

[madry]

مقابلات اللغه الإنجليزيه ما فيها واسطه
و عندنا معلمات اعادة تعيين....يعني كامو يشتغلون معلمات من أول و سقطوا...
عموما اتكلي على الله وروحي و الله يعين الجميع

 

[مبرووكه]

اهم شي الشخصيه تكونين قويه ومومرتبكه في المقابله وتسولفين معاهم موبس سؤال وجواب بيني لهم ان عندج افكار وحابه اتطبقينها بالواقع مثل خلق بيئة تربوية جاذبة للطالب وغيره حتى لوجاوبتي على اسئلتهم غلط بس تكونين واثقه من نفسج ولازم يكون عندج إلمام بالأهداف وفلسفة المنهج حسب مادتج،،،،،
والله الموفق،،،،