يابنات ابي تصويت على هالدولتين؟؟

[فواكه الموسم]

شلونكم بنات حبايبي انا محتارة بين هالدولتين ماليزيا وفرنسا (دزني) شهر 6 ابي تصويت اي وحده الافضل من الملاهي والترفيه والمتعه والنظافه والجو اسافر لها انا وعيالي ولاول مرة اروح هالدولتين

اتمنى في ردووووود
:yaaaaaarb:​

​

 

[jojowa]

حبيبتي انا رايحه الدولتين و ثنتينهم يصلحون لليهال و الترفيه فيهم وايد حلو ,,,بالنسبه حق باريس انا وايد انصحج فيها اتينن و وايد احبها الجو فيها حلو بشهر 6 و لازم تودينهم يورو ديزني و تسكنون هناك على الاقل ليلتين لنه ماراح يكفيج يوم واحد لان فيها مدينتين ملاهي لازم تروحين الثنتين ولا يطوفونج و غير الاوتلت مول ,,فنصيحه مني حجزي بفنادق الي داخل ديزني و راح تدشين الملاهي على طول ,,,و عندج بعد باريس وايد حلوة و الشوبينغ عجيب فيها و هم عندج مدينه ملاهي في باريس اسمها آستريك هم حلوة و العابها تونس ,,,,

و بالنسبه حق ماليزيا حلوة و سوقها اينن و رخيص و فيها ترفيه لليهال بس مو نفس باريس ,,,و بشهر 6 ماليزيا حاره و رطوبه ,,,انا انصحج بباريس توكلي على الله و ان شاءالله تستانسون وين ما رحتوا ​

,,,

 

[om_dodo]

شجاب لجاب
من صجج تحطين ماليزيا الرطوبه (شرق اسيا)
وباريس الجو السنع (عاصمة الموضه )
وانا رايحتلهم ثنتينهم مافى مقارنه بين شرق اسيا واروبا
فرق السما عن الارض
اوربا ارشح
تقبلى مرورى و وجهة نظرى
:eh_s(15):

 

[مرتجية رحمة ربي]

رد : يابنات ابي تصويت على هالدولتين؟؟

اذا انتي موجودة يا فواكة الموسم سوي اب عشان بكلمج عن ماليزيا عن تجربة :eh_s(17):

 

[ms_5ajoola]

:eh_s(17):حبيبتي انا رايحة ماليزيا ورحت فرنسا وانا صغيرة
الصراحة ماليزيا ما عجبتني واحلى شي فيها منتجع ( جنتنغ ) وسوقها عاادي نسبيا ..
بس فرنسا رووووعة من ناحية الجو والسوق بس طبعاا اغلى بواااااااااايد ..

 

[نونه الزعفرانه]

باريس طبعآ بس يبيلج ميزانيه صح
والطيران طبعا لوفتهانزا كويت المانيا باريس
ما تروح دايركت باريس توقف نص ساعه بالمانيا

 

[Tender Heart]

رد : يابنات ابي تصويت على هالدولتين؟؟

غريبه والله .... اصلا ماكو مقارنه كلش ارشحلج ماليزيا وبشده بعد اذا معاج يهال ورحلاتها ماتخلص ومتعه ولا في منها باوروبا وباريس مهما تروحين ماتوصل نفس رحلات ماليزيا والراي بالاخير لج

 

[لبى عيونه]

رد : يابنات ابي تصويت على هالدولتين؟؟

الجو
باريس

التسوق
كلهم بس ماليزيا رخيصه وباريس غاليه

الرحلات
ماليزيا أكثر وأحلى

صراحه استانست بماليزيا أكثر رحت جزر وكل شيء يبطل مبكر ويصكر متاخر
ونظافه أكثر من باريس وفرنسا حييييييييل كتمه وتزهق شوي
وتحسين براااااحه حييييل بماليزيا وأمان يكفي صوت الأذان

 

[فواكه الموسم]

مشكووورين حبايب قلبي على أرائكم ويعطيكم الف عافية

 

[ذكرى الفراق]

انا رحت ماليزيا وعائلية درجة اولى والسوق فيها حلو ورخيص نوعا ما....اما باريس بصراحه مارحت لها رفيجتي راحت واتقول غير عن ماليزيا بوااايد

 

[جنون العشق]

وهل يخفي القمر :ch12:


فرنسا طبعا :eh_s(9):

 

[الكادي 1981]

فــرنســـااااا بدووون تفكييييير .... لالالاتروووحييين للقته والحـــررررر والمعامله الخايســـة

 

[ام مهاوش]

طبعا فرنسا من صجج تقارنين فرنسا بماليزيا ويييع
روحي باريس وانتي مقمضه كافي ديزني احنا استانسنا فيها اكثر من اليهال سكني فيها ليلتين ولا ثلاث ليالي وماراح تخلصينها مقسمه ثلاث اقسام ديزني استوديو وديزني بارك والسوق الاوتلت والمحلات الموجوده احلى من سوق باريس وارخص بعد
وعندج باريس نفسها التمشي وايد حلو بالشانز واحلى وقت بالليل امان كنا نقعد لي 2و و3 الفير وناسه واذا تبين فندق انصحج بكونكورد لافاييت عائلي وحلو وامان وكله كويتيين وخليجيين ماتحسين بغربه وفيه مجمع لاصق بالفندق ومفتوح على الفندق فيه جم محل وسوبرماركت وفيه محطة قطار واذا تبين اي استفسار راسليني على الخاص اخاف ما ارد على موضوعج مره ثانيه

 

[الدلال]

فرنسا وخصوصا ديزني حق اليهال

ماليزيا ما احبها رطووبه

 

[مس دلال]

ع حسب الميزانيه
اذا كانت اوكي روحي فرنسا واستمتعي فيها واسكني في دزني
اما اذا بتروحينها وتضغطين ع نفسك وعيالك لاااااااااا تروحين
وماليزيا حلوووه وتنفع كثير للأطفال تحسين ببهجه في ماليزيا

 

[قلبي ابيض]

تروحين وتردين بالسلامة

 

[carrot^cake]

باريس طبعا
مع ميزانية حلوة طبعا :eh_s(8):

 

[مزيونة الهيلا]

باريس يبيلها ميزانية قوية قوية

بس ماليزيا ع رغم الرطوبة والقمته بس رحلاتها اكثر تنقلاتها اكثر وما تملين ودولة اسلامية وتحسين بالامان واكلهم حلال وارخص واحسها عائلية .............والله ييسر امورج واستخيري