وهي صامته ... وصابرة

[سيرةالحب]

للي تعذبت في طفولتها​

بالحبس - الحرق - التجويع - الضرب​

بسبب انتقام و ثأر بين الوالدين !​

وهي صامته و صابرة ​

للي جائتها الدورة الشهرية وعمرها 10 سنين​

وخجلت و ماصارحت امها ​

وجازتها الام بالشتائم و الاهانه و الاهمال !​

وهي صامته و صابرة ​

للي تمنت تتعلم تصلي وهي صغيرة​

لكن مالقت من الاهل اهتمام​

ولجأت لبنت الجيران تعلمها من ورى أهلها !​

وهي صامته و صابرة ​

للي حرمتها أمها تلبس نفنوف العيد وهي طفلة ​

لأنه أغلى من نفنوف خواتها بدينارين !​

واختفى النفنوف و بقى العيد الحزين​

وهي صامته و صابرة ​

للي منعوها اهلها تدخل الجامعه لانها خلط​

واجبروها تدخل معاهد التطبيقي لانها بنات​

وهي صامته و صابرة ​

للي دعوا عليها الوالدين و مادعوا لها​

وهي رايحة امتحان الثانويه العامه​

لانها : نست قلاص الحليب بالصاله من الارتباك ​

وما ودته المطبخ .. والبيت مافيه خدامه !​

وهي صامته و صابرة ​

للي ممنوع تسوق سيارة لانها بنت​

وممنوع تركب باص الكليه لانه مو امان​

وكانت تحت رحمت الاهل :​

متى يقوم الاب من نومه يوصلها​

ومتى محاضرة الاخ يوصلها بدربه​

ومتى الاخت الكبيرة تغيب عن دوامها وتوصلها​

او يوصلونها قبل المدارس ! والمحاضرة الضحى .​

اوتخلص الظهر بس الاهل يتغدون وتنطرهم ليما عقب العصر !​

وهي صامته و صابرة ​

للي احكموها الاهل تلتحق بمعهد يبونه​

و احكموها بتخصص يبونه وهي ما تفهم فيه​

لان كل بنات العايله دخلوا فيه ومايصير تكون شاذه عنهم !​

وهي صامته و صابرة​

للي التحقت بالجامعه والاهل شبه رافضين​

ولما طلع قبولها : شتمها ابوها و الام صامته !​

ولما شافوا معاشها .. صارت الغاليه​

ولما شافوا فايدة تخصصها.. صاروا يستغلونها ​

وهي صامته و صابرة ​

للي يخطبها ريال عمرة اكبر من ابوها ​

مطلق بنت عمه عقب عيال و عشرة​

و غير متعلم و غير كويتي وماحيلته شي​

والاهل يرحبون فيه لانه من القرايب و عيب يرفضونه​

ولما ترفضينه ... الاهل يزعلون ​

وهي صامته و صابرة ​

للي تشوف اهلها ينقون العرايس لاخوانها مثل تنقايه الرز​

ومن بيت لبيت بدون كلل او ملل​

بدون تحفظ على عائله او جنسيه او لون​

وهي صامته و صابرة​

للي يتقدم لها الكامل (و الكامل الله)​

ولد عايلة محترمه. ترابط اسري. مستوى مالي مستور.​

علم . اخلاق. ادب. منطق . هدف ​

بس الاب يرفض -بدون نقاش- لانه مو من العايله !!​

وهي صامته و صابرة ​

للي يشهدون لها بالاخلاق و الاناقه و الثقافه و النعومه​

ولا دروا انها تخطت ال 30 .. وكأنها جريمه !​

الناس تسألها : ليش ما تزوجتي للحين !!!!​

والخاطبه تقطها بالويه: نبي اصغر لولدنا (حتى لو ولدهم اكبر منها !)​

وما يحسون بانكسارها لما تسمع الكلمه !​

وهي صامته و صابرة ​

للي عشمها الحبيب المحترم .. ايام و ايام​

وطلع أجودي بالنهايه و اعترف لها :​

امي اخطبت لي !​

او : ترا باجر عرسي يا بنت الناس !​

وهي صامته و صابرة ​

للي ممنوع تكمل دراستها العليا​

وهي تدري انها بتنجح و بتكون شي​

وهي تدري ان العلم هو كل حياتها ومصدر سعادتها​

لان عند الاهل :شهادة الكليه للحصول على الوظيفه.. وكافي !​

وهي صامته و صابرة ​

للي ممنوع تسوي مشروع او تجارة (مدروسه)​

لان في اعتقاد الاهل ان هالشي خرابيط وماله داعي !​

وهي صامته و صابرة ​

للي متعتها بالعمل التطوعي و جمعت الناس​

لكن ممنوع تشارك بتطوع مع أي لجنه او مركز اجتماعي او انساني​

لان في اعتقاد الاهل : ليش تتعبين بدون فلوووووووووووس !​

وهي صامته و صابرة ​

للي شاركت بمشروع انساني من ورا الاهل​

بالاتفاق مع جمعيه خيريه​

(مشروع خياطة للبنات الايتام)​

وتبرعت لهم بمكينه خياطة جديدة.. لكن ​

الاهل طاحوا عليها !!! ومنعوها و شتموها ​

و استردوا من اللجنه .. ماكينه الخياطة !!!​

وهي صامته و صابرة ​

للي ممنوع تمارس هوايه ​

(رياضه – رسم – لغه –خياطة - .... )​

لان في اعتقاد الاهل ان كل المعاهد سمعتها مو زينه !​

وهي صامته و صابرة ​

للي فقدت صديقه العمر و الصدر الحنون ​

بسبب موت او سفر طويل طويل طويل وشبه دائم​

وما لقت بديل​

وهي صامته و صابرة ​

للي اهلها مقاطعين الاقارب و معتزلينهم​

وماتعرف منو بنت خالها ومنو بنت عمها !​

لأن الأب مو فاضي يواصل أهله​

والأم ماتخالط الا نخبة البشر (ال هاي كلاس) !​

وهي صامته و صابرة ​

للي اخوانها و خواتها تزوجوا و انشغلوا عنها​

سنين و سنين​

تنقش حروف الوحدة على جدران الغرفة !​

وهي صامته و صابرة ​

للي تصرخ و تبكي و تفضفض لربها على سجادتها​

والاهل يحلون لها المشكله : ​

اذا متضايقه من الوحدة ... شغلي التلفزيون تابعي فيلم !!​

وهي صامته و صابرة ​

للي ​

توصل المدارس . تمون البيت . تدرس العيال . تباشر المنزل . تودي الاولاد الطبيب.​

تواصل اهله وهو مايواصل اهلها. مخلصه معاشها على بيتها. ​

تقول للعيال: بابا طيب و يحبكم بس مشغول بدوامه ​

ويقول لعياله : امكم ماهي سنعه. ماتعرف وين اغراضي ​

ومتى موعد دواي ولا رديت البيت تالي الليل ماتسويلي عشا انا و ربعي !! ​

وهي صامته و صابرة ​

للي انظلمت.. للي بكت بصمت .. للي مابقى بقلبها رحمه للناس لانهم مارحموها​

​

الله​

ثم​

الله​

ثم ​

الله​

 

[ام الدرر]

((وبشر الصابرين))​

 

[فوق الثريا محلي]

و يقولون نحن نعرف مصلحتكم
الحمد الله

 

[سوسن1980]

الصبر مفتاح الفرج

 

[أحترت أعبر]

عورني قلبي وانا اقراء سطورج ....
الله كريم ومع الصابرين .....ربي يعوض صبرنا خير ويفرح قلوب كل وحده صبرت على هم او الم او فراق ....​

 

[أحبج يمه]

اي الله كرييم

 

[نفهمها صح]

اه
يارب تفرجها علينا يارب
وعلي كل صابره يارب
الله يعطيك العافيه​

 

[ام زهقانه]

لج رب غفور ورحيم و اشكي له الحال واربج ما ينسا عبده عورتي قلبي ناس قلبي يعورني وشكوا غير الله مذله صلي الفجر راح ترتاحين وستكي الرحمن رب العالمين ما ينساك ابد بكيتني والله

 

[رؤى القلوب]

الله الله الله على كلامج وعلى ما خطت أناملج والله احس الدمعة محبوسة في عيني وانا اقرى سطورج سلمت يداك وأن الله مع الصابرين

 

[*الشيـــهـانـة*]

صج عورتي قلبي عسى ربي يفرجها علينا

 

[شوشو الشقيه]

اي نعم بشده وبشده وبشده وبشده وبشده وبشده وبشده
نعم بصوت عالي نعم
ويقولون لنا ليش تتعبين نفسج شنو ناقصج
ناقصني احس اني انتجت في المجتمع ناقصني احس اني عنصر فعال في المجتمع
الدنيا ليس فقط فلوس
الدنيا تحقيق النفس والذات يا عالم
تعبت اتكلم الي ما نشف بلعومي

صوت عالي نعم .............................................................................................................................................................................................................................................................................................................

وهي صامته و صابرة
للي متعتها بالعمل التطوعي و جمعت الناس
لكن ممنوع تشارك بتطوع مع أي لجنه او مركز اجتماعي او انساني
لان في اعتقاد الاهل : ليش تتعبين بدون فلوووووووووووس !​

 

[شوشو الشقيه]

للحين ما برد ت حرتي

بصوت عالي
الدنيا ليس فقط فلوس يا عالم

والانسان اذا يشتغل ليس فقط حق فلوس
وليس لانه ناقصهه شيء
الانسان محتاج خبرات

كل كلمة يقولون لنا شنو ناقصني

 

[miss_rsa]

ان بعد العسر يسر

كوني متاكدة كل ما ضاقت كل ما كان الفرج قرييييييييييب ان شاء الله

 

[رهــKSAــــف]

كلامك يحزززززززن وفعلا في ناس ظالمه
الله ثم الله ثم الله

 

[ديما..]

حبيبتي ابقولج كم كلمه الصبر معروووف انه مر
ولكـــــــــــن عواقبه جميييله

 

[سيرةالحب]

اشكر خواتي اللي تفاعلوا معاي
وعسى الله مايحرمني منكم
انا لجأت للمنتدى للتنفيس عن اللي بخاطري
و لقيت قلوبكم اكبر بيت يحتويني
:eh_s(17):

 

[أماني عمري]

1- يا أيها الذين آمنوا استعينوا بالصبر و الصلاة إن الله مع الصابرين (153) البقرة
2- و استعينوا بالصبر و الصلاة و إنها لكبيرة إلا على الخاشعين (45) البقرة
3- فاصبر صبرا جميلا (5) المعارج
4- و بشر الصابرين جزء من (155) البقرة

آخر آية أكتبها بردي: أم حسبتم أن تدخلوا الجنة و لما يأتكم مثل الذين حلوا من قبلكم مستهم البأساء و الضراء و زلزلوا حتى يقول الرسول و الذين آمنوا معا متى نصر الله ألا نصر الله قريب (214) البقرة

أجرج عند ربج يا قلبي و ربج يحبج و حاولي تتصورين موقفج يوم القيامة وقت الحساب شكثر لج أجر عند رب العالمين و فرحي بهالشي لأن الصبر مر بس آخره جميل و فرح كبير، الله يبرد قلبج و ادعي رب إني لما أزلت إلي من خير فقير و تلقين الخير إن شاء الله