ولد عمي كشفني !

[Kuwait_790]

السلام بنات شلونكم ؟ بنات بدش بالموضوع بلا مقدمات ..

انا سويت شي غلط و ادري انه غلط بس نيتي مو شينة

وابي نصيحتكم :

تعرفت على ولد عمي اللي ماعرفه من النت وسولفنا جات
واهو يبي يشوفني مارضيت ووريته صورتي وجذبت عليه باسمي و كل شي تقريبا
بس مشاعري صادقه لان ادري مافي نصيب و اهلنا مايبون بعض وبنفس الوقت كان ودي اتعرف عليه واشووف حياتهم شلوت بس موقصدي لقافه لاني ماعلمت احد بس كان ودي والهوى ضدي
المهم اليوم صدمني وانا اسولف معاه اي و صح كلمته سكايبي باسم مستعار مره وحده
واليوم عاد صدمني و قالي شنو موقفج لما تكلمين وحده و تصير اخت رفيجي او تصيرلي مت من الخوووف قلت هذا عرف منو انا حاولت ارقعها ان ماتدري شنو نيتها وجذي و غير الموضوع فجأه فأنا مو عارفه اهوا عرف منو او لا
وحدي خايفه يكون موري الصورة اخته و قالتله او شلون عرف مادري !
المهم اني ما ابي اقوله انا منو اخاف ..
وخايفه ما اقوله انا منوو عباله العب عليه
وانا والله بنيتي بس اني ادش اشوف شخصيته و اعرف ولد عمي لا اكثر

 

[Tom ♥ Jerry]

,


طلعي من حياته بدون لا تقولين له انتي منو
و الله يستر علييييييج

 

[حكآية قلب]

غلللللطططططططط


غللللططططططط


بتعرفينه مو من الشات عيب



زوريهم وتعرفي عليهم



انسي هالموضوع

باجر يتكلمون فيج وقت سن الزواج بيقولون هذي ررراعية السوالف

 

[7o0o0r]

اهلين حياتي
ماخفتي يوري صورتج ربعه
على العموم الحين دام تدرين انه الهوى ضدج يعني مافي امل انكم تاخذون بعض
انسحبي من حياته وانسي الموضوع وان شاءالله مايصير إلا كل خير

 

[VET-Nour]

وريتيه صورتج واهو مايدري انه انتي تصيرينله ؟

[ لو تبييينه ] تقدرين تاخذينه لكن بطرق ثااااااااااانيه ومافيها مشاكل ويكون عااارف منو انتي بعد
مو تتعرفين عليه و تجذبين !!

و الغبااااء انج موريته صورتج !!!
بالله قابلج بيوم؟؟؟؟؟؟
انزين لووو قال ل ابوج ابي اشوف بنتك او مثلا صادفتيه ب اي مناسبه ؟؟؟
شافج و خذاج على جنب و قالج فلاانه اشجايبج ل بيت عمي ؟؟؟ << والفلانه هاذي الاسم الي جذبتي فيه
شبيكون موقفج ؟
طبعا بتتوهقين اهني و اهو بيعرف انج بنت عمه و بيقول هاذي اكيد تخربط و ماكانت تدري انه انا ولد عمها صح؟؟

لا تقولين ماراح يقول جذي ! عارفه تفكير الشباب شلون

و لو فضحج جدام العااااااايله كلها و قال ان انتي ......... وتتعرفين ع شباب من النت و تدشين عليهم و تدزدزين صورج



والله لو يعرف انج انتي بنت عمه راح تطيحين من عينه و يمكن يفضحج بعد و أي صبي بتكون هاذي ردة فعله
لانه ماكان عارف انج بنت عمه من البدايه و انتي ماقلتيله ف بيقول اكيد هاذي ماكانت تدري انه انا ولد عمها و اكيد دزت صورها ل اكثر من واحد من قبل و عندها سوالف



ترئ هذا الصجج و كيييفج

اذا بتحاولين ترقعين ل نفسج ؟؟؟

دشي عليه الحين و قوليله انا اسفه فلان الصورة الي دزيتها صورة رفيجتي و خذيتها منها بالحيلة و اهيا ماترضا اي احد ياخذ صورها لكن انا الي جذبت عليها و خذيتها و اتمنى منك تمسحها لانه البنت مالها اي ذنب وانا بطلع من هالاكاونت و ماني داشه مرة ثانية لاني تبت و هاذي اول مرة اعطي لاحد صورة البنت

واطلعي من الاكاونت و لا تردين تدشيييييينه لانه بيقول ليش تسوين جذي ومادري شنو

وان شا الله انتي تكلمينه باكاونت مو بالواتساب !!

طبعا بتقولين هالكلام عشان يعرف انج انتي مو راعية سوالف و اذا بتتقربين له تقربيله مبااااشر او عرفي بشخصيتج مو تجذبين ! و سوي نفسج ماتعرفين انه "هذيج" مكلمه ولد عمج ! ولو سالج عن وحده بالاسم الي مجذبه عليه فيه قولي اي هاذي رفيجتي وتهاوشت معاها من فتره لانها حقوده بسس !!

واهو بيفهم انج بنت نظييييفه و زينة و هذيج حقوده و انتي عمرج ماكلمتيه
فهمتي كلامي ؟؟؟ ​

 

[VET-Nour]

يوووووه توني اشوف انج مكلمته بسكايب

ولج انتي شلون انرقعلجج!!!
غيري صوتج او حاولي تغيرينه خشنيه نعميه مططي بالكلام سوي اي شيء !
اذا كنتي تتدلعين وانتي تكلمينه,, لمن تكلمينه وجه لوجه لا تتدلعين حاولي تكونين جديه
و اذا كنتي جديه شوي ,, تدلعي شوي
واذا كان صوتج خفيف , عليّه عشان لا يحس بالفرق
و اذا كان شوي عالي , خففيه

 

[{ شيوخهـ ~]

خلآص آتوقع عرفتي كل آللي تبينه عنه !
سحبي نفسج ولآ تقولين له شي !
،

 

[فـــخـــر]

اقطعي علاقتج شناطره ؟!!

والله يستر عليج

 

[زوجة عزيز]

وشلج به تبين اتعرفينه ! وموريته صورتج ولد عمج ومايعرف شكلج غريبه ترا

 

[عآليه !]

الله يستــر عليــج دنيآ وآخررره

اقطعي علاقتـج فيييه .. وتوبي لله تـوبـة صادقــة وادعي انه ربج يستر عليييييج

 

[نبض السعاده]

الله يستر عليج
البنات ماقصرو بالردود اطلبي من ربج ان يعغر لج يستر عليج

 

[شوق الوليف]

احمممممدي ربج انقرصتي قرصه وفتحتي عيووونج قبل لا يصير أي شي مو زين انسحببببي من حياته وخلي الفضووول عنج نصيييييييييييحه يا غلااااتي تراااا والله الشباب مااااينسوووون يشيبووون وانتي تعجزززين ويعااايرونج فيهااا وبعدين ماعندهم كلمه نيتها زينه او قصدها تعرف حياتي لالالا علطووول دام كلمتي انتي فيج وفيج ............
وانتي ماترضينهااا لا عليج ولا على اهلج وخري عنه عسى الله يكفيج شره

 

[دودي ♥]

الله يسامحج ويستر عليج
شنو تبين بالضبط منه؟
لايكشفج وياخذ عنج فكرة غلط انج راعية خرابيط وشباب فاهمه علي؟
بعدين انتي قايله ان اهلكم مايبونكم لبعض صدقيني اللي تسوينه بيعلقج فيه من غير فايده
لاياخذ عنج فكرة ويقول ﻷخته وتحطين نفسج بموقف انتي في غنى عنه
انسحبي من هاللي قاعده تسوينه واستغفري ربج الرجال اجنبي عنج مايجوز اللي قاعده تسوينه
​

 

[نكتار 2010]

طيب كيف هو ابن عمك وما تعرفيه

المهم لو هو محترم خبريه انك نيتك صادقه وحابه تتعرفي على ابن عمك بس ما عرفتي الطريقه بسبب المشاكل بين الاهل

لو تعرفي انه مو كويس اقطعي العلاقه بطريقه حلوه لان يمكن هو كاشفك بس ما حابب يخبرك ينتظر انتي تتكلمي

هاذا رايي

 

[تبيني آرضى عليك]

البنات ماقصرو
وربي يستررر عليج

 

[dalo0oa121]

شلون انتي عرفتي انه ولد عنك وهو ماعرف انه يصير لج
وبعدين خلاص أكيد عرف دام انه شاف صورتج

 

[طيشن على جديه]

ماادري الله يستر عليج استخيري ربج اذا علاقتكم كانت نظيفه وكان اسلوبكم مجرد صداقه بعيد عن الكلام الساذج والحب والخرابيط اشرحي له واطلعي من حياته ..

واذا العلاقه تطلعج بصوره غلط قولي له انج تبتي واول مره تسوين جذي وحلفيه يمسح الصور بيني له الندم ..


الله يعينج وخليه هالموقف درس لج وان الله يمهل ولايهمل دري بالج ي قلبي ..​

 

[ms_kakawa]

أكبر غلط سويتيه ، بس الحمدالله فتحتي وشفتي وأقطعي علاقتج فيه ولا تدخلين السكايب ، بالمختصر؟انسي انج تعرفتي عليه

 

[وَدَقْ]

انتي غريبه !!!


مواضيعج غريبه وكل فترة حاطة مشكلة مره عرسج بعد شهر ( موضوع من سنة تقريبا) يعني المفروض جده الحين هههه

وموضوع تحبين واحد غير عن مذهبج
ومرة ولد عمج !

انا متحسفة ع وقت البنات اللي ضيعوه وهم ينصحونج
اسئل الله العلي العظيم ان يشفيج من مرض الكذب

 

[granted]

والله انا اشوف انه تعترفين له وتقولين له الي بنيتج ويمكن تكونون سبب وتصالحون بين العيلتين
اهو بالنهاية ولد عمج سترج وغطاج المفروض
انتي اكيد عرفتي شخصيته وفكرة ومن جذي بتعرفين شنوبتكون ردة فعله