ودي اكون البنت الي نشأت بطاعة الله !

[NoNoSha Al-3oba]

السلام عليكم ..

مشكلتي مبينه من العنوان !
ودي اكون البنت ابس نشأت بطاعة الله !
بس مو عارفة شلون
يعني مثلاً لما بطلع الحمدلله لبسي ساتر ما البس الضيج ولا شي جذي لككن
ودي البس عباية بس متردده !
شكلي لان ملامحي و جسمي يعطيني اصغر من عمري بشكثر :/
ودي ادخل دورت تحفظ قرآن بس وين الوقت !
كرررراااف الدراسهه ما يعطي مجال !
ودي اكون البنت الي مالها شغل باحد لكن ماكو تجمع بنات
الا و فيه حش !
والله مليت احاول ابعد يزعلون !
و اذا قعدت وياهم ساكته و ذنوب ذنوب الناس على ظهري !!
و انا ما اتحجيت !
و اذا قلنا سكتو يا الدينهه يا المصلحجيه ويا ربج عشان الله يوفقج يعني ما تحشين
و بعدين تشتغلين حش :/
ماادري شقولكم ، العموم جذي والله !
بذاات بعمري ماكو بنات ملتزمين صراحههه !!!
الملتزمه الي ما عندها خرابيط شباب هذي ملتزمه بنسبة لهم !
و اذا لقيتيها دينه ، تنصدمين منها لو رافجتيها !
يعني صراحهه دينه تدور الزواج بس عشان سمعتي و هالخرابيط ولا بالصج
حقاره و لعانه تنقط منهاا !!

ملييييت صراحححههه مو عارفهه شلون اكون البنت الي نشأت بطاعة الله !
انصحوني شسوي ؟
شلون اكون بنت نشأت بطاعة الله ؟؟؟

 

[Tom ♥ Jerry]

,

حياتي انتي لا تبدين مره وحده بقوة !
لا ابدي بالتدريج .. يعني آول شي خففي ميكب
بعدين لبسي الطلعات السريعه عبايه
و حق الدوام عبايه .. بعدين بتصير عندج العبايه اعتياديا
الحين البنات ماشالله يلبسون عبي و كل عبايه آحلى من الثانيه
وآيد بنات ملامحهم بيبي فيس بس اتينن عليهم العبايه

بالنسبه للقرأن .. اقري بالبيت أول شي
ابتدي كل يوم اقريلج جم صفحه و خصصيلج كل يوم وقت حق القران
مو الا تشتركين بدورة عشان تقرين قرأن
تقدرين تقرين بالبيت بعدين اذا يت العطله اشتركي

 

[A.E]

اوكي اختي الحل عندي ههههه بس والله مافيني اكتب ان شاءالله برسل لك بالخاااص خيتوو

 

[A.E]

يعني بحاول بكره اوبعده بإذن الله اجهز المسج وبرسله وان شاءالله بإذن الله بساعدك بالتغير خيتوو

 

[تحت ظلك]

عندج دور تحفيظ القرآن منها حفظ قرآن + رفقة صالحة + جو إيماني + تشجيع على الطاعة
وشوفي بالنسبة للي يحشون ومدري ويش أنتي لايهمج هذول ماعليج الا من نفسج أستشعري خوف الله دايما
أذا مايسمعون النصيحة قومي عنهم خليهم , هذا الزمان زمان الغرباء في الدين , تلقين واحد ملتزم بين مجموعه كبيره
غريب عنهم بطاعته ودينه وأسلوبه , لأنه بغى الي عند ربه مو الي عند الناس,,

دينج وألتزامج وخوفج من الله وفعل الخير خليه فوووق ع القائمة باأمور حياتج
خليه هو المهم , الراحة مع الله بس , ولا أكثر البشر مامن وراهم الا التعب
أذا شافوج على حق أبدوا كرههم لج ,. بس كوني من الغرباء وماعليج من أحد

بالتفكير والتخطييط أن شاء الله تقدرين تنظمين وقتج وتستفيدين,,

ربي يوفقج لكل خير,,

 

[Vous jamais]

ما شاء الله عليج الله يثبتج على الطاعة حبيبتي

اول شيء اسالي الله الكريم أن ييسر لج رفقة صالحة تعينج على الخير

ثاني شغلة الرفقة الصالحة تلاقينها بمراكز التحفيظ و المحاضرات الدينية

كلش اذا ما عندج وقت للدراسة بالعطلة تقدرين تتطوعين مع مراكز التحفيظ فتتعرفين على صديقات

 

[دلوعة أبوهآ]

آلله يرزقك اللي تتمنيه
ويقويكِ لطاعته ..

 

[غيداء الاحساس]

حياك الله ياغاليه
مثل ماقالن الاخوات

ابدي شوي شوي ماهو كل شي تبدين فيه بقوه

يعني مثلا :

تبدين بعد كل صلاه تفتحين المصحف وتقرين ماتيسر لك ولاتنسين تصلين صلاه قيام الليل

شوفي عندي طريقه حلوه شفتي خاتم الاستغفار خلي على اصبعك طول الوقت عشان لو نسيتي تذكرين الله وادعي ربك

بالنسبه لبنات اللي يحشن لاتجلسين عندهن خليهن اتركيهن ادعي لهن بهداية

بالنسبه لعبايه البسي العبايه الواسعه ساتره انا مثلك اللي يشوفني يقول هذه صغيره بس الحمد الله البس العبايه بعكس الحجاب فرضها ربي علينا شكثر بنات يلبسن عبايه نصيحه لوجه الله لا تتهاونين عليها

وان شاء الله باذن الله ربي يحقق اللي تتمنينه ولاتنسين الدعاء لي ولجميع المسلمين​

 

[ماكواسم2]

ادعيلج ان الله يزيد ثقتج بنفسج لانها مفتاح كل شئ .......... واهم شئ التدرج وعلى خفيف ونصيحه لازم تتاقلمين مع البنات شوفي الجانب الايجابي لا اطحين بفخ البنات سيئات وانا الزينه وشوفي بمنظار الناس مو بمنظارج راح تعطينهم العذر ..... وكل انسان محاسب على افعاله محد شايل ذنب الثاني فمالج شغل بأحد ....

 

[NoNoSha Al-3oba]

يعطيكم العافيه ما قصرتو
بإذن الله بحاول ابدا بتدريج و انظم وقتي مثل ما قلتو ..
بين الدراسه و الطاعه و الله يعين ..
مشكورين مره ثانية على النصايح و الله يعيني عشان اطبقها
لا تنسونا من دعواتكم و لكم بالمثل بإذن الله

 

[لمى الهاجري]

الدين يكون بالخلق في عبادات ما تاخذ منج وقت مثل الاستغفار والتسبيح خلي دايما المسبحة بيدج ودايما عطري لسانج بذكر الله وكل يوم اري البقرة واتبعي سنة النبي صلى الله عليه وسلم واكلي 3 تمرات وتسوكي هاي اقل اشياء تسوينها اما العباية امرها هين هالايام في عبي كشخة وحلوة سوي لج عباية وشيلة كشخة ودام نيتج صافيه الله بيعطيج على قد نيتج

 

[A.E]

يلاه دامي دخلت الموضوع ثاني مره قلت بسدح الرد هنا بدل المسج لانك جديد ومشاركاتك قليله اخااف ما تقدر تفتحين المسج على العموم اختي:
اول شي ابدي بالتوبه توبه نصوحه من جميع المعاصي يعني تركي عنك الاغااني وغيره من المعااصي طبعا بتكوني تاركتها لوجه الله العظيم وحطي براسك من ترك شيئا عوضه الله خيرا منه..
هذا شي الشي الثاني التزمي بالحجاب والستر لان والله يا حبايبي اللي يقولون عباية كشخه حلوه ترى العبايه يا اواتي جزاكم الله خير ستر مو بزينه لان سبحان لما تستري حالك تحسي براحه نفسيه يعني الوحده ما تضمن حالها تموت وهي متزينه بداخل مول ولا مطعم..الخ وايش تموت وهي متبرجه والعياذ بالله لا اختي انصحك بعياايه ساااتره واسعه وبعد مو مطرزه انا بالنسبه لي عندي عبايه راس وكتف بس حاليا اللبس الكتف اكثر واللي يسلمك الحجاب طبعا يغطيني منو وراء ومن قدام يعني الكتف والصدر ومن وراء فهمتي عاد يا اختي ونقاب اللبس والحمدلله كذا مرتااحه واسال الله ان يثبتني بالنسبه لصلاه والله هي اهم شي زمان في بداية مراهقتي كنت شوي اللعب بالصلاه يعني ما اصلي بوقته شكثر تجيني ضيقه بس الحمدلله الحين صرت اصلي بوقتها اسال الله ان يثبتي على الصلاه واساله بالاخلاص بالقول والعمل يارب وان يبعد عنا المعاااصي اختي انا قلت لك مو من باب الرياء لو الله من باب الاقتداء المهم اختي ونصبحه مني عليك بقراءة المصحف لو جزء بسيط مع اني استغفرالله هالاياام صايره ما اقرا بس ان شاءالله برد مثل اول وراح اعلمك جدول حلو اختي وهو انك كل يوم تقري وجه من المصحف بكذا خلاص تحسي شي مهم حتى سبحان الله لو يمر يوم وما قريتي تحسي بضيقه لان خلاص تعودتي ع ذكر الله والتزمي اختي بالدعاء في اوقات الاستجابه وهي وقت ما بعد الاذان ويوم الجمعه وبكل وقت عودي نفسك بالدعاء ان ربي يهديك وييسر امورك ويفتح عليك ابواب السعاده يارب
وكمان صديقاتك قولي لهم بنات خافوا ربكم مو شرط اني ملتزمه وكذا بس خلاص كافي حش بالناس تخيلوا لو ربي يخسف فيكم الارض وانتم تقطعون بجلود الناس قولي لهم وعسى ربي يهديهم اختي ادري قرقرت عليك واجد
اسفه ع الاطاله واتمنى انك لقيتي الفائده بكلامي
واذا تبي اي شي انا حاضر اذا تبي جدول اي حاجه انا عندك اختي لا يردك شي ولا تستحين

أسأل الله عزوجل ان يوفقك دنيا وآخر يارب


بحفظ الرحمن...

 

[روانتي 12]

وعليكم سلام

حبيبتي امشي ع احاديث رسول
اول شي تطبقينه هو ( عامل ناس كما تحب ان يعاملوك )
ثاني شي تستري لبسي عبايه راس و نقاب و دسوس لا تقولين مايصلح شكلي ولا مو حلو ماعليج هذا شيطان يبي يخرب عليج
بس خلي ايمانج قووووي و ياجبل ما يهزك ريح . .
و بعدها دشي تحفيظ القران و احفظي كما ايه و فهمي شرحهها و من بعدها راح تعرفين دين صح
و المكان الي فيه الحش و ذم وووألخ .. انصيحهم لوجه الله قولي حرام .. مايجوز ..ياخذون حسناتكم و انتو تاخذون سيئاتهم ..ومن هالكلام و راح تلاحظين يقولون استغفر الله . . و سمعي مقاطع دينيه و اقري كتب دينيه

وعسسسى الله يهديج لصراطه المستقيم عاجلآ غير أجلآ و يوفقج دنيا و آخره

 

[كلي أنوثة]

(اعمل لدنياك كأنك تعيش ابدا و اعمل لآخرتك كأنك تموت غدا)
خليها قاعدة بحياتج

 

[Tina FJ]

وفقك الله اختي لما يحب ويرضي

 

[حياتي وأنا كيفي]

��السلام��
اختي اول شي لازم تبدين بدايات صغيره مثلا:
- توقفين الاغاني، ترا صج ما راح تحسين بنأثيرها المدمر الا لما توقفينها.
- تنظمين وقتج تنامين مبجر علشان تقدرين تقومين لصلاه الفجر.
-احسن شي علشان تعشقين دينج انج تتعرفين عليه اكثر وراح تنصدمين بالمعلومات الجديده، قصدي شوفي باليوتيوب فيديوات حق اجانب اسلموا راح تنصدمين شلون اهم متأثرين بالاسلام وشلون عندهم التزام رهيب بالحجاب الاسلامي معنه مجتمعهم ما يرحم ، انا بالنسبه لي محاضرات محمد العريفي حيل اثرت فيني تقدرين تكتبين باليوتيوب :محاضره حدائق الموت حيل عجيبه ، وفيه بعد كتب حيل مفيده منها كتب العريفي فيها مواقف بالحياه وشلون كان الرسول( صلى الله عليه وسلم ) والصحابه يتعاملون معاها،هذي الكتب تقدرين تلقينها بجمعيه الخالديه تحت محل تسجيلات.
- الاستغفار حيل مهم يعني الاستغفار يشيل الذنوب و ترا كثره الذنوب تعمي القلب ((كلا بل ران على قلوبهم ما كانو يكسبون)) والران هو الغطاء اللي يصير لما تكثر الذنوب وبعدين يعمي القلب والقلب هو اساس الايمان

وبالنسبه للعبايه فانتي قوليلي الحين اوكي البنات اللي يلبسون بدلات وسيعه هذي البدلات مو ملونه ما فيها شك ما فيها زينه يعني تلفت حتى لو وسيعه قال تعالى(وَلَا يُبْدِينَ زِينَتَهُنَّ إِلَّامَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ ¨َ زِينَتَهُنَّ إِلَّالِبُعُولَتِهِنَّ)) الى تكمله الايه

خلج واثقه من نفسج ولبسي العبايه وما عليج من البنات اللي يحبطون ترا الارزاق عند الله

بالنسبه للقران ترا صج مع الدراسه ما في وقت للحفظ، بس صدقيني في وقت للقراءه يعني بعد كل صلاه حاولي تقرين كميه صغيره
واذا تبين تحفظين القران تقدرين كل اسبوع تخصصين يوم تحفظين فيه كميه تناسبج خلي الموضوع على راحتج، بس اذا عطلتي ترا راح يكون عندج وقت فتقدرين كل يوم تحفظين كميه كبيره وشوفي باليوتيوب فيه فيديوات شلون تحفظين القران

الحين بالنسبه للبنات اللي يحشون ، حاولي تقوليلهم باسلوب حلو يعني قولي الحين فلانه اخذت كل حسناتج و اذا مو راضين يسكتون قومي لما يخلصون وحاولي تدورين بنات من مراكز دينيه او بنات هادين تسولفين معاهم و بآخر الزمان اهل الدين يصيرون اهما الغرباء بين الناس ميخالف خلج بعيده بس حاولي بعد تنصحين
توكلي على الله
والله يوفقج ��

 

[امـل لاينتهي]

انا مثلج احس الدنيا صارت غيير متحسفة اني للحين عايشة بهالزمن احس نفسي غريبة بينهم مومدح في نفسي بالعكس ملياانة ذنووب

بس مثلا رفيجاتي بالكلية قلييل اذا اجوف بنت وماعندها حبيب ولاتكلم والباقي مخطوبات او متزوجين والله جت فترة حسسوني اني

موطبيعية كل هذا بس لاني مومثلهم ماعندي حبيب ويقعدون يسولفون عن قصصهم وانا اسكت احيانا انصحهم اقولهم لويحبكم مايعلقكم

جذي او ابين لهم العيوب الي اجوفها وهم مايجوفونها يعاندون ويقولون جربي تحبين وبتجوفين ووحدة منهم تقول دوري لج بس انا اقولهم

ماحب هالسوالف وموويهي ويه حب بس الحين حمدلله لقيت بنتين مؤدبات وماعندهم هالسوالف بس مشكلة الغيبة بعد مانقدر ننعزل

عن الناس مثل ماتقولين وبنات وايد يجرونج للغيبة وانا الله يسامحني اغلب الاحيان اندمج وياهم ويوم صج خفت من عقاب الغيبة

صرت احاول اقول ماعلينا منها او اقول تاخذ حسناتنا وغيبة يقعدون يقولون احنا ماجذبنا عليها هذا صج فيها ! انزين هذي الغيبة ! والاغاني حمدلله تركتها من تقريبا 3 سنين بس بعض رفيجاتي يسمعون واذا انصحهم

ولايقولون لاتسوين روحج مطوعة مع اني جدا عادية وحتى عباتي فيها بعض الزخارف بس احس المجتمع بعضهم مايشجعون يقولون لي انتي وسواسية او معقدة ووايد كلام بقلبي بس مابي اطول عليج

 

[Ēŋѕαnħ ツ]

الإنسان مسؤول عن نفسه
مالك علاقه بغيرك
كلنا إذا متنا رحنا القبر مااحد معنا
أعمالك الصالحه هيي إللي بتشفعلك بالنهايه < تذكري هالنقطه
الله يغفر لنا ذنوبنا و يبعد عن الحرام​