والحل مع هالزوج ؟ اتركهه ؟ اروح بيت اهلي؟ اكلم امي؟

[شواخي]

كيف الحال؟

والله من الضيقه ما نمت ،،

ما ودي اتكلم بس بحاول اكتب واختصر قد ما اقدر

انا متزوجه من 3 سنين و عندي بنت الحمدلله سنتين عمرها .. عندي زوج استغفر الله مادري ليش ماينام معاي !!!

حملت من سنه و شهرين (برمضان الي فات العام) بكلوميد

وصار حمل خارج الرحم تعبت من المستشفيات سنه كامله اركض لهم الين اليوم !!

من سنه وشهرين ابي ضنا اخو او اخت حق بنتي .. لكن قدر الله و ماشاء فعل

تعبت نفسيتي والله ذيك الفتره خاصه عندي زوج ما يتواجد بالبيت !! يداوم 12 ساعه والله العظيم كله برا واذا يا نااااااايم حتى غدا ياكل بالدوام و العشا ما ياكل ينام خفيف على قولته !!

عابد الشغل عباده والله العظيم ماانروح بر مانروح بحر لا مول لا شي حتى بنته ماتعرفه تسمي ابوي بابا !!

حتى خدامه بالموت ياب لي ! حالتها حاله و لا تعرف تتكلم لا عربي ولا انجليزي !! تبهدلت !!

ماتعرف تطبخ وانا اداوم و عندي ياهل !! و حالتي الصحيه كلش

صار لي احاول احمل من 8 شهور وتعرفون كنها 8 سنين !!

تعبت من هالانسان !! كل شهر بايام التبويض يسوي مشكله !

اقوله انت متعمد انت ماتبي عيال؟ والله العظيم ماحب اشوف حامل (اسفه والله مو حسد بس والله ماعرف ليش )

ربعي كلهم حملوا .. 7 من ربعي ولدوا بعدي والحين بيولدون !

و من اهله 7 الحين بعد حملوا وبيولدون ،، بالعيد الكل يقولي ماحملتي ماحملتي !!

امي صارت تجي معاي مستشفيات عشان احمل !!

اقوله تعال معاي شوف ،، حنيت عليه لين ما يا معاي المستشفى و يزفني بالسياره انتي ليش جذيه مريضه ومريضه ! شكو!!! عذبببني كرهته والله العظيم

هاليومين الي فاتوا اقوله التبويض احين ...يعطيني ظهره !!يقول دوام دوام الصبح !!:eh_s(2):شكو انا بعد دوام الصبح !!

ارسلت له مسج قلت له ليش تسوي جذيه؟ يقول احترميني !!

قلت شدخل الاحترام ،، امس طابخت لك و قاعده ومتغديه معاك !!!

اذا تبي تتكلم قول ! مو تصدمني كل يوم رسميات !!!

والله كرهته وتعبت منه ،، ينكسر قلبي كل شهر لا جات الدوره ،، ماعدت انام ولا اكل ،، ما حب اي شي فالدنيا ،،

افكر اتركهه لان ما يستاهل

مايقعد معاي ولا يسولف ولا ينام ولا يواسي ولا يعرف الرومانسيه ولا الكلام السنع والبخل عنده توب !!!

تعبت ياريت من هالشغل تجيني منه فايده انا اكد وداتبي كله رايح على بيته !!

 

[منـــاي]

واضح انج مجروحه حيل واعتقد الي مخليج تحسين بضغط وتوتر زياده اهو موضوع الحمل

اللهم يهون عليج ويرزقج الضنا الي يبرد على قلبج

بس حطي في بالج شغله : عسى ان تكرهوا شيئا وهو خير لكم

ممكن الله مخبيلج مفاجئه حلوه بوقت حلو وبالنسبه لطبع زوجج

انا من رايي تقعدين وياه و تناقشينه عدل اذا حسيتي مو مال نقاش

فرضي عليه طلعه اسبوعيه مره لج و مره انتو والبنوته عشان تحسين انج انثى حالج حال الحريم

اما مشكلة المصرف انا اعتقد الجفاف العاطفي واااااااااااايد اقسى من الجفاف المادي

وسالفة انه ما يقول كلام حلو خو اشلون يتعلم واهو مجابل الشنبات لوووول المفروض انتي تعودينه على هالشي

بدون ضغوط بس اول شي خصصي وقت لج معاه مو معقوله حياته كلها دوام احس معذور اذا ينفس الواحد تمل تنعل جبده من جذي عيشه

 

[ناتشوو]

الله ييسر امورج ويهدي بالج
انت مشكلتج الاولى علاقتكم المتوترة بالفراش
لا حمال ولا دوام

الخادمة مشكلتج مو مشكلته انت اللي تعلمينها هذا الشي المتعارف عليه
تدريب الخدامة وتعليمة من مسؤولية الزوجة مو الزوج

وبعدين لا تحنين تبويض تبويض
تحسسينه انه الة
اكيد بيتوتر ويخاف يفشل
الاولى تتناقشين ليش الفتور هذا
وتحطين في بالج دوامه الطويل المتعب
انت كأنج تقولين له انامو ميتة عليك بس ابي احمل ابي طفل

واذا بخيل ع البيت خليج بخيلة اكثر بعد
ليش تصرفين
تناقشو باموركم المادية
كل طرف يعرف اللي له واللي عليه

واخذي ملاحظاته لج بعين الاعتبار
فهمي ليش قال احترميني
لا تطوفين شي من ملاحظاته
مو شرط كل كلمة يقولها وهو معصب مايقصد فيها شي
لا مرات يكون شي شايفه عليج

بليز لا تفهمين من ردي اني الومك او اقول انت السبب
بس انا اكلمج كونج الطرف اللي
نعرفه
ونقدر نناقشه

عسى الله يهديه ويسخره لج ويرزقج من حيث لا تحتسبين
ولا تتهورين باتخاذ قرار قبل لا تفكرين عدل

 

[البطه ميمي]

الله يكون بعونج انا مريت بنفس مرحلتج وقلتله ترا انا دفعت١٠دنانير عشان ابرة التبويض ولازم تجامعني اسبوع والاحرام تروح علي الفلوس مالت العياده والمراجعات والابره والحمدلله تمت وحملت بفضل الله لكن قبلها اكثرت من الاستغفار وصلاة التوبه وقراءة القرآن صدقيني يمكن حسد من الناس موشويه ويمكن هو عنده ذنوب الله مايوفقه مع الطيب لكن هو ابو بنتج ادعي وينج عن سهام الليل الدعاءآخر الليل وصبري ولاتيأسين ولاتنطرين منه لأ نطري من ربج اللي خلقج وساعات الصبر يطول

 

[لمى الهاجري]

الحمل هذا من رب العالمين والحمد لله على كل حال بس انتوا لازم تنظمون حياتكم ولما يرجع من الدوام لا تجبين له طاري حمال وما حمال خلوا يومكم عادي

 

[(حكاية قلب )]

الله يكون بعونج حبيبتي

هاي الرياين صعب المرة تفهم لهم

 

[عاشقة الدوحة]

الله يفرج همج عاجلا غيرا أجل .. امين..

والله مادري شقولج،، فكري شنو سبب التغيير ولا هو اصلا جذي ؟

استخيري ،، واهم شيء تتخذين قرار وانتي اعصابج هادية ،، ولا تخسرين صحتج،، لان محد بينفعج عقب.. وفوضي أمرج لله..

 

[جـــواهر]

دام تفكرين تنفصلين عنه ومنتي مرتاحه معاه شحقه دورين الحمل ؟؟؟

الله يعينج والله يسخره لج

 

[گـحِـلْ |~]

طنشي خليه من نفسه يجي
والحمد لله عندج بنت ماتختاجين علاج وتلعبين بنفسج
مايصير شي شلون راح تحملين

عطيه طاف وعيشي يومج صدقيني هو راح يجيج والموضوع يبي له صبر

اخر حل الطلاق

 

[ام فهود وشهود]

حبيبتي هدي بالج والله يسخره لج
لا تهتمين له وديري بالج تروحين لاهلج
نار الزوج ولا جنة الاهل
وعادي مردااا يبي عيال
وشوي وشوي تتفاهمون
والله يهدي سركم انشالله

 

[انثى عاشقة]

اختي اظن نفسيتك تعبااانة ع سالفة الحمل
ترى حتى لو جامعك يمكن مايصير حمل
مدري بس انا ما احب هالاسلوب تعال الحين تبويض
كأننا بنفرخ
هذا الشي يجي من كيف ومزاج مو روتين وشغل وغصب
انتي اتركيه بروحه
والتهي بشغلك وانسي سالفة الحمل صدقيني تتم
اي شي في الدنيا تشغلين بالك فيه مايصير
لا نسيتيه يصير سبحان الله

​

 

[al-musk]

الحمدالله الله رازقج وتو بنتج صغيرة .. الأهم الحين تصلحين العلاقة المتوترة

 

[ناسفه البرقع]

الحمدالله عندج بنووته الهي فيها بعدج تو الناس ليش متأزمه على الحمال هالكثرر

خل ادش الحضانه تالي فكري بثاني

اهوا مو مستعيل على الضـنه شفيج انتي مستعيله

قعدي جابلي بنتج وبيتج وونسي عمرج وونسيها
اشتركي بنادي عقب الدوام

ولا كل يومين روحي بيت اهلج قعدي معاهم العصر عقب ردي بليل

سويلج احلااا عشا حقج وسوي حق بنتج عشا من ايدج بعد بدال اكل اليهال ما الجمعيات

الهي بعمرج وفيهاا

وكشتـي بريل الله يخليج منو الي يدري عنها ريلهاا

روحي وردي معاها واخذي خدامتج معاج العاب ومطاعم وكفيهات وسينما تشرري

مو شرط ريلج دايما لازق فيـج و 24 على 24 قاعد بالبيت

الله يخليـج الريايل اذا مو دوام دوانيه
ببالغ واقولج 10 بالميـه مجابلين حريمهم

والي تقولج ريلي وريلي تره معطيها عشــره صفر

والي تسألج ما حملتي كل فتره وثانيه هاذي ووقحه والوقحـه ردي عليها برد وقـح يجعمـها

وانا اتحجى واقع مو حجي نـت

 

[جوري 2007]

لا خدامة سنعه ولا ريل شايل مسؤوليه ودوام وبنتج صغيره !!! كل هذا وماهمج الا الحمال !!

وبعدين مافي ريال بالدنيا ينجبر عالجماع اصلا مو حلوة كل ساع مناديته ياللا تبويض تبويض

الجماع يبيله حالة نفسيه مستقره والمفروض اهوة اللي يطلب ،، واضح انه اساس مشكلتج حالتج النفسيه ومحاتاتاة الحمل

شيلي هالموضوع من بالج ،، جابلي خدامتج وعلميها وتعبي عليها

جابلي نفسج وعطيها حقها لهي نفسج وونسيها ترى اذا ماهتميتي بنفسج محد بيهتم فيج

شيلي فكرة الحمال من بالج وان شاءالله بتحملين باذن الله سبحانه

 

[Tom ♥ Jerry]

,


براييي انه المشكله منج انتي حبيبتي و بآسلوبج ويا الريال !
اتيين له بالفراش تقولين له يلا خل انام مع بعض عشان ابي بيبي و الحين فتره تبويض و مآدري شنو
خو بينيله انج مشتاقتله بدون هالكلآم ..


يعني فتره التبويض كشخي و خلج على سنقه 10 و سوي عشا خفيف و اشتري عطور و يبيله هديه
ترا لريال مثل الياهل .. لميه قوليله آحبك و اشتقتلج جذي رآح تكسبينه
مو بآسلوبج الجآف هاذا و سوري على كلآمي


بالنسبه لـ وظيفته هاذي طبيعه عمله و انتي تدرين فيها المفروض قبل الزوآج ..
يعني بالعربي مآله دآعي تتحلطمين عليه الحين

 

[popa]

يمكن اهو مخترع من الموضوع لان يتهرب وانتي شويه مرعبه بسالفه يله تبويض تعال
حبيبتي قطعي احبوب منع الحمل وبس مارسي حياتج عادي واذا صار شي بالفراش عادي وان شالله الله يكتبلج الحمل بدون ماتحددين وقت التبويض وهالسوالف موشرط تحملين وقت التبويض لان مجرد ماينزل فيج يتمون في البطن فتره ايام وتتلقح البويضه بوقت التبويض وشكرا

 

[زوجة عزيز]

الله يعينج مايقهرون الا يسئلون ماحملتي قولي لهم اذا حملت بتعرفون صج يقهرون كل شي بيد الله حبيبتي واصبري ولا اتفكرين بالطلاق عذري ريلج يمكن تعبان من الشغل

 

[noooor2012]

الحمدالله الله رزقج بنت من اول سنه زواج وهذي نعمه من الله غيرج مو محصلها وثاني شي تقولين ثمان شهور علاج كانها ثمان سنين عيل هالحريم الي الله ماكتب لهم ضنا وقاعدين سبع وتسع وعشر سنين ينتضروون ومتاملين في الله خير انتي في نعمه بس مو حاسه فيها اذا همج تبويض طاف موعده في ناس تطوف سنين وماينفع معاهم لاتبويض ولا غيره الحمل بيد الله سبحانه يرزق من يشاء وزوجج يدور علي راحته بيته مو علي المشاكل والحنه وعوار الراس خصوصا انه يرد من شغله تعبان وهلكان

 

[حبي غالي]

يمكن خيره ،؛ وتذكري دايما هالآية....،؛
{عَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} صدق الله العظيم

والله يعينج ...،؛
ويسهل أمووورج ويرزقج بالذرية الصــــآلحــــــــة
​

 

[طموح دائم]

انتي متأذيه من اسئله الناس ومراجعات المستشفي هذا اللي اثر علي نفسيتج ولا مافيج الا العافيه حاولي تهدين جذيه واخذي نفس عميييييق وفكري بهدوء وقولي الحمدالله يارب علي الستر والنعمه اللي انتي فيها غيرج مو محصل ضني خلي ايمانج بالله قوي وتقبلي الامور بما هي عليه مع المحاوله بتحسينها يعني حاولي تطلعين معاه مكان وتناقشون بموضوع الحمال ثانيا لا تخلين هالامور تضغط عليج وعلي نفسيتج وينعكس علي زوجج من غير ماتحسين ولا تظنين انه اهو مو مهتم يمكن هروبه للدوام اهو سبب ضيقته يمكن تحنين علي الحمال تري المال والعيال رزق من رب العالمين ماتدرين متي وشلون بتحصلينهم وكثري الدعاء وضرووري تهدين