هل معاي حق احزن و اتضايق ؟ شتسوين لو انتي بمكاني؟

[هب العطر]

السلام عليكم خواتي
انا مو هب العطر بس داشه بحسابها بعد اذنها
بقول لكم اللي بقلبي
ويمكن انا تكلمت قبل بمشكله سابقه تتعلق بناس خطبوني واني محتاره بين اثنين

قبل فتره اخطبوني 2
ولد عمي اللي احبه و فيه كل شي تتمناه اي بنت بس في مانع حكومي يمنع زواجنا
و خاطب يديد تقدم لي

و طبعا صارت الظروف و صرت من نصيب الخاطب اليديد عشان المانع الحكومي
الخاطب اليديد ما فيه ولا 10 بالميه من ولد عمي
لا مرح و لا خفه دم
ثقل مصطنع و دم طين
جااااامد ما يحب الانطلاق
كل شي فيه يجيب الاحباط
عشت ملجتي وانا ميته بالحياة
قلبي يبجي
مو عشان ولد عمي و بس
لا
هالخاطب فعلا ما يونس
ودايم يهاوش و يبربر و يحن و يتحكم
وبعد
اكتشفت انه بخييييل

و تزامن زواجي مع ظرف قاهر جدا
و طبعا زوجي الحلو استغل الفرصه و فركش الزواج
حتى حفله ما سوا لي
و لا اي شي
سكيتي بكيتي

عقب ما تزوجنا طلعت الفناتق
البخل اللي فيه حرمني من السفر
حتى شاليه ماكو
فندق ماكو
تبين؟ انتي دفعي كل شي انا ما عندي

مصرف يعطيني فلسين
و احيانا يخصم منهم اذا بالغلط شرالي شي
يخصم المبلغ !!

يوم و الثاني يلمح ع الحريم اللي يشترون و يعطون رياييلهم
و انا طبعا مستحيل اصير نعجه انام مع ريال واعطيه فلوس ؛ مستحيل!

هواش و طقاق معاه و وصلت للاهل
تعدل شوي تالي رد
صرت انجنب افتح معاه اي موضوع يخص الفلوس

و حملت بتوأم
شال ايدينه عن مصاريف المستشفى كلهاااا
انا كل شي ادفع
اشعات و سونار و ادويه و كل شي علي
و ايضا طفح الكيل و تهاوشت معاه تالي شوي تعدل و الله يستر لا ينقلب

هو فيه اشياء زينه
ما اظلمه لا و الله
فيه صفات حلوه تعجب الوحده فينا
ونادره بهالزمن حييييل

بس بخله ملوع جبدي
و مخوفني من باجر معاه
و مخوفني على الاثنينه اللي ابطني منه

تخيلي
مالج امل تتدلعين على ريلج اييب لج شي
ماكو امل تسافرين او تروحين شاليه
ماكو امل تحسين باحساس الحريم لما زوجها يشتري لها
او يعطيها شي
ابد
ما يحب الناس و لا اليمعات
بارد
ساكت
ما ينطق الا بشلعة الروح
فرفشه الشباب و شقاوتهم ما عنده
ما يمدح ولا عمره مدح شكلج او كشختج حتى و انتي عروس
حتى بيوم دخلتج ما مدح شكلج
حتى كلمة ما شاء الله ما قالها عشان يجبر بخاطرج

اللي يسمعني يقول يمكن انا جيكره
لا و الله ماني جيكره و لاني ملكه جمال
بس اللي يشوفني يقول حلوه الحمد لله


وانا معاه احس انه يتعامل مع قطعة لحم !
مو مع مره
شفتي اشلون الواحد اذا بغى يشتري قطعه لحم اشلون؟
بدون مبالغه ؛ جذي

اسفه ترا بقول شي محرج
بس من غيظي اقوله
ويهي ما يقرب صوبه كلش
على طول جسمي
الويه هذا اللي وايد ناس يقولون حليو وبيبي فيس
ما يعبره كلش
كلش
الا بشلعة الروح
انا اللي اعرفه ان الريال يميل انه يقبل زوجته
ع الاقل خدها
هذا لا
على طول للجسم
ابي مره يمرر ايده على خدي
مع ان ويهي يا ربي ما يخرع يعني
ابد
و هذا يخليني ما احس معاه بأي فرح او متعه مثل باقي الحريم

و ترا لمحت له
وكلمته
بس ايضا يظل يتصنع و اغلب الاحيان يسحب على ويهي

اقول له شنو احلامك؟يسكت
شنو تتذكر مواقف حلوه او فكاهيه ؛ اي شي ؟ ماكو


احباااااط احبااااط
حتى صفاته الزينه اللي فيه ما تشفع له
احيانا احس ان ربي راح يعاقبني لو تضايقت من هالاشياء
واحيانا احس اني بشر يحس و يشعر و ربي ارحم الراحمين


شيروا علي

و مشكورين

 

[هب العطر]

13 مشاهده ومحد رد
وينكم بنات ؟؟

 

[ايمان7]

الله يعينج أختي ويمسح على قلبج
عشان تبتدين حياة فيها شيء من راحة البال لازم تمحين كل المقارنات بين ولد عمج وزوجج هذا أولا
ثانيا كل رجل فيه عيوب
موضوع البخل بعض الرجال لهم وجهة نظر فيه ..منهم يعتقد انه حرص ..وبعضهم يظن أن في شغلات أولى من غيرها..والبعض الآخر
يكون بخيل بالرومانسية
حاولي تركزين على ميزاته وتبرزينها له ..امدحيه خليه يسمع منج الكلام الطيب عشان بالمقابل ينرد لج هالتصرف
ابتسمي بوجهه ...امسحي على راسه وصدره وادعي بقلبج ان الله يألف بينكم
لاتكونين حنانة أو تفقدين ابتسامتج ببيتج ..كل تصرف تسوينه حطي الله بين عيونج وقولي يارب أنا سويت وتحملت علشان أفوز برضاك
كوني مع الله وصدقيني ربي راح يكون معاج وبنسمع اخبار حلوة ان شاءالله
كل مشكلة الحل يكون بيدنا وبالقرآن والسنة بس نحتاج من يذكرنا ..ترى سيرة الرسول الكريم فيها حلول كثيرة لمشاكلنا الحالية
::

اللهم ألف بين قلوب المتزوجين والمتحابين واجمعهم على طاعتك ورضاك يارب العالمين

 

[Aloe Vera]

حطي فبالج انتي في هالدنيا دار بلاء و انا مابي تزعلين بس لمن شفتيه بخيل و مو عاجبج من ايام الخطوبة ليش كملتي معاه؟ و ليش ملجتي و انتي مو مرتاحة ؟ ترا هذا زواج مو لعب انا زوجي درسته عدل قبل لا اتزوجه و هم بناتي ماراح اخليهم يتزوجون الا و احنا دارسين الريال عدل عدل الحين ادعي ربج يهديه و خليه يصرف عليج شوفيلج طريقة و اخذي دورات و اقري كتب عن التعامل مع الزوج لان زوجج حالته يبيلها علاج و شكثر في دورات عندج الدكتورة ناعمة الهاشمي و غيرها و كتب المترجمة مثل الرجال من المريخ و النساء من الزهرة و الله يساعدج و يفرج همج

 

[حبي حبيبي]

ما تنلامين حبيبتي

كثري من الدعاء والله يهديه لج

 

[كاملة الدسم]

الاحساس اللي تحسينه طبيعي لانج حبيتي شخص وتعلقتي فيه وفجأة تزوجتي شخص ثاني مختلف تماما
انتي قلتي فيه صفات زينة ونادرة الحمدلله هاذي نقطة ، بالنسبة للفراش مع الوقت بيتغير وبترتاحون وتنسجمون
اما البخل فهو مشكلة حقيقية الله يعينج عليها الرجل البخيل جدا مقزز والبخل ممكن ينسف كل الصفات الثانية الزينة
يبيلج صبر وطولة بال وكر وفر عشان تروضينه ويرخي ايده طلبي منه مصروف شهري خليه يصرف عالبيت من الئ ويعطيج شي بيدج لو خمسين دينار هالشي راح يخفف من اللي تحسينه واااايد
بالنسبة للسفر والشاليهات والتفيير انتي حجزي مرة علي حسابج باللوسيزن وروحوا واستانسوا يمكن اذا شاف المصاريف معقولة واستانس وكيف يتغير مع الوقت كل شي يبيله صبر ياحبيبتي ماكو زوج كامل واذا اخلاقه زينة وصاينج مايغلط عليج ولا يخونج الحمدلله معناته معدنه زين والامور الثانية مع الوقت والصبر واصرارج عالتغيير راح تتغير

 

[هب العطر]

فديتكم حبيباتي
ناطره باقي الردود

 

[shak!shoka]

الايام بتغيره
والعيال بيحركون احاسيسه بس طولي بالج

وشيييييييلييييييييييي ولد عمج من راااااسج
ولا تقارنين



هذا سر تعاستج

تقبلي زوجج بكل صفاته و حاولي وجاهدي تغيرين البخل الي فيه
قولي حرص زايد ، يمكن يبي يخش فلوس و يجمع للمستقبل


طولي بالج و ادعي ربج يسخره لج

وعسا الله يسهل عليج و تشوفين عيالج و تتغير حياتج معاه للاحسن

 

[أم حسوون]

السلام عليكم ، أقولج شي ، ما فيه شي ما يتغير صدقيني ، بس عليج في البداية انج تمسحين ولد عمج من راسج علشان ما يصير فيه مقارنه ، ثاني شي شكلج عقلانية بدليل انج ذكرتي أن فيه صفات حلوة ، المطلوب أنج تركزين عليه شوي قصدي تحاولين تكسبينه ، شوفي شنو يحب وشنو يكره ، احترميه قدريه افتحي معاه حوار ، خلكم قراب من بعض ، علشان تقدرين تخلينه يغير من بعض صفاته خصوصا البخل ، انا أعرف ناس معروفين بحرصهم بس ما شا الله حريمهم قدروا عليهم وعايشين معاهم بعز ، بس أنت طولي بالج وعليج بالصبر والدعاء وحببيه فيج ، والله يألف بينكم .

 

[بيت التوت]

طولي بالج حبيبتي

اعرف وحده زوجها بخيل بخيل حده وبشطارتها

خاته خاتم بصبعها ويعطيها كل اللي تبي

مافي شي يجي بالساهل

ومحد مرتاح بحياته ولا في انسان كامل

 

[بيت التوت]

طولي بالج حبيبتي

اعرف وحده زوجها بخيل بخيل حده وبشطارتها

خاته خاتم بصبعها ويعطيها كل اللي تبي

مافي شي يجي بالساهل

ومحد مرتاح بحياته ولا في انسان كامل

 

[Pink_Roses]

مالج الا تصبرين عليه وتحاوليت تغيرينه بعد انتي تدبستي بالعيال

 

[Tom ♥ Jerry]

.
مادري شقولج صراحه..
انتي غلطتي مرتين .. لما تزوجتيه و لما حملتي بس الحمدلله على كل حال و الي صار صار!

لما تزوجتيه كان المفروض ترفضين .. مو معناته في شي ما يخليج تتزوجين
ولد عمج تروحين تقطين نفسج أي قطه!!
حسستيني ماكو الا هالريالييين الي ممكن تتزوجينهم /:
شدعوة ترا في مليونين ريال غيرهم!!!!! فقدتي الامل من ولد عمج رحتي حق الخيار الثاني على طول /:!
مليون مره اقول البنت لازم تتريث و تستخير مليونين مره قبل الزواج
هذا زواج مو لعبه .. هذا زواج يعني بيت / مسؤوليه / حب / احترام / تقدير / يهال / عمر / عشره عمر !!!


و غلطتي يوم حملتي انا دايما انصح انه البنت تنطر شوي ، تاجل سالفه الحمل شوي
بس على ما يتوالمون الزوجين مع بعض !! تسأل نفسها بعد فتره هل يصلح يكون اب ؟
اذا تدرين انه ما يصلح يكون اب و رحتي حملتي منه يعني جذي قاعد تظلمين عيالج /:
شنو ذنبهم يكون ابوهم بخيل أو مافيه حنيه أو مآ يعرف الحب !!!
الحب و الاحترام والتقدير و الحنان مو بس حق الزوجة ، حق العيال بعد


المهم الحين مثل ما قلتلج الي صار صار حبيبتي،
الله يسهل عليج آنشالله و يقر عينج بعيالج و تكبرينهم و يصيرون دكاتره أد الدنيا
و ابوهم : سجلي عيوبة لو بورقه و قلت عادي!!
و شوفي شنو الشغلات الي في آمل آنج تغيرينها علاقل اذا مو عشانج عشان اليهال الي ياييين بالطريج


طبعا ماكو آحد ما فيه عيوب و ماشالله رياييل الكويت متروسين عيوب
بس شي حلووو آنج تقللين من هالعيوب
و تذكري كل شي يبيله صبر شوي شوي .. و كل شي عشان يلين معاج و تقدرين تغيرينه و تتحكمين فيه لازم تعاملينه بالحب بالحنيه بالسياسه يعني خليييييه من كثر ما يحبج يخضع لج و يغير اشياء عشانج و يسوي اشياء مو مقتنع فيها عشانج و يسوي اشياء ما يحبها عشانج ..

يبه بالكويتي خرفنييه ههههه

 

[Tom ♥ Jerry]

طولي بالج حبيبتي

اعرف وحده زوجها بخيل بخيل حده وبشطارتها

خاته خاتم بصبعها ويعطيها كل اللي تبي

مافي شي يجي بالساهل

ومحد مرتاح بحياته ولا في انسان كامل

هذا الي اقصده :eh_s(22):
كل بنت و ذكاءها استخدمي انوووثتج و اغراءاتج عشان تخلين الريال خاتم بصبعج
بدل لا تقعدين و تتذمرين .. فكري شلون تلينين راسه :eh_s(7):

 

[متواضعة]

الله يفري همج ويسر امورج ويسخر لج ريلج

 

[الأميرة جوري]

الله يعينج .....ادعي ربج يفرجها عليج

 

[هب العطر]

خواتي حبيباتي مشكورين ع الردود

اول شي انا وقفت مقارنه بينه و بين ولد عمي من زماااان
و ترا في بعض المقارنات اللي صارت قبل يت من صالح زوجي الحين
يعني هو طلع احسن بوايد اشياء


انا ما وافقت عليه عباطه
انا رضخت تحت ظرف صعببببببب حييييييل
و ضغط موووو طبيعيييي و الله
خلاني اوافق عشان اهرب بجلدي من اللي ناطرني بالطريج
تعرفون سالفه البحر من وراءكم و العدو من امامكم ؟ جذي


و يشهد الله من اول ما ملجت عليه و انا مبققه عيوني على ابسط ميزه فيه و احاااول اكبرها بعيني
و ترا زوجي فيه اشياء زينه محد يقدر يتعامى عنها
الحب و الحنيه غررررررقته فيهم غرق
و المدح
و الظن الطيب و اقول له ترا انا ادري ان فيك جذي و جذي صفات حسنه
و فعلا لقيت تحسن و الحمد لله بوايد اشياء
و رضى هو عني

بس دايما يحسسني اني مو شي!
يرز علي المترديه و النطيحه و اييب سوالف بنات عايلتهم جدامي
و الله لو تشوفين اشكالهم
لا ترتيب و لا هندام و جمالهم متوسسسسط
يعني من طقتي و يمكن اقل


قلت يمكن ما يبيني اشوف نفسي
ما يخالف
بس السالفه زادت حيييل
ثار يتذكر جدامي طفولته ويا فلانه
و سالفته مع علانه
و فلانه و علانه جياكر مياكر خخخخخ اللهم لا شماته
اييب السالفه يقطها قط بأذوني و يحفرها حفر و يكررها
حتى اذا وحده منهم عندها كلمه تكررها صار يستخدمها معاي بالبيت

شنو هالتحقير المتعمد ؟!
جذي حتى لو اني متزوجته عن حب راح اشيله من بالي و فورا!

تابع

 

[هب العطر]

ادري التعديل يحتاج وقت
بس انا مابي شي اوفر
ابي بس احس اني زوجه تنحب
ان فيني شي زين
صرت اكشخ للناس اكثر مما اكشخ له
مع ان كشختي ترا لنفسي قبل كل شي
بس معاه ماكو حماس بالتكشخ


ما عنده اكشن بالحياة
فرفشه و ضحك و تغيير جو
كله اشياء و طلعات عاديه و روتين يبط الجبد
ابي استانس
ابي احس اني عروس مالت على حظي خخخخخخخ
ترا ما صار لي معاه وايد
ابي شعور اللي زوجها طاير فيها
انا مو ناقصني شي و هذا بشهادة اهله واحد واحد
دايما يمدحوني و يشكرون فيني و بسناعتي و بشاشه ويهي
و ان ويهي بشر و احب اتبسم
ليش انا محرومه من هالشي؟
اذا ما لمحت الاعجاب من زوجي
الاعجاب اللي على قدي ؛ مابيه يكذب و لا يبالغ
لا
اللي على قدي يعطيني اياه
مو جذي

اذا ما حسيت بهالشعور من ريلي احسه بالله من منو مثلا ؟
و بعدين انا متزوجه كبيره
يعني تخيلي الصدمه و قوة الطراااق اللي احس فيه !!

ريلي ايي لي البيت محرررض و مدرس عدل
الخبل شايفني صاينته و مراعيته يقوم يدور علي الزله و يسمع فيني اللي يسوى
و اللي ما يسوى
و اذا عصبت و طربقت الدنيا على راسه صحصح من الغيبوبه و استوعب
بس عقب شنو ؟
عقب ما يهز بدني و يلعن خيري
شوروا علي خواتي
ابعرف راسي من ساسي

 

[اكسبلانكا]

الله يعينج ويصبرج ادعيله بصلاتج وان شاء الله يتغير

 

[هب العطر]

السلام عليكم ، أقولج شي ، ما فيه شي ما يتغير صدقيني ، بس عليج في البداية انج تمسحين ولد عمج من راسج علشان ما يصير فيه مقارنه ، ثاني شي شكلج عقلانية بدليل انج ذكرتي أن فيه صفات حلوة ، المطلوب أنج تركزين عليه شوي قصدي تحاولين تكسبينه ، شوفي شنو يحب وشنو يكره ، احترميه قدريه افتحي معاه حوار ، خلكم قراب من بعض ، علشان تقدرين تخلينه يغير من بعض صفاته خصوصا البخل ، انا أعرف ناس معروفين بحرصهم بس ما شا الله حريمهم قدروا عليهم وعايشين معاهم بعز ، بس أنت طولي بالج وعليج بالصبر والدعاء وحببيه فيج ، والله يألف بينكم .

تكفيييييين علميني شنو سووا عشان يحلون مشكبه البخل
لاعت جبدي من بخله و تحسب الفلوس
ما حسيت بالفقر الا يوم شفت تصرفاته ههههههههه