.. هل آتنـآزل عن حقي الشرعي .بالسكن المستقل اللي مسبب لي آلم وضيق نفسي ..!!**

[مــســك]

صـبآح الخيـر بنآآإت .. ​

آممممم .. مآدري شقول ب الضبط ..​

لكـن سمعو الي بقوله ..​

آنا لمآ آنخطبت .. وتمت الخطبه .. قالو شنو شروطكم .. قلت سكن مستقل / الوظيفه .. وآفقو ..​

علمًاً آن اهله حموولــة .. وبيتهم مآ يكفي .. يآلله لهم ..​

المهم .. تمت الملجـة .. ولمآ جآبو المهر .. جآء آبوه و زوجي .. ​

آبو زوجي كلم آبوي وقاله تكفى طلبتك ما ابي ولدي يطلع .. ابيه يقعد عندي وراح نحط شقه لها على كيفها ..​

آبوي آستحى وقال بكيفكم ..​

جآء ابوي وكلمني .. آنا رفضت وقلت يبا مابي .. بيتهم حكومي وما يكفي وين بيحطوني واهم حموله ..؟ ​

رفضت وزعلت ..​

وآبوي مستحي حيل .. قالي خلاص انا عطيته كلمه وما اقدر اقوله شي .. واهو بيقول راح يحطون لج شقه ..​

سكت وقلت لآبوي عشانك بس وافقت ..​

تم الزواج .. وآهني الصدمه لماا دخلوني على الغرفه :eh_s(2):​

قلت بقلبي وين الشقه ؟؟ وين الي يقولون لها باب خآرجي ؟؟​

بنات حاطين لي غرفه نوم .. وغرفه صغيره حيييييييييل حاطين فيها تلفزيوون ..وهالغرفه صارت مثل المخزن .. مآجله البيت .. مشر الملابس .. تكرمون جواتيي .. يعني شقول شخلي .. ​

وطبعن اكيد حمام .. ومطبخ تحضيري صغيييير حيل .. يعني يالله الي يدخله شخص واحد وبس ..​

المهم .. بلعتها وصبرت وتحملت ..​

صار لي سنه ونص من خذيته ..​

سآلت شيخ عن حالتي .. قالي هذا حقج الشرعي ولازم الي طلبتيه يسونه .. وجزاج الله خير انج متحمله ..​

حريم حمواني كلهم ب شقق ومستانساات الله يهنيهم .. ​

بنات زوجي مو وحيد اهله لا .. عنده اخوو اكبر منه وعايش مع اهله ..​

بس زوجي معتمدين عليه اكثر من اخوه ..​

بنــآت .. آناا ما قمت اتحمل خلاص ابي حقي شرعي الي شرطت عليهم واهم وافقو عليه .. لي الحق ولا لا ؟؟​

فوق هذا والله مكاني حييل صغير ويجيب لي الضيقه .. وكله اتضااايق .. واقوله والله خلاص ما اتحمل تجيني ضيقه وكوابيس بهالمكااان .. ​

قالي اصبري مو الحيييييييين ؟؟ ليمتى خلاص صبري نفذ ..​

عطيته مهله يفكرر .. ي يطلعني .. ي بكيفه ..​

مرت حماي حيل معاي وحبوبه قالت لي كلمي آمه واشرحي موقفج ..لهاا ..​

آنا مشكلتي حيوويه وآستحي آكلمها .. معنى خالتي الحمدلله طيبه معااي حييييييييييييل ..​

بناات شسووي انا ابي من زوجي اهوو يطلعني ويعرف ان هذا حقي وشرطي ..​

وآني قبلت بالبدايه عشان ابوي وابووه .. والحين من حقي لي شقه آستقلاليه حريــه ..​

آنا محتارة شسووي .. ما اقدر اعيش بهالمكان اكثر من جذي ..:eh_s(2): وفوق هذا من غير الازعاج ما اقدر انام مرات

وحتى زوجي اذا جاء عندي بس يدقون عليه اهله واخوانه وينك يلا تعال .. واهو يستحي منهم ويطالع فيني ويقولي بنزل .. قلت له انت من متى تقعد عندي يآ دوب تجي تآكل وتنام .. خو آنا فندق :eh_s(4):
​

آنا الوحيده الي من حريم عيالهم سكنت عندهم .. للعلم حريم حميآني كلهم شرطو شقه ؟؟ ونفذو طلبهم ؟؟​

شمعنى آنا بموت والله .. والله للحيني متحسفه آني وافقت وقبلت آسكن بهالمكان ...​

شسووي الحين .. كلمته مرة ومرتين وعشر .. وعمك آصمخ ..؟​

آكلم امه ..؟ هذا هو الحل ..؟ واذا ما رضت شسووي بعد ؟؟​

 

[ديانا سبنسر]

مانصحج تكلمين امه الموضوع بيد ريلج هو يحله امامسالة انتي تروحين لامه وتقولين لها خالتي ابي شقة موحلوة لابحقج ولابحقه الحل الوحيد يبني لج شقة عندهم اشوفه حل وسط بين رغبتج ورغبته انه مايخلي اهله قولي ابني لي شقة 3غرف ومطبخ وحمام وباب خارجي لخصوصيتج جذي مسكتي العصا من النص حني عليه تدلعي ساحيه سوي كل الطرق اكيييد راح ينفذ طلبج

 

[امـ خــزامـى]

^^^^
راائي من رائي اختي الحلوه اللي فوق


وعسى ربي يسهلها عليك

 

[ناتشوو]

اول شي
ماانصحج بالمبالغه بتعميق العلاقة مع مرت حماج
عن سكنج
وتفضفضين لها لي هالدرجة
وتعلمج الايام
عن الحدود اللي تحطينها بسوالفك


بالنسبة لابوج صراحة ماالومه الموقف محرج

بس شنو ردة فعل زوجج
بس يسكت ولاعنده مبرراته؟
عنده اخوانً اصغر ساكنين معاهم؟
وهل هي فعلا ضيقة ولا انت كارهتها وموقادرة
تتأقلمين او تحبينها
وع فكرةموشرط السكن المستقل
بيقطع التواصل بينه وبينهم

واخيرا
قلتي لابوج؟
انا احيان كثيرة
احب الحلول الرجالية
لانها ماتخطر ع بالنا
انا مااعرف نوع العلاقة او القرابة
بس اذا في مجال الام او الابو يتكلمون
انهم وافقو متوقعين
مكان اوسع للبنت
وهذا كان شرطنا الوحيد
واحترمنا رغبتكم وخليناها تسكن معاكم
والبنت مو مرتاحة
مع انها ماشافت قصور منكم

وياليت لو فعلا يقتنعون وتبنون لكم شقة واسعه بباب
خارجي
والله انا اشوف استقلالية العيال بالسكن
اريح للحمولة قبل لا يكون راحة لمرت الولد

 

[حبيبي مالكني]

اسمحيلي الغلط غلط ابوج
اهو صج كان شرط من شروط عقد الزواج لكن ابوج وافق يتنازل عن الشرط
يعني ما تقدرين تقولين حق ريلج انك ما احترمت الشروط
روحي كلمي ابوج وشرحي له حالتج وان نفسيتج اتعبت وايد وان اهم ما سكنوج بشقة مثل ما قالوا حق ابوج
خلي ابوج يتفاهم مع الي تنازل عن شرطج معاه الي اهو عمج
خلي سالفه بينهم
بس صج الله يعينج الضيج كريه

 

[iLLuMinaTion]

الله كريم

 

[#laloo]

بالعكس رايتج بيضه مافشلتي ابوج وجذي كبرتي بعينهم كلهم انج وافقتي عشان خاطره
بس من رايي لا تلجاين لخالتج لانه مهما كان ولدها ماتبيه يطلع كلش
ومرت حماج لا تفتحين قلبج لها باجر تدور الدنيا وتطلع كل كلامج وتزود عليه بعد
كلمي ريلج وحاولي تتفاهمين معاه مره مرتين بيحقر لكن من يشوفج مصره بيدور لكم حل
ولا تدخلين احد من اهلج وتكبرين المشاكل
بالعكس خل الطلعه اتيي من ريلج .. الله يوفقج

 

[سمو النفس]

نصيحه لاتكلمين خالتج ماها شغل بالموضووع الاسااس زوجج اقنعيه يا يبني لج عندهم شقه او تطلعيين بشقه ،، وزوجه حمااج لا تعمقين معاها وتقولين لها كل شي لازم يكون بينج وبينها حدود

 

[You FOR Me Only]

الله يعينج

انا من رايي شكله زوجح مايبي يترك بيت هله فخل يبنون لج شقه اكبر جي بترتاحين منها ماتكونين طلعتي ومنها تكون لج خصوصيتج

 

[مدام الباشا]

الله يفرجها عليك حبيبتي
وانا زي البنات ما انصحك تدخلي خالتك بالموضوع
وخلي ابوك يدخل ويكلم عمك وزوجك
وحبيبتي نصيحتي لك اكثري من الاستغفار

 

[دلوعة أبوهآ]

كلمي زوجك واقنعيه ولآتدخلي احد بالموضوع
ونصيحه لآتفضفضي لمرت حماكِ ولاتتكلمين معها بامورك الخآصه ..

وآلله يفرج همك

 

[وردة وطني]

اول شي
ماانصحج بالمبالغه بتعميق العلاقة مع مرت حماج
عن سكنج
وتفضفضين لها لي هالدرجة
وتعلمج الايام
عن الحدود اللي تحطينها بسوالفك


بالنسبة لابوج صراحة ماالومه الموقف محرج

بس شنو ردة فعل زوجج
بس يسكت ولاعنده مبرراته؟
عنده اخوانً اصغر ساكنين معاهم؟
وهل هي فعلا ضيقة ولا انت كارهتها وموقادرة
تتأقلمين او تحبينها
وع فكرةموشرط السكن المستقل
بيقطع التواصل بينه وبينهم

واخيرا
قلتي لابوج؟
انا احيان كثيرة
احب الحلول الرجالية
لانها ماتخطر ع بالنا
انا مااعرف نوع العلاقة او القرابة
بس اذا في مجال الام او الابو يتكلمون
انهم وافقو متوقعين
مكان اوسع للبنت
وهذا كان شرطنا الوحيد
واحترمنا رغبتكم وخليناها تسكن معاكم
والبنت مو مرتاحة
مع انها ماشافت قصور منكم

وياليت لو فعلا يقتنعون وتبنون لكم شقة واسعه بباب
خارجي
والله انا اشوف استقلالية العيال بالسكن
اريح للحمولة قبل لا يكون راحة لمرت الولد

كلامه عين العقل

بالتوفيق

 

[جذابه بنت ذيابه]

كثر الدق يفك اللحام

يوميا كلميه .. والله يعينج يارب

 

[جذابه بنت ذيابه]

كثر الدق يفك اللحام

يوميا كلميه .. والله يعينج يارب

 

[PuPa^^SWeeT]

شكله ريلج بعد مايبي يطلع



خالتج لاتكليمنها لانها بتحتر خصوصا اتقولين هذا ولدكم اللي يعتمدون عليه



مادري انا لو مكانج و اشوف ريلي جذي


عالاقل اضمن لي مكان

اقووله زييدني غرفة عالاقل احط فيها صالتي



و الغرفة الثانية مخزن





مادري انا هذا تفكيري على قولتهم الجود من الموجود




بس انتي كلمي ابووج و شوفي بعد شنو يقوولج

 

[مــســك]

مشكــورين بنــآت على رآيكم الكـريـم ..


بخصوص الي سآلتني شنو صـلة القرابه بيني وبين زوجي .. اهو يصير لي من جمآعتنا .. وأمه تصير لآهلي ..


بنآت آنا قلت له يبني لي شقه فوق بالسطح يصير دور ثآلث لي .. عطيته الحــل ..


بس للآسف رفض وتنح .. وقالي تبيني آخذ قرض عشان آبني دور ..؟؟؟


قلت انت الي تسكرها من جميع الابواب .. آنا زين مني متحمله وصابره وانت ما تحس فيني .. كله تطلع برا وانا محكورة مثل حكر الفآر ..!!

ووربي سبب لي آلم وضيييييييييق نفسي حييييل وآحس آني مكتئبــه .. وفضفضت لآمي وقالت لي خلاص اذا ما يبي يبني لج ... كلمي آمه ..

بحآولآكلم آمه اذا ما رضى يسوي شي ..! خلاص اهم شي نفسي ..


بنات انا بجد متحسفه اني رضخت للآمر الواقع وافقت وتنازلت عن حقي .. هذي غلطتي .. وآتمنى اي وحده تشوف موضوعي ما تتنآزل عن حقها آبدن آبدن ...



والله كــريم يآرب ..

 

[سمراء كويتية]

حبيبتي قعدي على قلبه و خليج اسنع من السنع عند اهله و من جهه ثانيه كلمي ابوج وشرحيله قوليله يا ينفذ ابوه وعده و كلمته الي يقولون عنها كلمة ريايل و يحطلي شقه و لا ترى باخذ اغراضي وبيي عندك وانت ابوي ملزوم فيني وخليه يكلم ابوه ويسأله عن الشقه ويفهمه انج متضايقه حيييل و ان مو هذا كان اتفاقهم

احنا شنو ضيعنا غير طيبة اهلنا

 

[مــســك]

سمرآء آي والله .. محد ضيعنا غير طيبه آهلنا وحيآهم ..


المشكله مو راضي يبني .. يعني لآهو مخلي رحمت الله تنزل ولا شي ..!!!


عقدني .. مستانس على هالمحكر .. اهوو يطلع ما يجي الا حزت النوم .. يعني مو حآس بالضيقه الي انا فيها ..


والحمدلله البيوت وايد والآيجارات شكثرها مترسه ترس الديره .. والحكومه مو مقصره تعطي بدل آيجار ..//



بس آخخخ الله كريم يااارب ...

 

[زوجة عزيز]

كلمي ريلج اهو المسؤول انه يطلعج بشقه بروحج وذكريه بشرطج وانج عايشه بضيق المكان وصابره وصار الوقت المناسب انكم تسكنون بروحكم

 

[مــســك]

زوجه عزيز .. حآولت معاه وقلت ان نفسيتي صفر ومتضايقه ومرات ابجي ...


يقولي اصبري مو الحين نطلع ؟؟ ليمتى بصبر ؟؟ لما يصير فيني حآلة آكتئاااب ؟؟..!!!!



انا عطيته مهله شهرين واهو حر ي يطلعني ولا ما يشوف شر ...:///