السلام عليكم و رحمه الله بركاته
انا يوم كتبت مشكلتي ماكان قصدي اكسر خاطر احد
البوينت كلا كان سؤالي في شي اسمه ربوبيه ولا انا عايش غلط بغلط !!
بس وايد بنات قيموني و قالوا تقبلي وضعج !
انا متقبله وضعي لان انا ادري اني طلعت من اهلي و رحت لاهلي و تري ابوي[الصج} و عياله مو بعاد حيل عني دايما نسافر و نطلع بر مع بعض و غيره بس وايد كنت متأزمه لان مو متعوده
وكنت حابه افضفض و اطلع اللي بقلبي فكتبت شصار لي ولاني كنت محتره ولا احد من اهلي يرد علي
ووايد بنات اسالوا شصار لج ،،،
اللي صار ثاني يوم الصبح من كتبت الموضوع شفت اخواني 3 الباجين و سالتهم و علي قولتهم سويت تحقيق معاهم
طلع عندهم خدامه بس تيي نص دوام يعني حدها للعصر و ماتطبخ الا الغدا و الباجي علي صبي و عندهم اثاث بس في دوانيه و الباجي خرابيط لانهم يقولون محد اييهم واايد غير رياييل يعني تعبانين تعب علي دوانيه
وصار بينا تفاعل غدوني بره و بليل انا طبخت لهم برغرز لان وحده من البنات يعطيها العافيه انصحتني اطبخ لهم
وطول هالوقت ادق عل خواتي و امي مايردون ، الخميس اللي اهو اليوم رحت لهم انا واخواني و ابوي الصج لان يمعت عماني كلهم هناك
اول مادخلت رحت سيدا علي امي قلت لها ليش ماتردين ! حتي مرت عمي ثانيه كانت موجوده و سالت وقالت لي انتي و ينج !! يعني محد قايل لها سالفه
قعدت تضحك امي تقولي شفيج معصبه ! قلت ليش ماعصب و انتي وخواتي ماتردون علي
جان تقول اسفين بس هدي ماردينا عشان ماتسوين فلم و تقولين برد لكم مابيهم @@
قلت ليش انتي ماتبيني ! جان تقول في احد مايبي ظناه و تفعد تبجي و انا قعت يمها و كملت البجي
قلتها خلاص اييب اغراضي و ارد بيتي قالت مو بيدي ابوج يبيج و خوالج اكلوا ويها ، وسالفه طلعت
ابوي الصج مهدد امي قايل لها تقعد عندج بس خوالكم ماتروح لهم و امي عصبت قالت انت ماتحكم فيها فقال لها هذي بنتي جان تقول امي بنتك عيل ليش مخليها عندي !!!
وبعد هذي سالفه ابوي عنّد و قالي امشي معاي
ابوي احد موصله اني اسلم وابوس خوال خواتي {بنات عمي} و عصب بعدها جذي هدد !
وحده من خواتي قالت لي ماعليج تعالي ردي خوالي خوالج و واخواني اخوانج
بس انا حسيت بضيقه لان وحده من العضوات جزاها الله الف خير دزت لي رقم شيوخ دين و انا دزيت مسج لكل احد فيهم و سالته و الكل رد علي حرام جلوسي معاهم و لا يعتبرون محارم !!
خليت خواتي يقرون المسج عشان يقتنعون
وامي قالت لي بتحط لي سايق بس اييبني كل عصر حق بيتنا و يردني بليل علي مانحل المشكله
انا بداخلي ماحسيتها مشكله و حسيت ان هذا صح وخص ردرد بعض العضوات اثر فيني وايد صج اهي تزفني فيه بس واايد اثر فيني
بس هذا اللي صار لي و ان شاء الله ابوي بيشتري لي سياره لان يقول مايرضي اركب مع سايق للجامعه و الغرفه مراح اشتري لاني ابي غرفتي نفسها حتي صبغ بيصبغها مثلها
والله مو عارفه شنو صح ! بس وايد كلام الشيوخ دين اثر فيني و خوفني
يااارب اكتب اللي فيه الخير
ويعطيكم العافيه بنات من دونكم انا ولا شي
