نقل زوجي ودراستي وحياتي المستقبلية الجاية

[د. فاطمة]

بسم الله الرحمن الرحيم
السلام عليكم ورحمة الله وبركاته
شخباركم حبيباتي؟؟

حبيت اخذ رايكم وتساعدوني بحياتي الجديدة..
أنا طالبة طب ولله الحمد>> لاحد يفهم اني اتكبر بس حبيت احطكم بالصورة كاملة.. متزوجة لي اربع سنوات و8 شهور تقريبا
...
وعندي ولد بسم الله عليه عمره سنتين و10 شهور
أنا ادرس بمنطقة وزوجي واهلي بمنطقة..
فكنت كل أسبوع اروح وارد الويك اند بس..
....
كانت حياتي مرتبة صج يوحشوني ونفسيتي تتعب بالبداية بس بعدين نظمت وقتي..
..
اذاكر واركز كثيررر وجايبة معدل 4.72
مراا حلو ألف الحمد والشكر
...
وكنت اخلص مذاكرة واكلم زوجي وولدي او اشبك ونكلم بالكام وماشية حياتنا تمام التمام
...
ولو فيه مناسبة رومنسية كعيد زواجنا او عيد ميلاد زوجي وكذا
كنت اتكشخ من هناك واتزين واغير لوكي وانزل لهم
وماقصرت بهالشي
>>اكيد بنات مو زي لما أكون معاهم بس عاللي اقدر عليه
وكنا مستانسين ومرتااااحين..
..........
أمي الله يحفظها لي ويخليها يارب ماقصررت هي اللي كانت تمسك ولدي ومهتمة فيه للآخر.
ألحين..

اللي صار ان زوجي جاته وظيفة بالمنطقة اللي أدرس فيها وقبل فيها وقدم استقالته وانقبلت
ومن هالويك اند راح نروح للرياض نحجز لنا شقة وناثثها
..
بصراحة بنات أنا مراا استانست لما عائلتي الصغيرة بتنقل معاي
بس الحين بديت افكر
:eh_s(10):
أنا مستانسة وخاايفة بنفس الووقت
ليش؟؟
انا لما يجي ولدي الله يحفظه حواس حواس حواس من شهادة كل اللي حولي
ولما كنت انزل لهم وعندي امتحان ماأذااكر ابد ابد ابد >>ومااأبالغ
الحين احاتي هم تنظيف الشقة والكوي وغسيل الملابس والطبخ>>انتوا اخبر
ومتعودة بايام الامتحانات اذااكر مع صديقاتي بالدفعة بقووووة بنات ماأقدر ماأقدر اذاكر برووحي
متعودة عاللمة ونشرح لبعض و و و ...:eh_s(2):

كلهااااا تهون عندي لو نظمت وقتي

بس ولدي الحين يبي له حضانة
واحس بكون بعيدة عن اهلي

خاطري لما اسوي هناك ليلة رومنسية :eh_s(7): و وو و
مادري وين اخلي ولدي بيكون بيننا ><

عطوني مقترحاتكم يالغاليات
>>بنات ماأبي ردود تجرح او تضايق
أنا مو معترضة وبالعكس مراا مستانسة بس ابي ماأقصر بعد على زوجي وولدي بحق دراستي والعكس
دعواتكم
:yaaaaaarb:​

 

[ام الدرر]

هلا حبيبتي
اولا بالنسبة لولدج بيكمل 3 سنين ما شاءالله يعني موصعب تتحكمين بنومه وقعدته
الصبح بيكون بالحضانه وانت بالجامعه
بترجعون خليه يلعب لوقت نومه وتحددينه حسب موعد الحضانه يعين ما اعتقد بيتعدى 7 او 8 بالليل
بهالوقت تفضين للقعدة مع زوجج
التنظيف والغسيل سوي جدول واحرصي عتنظيم الوقت بتتسهل وياج
يعني الغسيل يومين بالاسبوع
الطبخ جهزي اشياء سهلة ايدام يتبل من اليلي وينحط بالفرن ورز عالسريع او خبز معاه وسلطة
المذاكرة حاولي تكون بوقت فراغج بالجامعه وايام الامتحانات اكيد مافي محاضرات فبتستغلين الوقت بالمذاكرة
وحاولي مدام متعود عالوالدة تنزلينه عندها وقت الاختبارات
استعيني بالله وبيسهل عليج الوضع
الف مبروك وعسى الله يجمعكم ولا يفرقكم ​

 

[Lost]

مع الايام ان شاء الله راح تتعودين على الوضع

بتكون صعبة عليج وخصوصا الولد يبي له مجابل

بس صدقيني راح تتعودين وتتأقلمين بالتوفيق عزيزتي

 

[iLLuMinaTion]

الله يعينج

 

[غرأم]

دلوعه فطيم ..شفيج ماكو عندج مشكله !
قولي الحمدلله ريلج وولدج عندج بالرياض ..وشقه بروحكم والولد ينام ( عطيه منوم يادكتوره فطيم )؛؛
ولا ودج تردين حياة العزوبيه.. وتكونين حره وتذاكرين ويا رفيجاتج ههههه

 

[رماد وظل]

بصراحه ما أشوف فيه شيء صعب مع تنظيم الوقت والتفاهم ..

وبعض عاداتك القديمة لازم تتخلي عنها مثل : المذاكره مع صديقاتك ..

بالبداية راح يكون صعب لكن مع الوقت تتعودين ..

بالنسبه للبيبي إذا كان عندك جاره تثقين فيها حطيه عندها وعطيها المقسوم نهاية كل شهر ..

والغسيل والكوي خلي زوجك يشيلهم للمغسله ..

و الأكل مره تجهزي بالليل ومره خفيف ومره من براا والحياة تمشي ..


موووفقه ..

 

[تعويذه الحب]

ادري حبيبتي انج تعودتي على برنامج معين والحين حاسه بصعوبه انج تغيرينه

اول شي ادخلين ولدج حضانه واكيد راح يقعد مبجر الصبح ولا تنومينه الظهر خليه قاعد ليه الساعه 7 المغرب عشيه ونوميه

بالنسبه للغسيل والتنظيف اذا ما عندج وقت تقدرين تيبين لج شغاله بارت تايم او
تتفقين مع مصبغه انتي تغسلين الملابس واهم يكوونها لج والتنظيف انتوا عددكم مو كبير تقدرين تنظفين الشقه يومين او ثلاث ايام بالاسبوع يعني الموضوع حيل سهل

وبالنسبه للدراسه مع صديقاتك تقدرين تذاكرين معاهم وقت فراغاتج بالجامعه او ممكن تخصصون يوم بالاسبوع تلتقون فيه وتذاكرون على راحتكم

الله يسعدج ويهنيج ويوفقج

 

[om MaRyooM]

اللي تبي عايلتها يمها ماتحاتي هالامور اللي مالها داعي !!

بس شكلج تعودتي عالوحدة وتشيلين مسؤولية نفسج بس

انا ماقول ماتحبينهم .. بس لو فعلا مهتمة من قلب ومومعتمدة على احد ثاني جان استانستي ومافكرتي بهالامور الي قلتي عنها



وكل شي ايي بالتنظيم والتاقلم
يعني مافكرتي هالوضع ليمتى ؟؟
لو تخرجتي وخلاص .. وتوظفتي رح تظلين على هالحالة ؟؟ ماتوقع
والوظيفة وتنسيق الوقت اصعب من لما تكونين طالبة
والله يهون عليكم

 

[د. فاطمة]

/شكورات كلكم واحدة واحدة
رفعتوا معنوياتي
وساعدتوني بحلول وأفكار
مشكووورات

الأخت ام مريوم
بصراحة مادري ليش تقولين جذيه
والله ثم والله
كم مره كتبت بموضوعي اني مستاانسة انهم جنبي
واحسن من نفسيتي تتعب وهم بعيد عني

بس أنا كاتبته مو عشان عندي مشكلة
او عشان ابي اتجمع مع رفيجاتي
أنا متعودة على نظام
ولما أجي بغيره ابي يكون عندي له البديل
يعني فرضا المذاكرة
تعودت اللمة مو عشان الوناسة >> لا كل واحدة تمسك قسم معين وتشرحه للكل ونتناقش فيه
بكذا يترسخ بمخنا اكثر للامتحانات
أما السبب الأهم والرئيسي
اني قلت ماأبي اقصر على عائلتي
يعني مو حلوة يجي زوجي صراحة ويشوف الشقة مقلوبة فوق تحت..!!
ابيه يكون مرتااااااح ومستانس
ابيه يجي يشوف العشاء مجهز له وناكل مع بعض
ابي بالمناسبات نحتفل وكذا

من باب الاحتياط والحرص لاغير

الله يسامج حبيبتي بجد مادري ليش قلتي هالجملة..!!

بس شكلج تعودتي عالوحدة وتشيلين مسؤولية نفسج بس

انا ماقول ماتحبينهم .. بس لو فعلا مهتمة من قلب ومومعتمدة على احد ثاني جان استانستي ومافكرتي بهالامور الي قلتي عنها
​

للمعلومية
تزوجت وعمري 16 سنة
وشلت مسؤوولية بيتي ولوحدي
مااعتمدت على احد
وحملت وولدت هم شلت مسؤوليتي
بس زوجي وانا من النوع اللي نحب نكمل دراسة
هو قال لي يوم صارت لي ظروف واجلت سنة من دراستي مايبي زوجته اقل من بكالوريوس​

وانا فعلا مهتمة من قلب وبقوة هذولا حياتي كلها اللي عايشة عشانها
بس حبيت اني اخذ اراء والقسم مفتوح للجميع
وامي مو احد صراحة هي ماقصرت اهتمت بولدي بحكم دراستي اللي بمطنقة ثانية
الله يطول بعمرها ويحفظها يارب
.....​

والله يسهل عليج حبوبة ​

 

[Tom ♥ Jerry]

,


هلا يا قلبي .، عسى الله يوفقج و يتمم عليج يارب ،
هاذا ولدج بعد ليه متى رآح يكون الوصل بينكم لاب و كآم ،
خلاص انتي امه يعني انتي المسؤوله عنه أولا و آخيرا
و آمج مآ قصرت و رايتهآ بيضه الي اعتنت فيه طول هالوقت .،


الحين تقدرين تنظمين وقتج و وقت ولدج على حسب دوآمج انتي
اي حزة تدآمين اذا الصبح وديه الحضانه الصبح و لمآ تخلصين دوآم اخذيه
و بعدين انتي وياه تريحون شوي و بعدها قومي و خليه ينآم بسرعه من الاعه 7 و نص أو 8
يكون نآيم عشان تفضين حق ريلج و دراستج .،

و اذا العصر وديه حضانه العصر و نظمي وقتج انتي عآد !

موفقه

 

[غيــرة انثى]

ما تقدرين تييبين خدامه ؟ مو الا تعيش معاكم بس اتيي تنظف او مربيه تقعد مع ولدج اذا بتطلعون واذا رديتو ترجع بيتها ؟
مادري شنو النظام عندكم بالسعوديه بس الله يعينج حبيبتي و يوفقج

 

[فركيته]

اولا: حبيت احييج على طموحج الحلو ماشاء الله وعسى الله يوفقج وتجيبين اعلى النسب وترفعين راس اهلج.
ثانيا: في البدايه راح تلاقين صعوبه بالتوفيق بين دراستج وعايلتج بس مع الوقت راح تتعودين على الروتين وان شاء الله زوجج يساعدج وما يقصر وكلها ايام وتطير وتتخرجين ان شاء الله وتصيركل هالامور ذكريات :eh_s(7):

 

[ياغفور اغفر لي]

الله يوفقج بدراستج
واذا ع الولد انا تشوف تخلينه عند امج فترة الدراسة وبالعطله الصيفية او الاجازات الطويله تاخذينه
ع ماتتخرجين وجذي ماراح يكون عندج الا التنظيف والطبخ وهذي سهله اذا نظمتي وقتج

 

[Freakya]

مادري شقول لج بس اذا ريلج ناوي ايي عندج لازم اهو يتحمل مسؤولية الولد و الشقة

ما يصير كل شي فوق راسج و لازم يراعي ظروفج كونه يبيج تحصلين على شهادة عالية

و انتي بعد تدرسين طب يعني هلاك و عماة عين

فمن الحين اقول لج اذا كل شي بيصير فوق راسج غسلي ايدج تنجحين @@

 

[بيتي بوب بس كويتيه]

حاولي اتييبين لج خدامه تساعدك عالياهل
دراسه وياهل الله يكون بعونج
وموفقه يا قلبي

 

[princess.78]

امممم انا فاهمه وضعج وفاهمه عليج عدل

اولاااا محلوله لو فكرتي فيها شوي ..

اولا إذا كان عندك اختبار نزلي ولدج الشرقيه كلها أسبوعين وتجيبينه خلصي اختبارتج وجيبيه

وإذا حابه على الليالي الرومانسيه نيميه بدري وانتهى الموضوع

مادري ليش احسج معقدتها زياده عن اللزوم



الله يسهل ويوفق : )

 

[Zen&7ala]

السلام عليكم

انا ما اشوف في مشكله ابدا

و مبين انك مستانسه على جيتهم بس انتي فيكي خوف و الله يعينك لانك مو متعوده


اول شي هدي اعصابك و ريحي و خليج ريلاااكس

الأكل : غدا عشى (وايد بيكون سهل اي شي على السريع مثلا سوي بيتزا (المثلجه) خليها بالفرن و اكليها حق العشى)

و الغدا سويه مثلا الصبح قبل الجامعه زهبي شغلك و لما ترجعين سوي عيش و دجاجه بالفرن او اي شي


(اهم شي اني قلبت اتكلم سعودي ههههههه)


ثاني شي ولدك ان شاء الله امره سهل اسم الله عليه غدا شره

وديه الحضانه خليه من تروحين الكليه تقطينه و طلعته معاج (يعني كلاساتك من دخوله الحضانه الساعه 8 الصبح مثلا

لي 1 الظهر)

ترجعين البيت تريحين و الولد مشاء الله يفهم الحين و تسوين الغدا و تريحين

وقت الدراسه تتفقين مع زوجج انه يشوفه يعني مو معقوله زوجج كله شغل لا تحاتين راح يراعيج و يساعدج

بالذات وقت الدراسه و الامتحانات عشان معدلج

التنظيف جيبيلج غساله و غسلي الملابس كل يوم بليل عشان ما تتراكم عليج

و الغسيل سهل

اما الحمامات و هالسوالف و المسح و تنظيف السليم الي تخلين البيت نظييييييف حييل

اتفقي مع شغاله الي نظاف بالساعه تجييج مره بالاسبوع مثلا او مرتين تيي تنظف البيت و الحمامات و تكنس و تسوي كل شي


اذا ما قدرتي انتي بالويك اند سوي هالشغلات و كل مره شي عشان ما يتراكم و تتعبين


صدقيني اذا انتي قلتي شي صعب بيصير صعب و اذا قلتي الأمر سهل راح يتسهل معاج

و الله يوفقج و اهم شي شهادتج لان هذي فتره و بتعدي و راح تتغير ان شاء الله الى الاحسن

 

[كويتية222]

وين المشكلة ؟!!

عائلتج تكون في المقام الاول اخذي هالشي قاعدة في حياتج

تخيلي لما تكونين تدرسين دراسات عليا بتخصص صعب +من غير مقدمات ولا ترتيب حملتي +اختبارات صعبة وتدريب ميداني +

طفلين في المدرسة + زوج

شلون بتوفقين بكل تلك الامور ؟!!

ولله الحمد نجحت وتحملت لان المراة بطبعها قوة التحمل مو اهي اللي تحمل وتولد ؟!!

يات ع الدراسة والرعاية سهالة الامور والله ​

 

[صادقة بكلمتي]

هلا حبيبتي

اولا بالنسبة لولدج بيكمل 3 سنين ما شاءالله يعني موصعب تتحكمين بنومه وقعدته
الصبح بيكون بالحضانه وانت بالجامعه
بترجعون خليه يلعب لوقت نومه وتحددينه حسب موعد الحضانه يعين ما اعتقد بيتعدى 7 او 8 بالليل
بهالوقت تفضين للقعدة مع زوجج
التنظيف والغسيل سوي جدول واحرصي عتنظيم الوقت بتتسهل وياج
يعني الغسيل يومين بالاسبوع
الطبخ جهزي اشياء سهلة ايدام يتبل من اليلي وينحط بالفرن ورز عالسريع او خبز معاه وسلطة
المذاكرة حاولي تكون بوقت فراغج بالجامعه وايام الامتحانات اكيد مافي محاضرات فبتستغلين الوقت بالمذاكرة
وحاولي مدام متعود عالوالدة تنزلينه عندها وقت الاختبارات
استعيني بالله وبيسهل عليج الوضع

الف مبروك وعسى الله يجمعكم ولا يفرقكم ​

معاها والله يوفقج ويسهل امورج حبيبتي امييييييييييييييييييييييييييييين

 

[جولينار]

ماقصرو البنات


وموفقة خيتو