رد : @@ $$نـصـــايـــح لــكـل عـــروووووووووس ،،،،،، متــجــدد $$ @@
•
•
•
~
# اول شي ياعروووس اقري سورة البقره يوميا والمعوذات إطمن قلبج وتريحج نفسيا ( أهم شي الراحه النفسيه ) .
عشان لا تتعبين نفسيا ويضيق خلقج .. دايما عودي نفسج ولسانج لـذكر الرحمن ..
# ثاني شي نظمي وقتج وحددي مشترياتج وقسمي مهرج وهذي نقطه مهمه ياعرايس
.. ولا تاخذين الكرديت كارد وياج ولا جان تشترين بالهبل واشياء مو مهمه . سحبي اللي محتاجته وقسمي ايامج عشان ترتاحين ولا تخربطين ..
# قسمي مهرج للمهم والاهم وبعده التناتيف.. اهم شي البدله البيضا ..اخذي ذوقج اهم شي وااللي انتي مرتاحه له ..
# قسمي الايام .. يعني يوم الاحد تروحين للسوق تشترين بجايم فقط ... ولا تشترين غيرهم ..
يوم الاثنين قمصان نوم ... ونصيحة مجربه لا تكثرين قمصان نوم والله ثم والله ثم والله عندي للحين قمصان نوم يدد مالبستهم وياكثرهم ..
أهم شي واللي أكثر شي راح تستهلكينه اهما البجايم والشورتات والبلايز والنفانيف القصيره ...
يوم الثلاثاء خصصيه لشوزات والكعوبه والفلاتات أشتري أغلب الالوان والاشكال ... يوم الاربعاء خصصيه للملافـــع والاكسسوارات فقــط اشتري أغــلب الالـوان ونوعي بين الناعم والثقيل .. والخميس خصصيه للميك آب ..
يوم اليمعه أوف لج راحه واهمتي بجسمج وشعرج ... ويوم السبت خصصيه للتناتيف ... مثل الاقطان ومزيل الميك أب وماشات وشباصات
ومشوطه ..تيجان ..باندات ... فوط ...شموع صغيره ...زيوت عطريه وفواحات ...
جذي تريحين نفسج وامج وخواتج (اهلج ) وماتتخربطين وتحوسين بالمشتريات... وباليوم اللي خصصتيه كتبي احتياجاتج .. مثلا للميك أب شنو محتاجته من كريمات وحمر وشدوات وبلشرات وغيره بالعدد
والالوان اللايقه عليج ولا تاخذين شي مو مجربته من قبل او ماتعرفين لستخدمه نصـــــيـحه من ذهـــب ترا ... لانج ماراح تستخدمينه بعدين وبتركنينه :d<<<كان غيرج أشطر : )
<< اللي بتاخذينه ماركة وماتتحسفين عليه اهوا الكريم أساس والبودره ولكريمات المرطبه والباجي لكم الاختيار ...
# اللي ساكنه عند أهل ريلها تكثر دراريع وبدل << تستهلكينهم وايــد ... وكثري الناعم أكثر شي ... وجم بدله او دراعه فخمه ...
# اللي ساكنه بشقة بروحها تكثر البدل والبجايم ..
وأدري بتقولون وين العطوور ليش ماذكرتيهم ... انا اقولكم ...
العطور الفرنسيه وحتى العربية نصيــــــــــــــحه لا تشترونها إلا قبل العرس بسبوع او بالكـثير اسبوعين ... تتغـيـر ريحتهم ياعرايس ...ويطيحون بجبدج .. : ( ...
<< ســألــو مــجـربه والله شاريتهم بمبلغ وقدره قبل عرسي بجم شهر بمعرض شهر 3 ... وتغيرت ريحتهم لانه يبيله تخزين عدل وتكيف شغااال اربع وعشرين ساعه ... ولا إبتتغير ريحتهم من الحر والحراره المرتفعه ..
وياسلام على جونا جو اوروبي صراحة
اما دهن العود كل ماعتق كل مايعطيج ريحه أحلى ...
@@ ولــنــا بـاكـ للـمــوضــوعـ @@ ان شاءالله
