نصايحححكم عروسات عرسي باقي له اسبوع

[الله يجازيك]

السلام عليكم حبايب قلبي
شلونكككم جد اشتئتلكوم كتير كتير
بنات ابي نصايحححكم
عرسي مابقئ له الا اسبوع واااااحد بس ««ياااللهوي
وعلي دوام بالمدرسه تنصحوني اداوم ولا لا ..؟
وانزين شسوي بعمري بالاسبوع عشان اتنشط من تعب المدرسه اللي هد حيلي ..وشنو اكل او اسوي
ابي نصايحكم لي حق الاسبوع الاخير من حياه عزابيه اهئئئئ هههههههههه

 

[حبابة]

ليلة العرس روحي سبا تايم اخذي جلسات ريلاكس تحتاااااااجينها

 

[اميره^_^بحلآها]

يؤؤؤ الله يعينج يارب و يوفقج ليش ما اخذتي مسائي ..؟؟~ جد الله يعينج
المهـم من الحين ابدي برنامج العروس حمامات مغربي و شوفي لج سبا ذرب و سعرهـ مناسب

والله يوفقج يارب

 

[الله يجازيك]

فديتكم حبايبي .. وع اساس احول مسائي محد يمدحه ولا يهتمون بالبنات ودرجاتهم واستهتار و بلاوي يقولونها لي وانا توني صغيره فراح اكمل صباحي لين اتخرج الله يعين

 

[اميره^_^بحلآها]

امبي جد الله يعينج مدرسهه و زواج ..~

الله يوفقج و يتمم عليج و يسهـل عليج يارب

 

[كلي هداوه]

ربي يوفقج
اقري ايه البقره بكل وقتج

وربي يوفقج

 

[كيك و حلاوهـ]

اي والله الله يعينج ويوفقج انشالله ويسهلها عليييج

مثل ماقالو البنات لاتخلين آيه البقرره

اخذيها طبيات بس الاسبوع اللي وراه شبتسسوين @@

 

[ام مصعب ويزيد]

وعليكم السلام ورحمه الله

الله يوفقج ويسهل امرج

وبنات الله يبارك فيكم سورة البقره وليست آيه البقره

 

[(حكاية قلب )]

سهلات ان شاء الله

 

[عـــروس خـــالد]

الله يوفقج ويسهل امرج ويسعدج
مبروووووووووك ياقلبي

 

[mrs.abk]

هلا حبيبتي ..

بما أني توني معرسة من شهرين تقريبا .. خليني أقول لج

آخر اسبوع تحتاجين اجازة 100 بالمية .. أنا كان عرسي عقب العيد ب 6 أيام تقريبا .. تخيلي بديت أصوم القضاء .. صمت يومين وما قدرت أكمل لأن كان لازم أفر على الصوالين ..

بخبرج كيف كان برنامجي تنازليا ..

قبل العرس ب5 أيام ..

تشييك أخير على فواتير القاعة والكوشة والتأكد إن كل المواعيد مؤكدة ..
حجز الكاكاو والميني كيك والسويتز وتوصيل الصواني للمحلات ( من تجربة تعيد استعمال صواني الحلو ونسوي لها ريفيل وايد أحسن من اننا ناخذ صواني يديدة من المحلات يطلع أرخص علينا)
حمام مغربي (سويته في البيت لأني ما بغيت شيء عميق على أساس بتحنى ) + تشقير جسمي في البيت .. الله يخلي لي خواتي سوو لي ..
سويت زيت لشعري وماسك


قبل العرس ب 4 أيام ..
شراء احتياجات البيت لضيوف العرس ( يوني أهلي وصديقاتي من الكويت وقطر وعمان الله يخليهم لي)
الاحتياجات اللي اقصدها صابون وكلينكس ودلال القهوة والسماطات للأكل وغيره وغيره
شراء فواكه للبيت وحجز وجبات البيت خلال 3 أيام العرس في المطاعم لأن يا حرام شغالاتنا بيكونون مشغولين بالضيوف
على طاري الشغالات في هاليوم تأكدت إن عندهم ملابس جديدة للعرس ( قمصان طويلة وليقنززات )
سويت فيشل العرايس في عيادة بأبوظبي


قبل العرس ب 3 أيام ..
تأكدت من حضور معازيمي واتصلت في غالبية صديقاتي علشان أتأكد
تأكدت من حجز الصالون للحناء
تأكدت من جاهزية ملابسي وشنطة الفندق وجوتي العرس وباقي أغراضي
استلمت فستاني
بصراحة ما كنت مقتنعة بلون صبغة شعري فرحت سويت هايلات
سويت تشقير لجسمي مرة ثانية في البيت + سويت سكراب
سويت مانكير وبدكير

قبل العرس بيومين
رحت الصالون تحنيت من الصبح وحناء العروس في الامارات ياخذ اليوم كله
في هاليوم ركبوا خيمة حفلة الحناء في البيت
وبدوا صديقاتي وأهلي يوصلون فكنت منسقة أساميهم في لوحات وأرسل السايق يجيبهم من المطار للبيت أو الفنندق حسب قرابتهم لي ورغبتهم الخاصة
أكدت حجز ميك أب حفلة الحناء اللي كانت ثاني يوم


قبل العرس يوم
اليوم كانت حفلة الحناء
استمر وصول أهلي وصديقاتي من مدن الامارات وباقي الخليج
رحت الصالون للميك أب والحناء .. بس حطيت ميك أب عادي ناعم جدا موب كأنه ميك أب عروس
سويت حواجبي
طبعا قضيت وقت الحفلة بشكل جميل جدا جدا


يوم العرس
من الصبح رحت الصالون
وأختي وصلت أغراضي للفندق فديتها يا ربي أختي
وبعدين رجعت الفندق علشان التصوير وبعدين الحفلة



هذا كان برنامجي
ملاحظاتي :
أصلا ما عندج وقت تاكلين حتى لو تبين .. أنا كنت حريصة أكل بشكل جيد بس بأمانة ما كان فيه وقت فكنت أكل فوواكه وأشرب لبن وهالشيء نزلني قريب 3 كيلو في هالكمن يوم

لا تاكلين عيش ولا خبز علشان ما تستوي لج نفخة بطن تطلع شكلج خايس في الفستان

خلي عندج في الشنطة 3 حبات كاكاو علشان أي تعب أو هبوظ مفاجئ

اشربي ماي بكميات زينة لين يوم العرس نفسه .. لا تشربين إلا للعطش الفعلي علشان ما تنحصرين وتحتاجين الحمام وانتي لابسة الفستان

خلي في أغراض الفندق كواية بخار .. لأن تحتاجينها لكوي فستانج على السريع قبل لا تلبسينه

خلي في ايدج فلوس كاش تحسبا لأي احتياج ولا تحاسبين على فلوسج لأنج بكل الاحوال بتصرفين بدون شعور

خلي شخصين على الاقل من اخوانج في خدمتج .. أخ ريال وأخت بنوتة علشان يساعدونج ويسوون أي شيء عنج

لا تتوترين أبدا .. وتذكري إن هالثلاث أيام أحلى أيام حياتج فلا تنزعجين شو ما صار وخليج ريلاكس وتعاهدي مع زوجج إنكم ما تزعلون من شيء وترمون كل شيء ورا ظهركم .. وهالشيء وايد بيساعدج


ما بقول لج اقري سورة البقرة لأني بكل صراحة ما قدرت أقراها لكن اقري المعوذات واقري أية الكرسي كل ما شدت أعصابج .. وتعوذي من ابليس بداعي وبدون داعي ..

ربي يوفقج وييسر امرج

 

[شربـــات لـــوز]

الله يعينج وربي يوفقج

 

[جذابه بنت ذيابه]

يوميا اشربي عصير جزر بالبرتقال انتي مسويته كل يووم


و غيبي قبل العرس بيومين وبعد العرس اسبوع


والله يوفقج ويعينج

 

[shosh1993]

غيبي بعده ب اسبوع ..

ب التوفيق