من سافرت لماليزيا مع اليهال واستانست ؟؟

[سعودية قلبها كويتي]

اخواتي الغاليات

بسافر لماليزيا بأذن الله بعد عشرين يوم ..

المشكلة اني باخذ عيالي الصغار معي .. الكبير عمره 3 سنين والصغير سنة و4 شهور

وماعندي احد احطهم عنده ...

ابي نصيحتكم لي .. وشلون اقدر اتعامل معهم بهالطياره وبهالديره ؟؟

والله شايله همهم ..

وطلبتكم يالغاليات .. ابي تدلوني على الأسواق الشعبية هناك .. وافضل الشقق والفنادق النظيفه هناك

ابيها تكون بولاية كوالالمبور ..

جزاكم الله كل خير

 

[AlZaina]

حبيبتي لا تحاتين هم اليهال ان شاء الله بتستانسون و الله انا ناسية الاماكن بالضبط لأن رايحتلها قبل 3 سنين تقريبا بس فندق ماريوت وايد زيت لأن يمة مولات فتطلعين من الفندق و اتمشين بالشارع اللي يمه و اذكر مول سمه تايم سكوير و تون تاور و عن اليهال بالطيارة اذا كانت طيارتكم بليل لا تنوكينهم الظهر سهيهم باي شي عشان أول ما يركبونالطيارة ينامون و يا نومة كوني نومة لما توصلين و اذا كانت الصبح قوميهم من فجر الله عشان يروحون المطار دايخين و اول ما يركبون الطيارة ينامون

 

[AlZaina]

ييي و في سوق يم فندق الاحصنة الذهبية و عموما سوقهم يونس وااايد رخيص و في محل اسمه vincci يبيع جواتي عجيبة لا يطوفج بتلقينه بكل مجمع

 

[سعودية قلبها كويتي]

مشكوره بعد عمري وماقصرتي

اخاف ينامون بهالطيارة واذا وصلت انا للفندق وابي انام يازينهم والله مصحصحين خخخخخخخخخخ

جزاك الله كل خير حبيبتي

وبارك الله فيك

 

[شهدQ]

الله يخليهم لج يارب

التايم سكوير جدا ممتاز

واحلى مافيه مدينة العاب مغلقه كبيره بنفس المجمع اكبر مدينة العاب مغلقه بالشرق الاوسط

وفيها سينما اي ماكس اكبر سينما عرض ثلاثي بالشرق الاوسط واوقات افلامها سألي عنهم بالمكتب السياحي الي بالفندق

وهم فندق اسكوت لشقق رووعه

بس الاول بنظري افضل

الاماكن الي تصلح لليهال بكوالالمبور مثل ماطلبتي

افاموسا طريق ساعتين بس روعه ماتحسين بالوقت ونصيحه اخذي ليله بالمنتجع

فيها عروض تشوق لليهال والعاب ناريه بالليل فانصحج تباتين ليله

عندج جنتغ اعلى جبل تروحيلها الصبح بدري وترجعين ع المغرب مدينة العاب بارده وتشوق ساعه تقريبا طريق واول ماتوصلين تركبين بالتلفريك او تخلين التاكسي يوصلج اعلى الجبل


حديقة الفراشات بالعاصمه

وبعد المغرب الماينز وندرلاند وتركيبن القارب الي ينزلج بالسد وتضرين عرض النافوره الراقصه الساعه 8 ونص مساء تأكدي من الوقت ولايفوتج العرض

وفي مدينة صن واي لاغون حليوه بس جنتغ تغنيج عنها

واذا تذكرت اقولج

دعواتج

 

[tofy]

انا رحت العام شهر 8 واخذت ولدي معاي كان عمره اسم الله عليه سنة و7 شهور

طبعا اذاني بالطيارة لانة حزة نومتة ومو عارفة ينام

والديرة ونيسة تنفع حق اليهال بكل مجمع العاب والعابهم يم المحلات فكنت اتسوق واخلي ريلي يلعبة


وبالنسبة حق الاسواق الشعبية ماعرفهم

والشقق بعد ماعرفهم لاني سكنت بفندق

بس حبيت انبهج على شغلة دي بالج من الاكل لان ولدي تكرمين حاشة اسهال قوي والسبة اني كنت اعطية من

اكل المطاعم

 

[اخت فروحه]

بصراحة الله يعينج عالسفرة مع اليهال وخصوصا إذا أول مرة تسافرين فيهم .
مابي أحبطج بس لازم تحسبين احسابج انهم بيأذونج عشان ماتنصدمين وبالتوفيق

 

[غيـ الناس ـر]

والله انا اختي وايد تروح لماليزيا ويا بناتها ..


حيل يستانسون حتى يردون يقعدون يسطرون لنا شسوو هناك فتره من كثر الوناسه

 

[يويو حبيبي]

انا نفسك اعاني من نفس مشكلتك ابي آخذ ولدي معاي وخايفه يتعبني[
بس بغيت اسأل عن اسواق ماليزيا وشلون اسعارها يعني عشان احسب الميزانيه عدل يالييييييت اللي عندها خبره ترد علي تكفون]

 

[أمانيQ8]

ماليزيا اذا بتروحين كوالالمبور والله تغربلت فيهم بالسوق وغير صعد العربانه ونزلها من هالتكاسي...ما ارتحت الا رحت الجزر الماليزيه مثل بينانج وجنتنج,,, فيهم منتحعات حلوه واسلاميه ماكو هلاقه... وحلوه حق اليهال سباحه والشوارع سهله موذيج الزحمه..

 

[سعودية قلبها كويتي]

جزاكم الله كل خيييييييييير يالغاليات ..

الف شكر لكم وبارك الله فيكم

 

[malekatsabaa]

انا حبيت كوالا مع اني زرت خمس اماكن زائد يوم في سنغافوره

لان فيها وايد اماكن سياحيه واسواقها احلى من كل الجزر الماليزيه الثانيه خاصه السوق الي في توين تاور ..اخذي العربانه الي مالت التوائم عشان ترتاحين اكثر واذا اعيالج مو من النوع الي ينامون اي مكان خليهم يروحون المطار شبعانين نوم ومرتاحين..اما اذا كانوا من النوع السهل الي ينام اي مكان واي وضع ..فسهريهم عشان ينامون بالطياره.. وافضل شي انج ما تطلعين من كوالا عشان لا تتعبين معاهم تر كوالا اتكفي واتوفي وفيها عشرات الاماكن السباحيه والحدايق ..

وسفره سعيده مريحه انشاللله!!!

 

[سعودية قلبها كويتي]

انا حبيت كوالا مع اني زرت خمس اماكن زائد يوم في سنغافوره

لان فيها وايد اماكن سياحيه واسواقها احلى من كل الجزر الماليزيه الثانيه خاصه السوق الي في توين تاور ..اخذي العربانه الي مالت التوائم عشان ترتاحين اكثر واذا اعيالج مو من النوع الي ينامون اي مكان خليهم يروحون المطار شبعانين نوم ومرتاحين..اما اذا كانوا من النوع السهل الي ينام اي مكان واي وضع ..فسهريهم عشان ينامون بالطياره.. وافضل شي انج ما تطلعين من كوالا عشان لا تتعبين معاهم تر كوالا اتكفي واتوفي وفيها عشرات الاماكن السباحيه والحدايق ..

وسفره سعيده مريحه انشاللله!!!

مشكورة بعد عمري وجزاك الله كل خير يالغالية

وفيتي وكفيتي بارك الله فيك

 

[**بياض الثلج**]

خووووووووووش موضوووع بنات ابي يعني مثلا تسوى 20 يوم ولا اقل وجم المصرووف اليومي مو المشترى وشلونها غاليه ولا لاءيالله من كلامكم شجعتوني اروحلها