منو طلعت عيالها من الخاص ؟؟

[حيوته]

السلام عليكم ورحمة الله وبركاته
خواتي اشلونكم ..
أنا ولدي كان بمدرسة خاصة لي الصف السابع والحين طلعته وبوديه الحكومة لأنه دراجته كللللللللللش مو شي فحرام أقط كل هالفلوس على الفاضي ..
فبعرف منو فيكم حولت عيالها من الخاص لي الحكومة ؟؟؟
وما تأذوا عيالكم على أساس اللغة لأن الخاص تدريسهم كله انجليزي والحكومة غير عن الخاص ...
فياريت تساعدوني وتشورون علي شسوي عشان ولدي يتقبل المدرسة اليديدة واشلون اخليه يعدي الأمور الصعبة الي بتواجهه ؟؟

 

[باونتى]

شوفى حبيبتى انا اخصائية اجتماعية وكنت اشتغل فى المتوسطة ووايد اولياء امور نقلوا عيالهم اللى من المدرسة الباكستانية واللى بريطانيه .. بس المشكله مثل ما قلتى فى اللغة كانت اللغة عائق بالنسبة لهم ودرجاتهم فى المواد ضعيفه وما يعرفون يقرون أسئلة الاختبار .. راح تتعبين فى البداية بس ها خلييج معاه والله كانت عندى ولية امر مطلعها بنتها من البريطانيه ومن غير مبالغة كل يوم اتييي مكتب الخدمة الاجتماعية وتقابل المدرسات عشان تعرف نقاط الضعف وما شاء الله بنته مشت ودرجاتها جيد جدا

 

[حلم الطفولة]

الله يوفق ولدج وين مايكون وان شالله يتخطى العقبات وماعليه إلا الخير
مثل ماقالت باونتي تابعيه وحده بوحده وراجعي المدرسه باستمرار حق تعرفين نقاط ضعفه وتساعدينه بالبيت
واستعيني بالله يكون بعونكم

 

[احلى عواشة]

الله يكون بالعون انا نفسج عيالي ثالث وخامس ونقلهم
بس بدي من العطلة وحطيت مدرسة رياضيات ومثل ما قالت باونتي
بتابع المدرسة اول باول

 

[حيوته]

الله يعطيج العافيه حلم الطفولة ما قصرتي على هالدعوة الله يوفقج يارب ويعطيج الي في بالج يارب
أحلى عواشة ما قصرتي أكيد راح أتابعه أول بأول وأنا هم درسته رياضيات وشوية عطيته فكرة عن العلوم
باونتي الله يعطيج الف عافيه يا الغالية مشكورة على النصيحة وراح أسمع نصيحتج بس اهو من أول شي وهو يقولي أنا كاره المدرسة مابي اروح ابي مدرستي كل ما أتذكر بروح الحكومة تلوع جبدي ،، شقوله اختي اشلون اهون عليه ؟؟؟

 

[باونتى]

شوفى حبيبتى فى البدايه الموضوع راح يكون صعب بالنسبة له وما راح يتأقلم بسرعه بس صدقينى مع الوقت راح يتأقلم خصوصا اذا تعرف على اولاد بنفس عمره

 

[الفنانه79]

رد : منو طلعت عيالها من الخاص ؟؟

انا اعيالي من الحضانه لحد الروضه بخاص واهما اثنين الله يخليهم

وتقريبا لازم ندفع 5 الالف دينار حقهم اثنينهم بالسنه اسم الله عليهم والصراحه وايد

والحين حق اولى ابتدائي حولتهم حكومه وانشوووف شنو بيصير الله كريم يوفقهم يارب

 

[اصيلة]

للرفع .

 

[حيوته]

مشكورة يا باونتي تسلمين ..
الفنانة عيالج أمورهم سهلة من الروضة للحكومة مو مشكلة ما راح يتعبونج والله يوفقهم ..
مشكورة أصيله للرفع ..

 

[قلب اميمتها]

رد : منو طلعت عيالها من الخاص ؟؟

و عليكمـ السلامـ و الرحمهـ ^_^

كونهمـ قبل بالخاص كان هالشي لصالحهمـ ,

يعني معلوماتهمـ و لغتهمـ اكثر من الحكومهـ ,

بس اهمـ شي تكونين متابعهـ معاهمـ ,

تخيلي اعرف ناس عيالهمـ لما يدرسون الرياضيات اول الايامـ يحولون الاعداد انجليزي عشان يحسبون هع ,

و الحين الحمدلله كل شي تمامـ بس اهمـ شي انتي تكونين ماشيهـ معاهمـ خطوهـ بخطوهـ ,

الله يوفقكـ ويآهمـ و يخليكـ لهمـ

 

[ذراي]

وآنا نفس حالتج
بنتي بتروح رابع ابتدائي وراح احولها مدارس حكومة ، اهي شاطرة بس بالرياضيات ما تفهم والعربي موذاك الزود بس انها تعرف انجليزي وصراحة حيل خايفة اخاف اضيعها خاصة ان رابع وخامس امتحانات محتارة احولها او لا
فيدوني يزاكم الله خير
:0bee2e8d89:

 

[بنت الحساوي]

بالنسبة لي آنا نقلت عيالي من خاص لي حكومة

آنا نفسج بالضبط ولدي درجاته صارت واايد ضعيفة فقلت خل انقله احسن ونقلت خواته معاه

اهو أول السنة كان ضعيف بس جابلته وشرحت حق الأساتذة انه منتقل من مدرسه خاصة ولازم يراعونه اشوي

وبعدها الحمدالله مشى باجي السنة بس بالعربي نجح على الحفة ...

 

[حيوته]

ذراي مشكورة على الرد يا قلبي والله يوفق بنتج يارب وان بغيتي أي شي أنا تحت أمرج لأني مدرسة ابتدائي ...
اختي بنت الحساوي مشكورة يا قلبي طمنتيني يعني لازم أشد معاه بالعربي عشان يتقوى ..
الله كريم يارب ويوفقكم كلكم ويوفق عيالكم قولوا آمين

 

[بحرينيه كيوت]

حيوته الغاليه مشكوووووره على الموضوع القيم بصراحه أنا بعد محتاره أنقل ولدي وبنتي ولالأ ؟ وخصوصا إني من قلت له بنقلك وهو ضايق خلقه وعصبي وماياكل ؟
ياريت أحد يعطيني حل أخواتي ..

 

[احلى عواشة]

حبايبي الله يكون بالعون انا حطيت مدرسة رياضيات لعيالي
واحد شوي بدا يتاقلم والثاني الله يعيني مو مستوعب الارقام بالعربي

 

[بحرينيه كيوت]

هلا والله أحلى عواشه .. المشكله موأني اييب له مدرسين مشكلة ولدي إنه رافض يروح الحكومه بالمره ..
والله محتاره ..ولا على بنتي عادي ماعندها مشكله بالحكومه ولابالخاص ..

 

[احلى عواشة]

بحرينية
حبيبتي سوي مثلي قعدي معاه وفهميه ان انتي اللي اخترتي الخاص وان انتي ادرى بمصلحته ولا يمكن تسويين شي مو زين له
وفهميه ان مو مهم المدرسة المهم ان اهوا يرفع راسج ويدرس وكل هذا حقة
انا قلت حق ولدي انا درست وما فشلت اهلي وتخرجت وتوظفت وعندي عيال وكل هذا سويته بنفسي واذا اهوا بيسوي اي شي راح تكون النتيجة مو لج -له اهوا ومع شوية حنان و تغلي وانه بيتعرف على ناس ثانين واصدقاء اكثر وعطيه امثلة عن اعيال خلاته وعماته الشطار اللي بالحكومة
والله معاج

 

[بحرينيه كيوت]

حبيبتي مشكوووووووره عالنصيحه يالغاليه ..والله قعدت معاه وقلت له شوف بنت خالتك كانت بالحكومه والحين بالهندسه وعمك بعد بالجامعه وانا الحين قاعده اكمل بالجامعه وخلصت من الحكومه اشوي بدا يقتنع .. المشكله اني انا وايد حساسه واخاف عليه وعلى اخوانه حتى من الهوى يعني وايد أحاتيه ..

 

[حيوته]

كلنا نحاتي عيالنا حبيبتي بس هذا مصيرهم لازم نكون حازمين فيه توكلي على الله والله يوفقج يارب ويوفق عيالج

 

[أم وهابي]

ضربتى على الوتر الحساس


انا تونى ناقله عيالى من المجموعه الانكليزيه عقب 8 سنوات عيالى فيها طبعا من سن الحضانه
العود بيروح خامس والثانى ابتدائى ثانيه


شوفى المدارس الخاصه بدون استثناء والله بس خساره فلوس لانه الاغلبيه نظامه تجارى وبتأسسين شى على حساب شى

يعنى بالانكليزى اوكى وباجى المواد خواره

احمد ربى انى وديتهم حكومه اصلا اهم مستناسين وايد

بس شوفى شنو سويت

اتفقت مع مدرس مصرى يدرسهم الكورس الاول كله 3 مرات بالاسبوع 200 دينار

ونفس الكلام راح يصير مع مدرس العلوم والعربى

السالفه بالبدايه راح تصير صعبه بس مهما كان عيالنا صغار ونسيطر عليه


والله سبقتينى ونزلتى الموضوع انا بالى انزله الموضوع لانه وايد حريم انا اعرفهم طلعوا عيالهم

نصيحه اللى تبى تفكر تدخل عيالها خاص عشان تقوى الانكليزى عندهم

تختار بالصيف معهد قوى او تتفق مع مدرس بريطانى او امريكى يدرس عيالها بربع الفلوس اللى راح تتدفعينهم للمدرسه

والله يا جماعه كنت ادفع الالاف واخر شى عيالى كل اسبوع رحله والدرسات غياب طبعا يا ويلناه ان كلمنا المدرسات البريطانيات
حتى الاداره ما تكلمهم

بنات انا قلبى مورم

الله المستعان