منو جربت فيكم السستر في البيت وقت النفاس؟؟؟

[mms]

شلونكم يا كويتيات ؟؟
حبيت أسألكم منو فيكم جربت السستر اللي تييج البيت بعد الولادة وبعد طلعتج من المستشفى ..
حبيت أسأل عن التجربة عموما تسوى ولا لأ ؟؟
جم السعر ؟؟ ومن الساعة جم لي جم تيي ؟؟
وأهم شي الشركة اللي تعاملتي معاها .. يا ريت تفيدونا بأرقامهم عشان نسأل ..
يا ريت اللي مجربة تفيدنا بتجربتها ..
ومشكورين وما قصرتوا ​

 

[poneta]

شوفي حبيبتي هالشيء في له عيوب ومزايا

العيوب:
اذا عندج خدم يمكن يختربون منها
وما يعرفون طريقتنا احنا الكويتيين

المزايا :
تريحج شوي وتقدرين تنامين
وتجابل الياهل طول الوقت

وبالنسبة للسعر غلى حسب الشركة في شركات ياخذون 150 بالشهر وفي 350 يعتمد

بس اذا تبيين رايي ما انصحج وهذا عن تجربة

 

[q8yah]

اول مرة اسمع فيها بس احس مالها داعي الخدم موجودين

 

[الريشة]

سمعت عن وحدة يايبه توأم عشان شذيه يابت الستتر حقهم
بس مادري بكم أو من وين؟؟؟

 

[sHa6o0ra]

بنت عمي يابت جنه اب 300 حق 12 ساعه بالشهر ,, يعني ثنتين اب 600 اربعه وعشرين ساعه يتناوبون

بس حسيت انه مايسوى كلش خاصه انه ياهل واحد

اعرف وحده ثانيه يايبه 3 توائم ويابت السسترات طلعت قيمتهم كانت 24 ساعه طالعه مع ريلها وكاشته بعيالها ولين كبرو
واهيا تييبهم

 

[rainbow_brite]

بيه حس ماله داعي الياهل بالاربعين اغلب وقته نايم وبعدين اذا السستر بتجابله متى ترضعه الام احس ييتها عالفاضي

 

[mms]

خواتي يمكن كلكم تقولون ملاها داعي صح انا معاكم بالظروف العادية والطبيعية حدها مالها داعي بس الواحد تمر عليه ظروف معينة يحتاج فيها مساعدة ..
لو اول 10 أيام من الولادة ..
ولا بقعد اييبها مثل هذي اللي قالت عنها شطورة وبطلع 24 ساعة مع ريلي شفايدتي عيل أم ؟؟؟؟؟؟؟
الواحد اييبهم للضرورة والعازة فقط ..
مشكورين على المرور

 

[slk]

يا بنات الناس لها ضروف انا فى بجرى ولدت قيصريه يعنى كلش ما اقدر اسوى شى ولا اعرف للياهل وامى الله يشفيها مسويه عمليه شايله ورم بصدرها الله يشافيها قولو امين وما عندى احد كلش فوحده دلتنا على شركة العيسى وخوش شركه كله هنودمن 7لل 7 ب10 باليوم والحمدلله خليتها لين صرت اقدر اعتمد على نفسى لان امى كلش ما تقدر بس الله يعين والحمدلله عدت على خير وحتى معاماتهم حلوه وهو صج للمحتاج ليش لا لو عالاقلاول اسبوعين

 

[OM-EL'3ALY]

والله انا يبتها من شركة الاولى والله خوش شركه اب 9 باليوم من 8pmلين 8 am شحليلها هنديه والله انا ماعرف حق اليهاال بس يبتها بالاربعين بعدين انا جابلته الحمدالله...بس ترى اريح وايد

 

[كويتيه وافتخر]

انا جايبه توائم وخدج صغار كلش محد عارف حتى يشيلهم من هلي

فجبت من شركه بروفشنال هنديه من الساعه 8 الين 8 الليل واحيان افكر اخذها اربع وعشرين ساعه بس ودي اجابلهم شويه علشان اتعلم

وسعرها الله يسلمج 280 بالشهر وباستمر عليها لين اشوف عيالي اوزانهم زينه واقدر اشيلهم مثل باجي المواليد لان عيالي 1700 و1800 صغار ينخاف عليهم ابنطر لين يصيرون اربع كيلوات يعني ابي السستر شهرين الى ثلاث شهور وبعدين انا والخدامه كافي بس الحين اعتقد انها انسب

 

[لالوش]

الصراحة انا يبت سستر لمدة شهر وايد وايد ارتحت لان اول الايام الجرح كان عورنى فماكنت قادرة اسوى شى انا انصحج تيبين خصوصا اذا امج مالها خلق مجابل

 

[*دانة الخليج*]

تصلح حق اللي ولادتها قيصريه وماعندها احد يساعدها
خااااااااااصه اول الايام

 

[أم دووودي]

هلا حبوووبه
اناجبت سستراات من شركة العيسى لاني جبت توأم وبقيصريه وكانوا خدج اوزاانهم 1500 ومحد عارف لهم وخليتهم 24 سااعه وكانوا باليوم ياخذون 24 دينااار يعني الساعه بديناار وما كان عندي خداامه ووقفتهم لما صار عمر عياالي 5 شهوووور وكانوا هنووود وخووووش شغل

 

[%ورد طايفي%]

والله انا اشوف اذا بيبي واحد مايحتاج بس التوام يحتاجون اكثر شي
والي جربوهم حيل يمدحونهم خاصه شركة العيسى

 

[fnoora]

انا جبت سستر من شركه الاولى فلبينيه وخوش وحده

اخذها من 8 الصبح لي 8 بليل

ابصراحه ارتحت وايد

وخاصه اني بجر وما اعرف للياهل وامي حبيبتي اتعبت منه لان اول الايام ما كنت جايبتها وخدامتي ما اوصلت
بس ماطولت عندي اقل من شهر

اهي يوميتهم 15 دينار واذا خذيتي اكثر من خمس ايام يصيرون ب 10

 

[قمر الكويت]

انا جبت وحده فليينيه حجزتها قبل الولاده من اول يوم طلعة من المستشفي و اهي عندي بالبيت حيييييل ارتحة
ادري ان طفل الاربعين مايسوي شي بس يبيله حراسه من الي اكبر منه
وانا خذيتها من شركة الوزان ب 300 د.ك بشهر