منو تعرف طريقة لتعطير المنزل

[noora_333]

بنات منو تعرف طريقه حلوه لتعطير المنزل زرت وحده من صديقاتى توها عروس ريحت شقتها جنان سألتها ما اعطتنى جواب اذا تعرفون خلطه حلوه للمنزل قويه وتدوم مدتها 0

 

[هتون القمر]

بالنسبه للحمامات وهى الاصعب انا اضع فى علبه السيفون علبه العملاق الاخضر وبذلك يكو ن الحمام معطر على طول ام البيت منظفات للسراميك برؤئح جميله وثم ابخره بعود اخذه من عبد الصمد قرشى

 

[norema-sarto]

بس البخور بإستمرار مو زين للصدر

 

[noora_333]

اللى انا اقصد اكو خلطه يخلطونها اهم البنات ورشون فيها البيت عجيبه بس نا عرف شلون تكون اللى حسيت انها خلطه اهى مسويتها كلونيا وهم ضايفه لها شغلات وايد

 

[كويتية أصيلة]

نورة في مليون طريقة وطريقة باعطيج اياها وانتي اختاري اللي تبينه :

بس قبل لا تفكرين تعطرين لازم تحاولين تنظفين وتعقمين واذا خلصتي مرحلة التنظيف والتعقيم الحين حاولي تسووين هالجم طريقه معاي :

اول شي عندج مباخر الشمع : تقدرين تحطين كذا واحد في كذا مكان وانتي مو محتاجه الشمعه تتم مده طويلة عشر دقايق كافي عليها وبامكانج تختارين نوع الزيت اللي تبينه ممكن تسوين لكل ركن اجواءه .

2/ عندج بودرة الزل : اذا عندج قطع لان اتوقع الناس الحين كلها سيراميك وباركيه فاذا عندج قطعه حتى لو صغيره استغليها . اشتري البودر بالريحه اللي تعجبج ورشي على الزولية وخليه ساعه ساعتين كيفج انا اخليه يوم كامل اذا كان زوجي مسافر واخليه نهار اذا كان موجود بالديره .. الطريقه هذي تضمن لج ريحه لمده ثلاث اربع ايام بالبيت ( جربي اللافندر ) على مسؤوليتي .

3/ عندج معطر الأرضيات السيراميك يبيعونهم بالجمعيات بس انا اخلطهم بالبيت .. اذا نظفتي الارضيه ومسحتيها بديتول رشي عليها من هذا المعطر انا اخليه ثلاث دقايق بعدين امسحه بفوطه خاصه للعطور.

4/ المرشات المعطره والمشعلات والله ما كثرها في كل مكان تنباع في كل مكان
وراح اعطيج طريقة وحدة من الخلطات اللي انا اسويها

عنبر وعود كل واحد فيهم 10 ملل
مسك اسود او ازرق 5 ملل
ماي ورد 70-90 ملل
بومبيا عطر بو بنت جان عرفتيه ثلاثين ملل

وبالعافية اي شي تبين آنه موجودة

 

[Brounzi_girlly]

حبوبة مثل ماقالت الأخت جربي الفواحات واشتري الزيوت من ترفاليو واااايد رخيصة على ربع دينار
وبعدين في منظفات سيراميك على نكهات
وفي طريقة بعد قاريتها من المنتدى
رشي أي عطر تحبينه من الليل على ليتات والصبح لما تشبين الليت بتفوح الريحة
مع التحية.........

 

[noora_333]

اختى كويتيه اصلية وين احصل هالمجموعه وممكن اضيف عليها كلونيا

عنبر وعود كل واحد فيهم 10 ملل
مسك اسود او ازرق 5 ملل
ماي ورد 70-90 ملل
بومبيا عطر بو بنت جان عرفتيه ثلاثين ملل

 

[كويتية أصيلة]

شوفي الدهن العود والعنبر والمسك وماي الورد تلقينهم عند اي محل عطور شرقية بس لا تاخذين اشياء غالية طبعا لانج بتسوينه رش وعطر بومبيا تلقينه بالجمعية حتى ماي الورد في جمعيات يبيعونه

شوفي خل اقولج شي بدال لا تتعنين :
اذا عندج دهن عود قرب يخلص وما تبينه صبي بنص الغرشه ماي ورد وخضيه عدل تالي صبيه بالغرشه مالت الرش وقطي التوله بكبرها داخل وضيفي عليها اي نوع من العطور اللي تمشي مع التركيبه .. خليها يومين ثلاث تالي ابدي تستعملينها

ملاحظة : الريحه اللي تنتج بعد ما تخلطين الخلطه عادتا مو نفس الريحه اللي تصير بعدها بيومين ثلاث .. وهم اي سؤال لا تترددين

 

[نطوووعه]

مشالله خةش طريقه بس شنو يعني قطي التوله بكبرها داخل؟

 

[مزيونه وشقره]

شوفي الرابط

http://q8yat.net/showthread.php?t=68577


مع تحياتي يا حياتي

مزيونه وشقره​

 

[كويتية أصيلة]

نطوعة يعني غرشه التوله الجزاز بكبرها حطيها داخل البطل مال الرش وخضيه شوي فهمتي علي ؟