مقابلة التدريس لغة انجليزية

[yasmeen_q8]

السلام عليكم خواتي
انا طالبة بكلية الاداب لغة انجليزية
وان شاء الله تخرجي قريب لكن رفيجاتي اللي تخرجوا حبطووني حييل :eh_s(16):
وبنفس الوقت خوفوني
يقولون المقابله حييل صعبه
وما ينجحون احد الا بالواسطة !!؟؟
وخصوصا بعد الكوادر اللي اقروها :eh_s(11):
عفية سيداتي العزيزات
اللي عندها معلومات خلتفيدني شنو نوع المقابله وشنو نوعية الاسئلة
وصج هالحجي
من دشيت .. واملي وامنياتي اصير مدرسة وما بغيت كلية التربية لأني استخرت وضاق صدري فكملت بالاداب
والحين أبي عالاقل ارتاح نفسيا لأني حيل احاتي المقابله وشنو محتواها وشنو اسئلتهم وشنو يبون بالضبط وصج اللي يقولونه ان ماحد ينجح بدون واسطه وان حيل مصعبينها ؟!!:eh_s(2):
والله يفرجها عاللي بترد علي ويحقق امنياتها ويوفقها:yaaaaaarb:

 

[yasmeen_q8]

ليش ماكو رد معقوله كلكم معلمات قدم وما تعرفون اي معلومات ؟!

 

[bobo lover]

لا حبيبتي لا تخافين
انا انقبلت من اول مرة
بس ها ترا اذا بتقدمين شهر 2 صعبة شوي
يقولون لازم واسطة لان التوجيه حاسدنا ناخذ معاش العطلة هههههههه واحنا تونا متوظفين
يبونا نشتغل من شهر 9 لما 7 او 6

عموما الاسئلة سهلة
اول شي عرفي عن نفسج وليش تبين تصيرين مدرسة ويكون لسانج طلق وما تخربطين بالقواعد
يعني اللغة سليمة. وبعدين راجعي كل القواعد مثل الريبورتد سبيج والتاغ كويسجنز ويفضل تراجعين من منهج الثنوي لو عندج مذكرات
وبيسالونج بعد حطي هالكلمة بجملة مثلا او حوليها لصفة وهي فعل وجذي.

ويسالونج عن مميزات المعلم الناجح وباخر المقابلة يطلبون منج تكتبين تعبير عن شي محددينه وانا موضوعي كان عن مميزات المعلم الناجح وهني لازم تكونين عارفة متى تستخدمين الفاصلة والنقطة وعلامات الترقيم.

في موضوع هني بالقسم دوريه عن مقابلة الانجليزي وحدة حاطة الاسئلة المحتملة ولا تحااااتين
ترا اهم شي عندهم الثقة بالنفس

 

[bobo lover]

اي صج بيسالونج شلون بتحضرين؟

قولي من التيجرز قايد اتبع الخطوات واشوف شنو المطلوب واكيد راح اتعلم مع الوقت لان محد ينولد عالم ورئيسة القسم بتخليني احضر دروس واشوف تحضيرات غيري وبجذي اتعلم
هذي اجابتي كانت ههههههههه وضحكت الموجهه