معقولة ماعندي رفيجة الروح بالروح

[احلى ديما]

مرحبا كويتيات شلونكم
بنات بصراحة فجاة ياتني الضيقة صارلي موقف مع.اختي وتضايقت منه حسيت ان ودي اشكي لوحدة تسمعني تخفف.عني قعدت افكر لين استوعبت ان انا ماعندي رفيجة عمر او مثل مايسمونها اخت دنيا عندي رفيجات من الثنوية وعندي رفيجات.بالكلية بس كلهم علاقتي معاهم ماتتعدى الواتس اب والانستاجرام والا الزوارات والطلعات.ماكو وحدة قريبة مني الجأ لها وتلجأ لي اثق فيها وتثق فيني كل اللي حوالييني غاليات علي وكلامي معاهم تقريبا يوميا سوالف وضحك بالواتس اب بس ماعمري طورت علاقتي مع.وحده فيهم وصرنا انتيم مثل مايقولون (
بصراحة ما اخش عليكم هالشي ضايقني حييييل يعني معقولة عمري 25 سنة وماعندي اخت اشد فيها الظهر احبها وتحبني
منو منكم مثلي بنات ؟؟ واذا حسيتو انكم محتاجين احد يسمعكم من حقه تشكون وتسولفون ؟؟

 

[دلوعةمآمآ]

وش لك بالبشر ؟

اهم ماعليك خالق كل هالبشر ,, الله سُبحانه وتعالى ..

فضفضي واشكي له اهو يسممع لك ويعلم مافي صدرك ..

الناااس والله ماتنفع ممكن تسسمع لك شكاويك بس بدوون فايده !!

ومُمكن يسوي نفسه متضايق عليك واهو من داخله فرحان ,وتلاقين نااس ماتكتم السر

اهم ماعليك اشغلي وقتك بالذكر والقراءن رااح تستغنين عن كل شيء

صح الصدييقه مهمه بس صعب جداً تلاقيين صدييق بدوون مصلحه

العلاقه اللي مافيها مصلحه هي علاقات العبد بربه

انا اذا تضايقت وتسكرت الدنيا بوجههي اول ما اهرب من الخلق واروح لخالقهم لأن اهو اللي راح يفرجها علي

انا ماقولك كوني وحيده لكن اعررفي الصديقه المُناسبه بس ماتقولين كل اسرار حياتك لها لأن يوم من الايام راح تنصدمين منها

دائماً قولي اللهُم اسألك الانُس بقُربك ...

 

[Kuwaiti Hope]

حبيبتي فيه وايد بنات مثلج و أنا بصراحة أييد كلام أختي دلوعة ماما مهما كان فيهجوحتى لو كان عندج صديقة قريبة منج لا تقولين كل شيء لأنه مو كل شيء ينقال حق الصديقات وحتى الأسرار.. احتفظي بالشغلات الخاصة فيج حق نفسج أو قولي حق أمج أو وحدة من خواتج بس أنا أفضل رب العالمين ناجي ربج ابكل اللي بخاطرج قولي اللي عندج وانسي وربج ما ينسى أحد... ويقولون لا تقولين عندي هم كبير قولي عندي رب كريم
أنا أمي قريبة مني حيل بس ساعات ما أقولها الشغلات اللي تضايقني لأنه أدري بتتضايق أضعاف ضيقي.
أتمنى أني أكون ساعدتج حبيبتي والله يهون عليج و صدقيني سوي اللي قلتلج عليه وراح تحسين براحة، خلج قريبة من ربج وقولي اللي بخاطرج و رب العالمين بهونها عليج

 

[فخر ابوي]

اب اب اب اب لعيوونج

 

[غصون ق]

انه والله مثلج وبي مثلج
كل صديقاتي عادي بس ما واثقه من احد يعني بس سوالف وضحك بسيطه
بس انه نفسج ودي بوحده اشكي لها وتشكي لي بس مافي كلهم احسهم مصلحه او عادي
انه اقعد ب اليل اتكلم معه ربي احسه صج اهو معاي وفاهمني وادعي له واشكي له عني والي صاير لي بكل يوم احسه انه واقف معاي بس لازم بعد في احد يرد عليج ويحس فيج ويفكر في


يعني بختصار مو بس انتي

 

[Pinky -cat]

فعلا لازم يكون في صديقة تسمعج تسمعينها وتقولين اللي بقلبج لها شعور بالراحة عقب ما تطلعين اللي بداخلج.
بس الخوف من الناس اللي تغدر فيج او تحسد وتغار ويا كثرهم عاد هالنوعية

 

[Pinky -cat]

حبيبتي كلنا هني صديقاتج اذا بغيتي شي كلمينا وفتحي قلبج لنا وكلنا اذان صاغية وعندج اقسام طرحي مشكلتج والكل بيوقف وياج
ويساعدج ويهونون عليج

 

[جيتارا]

إختي العزيزة,,,


تييني فترة احتاج لوحدة تسمع قلبي قبل لساني,, ونادر اللي تلقينهم يسمعون للقلب قبل اللسان,, لو تسأليني كم عرفت من البنات بقولج وااااااااايدات لما كنت أمشي بالجامعه ,, تلقين الكل يسلم علي ويسولف ويضحك وولكن يوم احتاج ما لقيت حد,,


همج وحزنج,, احكي والكل راح يسمعج ثالثهم او رابعهم بكون أكيد اناا من بعد أذن الخوات اللي سبقوني ,,

صدقيني ,, بتلقين بنات يحترمون فكرج وتفكيرج,, وحتى أفكارج اللي تتحرينها يمكن تكون صغيرة تكون افكار تغير من حياة غيرج,,

تدرين يالعزيزة مشكلتنا نفقد الثقه في نفسنا بسبب أقل موقف أو أضعف موضوع يصير لنا,,

خلج قوية وأنا وياج,,


والسموحه منج,,



ج يـــتارا

 

[M!SS.LOBY]

لازم يكون عندج صديقة بالحياة