مظايجه موت ومحتاره شسوي

[جرح الزماني]

السلام عليكم والرحمه الله وبركاته
مرحبا بنات شحالكن عساكن بخير وسهاله ؟؟!! بنات انا من زمان متابعه هالقسم بالذات لني وايد مستفيده من مشاكلكن وطريقه حلها ..!! فقررت اليوم انزل مشكلتي واتمنى القى حل يفيدي وبعيد عن المشاكل ...

بدايتي طولي بعماركن انا تعرفت ع واحد عن طريق النت بالصدفه ومع الايام تعلقت فيه لدرجه ماتخيلونه لانه يمكن اول ريال اعرفه !!! تمينا مع بعض سنين ويا القدر وفرقنا لاسباب انا ماعرفها ليومي هذا .. استمر الفراق اربع سنين ... والحين من شهر الريال رد لي وندمان وعبرلي عن حبه ومشاعره وقالي كلمه * انتي غير عن البنات الي عرفتهن * بصراحه انقهرت توه يعرف هالشي !!! انا والله اعرف انه غلط طريقه التعارف عن النت والله اعرف بس شسوي بس والله هالريال شفته في الحلم قبل ماتعرف عليه وهالشي خلانيه اتمسك فيه اكثر لني وايد اعاني في حياتي والحلم هذا يوم فسرته قالي بدايته عذاب والم وظيج وعقبها راحه وطمانينه بتتغير حياتج
يمكن ماتفهموني بس انا وايد اشوف اشياء عنه قبل ماتعرف عليه اشوف شكله في حلم ويوم تعرفت عليه وشفت صورته انصدمت انه نفس الشخص في الحلم يمكن ماتصدقون بس الله شاهد عليه واتمنى محد يجرحنيه بكلمه بليز بنات انا وايد مظايجه الحينه ريال رد وشاري ويبا يتقدم بس انا ماقمت اثق فيه وايد عذبني ولعوزني ودمرني كيف اثق فيه الحينه واذا وافقت عليه وخذته يمكن يدووسني مره ثانيه ويخليني كيف اوافق عليه الحينه
انا والله احبه وايد واموت فيه واتمناه ... والله اني رديت واااايد عشانه وصابره ... والقلب مايبا غيره :"( الحمدالله ع كل حال بليز بنات انصحووني كيف اثق فيه واصدق كلامه الحينه !!! كيف كيييييييييف !!!! قلبي وايد شايل عليه ومجروح ...

والسموحه ع المغثه ..

اختكم من الامارات ..
دعواتكن :yaaaaaarb:
د

 

[كربون امها]

اللي كاتبه الله يصير استخيري

 

[Tulips]

صلي استخاره
ان كان هالزواج فيه خير لج راح يتم واذا لا الله بيصرفه عنج

 

[سلطانه العتيبي]

اول شي الاستخاره قبل كل شي ........ وبعدين اربع سنين وين كان ؟؟ احس في سر في اختفاءه بس لايكون الرجال اتزوج وخلف ورجع يلعب انتبهي والله يدلك ع الخير

 

[! بــدويه وآآيــد !]

،


اربع سنين مره وحده ! وااااجد
بس دام شاري قولي له طق الباب انا من تركتك تبت اكلم ريال غريب
واذا اهو صج جاد وشاريج ويبيج راح يطق الباب بدون لا يماطل
واذا قعد يماطل ويتحجج بظروف ومادري شنو انا اقول مثل ماتحملتي فراقه 4 سنين تقدرين تحملينه العمــر كله
الله يكتب لج الي فيه الخيـر

 

[Ḩkāyāt]

استخيري ربك حبيبتي
والله يكتب لك اللي فيه الخير والصلاح

 

[الـ ج ــوري]

استخيري يا عمري واثقلي عليه لحد ما يتقدم لج والله يكتب اللي فيه الخير

 

[q8dvd2000]

مثل ما قالوا البنات الخيره ثم الخيره

وغريبه احد يغيييييب 4 سنين ؟ وين كان وين غططط

 

[**تاجر الزين**]

انتي مصدقه

اربع اسنين

وبعدين يمكن الصوره مو صورته

الله يرزقج بواحد احسن منه

صايم مصلي ماعنده هالسوالف

 

[نوني العسل]

انصحك نصيحه اخت لا اختها بعيد عن هذا الزواج لان اللي يبدا بغلط ينتهي بغلط وش لك بعوار الراس احس مرة مو زابطه يختفي ويرجع كان من اول دق الباب واخذك بس عارف انك متعلقه فيه نصيحه اتزوجي زواج بطريقه افضل من كذا بدن تعارف معرفه ومن هالكلام
انا نصيحتي هاي
بس كل حاجه راجعه لك

 

[نوني العسل]

ونسييت اقلك استخيري بكل امر يواجهك والله يفرج عنك وييسر لك ويسعدك

 

[amami al-kuwai]

مثل ماقالو الخواتي

مالج الا الاستخاره

 

[Al-RoRo77]

وعليكم السلام ورحمة الله وبركاته
الاستخاره قبل كل شي
وخليه يتقدملج اذا صج شاريج واذا عنده او طلع عذر قوليله ماراح تكلمينه بس اذا يبي يتقدملج حياه الله
ودامج صبرتي هالمده لا ترديله غير اذا تقدملج علشان لا سمح الله لا تتكرر نفس السالفه اتعلقين فيه
وتتعودين عليه بعدين يتركج
الله يوفجج يارب

 

[أعشقني]

لاتمشين ورا عواطفج واحلامج , الطريق الي بدايته من الشيطان شلون ربي بيبارك لج فيه ؟
خليج ماشيه في طريق ربج وهو ان شاءاالله بينور دربج عليج بقيام الليل والاستخار وكثرة الاستغفار
اذا هو نصيبج بتاخذينه واذا لا الخيره فيما اختاره الله

 

[-فلانة-]

4 سنين!!
راح لعب و دار و لف الدنيا و يمكن تزوج و خلف عيال بعد!!
وراجع بعد هالوقت يبي قربج!!
انا أقول إشتري كرامتج وعزة نفسج حبيبتي..
كفاية الوقت اللي ضيعتيه عليه!!
​

 

[هُدوء]

انآ آقول آستخيري ،
وآلخيره ةة فيممآ اختآره آلله ةة ..
وآلله ةة يوفجج !



,

 

[*E.B.D.A.3*]

لا يمكن الحكم على الانسان من غلطه
كلنا نغلط وكلنا نتوب .. ومافيها شي اذا الواحد اعترف بغلطته
هذا بس ردا على الي يقولون كان يلعب وخري عنه !!

عموما حبيبتي
الزواج عملية تقدرين تتنبئين بنجاحها من عدمه من خلال عده عوامل تكون متوفرة جدامج تحددلج نسبة النجاح.

شي لازم تعرفينه :
العواطف مو كل شي .. والعواطف مصير قسوة الايام تدفنها!
وكل زواج ينبني على عاطفه محظة، ينهدم!
لان الزواج مو بس رباط عاطفي او بمعنى اخر اهوه مو" قبة الهرم العاطفي بين شخصين" !
الزواج يمكن ناخذه كمقوي للرابط العاطفي ايي .. سند اساسي للمشاعر ايي ،
لكن مو على اساسه انا ابني زواج ،، لا !!

بعطيج عوامل لازم تتوفر فيكم الاثنين حتى تقدرون تمشون بزواجكم :
اتفاق عقلي بينج وبينه ،، يعني ماكو Gap فكري بينكم .، او فجوة فكرية
يعني مستويات تفكريكم تكون متقاربة ، نظرتكم للاشياء تكون متقاربة ..
توجهاتكم الدينية السياسية الاجتماعية، تكون ايضا متقاربة ... يعني مو انتي مطوعه واهوه صايع
والا اهوه اجتماعي وانتي لا .. ولا اهوه علماني وانتي سلفية
مو انتي من النوع الي يحب يطلع واهوه من النوع الرافض لطلعه البنت
مو انتي منقبه واهوه يبيج سفور ..
مو ان عندج سيارة واهوه مايبيج تسوقين ..

هالامور على قد ماهيه صغيره ... لكن تراكمها وكثرتها راح تسبب انفصال تام بينكم الاثنين
بتوصلون مرحله ان ماكو شي يجمعكم !!

دوري نقاط الالتقاء ونقاط الاختلاف ..
شوفي جم نسبة التقائكم و اختلافكم ..
وحزتها راح تقدرين تكونين تصور مبدئي عن حياتكم الزوجية بالمستقبل

لكن اختي ، اذا لقيتي ان ماكو شي يجمعكم غير العاطفة
فلا تفكرين نهائيا تتزوجينه ، حطي اكس كبير علييييييييييييييييه
انسيه بالمره ... هذا مراح ينفع حتى كحبيب ماينفع !!

 

[Gatwa DaloO3a]

انا برد عليك لانك كسرتي خاطري والله


اول شي :

الحب اللي انتي عايشه فيييه وكيف انتي متعلقه فيه هذا كله لانه اول انسان عرفتيه وفتحتي عينك عليه ومافيه غيره اصلا !! .... ثاني شي لانك ( تعودتي ) وجوده فقط لا غيير ..


وبخصوص الحلم ، انتي مستعده تدمرين حياتك بسبب شي شفتيه بمنامك !!

لاتصيرين عاطفيه ! ... خليك قويه ... خلي عزة نفسك فوق كل شي !......مافي شي اسمه ما اقدر

ولا فيه شي اسمه ما اقدر اعيش من غيره .. تقدرينننن .. وعلى قولت فوزيه الدريع مافي احد يموت من الفراق ........

الحب الحين معمييك ، بكره بس تفتحين عينك راح تستوعبين انك غلطااانه ..

وش الشي اللي يخليك تتمسكين فيه وتتعلقين ؟؟ ....... من داخلك انتي عارفه انه مافيه زود ، لا ويمكن يكون ما يستاهلك .. بس عاطفتك زينته لك بعينك ..

هذا اللي اانا اشوفه

 

[ليه الجفآ]

نصيحه خليه يولي

هذا لو فيه خير لج ماتركج كل هلفتره

والله رده عشان تردينه وتنتقمين لجرحج وعلى فكره راح يدوسج دوس لارديتي له

وجذاب اذا قال يحبج مهما كانت اسباب غيابه لان الفتره مو شوي

خليه يولي​

 

[dandrma]

انا اقول خليه يتقدملج واستخيري ربج