مطعم نارنج بالكويت
مطعم نارنج السوري الموجود في أخر شارع الخليج بمجمع أولمبيا مقابل المركز العلمي ،، موقع المطعم ممتاز و القعده تحسسك كأنك موجود في جبال سوريا و لبنان
وهذي القعدات الي برا والجو روووعه والقعده عجييييبه
طلبنا عدد من الأطباق منها :
فطاير السبانخ واااايد لذيذه درجة الحموضه صح و عجينه خفيفه، العرايس بالجبن بعد حلوه و الكبه فعلا الكبة السورية الأصلية
بس انا ما حبيت بطاط بالثوم جنه ماش بتاتو بس بارد
كباب بالكرز وايد لذيذ عجبني اكثر من مطعم المياس
و بعدها ما خلصنا اكلنا قدمولنا طبق الفواكه و الحلويات ضيافه من المطعم
المطعم حلو خصوصا حق الطلعات العائلية و يستحق زيارة ثانية
وإسم نارنج معناه شجره معمره أوراقها خضراء غامقه وريحتها عكره وفيها ثمره لونها برتقالي محمر وطعما حامض مثل الليمون.
